ཉེ་ཆར། རང་སྐྱོང་ལྗོངས་ཡུལ་སྐོར་འཕེལ་རྒྱས་ཐིང་གིས་གཙོ་གཉེར་བྱས་པའི་རང་སྐྱོང་ལྗོངས་རིམ་པའི་ལུས་གསོ་དང་ལྗང་མདོག་ཡུལ་སྐོར་གྱི་དཔེ་སྟོན་རྟེན་གཞིར་ཚོད་ལྟའི་སྒོ་བྱང་སྤྲོད་པའི་མཛད་སྒོ་དང་གྲོང་གསེབ་ཀྱི་ཡུལ་སྐོར་ཁྱབ་གདལ་གཏོང་བའི་བྱེད་སྒོ་སྟག་གདོང་གྲོང་ཚོར་སྤེལ་བ་རེད།
ལྷ་སའི“གྲོང་གསེབ་མཛེས་ཤོས”སྟག་གདོང་གྲོང་ཚོ་ཕུད་ད་རེས་སྒོ་བྱང་སྤྲད་པའི་རྟེན་གཞིའི་གྲས་སུ་ད་དུང་ས་འོག་ཚ་ནུས་ཐོན་ཁུངས་འབེལ་བའི་ཡངས་པ་ཅན་མཐིང་མདོག་ཞིང་ཁམས་ཡུལ་སྐོར་ཁུལ་དང་། མཉམ་འབྲེལ་རྒྱལ་ཚོགས་སློབ་ཚན་རིག་གསུམ་རྩ་འཛུགས་ཀྱིས་དཔྱད་འདེམས་བྱས་རྗེས《མིའི་རིགས་ཀྱི་མངོན་མིན་རིག་གནས་ཤུལ་བཞག་གི་འཐུས་ཚབ་མིང་གཞུང》ནང་ཚུད་པའི་བདུད་རྩིའི་ཆུ་མིག་གི་སྨན་ལུམས། ཆ་ཚང་ཞིང་ཕྱོགས་བསྡུས་ཀྱི་རང་བྱུང་སྣོད་བཅུད་མ་ལག་ལྡན་པའི་མེ་ཏོག་གི་སྣོད་བཅུད་ཡུལ་སྐོར་ཁུལ། “རང་བྱུང་གསོ་རླུང་གི་ཞིང་ཁམས”དང“སྐྱེ་དངོས་ཀྱི་གཞི་གྱིན་མཛོད”ཅེས་པའི་མཚན་སྙན་གྲགས་ལྡན་པའི་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུ་བཅས་དང་དེ་བཞིན་རི་ཆུས་བསྐོར་ཞིང་ཚང་ཚིང་ནགས་ཚལ་སྟུག་པོའི་སྤོ་བོ་སྒང་གི་ཐང་ཤིང་ནགས་ཚལ་ཡུལ་སྐོར་ཁུལ་བཅས་ཚུད་ཡོད་པ་རེད།
ཤེས་རྟོགས་བྱུང་བར་གཞིགས་ན། རང་ལྗོངས་ཀྱི་སྣོད་བཅུད་དང་ལུས་གསོའི་ཐོན་ཁུངས་ཅུང་འབེལ་པོ་ཡོད་པ་རེད། ཟླ་5པའི་ཟླ་སྟོད་དུ་རྒྱལ་ཡོངས་ཀྱི་ཁྱབ་ཁོངས་སུ་རང་ལྗོངས་ཀྱིས་སྔོན་ལ་རང་སྐྱོང་ལྗོངས་རིམ་པའི་ལུས་གསོ་དང་ལྗང་མདོག་ཡུལ་སྐོར་གྱི་དཔེ་སྟོན་རྟེན་གཞི་ཁག་དང་པོ་གཏོད་པའི་ཚོད་ལྟའི་ལས་དོན་སྤེལ་ནས་རྟེན་གཞི་གཅིག་གཏོད་པ་དང་ཁྱད་ཆོས་གཅིག་མངོན་འགྱུར་ཡོང་བ་བྱ་རྒྱུ་དམིགས་ཡུལ་དུ་བཟུང་བ་དང་ལས་རྣམ་གསར་པ་དང་ཆེད་དོན་ཡུལ་སྐོར་འཕེལ་རྒྱས་ལ་བརྟེན་ཏེ་སྲོལ་རྒྱུན་གྱི་ལྟ་སྐོར་ཡུལ་སྐོར་ནས་ཉམས་ལེན་རྣམ་པའི་ཡུལ་སྐོར་ལ་རིམ་སྤོར་བྱ་རྒྱུར་སྐུལ་འདེད་བཏང་སྟེ་བོད་ཀྱི་ཡུལ་སྐོར་ཐོན་རྫས་མཁོ་སྤྲོད་དང་གཅིག་མཐུན་རང་བཞིན་འཕེལ་རྒྱས་ཀྱི་གནད་དོན་ཐག་གཅོད་བྱས་ཡོད།