ཚེས་17ཉིན། གསར་འགོད་པས་2019ལོའི་ཉིང་ཁྲིའི་ཡར་ཀླུང་གཙང་པོའི་སྣོད་བཅུད་རིག་གནས་ཡུལ་སྐོར་དུས་ཆེན་གྱི་གསར་འགྱུར་ཡོང་བསྒྲགས་ཚོགས་འདུ་དང་པོའི་ཐོག་ནས་ཤེས་རྟོགས་བྱས་པར། ད་ཐེངས་ཀྱི་རིག་གནས་ཡུལ་སྐོར་དུས་ཆེན་དེ་ཟླ་9ཚེས་26ཉིན་ནས་ཟླ་9ཚེས་30ཉིན་བར་ཉིང་ཁྲིར་འཚོག་རྒྱུ་རེད།

2019ལོའི་ཉིང་ཁྲིའི་ཡར་ཀླུང་གཙང་པོའི་སྣོད་བཅུད་རིག་གནས་ཡུལ་སྐོར་དུས་ཆེན་གྱིས་སྐབས་གོང་མའི་གྲུབ་འབྲས་ཐོན་པའི་ཉམས་མྱོང་དཔྱད་གཞིར་འཛིན་པའི་རྨང་གཞིའི་ཐོག“གཟབ་རྒྱས་དགའ་སྤྲོ་འཁོལ་བ་དང་། ཁྱད་ཆོས་འབུར་དུ་ཐོན་པ། དྲིལ་བསྒྲགས་ལ་སྣང་ཆེན། བབ་ཆགས་གྲོན་ཆུང”བཅས་ཀྱི་དུས་ཆེན་གཏོང་བའི་རྩ་དོན་མཐའ་འཁྱོངས་ཀྱིས“མི་ཡུལ་གྱི་དག་ཞིང་། མཛེས་པའི་ཉིང་ཁྲི”ཞེས་པའི་བརྗོད་དོན་རྒྱུན་མཐུད་དེ“འཁྲབ་སྟོན་དང་། འགྲེམས་སྟོན། ཡུལ་སྐོར། གླེང་སྟེགས། འགྲན་བསྡུར། ཉོ་ཚོང་། གསར་གཏོད”བཅས་རིགས་ཆེ་གྲས་7གྱི་བྱེད་སྒོ་16སྤེལ་ནས་བྱེད་སྒོ་རིམ་སྤོར་དང་ངོ་མཚར་རིམ་སྤོར་མངོན་འགྱུར་ཧུར་ཐག་བྱ་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་རིག་གནས་ཡུལ་སྐོར་དུས་ཆེན་གྱིས་གླུ་ལེན་གར་འཁྲབ་ཀྱི་རྣམ་པའི་ཐོག་ནས་ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བ་དང་། བོད་ལ་དམངས་གཙོའི་བཅོས་སྒྱུར་བྱས་ནས་ལོ་ངོ་60འཁོར་ཚུན། ཉིང་ཁྲིར་བྱུང་བའི་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་གང་ལེགས་མངོན་པར་བྱ་རྒྱུ་མ་ཟད། ཉིང་ཁྲིས་རྒྱལ་སྤྱིའི་སྣོད་བཅུད་ཡུལ་སྐོར་ཁུལ་དང་རྒྱལ་ཁབ་ཀྱི་ས་ཁོངས་ཧྲིལ་པོའི་ཡུལ་སྐོར་དཔེ་སྟོན་ཁུལ་སྐྲུན་པའི་རྣམ་པ་གསར་པ་མངོན་པར་བྱས་ཏེ་ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བར་ཕྱག་རྟགས་འབུལ་རྒྱུ་ཡིན་པ་རེད།