ལྷ་ས་གྲོང་ཁུལ་དུ་གནས་པའི་ཕུན་ཚོགས་ཁང་བཟང་ལྗོངས་གཟིགས་མགྲོན་ཁང་གི་ཁང་པ་མང་ཆེ་བ་ནས་ཕོ་བྲང་པོ་ཏ་ལ་མཇལ་ཐུབ་ཀྱི་ཡོད་པས་མིང་དོན་མཚུངས་པའི“དྲ་ཐོག་གི་གྲགས་ཅན་ལྗོངས་གཟིགས་གནས”ཤིག་ཡིན། ཡུལ་བབ་ཡག་པ་དང་ཁོར་ཡུག་ལེགས་པའི་དབང་གིས་མགྲོན་ཁང་དེ་ནས་ཁང་པ་གཅིག་མངག་པར་དཀའ་ལས་ཧ་ཅང་ཁག་པོ་ཡོད། འདི་ལོའི་ཟླ་6པར་མགྲོན་ཁང་གི་ཚོང་གཉེར་ཡོང་འབབ་ན་ནིང་གི་དུས་མཚུངས་ཆུ་ཚད་ལ་སླེབས་ནས་རིམས་ནད་ཀྱི་ཤུགས་རྐྱེན་སྤྱིའི་ཆ་ནས་ཕོག་མེད།

ཕུན་ཚོགས་ཁང་བཟང་ལྗོངས་གཟིགས་མགྲོན་ཁང་གི་གནས་བབ་ནི་བོད་ཀྱི་ཡུལ་སྐོར་ལས་རིགས་རིམ་གྱིས་ལེགས་སུ་འགྲོ་བའི་བསྡུས་རིས་ཤིག་ཡིན། རིམས་ནད་ཀྱི་རྐྱེན་པས་ཕོག་པའི་ཤུགས་རྐྱེན་ཞི་ལྷོད་དུ་གཏོང་ཆེད། བོད་ཀྱིས་བྱེད་ཐབས་མང་པོ་སྤྱད་ནས་ཡུལ་སྐོར་ཁེ་ལས་དཀའ་གནད་ལས་སྒྲོལ་རོགས་བྱས་ཏེ་ཡུལ་སྐོར་ཐོན་ལས་བརྟན་པོའི་ངང་སླར་གསོ་འགྲོ་རྒྱུར་སྐུལ་འདེད་ཧུར་ཐག་བཏང་ཡོད།

མཛེས་ལྗོངས་ཁུལ་ཁག་རིམ་གྱིས་སྒོ་ཕྱེ་བ། ཟླ་3པ་ནས་བཟུང་བོད་ཀྱིས་འཛུལ་ཆོག་པའི་རང་བྱུང་རིགས་ཀྱི་མཛེས་ལྗོངས་ཁུལ་300ལྷག་ཙམ་གོ་རིམ་ལྡན་པའི་ངང་སྒོ་ཕྱེ་བའི་ནང་Aརིམ་པའི་ཡུལ་སྐོར་མཛེས་ལྗོངས་ཁུལ་35ཡོད། སྒོ་ཕྱེ་བའི་མཛེས་ལྗོངས་ཁུལ་ཚང་མར“མི་གྲངས་ཚད་བཀག་དང་། སྔོན་མངག འཚང་གཡོལ”བཅས་ཀྱི་བྱེད་ཐབས་སྤྱད་ནས་རིག་གནས་ཡུལ་སྐོར་པུས་གཏན་འབེབས་བྱས་པའི་ཚད་གཞི་མཛེས་ལྗོངས་ཁུལ་གྱི་ཡུལ་སྐོར་སྣེ་ལེན་མི་གྲངས་ལག་བསྟར་ནན་པོ་བྱས་ཡོད།

དྲ་ཐོག་ཁྱབ་གདལ་བྱེད་སྒོ་སྤེལ་བ། “ལྔ་གཅིག”རིང་ཀྲུང་གོ་བོད་ལྗོངས་ཡུལ་སྐོར་གཞུང་ཕྱོགས་ཁྱུག་དབྱིངས་ཨང་རྟགས་ཐོག་བོད་ཀྱི་མཛེས་ལྗོངས་ཁུལ་གནམ་མཚོ་དང་ཡར་འབྲོག་གཡུ་མཚོ་གཉིས་ཐད་གཏོང་ཆུ་ཚོད་5ལྷག་ཙམ་བྱས་པ་རེད། ཟླ་6ཚེས་27ཉིན“ཡུལ་སྐོར་ཟིན་ཐོ”ཞེས་པ་བརྗོད་དོན་གཙོ་བོར་བྱེད་པའི་ཕོ་བྲང་པོ་ཏ་ལའི་ཐད་གཏོང་བྱེད་སྒོ་བདེ་བླག་ངང་སྤེལ་ནས་ཐད་གཏོང་དུས་ཡུན་ཆུ་ཚོད་2.5ཟིན་པ་དང་ལྟད་མོ་བ་མི་ཐེངས་ཁྲི་44.5ཟིན་ཡོད།

བྱེད་ཐབས་ཁག་ལ་གྲུབ་འབྲས་ཐོབ་ནས་བོད་ཀྱི་ཡུལ་སྐོར་སྣེ་ལེན་མི་གྲངས་རིམ་གྱིས་མང་དུ་ཕྱིན་པ། བོད་རང་སྐྱོང་ལྗོངས་ཡུལ་སྐོར་འཕེལ་རྒྱས་ཐིང་གི་གྲངས་གཞི་ལས་མངོན་དོན། འདི་ལོའི་ཟླ་5པར་ལྗོངས་ཡོངས་ཀྱི་ཡུལ་སྐོར་སྣེ་ལེན་མི་གྲངས་ཟླ་བསྡུར་ལས་204.4%འཕར་བ་དང་། ཟླ་6པར་ཟླ་བསྡུར་ལས་75.3%འཕར་བ། དུས་ཚིགས་གཉིས་པའི་ཡུལ་སྐོར་མི་གྲངས་ཟླ་བསྡུར་ལས་1462.3%འཕར་བ་བཅས་རེད།

“བོད་ཀྱི་ཡུལ་སྐོར་ཐོན་རྫས་ཕྱོགས་སྒྱུར་རིམ་སྤོར་སོགས་ཀྱི་བྱེད་ཐབས་ལ་སྐུལ་འདེད་ཤུགས་ཆེན་བཏང་བ་བརྒྱུད། རིམས་ནད་སྔོན་འགོག་དང་ཚོད་འཛིན་ཐུབ་པའི་སྔོན་འགྲོའི་ཆ་རྐྱེན་འོག་བོད་ཀྱི་ཡུལ་སྐོར་ལས་རིགས་བརྟན་པོའི་ངང་སླར་གསོ་འགྲོ་བཞིན་ཡོད”ཅེས་བོད་རང་སྐྱོང་ལྗོངས་ཡུལ་སྐོར་འཕེལ་རྒྱས་ཐིང་གི་ཐིང་ཀྲང་ཝང་སུང་ཕིང་གིས་བཤད།