འདི་ནི་ཤན་རྩ་རྫོང་གི་རི་སྐྱེས་སྲོག་ཆགས་སྲུང་སྐྱོང་བ་མཐར་ཕྱིན་དང་ཁོང་གི་ལས་རོགས་ཀྱིས་མཚོ་སྔོན་མོའི་འདབ་ཆགས་གླིང་ཕྲན་དུ་ལྟ་ཞིབ་ཚད་ལེན་བྱེད་བཞིན་པ།

ཉེ་དུས་གནམ་གཤིས་ཡག་པོ་བསྟན་པ་དང་ཆབས་ཅིག ང་ཚོ་སེར་ལིང་མཚོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་ཡོང་ནས་ནག་ཆུ་གྲོང་ཁྱེར་ཤན་རྩ་རྫོང་གཞུང་སྨད་གྲོང་རྡལ་དང་མར་ཡོ་ཤང་ཁོངས་སུ་ཡོད་པའི་མཚོ་སྔོན་མོར་ལྟ་བར་བསྐྱོད་པ་ཡིན།

དྭངས་གཙང་མཚོ་མོ། བྱ་རིགས་ཀྱི་ཞིང་ཁམས།

འབྲེལ་ཡོད་དཔྱད་གཞིའི་ཡིག་རིགས་ལས་མངོན་པར། སེར་ལིང་མཚོའི་སྲུང་སྐར་མཚོ་23གྱི་གྲས་ཤིག་ཡིན་པའི་མཚོ་སྔོན་མོ་ནི་སྐམ་སའི་དབུས་ཁུལ་གྱི་ཅུང་བ་ཚྭ་ཅན་དང་། མཚོ་ངོས་ཀྱི་ས་བབ་མཐོ་ཚད་སྨི་5462ཟིན་པ། ཆུའི་རྒྱ་ཁྱོན་སྟོང་སྨི་ངོས་གྲུ་8985བཅས་ཟིན་པའི་མཚོ་ཞིག་རེད་ལ་འདབ་ཆགས་སྣ་ཁ་འཛོམས་པ་ལས་སྐད་གྲགས་ཆོད་པའི་འཛམ་གླིང་ཐོག་གི་ས་བབ་མཐོ་ཤོས་ཀྱི་འདབ་ཆགས་གླིང་ཕྲན་གྱི་གྲས་ཤིག་ཀྱང་རེད། མཚོ་སྔོན་མོར་གླིང་ཕྲན་ཆེ་ཆུང་མི་འདྲ་བ་བདུན་ཡོད་པའི་ཐོག་སོ་བྱ་དང་། ངང་སེར། གངས་བྱིའུ། ཕོ་རོག་ལ་སོགས་བགྲང་ལས་འདས་པ་ཡོད།

མཚོ་སྔོན་མོར་འབྱོར་ནས་རྒྱང་ལྟ་བྱེད་སྐབས་རྨི་ལམ་ནང་གི་ཡུལ་ངོ་མཚར་ཅན་ཞིག་ཏུ་སླེབས་པ་ལྟ་བུའི་ཚོར་སྣང་སྟེར། མཚོ་སྔོན་མོ་ཤིན་ཏུ་དྭངས་ལ་སྔོ་ཞིང་། མཚོ་ངོགས་ཀྱི་ཆུ་གཏིང་རིང་པོ་མེད་པའི་ཁར། དྭངས་ཤིང་གཙང་བས་མཚོ་གཏིང་དུ་གང་ཡོད་པ་ཚང་མ་མིག་ལམ་དུ་འཆར་འོང་། མཚོ་སྔོན་མོ་དང་བསྡུར་ན་གླིང་ཕྲན་དག་སྐྱ་ཐེར་ཐེར་ཡིན་མོད། འོན་ཏེ་གླིང་ཕྲན་འགའ་ཞིག་ཐོག་རྩྭ་རྩི་སྣ་འཛོམས་པར་བརྟེན་འདབ་ཆགས་འདྲ་མིན་སྣ་ཚོགས་འཁོར།

ཤན་རྩ་རྫོང་། ནག་ཆུའི་ནུབ་རྒྱུད་ཀྱི་སྣོད་བཅུད་དཔེ་སྟོན།

མཚོ་སྔོན་མོ་དེ་ལྟ་བུའི་དྭངས་ཤིང་གཙང་བ་ནི་ཏང་དང་སྲིད་གཞུང་གིས་བྱེད་ཐབས་ནུས་ལྡན་སྤྱད་པ་ལས་བྱུང་བ་ཞིག་རེད། ཉེ་བའི་ལོ་ཤས་རིང་། ཤན་རྩ་རྫོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་གནང་བའི“སྔོ་ཞིང་དྭངས་བའི་རི་ཆུ་གསེར་རི་དངུལ་རི་ཡིན”ཞེས་པའི་སྣོད་བཅུད་འཕེལ་རྒྱས་འདུ་ཤེས་ལག་ལེན་ཧུར་ཐག་བཏང་ཞིང་། “སྲུང་སྐྱོང་ཨང་དང་པོ་དང་འཕེལ་རྒྱས་ལ་སྐུལ་འདེད”ཀྱི་རྩ་དོན་གཞིར་བཟུང་། འདམ་ར་སྲུང་སྐྱོང་གི་ལས་དོན་དེ་རྫོང་ཡོངས་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་ལས་དོན་གཙོ་བོའི་གྲས་སུ་བཅུག་ནས་དམ་འཛིན་བྱས་པའི་ཁར། བྱེད་ཐབས་ནུས་ལྡན་སྤྱད་པ་དང་བཀོད་སྒྲིག་ཞིབ་ཚགས་བྱས་ཏེ། འདམ་ར་སྲུང་སྐྱོང་ལས་དོན་ལ་བརྟན་པོའི་ངང་སྐུལ་འདེད་བཏང་བས་འདམ་ར་ཁྱོན་ཡོངས་ནས་སྲུང་སྐྱོང་ཡག་པོ་བྱུང་བ་དང་འདམ་ར་ཁག་གཅིག་གི་གཞི་རྒྱ་ཆེ་རུ་འགྲོ་བའི་གྲུབ་འབྲས་ཡག་པོ་ཐོབ།

དུས་མཚུངས་སུ་ཤན་རྩ་རྫོང་གིས《ནག་ཆུ་གྲོང་ཁྱེར་གྱི་འདམ་ར་སྲུང་སྐྱོང་སླར་གསོའི་ལམ་ལུགས་ལག་བསྟར་ཇུས་གཞི》ལག་ལེན་ཧུར་ཐག་བསྟར་ཞིང་། བོད་རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཐིང་གི《ནགས་ཚལ་དང་འདམ་རའི་ཐོན་ཁུངས་སྲུང་སྐྱོང་དང་འཕེལ་རྒྱས་གཏོང་བའི་དམིགས་ཚད་འགན་འཁྲིའི་ལམ་ལུགས་བཟོ་རྒྱུའི་སྐོར་གྱི་བརྡ་ཐོ》སོགས་ཡིག་ཆའི་དགོངས་དོན་གཞིར་བཟུང་། ཐེངས་གཅིག་ལ་འདམ་ར་སྲུང་སྐྱོང་བ་572བསྡུས་པ་དང་འབྲེལ། དམིགས་ཚད་འགན་འཁྲིའི་ཡི་གེའང་བཞག་ནས་འདམ་ར་སྲུང་སྐྱོང་དང་སླར་གསོའི་རྣམ་གྲངས་ལག་བསྟར་ཤུགས་ཆེན་བྱས་པ་མ་ཟད། ད་དུང་རིམ་ཁག་ནགས་ལས་སྡེ་ཚན་ལ་ཁྲིམས་འཛིན་ནན་པོ་དང་ཁྲིམས་ལྟར་སྲིད་འཛིན་བྱས་ཏེ། འདམ་ར་གཏོར་བཤིག་གཏོང་བ་དང་རི་སྐྱེས་སྲོག་ཆགས་བཟུང་གསོད་བྱེད་པའི་ཁྲིམས་འགལ་ཉེས་གསོག་གི་བྱེད་སྤྱོད་སྣ་ཚོགས་ལ་རྡུང་རྡེག་ཚ་ནན་གཏོང་དགོས་པའི་བླང་བྱའང་བཏོན་ཡོད།

མིག་སྔར་མཚོ་སྔོན་མོའི་འདམ་རར་འདབ་ཆགས་སྣ་ཚོགས་ཁྲི་བཅུ་གྲངས་ཡོད་པ་མ་ཟད། ད་དུང་གཙོད་དང་གསའ་ལ་སོགས་ཀྱང་ཡོད་ཅིང་། དེ་དག་གིས་མཉམ་དུ་མཚོ་སྔོན་མོའི་སྣོད་བཅུད་སྲུང་བཞིན་མཆིས། ས་གནས་དེ་གའི་མི་སེར་གྱིས་སྤོབས་པ་ཆེན་པོས་ང་ཚོའི་གནས་འདིར་མཚོ་ཆེ་ཆུང་མང་པོ་ཡོད་པའི་ཁར། གནམ་ལ་འཕུར་མཁན་དང་། ས་ལ་རྒྱུག་མཁན། ཆུ་ནང་དུ་འཛུལ་མཁན་སོགས་ཀྱང་ཚང་མ་ཡོད་ཅེས་ཤོད་ཀྱི་འདུག

རི་སྐྱེས་སྲོག་ཆགས་སྲུང་སྐྱོང་བ་མཐར་ཕྱིན། ཇི་སྲིད་བར་སྲུང་སྐྱོང་བྱེད་ཀྱི་ཡིན།

ཤན་རྩ་རྫོང་དུ་མཐར་ཕྱིན་འདྲ་བའི་རི་སྐྱེས་སྲོག་ཆགས་སྲུང་སྐྱོང་བ་ཁྱོན་42ཡོད་ཅིང་། སྦག་སྦག་གཅིག་དང་། རྒྱང་ཤེལ་གཅིག རྩམ་ཁུག་གཅིག ཐོ་དེབ་གཅིག་བཅས་ནི་ཁོང་ཚོའི་ཁུར་རྡོག་ཆས་རེད།

ང་ཚོས་མཐར་ཕྱིན་ས་ནས་མིག་སྔར་གཅོད་ཕྲུག་བཙའ་བའི་དུས་ཚིཌ་ཡིན་པས། རི་སྐྱེས་སྲོག་ཆགས་སྲུང་སྐྱོང་བར་ལས་ཀ་མང་པོ་ཡོད་པ་ཤེས་རྟོགས་བྱུང་། “ཉིན་རེའི་ལས་ཀ་ནི་སྐོར་གཡེང་དང་ལྟ་ཞིབ་ཚད་ལེན་བྱ་རྒྱུ་དེ་ཡིན། ཉིན་ལྟར་ཞོགས་པ་ཁྱིམ་ནས་ཐོན་རྗེས་ཆུ་ཚོད་6ནས་8བར་སྐོར་གཡེང་བྱས་པར་ལམ་ཐག་སྤྱི་ལེ་300ལྷག་ཙམ་ཟིན་པ་དང་དགོང་མོ་མ་གཏོགས་ཁྱིམ་ལ་འབྱོར་གྱི་མི་འདུག”ཅེས་མཐར་ཕྱིན་གྱིས་བཤད།

ཁྲུང་ཁྲུང་དང་། གཙོད། གསའ། རྐྱང་སོགས་རི་སྐྱེས་སྲོག་ཆགས་ཆགས་སའི་གནས་འདིར་བཟུང་གསོད་དང་། བྱ་རིགས་ཀྱི་ཆམ་རིམས། འདམ་ར་གཏོར་བཤིག་སོགས་སྔོན་དཔག་མི་ཐུབ་པའི་ཉེན་ཁ་མང་པོ་ཡོད། གནས་ཚུལ་དེ་རིགས་ཐོན་སྐབས་རི་སྐྱེས་སྲོག་ཆགས་སྲུང་སྐྱོང་པའི་ལས་ཀ་ལྷག་པར་དུ་གལ་ཆེན་པོ་ཞིག་རེད།

རྒྱལ་ཁབ་ཀྱི་རོགས་སྐྱོར་ཤུགས་ཆེན་འོག སེར་ལིང་མཚོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་ནས་དོ་དམ་མ་ལག་ཅིག་རིམ་བཞིན་ཆགས་པ་སྟེ། ཕྱོགས་གཅིག་ནས་སྐོར་གཡེང་སྲུང་སྐྱོང་དཔུང་ཁག་བཙུགས་ཏེ་ཆེད་ལས་དོ་དམ་སྲུང་སྐྱོང་མི་སྣ་བཀོད་སྒྲིག་བྱས་པ་དང་། ཕྱོགས་གཞན་ཞིག་ནས་དྲིལ་བསྒྲགས་བྱེད་ཤུགས་ཆེ་རུ་བཏང་བས། ཞིང་འབྲོག་མང་ཚོགས་ཀྱི་སྣོད་བཅུད་སྲུང་སྐྱོང་གི་འདུ་ཤེས་ཟབ་ཏུ་སོང་ཡོད། གཞན་ཡང་ཕྱུགས་བཀག་རྩྭ་གསོ་དང་། རྩྭ་ཐང་ལྟ་ཞིབ། འདམ་ར་གལ་ཆེན་གྱི་སྣོད་བཅུད་ཕན་འབྲས་ཁ་གསབ་སོགས་ཀྱི་བྱེད་ཐབས་སྔར་བས་ལག་ལེན་བསྟར་བ་ལས་འདམ་ར་དང་རི་སྐྱེས་སྲོག་ཆགས་ལ་སྲུང་སྐྱོང་ཐུབ་ལ། མང་ཚོགས་ཀྱི་ཡོང་འབབ་མང་དུའང་ཕྱིན་ཡོད།

ཡུལ་དེ་ནས་ཁ་གྱེས་མཚམས་སུ་མཐར་ཕྱིན་གྱིས་ང་ཚོར“འདམ་ར་དང་། མཚོ་མོ། གཙང་པོ་སོགས་ནི་ང་ཚོས་མི་རབས་ཕྱི་མར་བཞག་པའི་རྒྱུ་ནོར་ཡིན། དེར་སྲུང་སྐྱོང་བྱ་རྒྱུ་ནི་ང་ཚོའི་ཇི་སྲིད་བར་གྱི་ལས་འགན་ཡིན”ཞེས་བརྗོད་བྱུང་། སྐད་ཆ་དེ་ལས་ང་ཚོར་དད་གུས་དབང་མེད་དུ་སྐྱེས་བྱུང་། བོད་བྱང་ཐང་དུ་ཆར་རླུང་ཁྲོད་དུ་བཟའ་འཐུང་བྱེད་མཁན་དང་། ལ་བརྒྱབ་ཆུ་བརྒལ་བྱེད་མཁན། སྒེར་སེམས་མེད་པར་ལེགས་སྐྱེས་འབུལ་མཁན་བཅས་ཀྱི་མི་མང་པོ་ཞིག་ཡོད་པ་དག་ང་ཚོས་དུས་ནམ་ཡང་བརྗེད་མི་རུང་།