འདི་ནི་བོད་ལྗོངས་གྲོ་མོའི་མདོ་ཆེན་མཚོ་འགྲམ་དུ་འཕུར་ལྡིང་བྱེད་པའི་ཁྲུང་ཁྲུང་སྐེ་ནག་ཡིན་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཞི་ཅིན་ཕིང་གི་སྣོད་བཅུད་ཤེས་དཔལ་དགོངས་པ་ལག་བསྟར་དོན་འཁྱོལ་གཏིང་ཟབ་བྱས་ཏེ། སྣོད་བཅུད་ཁོར་ཡུག་གི་སྤུས་ཚད་ལེགས་པོ་རྒྱུན་འཁྱོངས་ཡོང་བ་ལྟེ་བར་བྱེད་པ་དང་། རྒྱལ་ཁབ་ཀྱི་སྣོད་བཅུད་བདེ་འཇགས་སྲུང་ཡོལ་གལ་ཆེན་བསྐྲུན་པ་དང་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་རྒྱག་པ་དམ་འཛིན་བྱ་གཞིར་བརྩི་བ། སྣོད་བཅུད་ཤེས་དཔལ་གཏོད་རྒྱུ་ཆབ་སྲིད་ཀྱི་འགན་འཁྲིར་བརྩི་བ་བཅས་ཀྱི་ཐོག་ནས་ལྗང་མདོག་འཕེལ་རྒྱས་འདུ་ཤེས་ལག་ལེན་ནན་ཏན་བསྟར་ཐོག་ཕྱོགས་ཡོངས་ནས་གནམ་སྔོན། ཆུ་དྭངས། ས་གཙང་བཅས་སྲུང་སྐྱོང་དམག་འཐབ་བརྒྱབ་པས། “མཛེས་སྡུག་ལྡན་པའི་བོད་ལྗོངས”ཀྱི་མཛེས་རིས་ཤིག་ལྷམ་མེར་འཆར་འོང་།

བྱ་སྤྱོད་དངོས་ཀྱི་ཐོག་ནས་ཁོར་ཡུག་སྤུས་ཚད་རྒྱུན་མཐུད་ལེགས་པོ་ཡོང་བ་བྱས་པ།

ཉེ་བའི་ལོ་ཤས་རིང་། རང་ལྗོངས་ཀྱིས་སེམས་ཐག་གཙང་བཅད་ཀྱི་རྣམ་འགྱུར་དང་། ལམ་ལུགས་ཆེས་ནན་ཤོས། བྱ་ཐབས་ཆེས་ནུས་ལྡན་བཅས་ཀྱི་ཐོག་ནས་རྒྱལ་ཁབ་ཀྱི་སྣོད་བཅུད་སྲུང་ཡོལ་གལ་ཆེན་གྱི་འཐབ་ཇུས་ནུས་པའི་ངེས་གནས་ནང་སེམས་རྒྱུད་ལ་འཇགས་པ་དང་ཕྱི་ལག་ལེན་ཐོག་འཁྱོལ་བ་བྱེད་པ་དང་། སྣོད་བཅུད་ཁོར་ཡུག་གི་སྤུས་ཚད་ལེགས་པོ་རྒྱུན་འཁྱོངས་ཡོང་རྒྱུ་ལྟེ་བར་བྱེད་པ་དང་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་ནས། ཕྱོགས་ཡོངས་ནས་གནམ་སྔོན། ཆུ་དྭངས། ས་གཙང་བཅས་སྲུང་སྐྱོབ་དམག་འཐབ་བརྒྱབ་ཡོད།

གནམ་སྔོན་སྲུང་སྐྱོང་དམག་འཐབ་ཐད་རང་ལྗོངས་ཀྱིས་དམིགས་སུ་བཀར་ནས་ཁྲའེ་ཡིའུ་སྣུམ་གྱི་དོས་སྐྱེལ་རླངས་འཁོར་གྱི་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་པ་དང་། 2019ལོའི་ཟླ་1ཚེས་1ཉིན་ནས་འགོ་བཙུགས་ཏེ་ལྗོངས་ཡོངས་སུ་རྒྱལ་ཁབ་ཀྱི་རིམ་པ་དྲུག་པའི་ཚད་གཞི་དང་འཚམ་པའི་རླངས་སྣུམ་དང་ཁྲའེ་ཡིའུ་སྣུམ་མཁོ་སྤྲོད་བྱས་ཡོད། ལྷ་ས་དང་ཉིང་ཁྲི་གྲོང་ཁྱེར་གཉིས་སྦགས་བཙོག་ཆེ་བའི་འབར་རྫས་བེད་སྤྱོད་གཏོང་མི་ཆོག་པའི་ཁུལ་དུ་གཏན་འཁེལ་བྱས། ལྗོངས་ཡོངས་ཀྱི་ཨར་སྐྲུན་ལས་ཡུལ་གྱི་རྡུལ་འཚུབ་སྦགས་བཙོག་ཆེད་དོན་བཅོས་སྒྲིག་བྱ་སྤྱོད་སྤེལ་བ་དང་། གཞི་ཁྱོན་སྨི་ངོས་གྲུ་300ཡན་གྱི་ཟ་བཏུང་ཁེ་ལས་464ཚང་མར་སྣུམ་དུད་གཙང་སེལ་སྒྲིག་བཀོད་ཁྱབ་པར་བྱས་པ་དང་། རང་ལྗོངས་ཀྱི་གྲོང་ཁྱེར་དང་གྲོང་རྡལ་གཙོ་བོའི་རླུང་ཁམས་ཆེ་མོའི་ཁོར་ཡུག་སྤུས་ཚད་སྤྱིར་ན་ལེགས་པོ་ཡོང་རྒྱུ་རྒྱུན་འཁྱོངས་ཐུབ་ཡོད། 2018ལོར་ལྗོངས་ཡོངས་ཀྱི་ཁོར་ཡུག་དང་མཁའ་རླུང་སྤུས་ལེགས་ཉིན་གྲངས་ཀྱི་བསྡུར་ཚད་98.2%ཟིན་ཡོད།

ཆུ་དྭངས་སྲུང་སྐྱོང་ཐད་2017ལོ་ནས་རང་ལྗོངས་ཀྱིས་ཕྱོགས་ཡོངས་ནས་གཙང་པོ་དང་མཚེའུ་ཆུ་དཔོན་ལམ་ལུགས་ཁྱབ་གདལ་བཏང་སྟེ། རིམ་པ་དབྱེ་ནས་གཙང་པོ་དང་མཚེའུ་ཆུ་དཔོན་14747བཙུགས་པ་དང་། ཡར་ཀླུང་གཙང་པོ་སོགས་གཙང་པོ་དང་མཚེའུ་20ཡི་སྣོད་བཅུད་སྲུང་སྐྱོང་དང་ཉམས་གསོ་བྱས་པ། ལྗོངས་ཡོངས་སུ་རྫོང་རིམ་པ་དང་དེ་ཡན་གྱི་གཅིག་སྡུད་རྣམ་པའི་འཐུང་ཆུའི་ཆུ་ཁུངས་སྲུང་སྐྱོང་ཁུལ་138གཏན་འཁེལ་བྱས་ཏེ་ཕྱོགས་ཡོངས་ནས་གྲོང་གསེབ་ཀྱི་འཐུང་ཆུའི་ཆུ་ཁུངས་ཁུལ་3300ཡི་ཁོར་ཡུག་སྲུང་སྐྱོང་ལས་གྲྭ་ལག་ལེན་བསྟར་བ་བཅས་བྱས་པ་རེད། སྒོ་ཕྱུགས་དང་ཁྱིམ་བྱ་གསོ་ཚགས་བྱེད་མི་ཆོག་པའི་ཁུལ་1387གཏན་འཁེལ་བྱས་པར་རྒྱ་ཁྱོན་སྤྱི་ཆིང་ཁྲི་293.16ཟིན་ཡོད། ལྗོངས་ཡོངས་ཀྱི་གཙང་པོ་དང་མཚེའུ་གཙོ་བོའི་ཆུ་སྤུས་སྤྱིར་ན་རྒྱུན་འཁྱོངས་ལེགས་པོ་ཐུབ་ནས། རྒྱལ་ཁབ་ཀྱིས་གཏན་འབེབས་བྱས་པའི་འབྲེལ་ཡོད་ཆུ་ཁུངས་གྱི་ཁོར་ཡུག་སྤུས་ཚད་ཚད་གཞིར་སླེབས་པ་དང་ས་ངོས་ཆུའི་སྤུས་ཚད་ལེགས་ཚད་100%ཟིན་ཡོད།

ལམ་ལུགས་མ་ལག་རྒྱུན་ཆད་མེད་པར་འཐུས་སྒོ་ཚང་དུ་བཏང་ནས་རྨང་གཞི་བརྟན་དུ་ཟམ་མི་ཆད་པར་བཏང་བ།

ཏང་སྲིད་འགོ་ཁྲིད་ལས་བྱེད་པའི་སྣོད་བཅུད་ཁོར་ཡུག་གནོད་འཚེའི་འགན་འཁྲི་བདའ་འདེད་ལག་བསྟར་ཞིབ་སྲོལ་བཏོན་པ་ནས་སྣོད་བཅུད་ཤེས་དཔལ་གཏོད་པའི་དམིགས་ཚད་གདེང་འཇོག་དཔྱད་ཞིབ་བྱ་ཐབས་བཏོན་པའི་བར་དང་། སྣོད་བཅུད་ཁོར་ཡུག་ལྟ་ཞིབ་ཚད་ལེན་དྲ་བ་བཙུགས་པ་ནས་ཁོར་ཡུག་ལྟ་འདོམས་ཁྲིམས་སྐྱོང་ལ་ཤུགས་སྣོན་རྒྱག་པའི་བར། སྣོད་བཅུད་སྲུང་སྐྱོང་དམར་ཐིག་གཏན་འཁེལ་བྱས་པ་ནས་སྣོད་བཅུད་སྲུང་སྐྱོང་སྐྱིན་གསབ་ལམ་སྲོལ་འཐུས་ཚང་བཙུགས་པའི་བར་སོགས་ཐད་མིག་སྔའི་བར་དུ་རང་ལྗོངས་ཀྱིས་སྔ་རྗེས་སུ་ས་གནས་རང་བཞིན་གྱི་ཁྲིམས་སྲོལ་དང་སྲིད་ཇུས་སྒྲིག་སྲོལ་60ལྷག་བཏོན་ཡོད།

དེ་དང་ཆབས་ཅིག རང་ལྗོངས་ཀྱིས་སྣོད་བཅུད་ཁོར་ཡུག་གི་གནད་དོན་མངོན་གསལ་དོད་རིགས་ཐག་གཅོད་དང་། སྣོད་བཅུད་ཁོར་ཡུག་གི་སྤུས་ཚད་ལེགས་སུ་གཏོང་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་གཙོ་གནད་དུ་བཟུང་ཐོག ཁོར་ཡུག་སྲུང་སྐྱོང་ལྟ་བཤེར་ལམ་སྲོལ་འཐུས་སྒོ་ཚང་དུ་གཏོང་རྒྱུར་ཤུགས་སྣོན་བརྒྱབ་ནས། སྣོད་བཅུད་ཤེས་དཔལ་འཛུགས་སྐྱོང་དང་སྣོད་བཅུད་ཁོར་ཡུག་སྲུང་སྐྱོང་གི་ཆབ་སྲིད་ཀྱི་འགན་འཁྲི་ནན་དུ་བཏང་ཡོད།

ཀྲུང་དབྱང་ཁོར་ཡུག་སྲུང་སྐྱོང་ལྟ་བཤེར་ཚོགས་ཆུང་གི་ཚུར་ལན་གནད་དོན་དག་ཐེར་བྱ་རྒྱུར་སྐུལ་འདེད་ཏན་ཏིག་བཏང་ནས། རང་སྐྱོང་ལྗོངས་རིམ་པའི་ཁོར་ཡུག་སྲུང་སྐྱོང་ལྟ་བཤེར་ཁྱོན་ཡོངས་ལ་ཁྱབ་པར་བྱས་ཤིང་། གཏེར་རྫས་ཐོན་ཁུངས་གསར་སྤེལ་ལ་རང་སྐྱོང་ལྗོངས་མི་དམངས་སྲིད་གཞུང་ཁོ་ནས་ཞིབ་བཤེར་ཆོག་མཆན་སྤྲོད་རྒྱུ་མཐའ་འཁྱོངས་བྱས་ཐོག་འཆར་འགོད་དང་འཛུགས་སྐྲུན་རྣམ་གྲངས་ཀྱི་ཁོར་ཡུག་ཤུགས་རྐྱེན་གདེང་འཇོག་ལམ་ལུགས་ལག་བསྟར་ནན་ཏན་བྱས་ནས། ཁོར་ཡུག་སྲུང་སྐྱོང་ཐད“སྤ་སེ་གཅིག་གིས་ཁྲུ་སློག་པའི”ལམ་ལུགས་ལག་བསྟར་བྱས་པ་རེད།

ལྗང་མདོག་འཕེལ་རྒྱས་ལག་ལེན་ལས་བདེ་སྐྱིད་ཚོར་སེམས་རིམ་བཞིན་ཆེ་རུ་ཕྱིན་པ།

“ང་ཆུང་དུས་ནས་འདི་གར་འཚར་ལོངས་བྱུང་བ་ཡིན། རླུང་བུ་ལྡང་བའི་དུས་ཚིགས་སུ། གང་ས་གང་དུ་བྱེ་རླུང་འཚུབ་ཀྱི་ཡོད་པས། ན་གཞོན་ཚོ་ཕྱིར་སྐྱོད་འདོད་ཆེན་པོ་བྱེད་ཀྱི་ཡོད། ད་ཆ་སྲིད་གཞུང་གིས་སྒྲིག་འཛུགས་བྱས་ནས་འདི་གར་རྩྭ་དང་ལྕང་མ་བཏབ་པས། དེ་སྔའི་བྱེ་རླུང་འཚུབ་པའི་རྣམ་པར་འགྱུར་ལྡོག་ཕྱིན་ནས་ཕ་ཡུལ་ཇེ་མཛེས་ནས་ཇེ་མཛེས་སུ་གྱུར་ཡོད”ཅེས་གྲ་ནང་རྫོང་རྔ་སྒྲ་ཤང་གི་དུད་ཚང་དབུལ་པོ་བོད་ལྗོངས་སྤང་ལྗོངས་སྣོད་བཅུད་ཚན་རྩལ་ཚད་ཡོད་ཀུང་སིར་ལས་ཀ་བྱེད་བཞིན་པའི་ཆོས་སྒྲོན་གྱིས་བརྗོད་པ་རེད།

གྲ་ནང་རྫོང་ནི་ཡར་ཀླུང་གཙང་པོའི་དབུས་རྒྱུད་དུ་གནས་ཤིང་། བྱེ་རླུང་ཆེ་ལ་ས་ཆ་བྱེ་འགྱུར་གྱི་གནད་དོན་ཉིན་རེ་བཞིན་ཚབས་ཆེར་འགྲོ་བཞིན་ཡོད་པ་རེད། 2018ལོའི་གོང་དུ། འདི་ག་ནི་བྱེ་ཐང་ཞིག་ཡིན། 2016ལོར། གྲ་ནང་རྫོང་གིས་ལྗང་མདོག་འཕེལ་རྒྱས་ཀྱི་དར་ཆ་མཐོན་པོར་བསྒྲེངས་ནས་སྣོད་བཅུད་དམངས་ཕྱུག་ལམ་བུར་བསྐྱོད་དེ། “སྔོ་ཞིང་དྭངས་བའི་རི་ཆུ་གསེར་རི་དངུལ་རི་ཡིན་པའི”འདུ་ཤེས་དེ་གསོན་ཉམས་ལྡན་པའི་ལག་ལེན་དུ་འགྱུར་བར་བྱས་པ་རེད།

རང་ལྗོངས་ཀྱིས་ལྗང་མདོག་འཕེལ་རྒྱས་ཀྱི་འདུ་ཤེས་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ་རྒྱལ་ཁབ་ཀྱི་ས་ཆ་སྔོ་འགྱུར་ལ་སྐུལ་འདེད་གཏོང་རྒྱུ་དེ་སྣོད་བཅུད་ཤེས་དཔལ་འཛུགས་སྐྱོང་ལ་སྐུལ་འདེད་གཏོང་བའི་གྲུབ་ཆ་གལ་ཆེན་ཞིག་ཏུ་བརྩིས་ནས་རྒྱལ་ཁབ་ཀྱི་ས་ཆ་སྔོ་འགྱུར་བྱ་སྤྱོད་ལ་གཞི་ཁྱོན་ཆེན་པོས་སྐུལ་འདེད་བཏང་བ་རེད། ལྗོངས་ཡོངས་སུ་ཆོས་སྒྲོན་དང་འདྲ་བའི་མང་ཚོགས་དེ་བས་མང་དུ་འགྲོ་བཞིན་ཡོད། སྣོད་བཅུད་ཁ་གསབ་ལས་གནས་ཁྲི་30དོན་འཁྱོལ་བྱས་པ་བརྒྱུད་ཞིང་འབྲོག་མང་ཚོགས་ལ་ནགས་བཟོ་སྔོ་འགྱུར་དང་བྱེ་འགོག་བྱེ་བཅོས་སོགས་སྣོད་བཅུད་ལས་གྲྭ་འཛུགས་སྐྲུན་ནང་ཞུགས་རྒྱུའི་ལྕག་སྐུལ་དང་ཁྲིད་སྟོན་བྱས་པས། ལོ་རེར་ཞིང་འབྲོག་མང་ཚོགས་ཁྲི་10ལྷག་ཙམ་ལ་མི་རེར་ཆ་སྙོམས་འབབ་འཕར་སྒོར་3000ལྷག་ཙམ་བྱུང་ཡོད་པ་རེད། 2018ལོར། ནགས་ལས་ཐོན་ཁུངས་དོ་དམ་སྲུང་སྐྱོང་དང་སྣོད་བཅུད་འཛུགས་སྐྱོང་སོགས་ནང་ཞུགས་པ་བརྒྱུད་ཞིང་འབྲོག་མང་ཚོགས་ལ་འབབ་འཕར་སྒོར་དུང་ཕྱུར་15བྱུང་ཡོད་པ་རེད།