འདི་ནི་ཀ་གནམ་མཚེའུའི་འགྲམ་དུ་རྟ་རྩྭ་ཆུར་རོལ་བཞིན་པ།

ཀ་གནམ་གྲོང་ཚོ་ནི་སྤོ་བོ་རྫོང་གི་ནུབ་བྱང་དུ་གནས་པ་དང་། དེ་ནི་རྒུ་ཤང་ཁོངས་གཏོགས་ཡིན། རྫོང་གྲོང་དང་བར་ཐག་སྤྱི་ལེ་17ཙམ་དང་ཆ་སྙོམས་ས་བབ་མཐོ་ཚད་ལ་སྨི་2700ཡོད། མཛེས་ལྗོངས་ལྟ་ན་སྡུག་པའི་རྒྱལ་ལམ་318རྒྱུད་དང་འཛམ་གླིང་གི་ཁམ་བུའི་མེ་ཏོག་རོང་ཆེ་ཤོས་ཏེ་སྤོ་བོ་རྫོང་ཁམ་བུའི་མེ་ཏོག་རོང་གི་རོང་མདོ་དེ་གར་གནས་པ་དང་། སྙན་གྲཌ་ཆེ་བའི་ཀ་གནམ་རྒྱལ་རབས་ཀྱི་རྗེས་ཤུལ་ཀྱང་ཀ་གནམ་གྲོང་ཚོར་གནས་ཡོད། 2010ལོའི་ཟླ་10པར། རྒྱལ་ཁབ་སྣོད་བཅུད་རིག་གནས་མཐུན་ཚོཌ་ཀྱིས་ཀ་གནམ་གྲོང་ཚོ“རྒྱལ་ཡོངས་ཀྱི་སྣོད་བཅུད་རིག་གནས་གྲོང་ཚོར”བདམས་པ་དང་། 2013ལོའི་ཟླ་3པར། ཀ་གནམ་གྲོང་ཚོ་རང་སྐྱོང་ལྗོངས་ཁོར་ཡུག་སྲུང་སྐྱོང་ཐིང་གིས“རང་སྐྱོང་ལྗོངས་རིམ་པའི་སྣོད་བཅུད་གྲོང་ཚོར”བདམས་པ་རེད། སྤོ་སྟོད་གཙང་པོ་དང་ཕར་ལུང་གཙང་པོ་གྲོང་ཚོའི་འདབས་སུ་མཉམ་དུ་འདྲེས་ནས་རྒྱལ་ཁབ་རིམ་པའི་འདམ་རའི་སྤྱི་གླིང་སྟེ། བོད་ཀྱི་ཀ་གནམ་རྒྱལ་ཁབ་འདམ་རའི་སྤྱི་གླིང་གྲུབ་ཡོད།

མཛེས་སྡུག་ཉམས་དགའ་བའི་དབེན་པའི་ཞིང་གྲོང་།

སྟོན་གྱི་རླུང་བུ་བསིལ་བསིལ་དུ་ལྡང་བ་ལས་ལུས་ལ་གྲང་ཤུར་ཤུར་གྱི་ཚོར་སྣང་ཞིག་སྦྱིན། འོན་ཀྱང་། ཀ་གནམ་གྲོང་ཚོའི་མཛེས་ལྗོངས་ཤིན་ཏུ་ལྟ་ན་སྡུག དེ་གར་རི་མཐོ་དང་། མཚོ་མོ། ནགས་ཚལ། རྩྭ་ཐང་སོགས་རང་བྱུང་་ཁམས་ཀྱི་མཛེས་ལྗོངས་སྣ་ཚོགས་འདུས་ཡོད་པ་རེད།

ཀ་གནམ་གྲོང་ཚོའི་ཉེ་འགྲམ་དུ་སྤྱི་ལེ་ངོས་གྲུ་གཉིས་ཙམ་ཟིན་པའི་ཀ་གནམ་མཚོ་མོ་ཡོད་པ་དེ་ནི་བོད་ཀྱི་ཀ་གནམ་རྒྱལ་སྤྱིའི་འདམ་རའི་སྤྱི་གླིང་གི་གྲུབ་ཆ་གལ་ཆེན་ཞིག་ཡིན། སྟོན་མཇུག་ཏུ་མཚོ་མོའི་ནང་གི་ཆུ་རྩྭ་ཚང་མ་སེར་ཐིང་ཐིང་དུ་གྱུར་པ་དང་མཚོ་འགྲམ་གྱི་ཁམ་བུ་སྨིན་ནས་ས་ལ་ལྷུང་བ་དག་བོད་ཕག་གི་ཞིམ་ཟས་སུ་གྱུར་ཡོད།

ལོ་ངོ་600ལྷག་ཙམ་གྱི་ལོ་རྒྱུས་ལྡན་པའི་གནའ་བོའི་ཀ་གནམ་རྒྱལ་རབས་ཀྱི་རྗེས་ཤུལ་དང་ཀ་གནམ་མཚོ་མོ་མཉམ་དུ་འགྲོགས་པ་ལས་ལོ་གཅིག་དུས་བཞིར་ལྟ་ན་སྡུག་པའི་མཛེས་ལྗོངས་སྣ་ཚོགས་གྲུབ། 2016ལོར་ཡུལ་སྐོར་ཀུང་སིས་སྒོར་ཁྲི་800བཏང་བ་དང་མང་ཚོགས་ཀྱིས་མ་རྐང་ནང་ཞུགས་ནས་སྒོར་ཁྲི་200བཏང་སྟེ། “ཀ་གནམ་རྒྱལ་པོའི་ཕོ་བྲང་དངོས་མང་རྟེན་རྫས་བཤམས་མཛོད་ཁང”གསར་སྐྲུན་བྱས། གྲོང་མིས་ལས་ཤོགས་ལ་གཞིགས་ནས་ཁེ་སྤོགས་བགོ་འགྲེམས་བྱས་པར་ལོ་གཉིས་ནང་གྲོང་ཚོ་མཉམ་སྡེབ་དཔལ་འབྱོར་ལ་ཡོང་འབབ་སྒོར་ཁྲི་8བྱུང་བ་རེད།

ཁོར་ཡུག་སྲུང་སྐྱོང་གྲོང་སྲོལ་དམངས་ཆིངས་ནང་བཅུག་པ།

1996ལོར་ཚེ་རིང་བསོད་ནམས་ཀ་གནམ་གྲོང་ཚོའི་ཏང་ཀྲི་པུའི་ཧྲུའུ་ཅིར་བདམས། སྐབས་དེ་དུས་ཀ་གནམ་གྲོང་ཚོའི་མཐའ་འཁོར་དུ་ལྗོན་ཤིང་མང་པོ་མེད། ལོ་ལྟར་གྲོང་ཚོའི་ནང་གི་མང་ཚོགས་སྒྲིག་འཛུགས་བྱས་ནས་སྤོ་སྟོད་གཙང་པོ་དང་ཕར་ལུང་གཙང་པོའི་རྒྱུད་དུ་ཤིང་འཛུགས་ནགས་གསོ་བྱས། ཆ་སྙོམས་བྱས་ན་དུད་ཚང་རེས་ལོ་ལྟར་ཤིང་རྐང་10ནས་15བར་བཙུགས་དགོས་ཀྱི་ཡོད། “སྐབས་དེ་དུས་གྲོང་ཚོའི་ནང་ཆུ་ཀ་ལ་མེད། རྒྱུན་གཏན་གྱི་འཐུང་ཆུའང་སྤོ་སྟོད་གཙང་པོ་ནས་ལེན་དགོས་ཀྱི་ཡོད། ཁྱིམ་ལ་སླེབས་དུས་ཆུ་ཟོམ་ནང་གི་ཆུ་ཕྱེད་ཙམ་ལས་ལྷག་གི་མེད་པ་དང་གྱོན་ཆས་ཚང་མ་རློན་པ་ཆག་གི་ཡོད”ཅེས་ཚེ་རིང་བསོད་ནམས་ཀྱིས་བཤད།

ཚེ་རིང་བསོད་ནམས་ཀྱིས་གྲོང་ཚོའི་ཏང་ཀྲི་པུའི་ཧྲུའུ་ཅིའི་འགན་འཁུར་རྗེས་ཀྱི་ལོ་20ལྷག་ཙམ་གྱི་དུས་ཚོད་རིང་། ཀ་གནམ་གྲོང་ཚོས་ལོ་ལྟར་ཤིང་འཛུགས་ལས་དོན་སྒྲིག་འཛུགས་བྱེད་ཀྱི་ཡོད། ཁོར་ཡུག་སྲུང་སྐྱོང་བྱེད་ཤུགས་ཆེ་རུ་བཏང་བ་དང་བསྟུན་ནས། གྲོང་མིའི་ཁོར་ཡུག་སྲུང་སྐྱོང་གི་འདུ་ཤེས་ཀྱང་ཉིན་བཞིན་མ་བསྡད་པར་ཟབ་ཏུ་ཕྱིན་ཡོད།

གྲོང་ཚོའི་རྣམ་པ་གཙང་ཞིང་ཡིད་དུ་འོང་བ་ཞིག་ཏུ་གཏོད་རྒྱུ་ནི་གྲོང་མི་ཚང་མའི་རང་རྟོགས་རང་གཅུན་དང་ཁ་འབྲལ་ཐབས་མེད། སྔོན་ཆད་གྲོང་མི་ཚོས་རང་ཁྱིམ་གྱི་གད་སྙིགས་ཚང་མ་གང་བྱུང་དུ་བྱོ་བ་ལས་གད་སྙིགས་གཅིག་གྱུར་བསྡུ་བའི་གོམས་གཤིས་མེད། 2016ལོར། ཀ་གནམ་གྲོང་ཚོས་གད་སྙིགས་བླུགས་སྒམ་བཅུ་གྲངས་ཤིག་དང་གད་སྙིགས་སྤུངས་ས་གཉིས་བཟོས་པས། གྲོང་མི་ཚོས་གད་སྙིགས་བླུགས་སྒམ་དུ་བླུགས་རྗེས་གཅིག་བསྡུས་ཐོག་གད་སྙིགས་སྤུངས་སར་དབོར་གྱི་ཡོད་པ་རེད།

གྲོང་མི་ཚོས་རང་འགུལ་ངང་ཁོར་ཡུག་ལ་སྲུང་སྐྱོང་བྱས་པ་ཕུད། ཀ་གནམ་གྲོང་ཚོས་ད་དུང་ཁོར་ཡུག་སྲུང་སྐྱོང་གྲོང་སྲོལ་དམངས་ཆིངས་ནང་བཅུག་ནས། མི་ཚང་མ་ཁོར་ཡུག་ལྟ་སྐུལ་བ་དང་སྲུང་སྐྱོང་བར་འགྱུར་བར་བྱས་ཏེ། ཁོར་ཡུག་སྲུང་སྐྱོང་ལས་དོན་དངོས་འབྲེལ་ཡག་པོ་སྒྲུབ་ཀྱི་ཡོད་པ་རེད།

མི་ཚང་མ་མཛེས་ལྡན་ཁྱིམ་གཞིས་སྲུང་མཁན་དུ་གྱུར་པ།

ཚེ་རིང་བསོད་ནམས་དང་ཀྲང་ཡུན་ཁྲེན་ཁ་བརྡ་གློད་སྐབས། གཟུགས་པོ་ཅུང་རྒྱགས་པའི་སྐྱེས་པ་ཞིག་འཁར་རྒྱུག་བཙུགས་ནས་ང་ཚོའི་མདུན་དུ་སླེབས་བྱུང་། ཚེ་རིང་བསོད་ནམས་ཀྱིས་ངོ་སྤྲོད་བྱས་པར་གཞིགས་ན། ཁོང་གི་མིང་ལ་བསོད་ནམས་རིན་ཆེན་ཟེར་ཞིང་། འདི་ལོ་ལོ་56ལ་ས་སླེབས་པ་དང་། ཀ་གནམ་གྲོང་ཚོའི་སྣོད་བཅུད་ནགས་སྲུང་བ་ཞིག་ཡིན་པ་རེད།

སྣོད་བཅུད་ནགས་སྲུང་བ་བྱས་ནས་ལོ་3སོང་རིང་། བསོད་ནམས་རིན་ཆེན་གྱིས་རྟག་ཏུ་སྐོར་གཡེང་བྱས་ནས། ནགས་ཤིང་གང་བྱུང་དུ་གཅོད་པ་དང་། གད་སྙིགས་གང་སར་བྱོ་བ། ནགས་ཁུལ་དུ་ཐ་མག་འཐེན་པ་སོགས་ཀྱི་བྱེད་སྤྱོད་བཀག་འགོག་བྱས། ཁོང་གིས་ད་དུང་ཡུལ་སྐོར་བ་དང་གླིང་ག་གཏོང་མཁན་ལ་གད་སྙིགས་འཁྱེར་དགོས་པའི་དྲན་སྐུལ་བྱེད་པ་དང་། མི་རྣམས་ནགས་ཁྲོད་དུ་སྐྱོད་སྐབས་མེ་སོན་འཁྱེར་མི་ཆོག་པའི་དྲན་སྐུལ་བྱེད་རྒྱུ་དེའང་ཁོང་གི་རྒྱུན་གཏན་གྱི་ལས་ཀ་གཙོ་བོ་ཞིག་རེད།

ད་ཆ་བསོད་ནམས་རིན་ཆེན་ལྟ་བུའི་སྣོད་བཅུད་སྲུང་སྐྱོང་བ་ཀ་གནམ་གྲོང་ཚོར་ཧ་ཅང་མང་པོ་ཡོད། ཀྲང་ཡུན་ཁྲེན་གྱིས། 2016ལོ་ནས་ད་བར་ཀ་གནམ་གྲོང་ཚོའི་ཁག་3གྱི་མི་102ལ་སྣོད་བཅུད་ཀྱི་ལས་གནས་རག་པའི་ཁྲོད། ཉ་སྲུང་བ་དང་། ཁོར་ཡུག་གཙང་སྦྲ་བ། གྲོང་གསེབ་གཞུང་ལམ་བདག་སྐྱོང་བ། གྲོང་གསེབ་འཐུང་ཆུའི་ཆུ་འགོ་སྲུང་སྐྱོང་བ། ཆུའི་ཐོན་ཁུངས་དོ་དམ་པ། རྩྭ་ཐང་ལྟ་སྐུལ་བ། ནགས་ཚལ་སྣོད་བཅུད་ཀྱི་དབུལ་སྒྲོལ་ལས་གནས། ནགས་ལས་སྣོད་བཅུད་ལས་གནས་སོགས་ཚུད་པ་དང་། ཁོང་ཚོས་རང་སོ་སོའི་ལས་གནས་ཐོག་དུས་དང་རྣམ་པ་ཀུན་ཏུ་ཀ་གནམ་གྲོང་ཚོའི་ཁོར་ཡུག་ལ་དོ་སྣང་བྱེད་བཞིན་ཡོད།

མིག་སྔར་ནགས་ཚལ་དུ་མེ་སྐྱོན་སྔོན་འགོག་བྱེད་པའི་དུས་སྐབས་གལ་ཆེན་དུ་སླེབས་ཡོད། བསོད་ནམས་རིན་ཆེན་དང་ཁོང་གི་ལས་རོགས་ཚོས་རྟག་ཏུ་རི་སྐོར་ནགས་སྲུང་ཧུར་ཐག་བྱས་ནས་ཀ་གནམ་གྲོང་ཚོའི་མིང་དོན་མཚུངས་པའི་སྣོད་བཅུད་སྲུང་སྐྱོང་བར་གྱུར་ཡོད།