དཔྱིད་ཀྱི་མཛེས་མའི་གོམ་སྟབས་དང་སྦྲགས་ནས་འཇའ་རྫ་གྲོང་ཚོར་སྐྱོད་སྐབས་སྔོ་ལྗང་གི་ཡལ་འདབ་ལྷུག་པོར་གྲོལ་བའི་རྒྱ་ལྕང་རླུང་བུའི་འགྲོས་དང་བསྟུན་ནས་ལྡེམ་ལྡེམ་དུ་གཡོ་བ་དང་། ལྟ་སྣང་དོད་པའི་གྲོང་མིའི་ཁང་པ་རྣམས་གྲལ་སྟར་འགྲིག་པ། པ་ཏྲའི་རི་མོ་ལྟར་གྱི་སྲང་ལམ་དྭངས་ཤིང་གཙང་བ། གཤིས་རྒྱུད་བཟང་བའི་གྲོང་མི་རྣམས་བག་ཕེབས་ཤིང་སྣང་བ་སྐྱིད་པ། སྐར་ཚོགས་ས་ལ་འཕོས་འདྲའི་ནོར་ལུག་ཁྱུ་དང་ཁྱུ་སོས་དལ་བག་ཕེབས་ངང་རྩྭ་བཟའ་བཞིན་པ་སོགས་མཛེས་སྡུག་ལྡན་པའི་གྲོང་གསེབ་ཀྱི་ཉམས་འགྱུར་འདྲེན་བྱེད་ལམ་དུ་ལྷམ་མེར་འཆར་བྱུང་།

འོན་ཀྱང་ལོ་འགའ་ཤས་སྔོན་འཇའ་རྫ་གྲོང་ཚོའི་རྣམ་པ་དེ་འདྲ་གཏན་ནས་མ་རེད།

“སྔོན་མ་འཇའ་རྫ་གྲོང་ཚོའི་ཕྱོགས་མཚམས་གང་སར་ལམ་ཁོད་སྙོམས་པོ་མེད་ལ་གྲོང་ཚོའི་བཀོད་པའང་གཙང་མ་མེད། ལྷགས་པ་རྒྱག་སྐབས་ཐལ་རྡུལ་གང་སར་འཁྱེར་བ་དང་མང་ཚོགས་ཀྱིས་ཀྱང་འཚོ་བར་དང་དོད་དེ་ཙམ་བྱེད་ཀྱི་མེད”དེ་ནི་མཚོ་སྨད་རྫོང་འཕེལ་སྒྱུར་ཨུ་ལྷན་གྱི་ཀྲུའུ་རེན་འཇམ་དབྱངས་ཀྱི་དྲན་པའི་ངོགས་སུ་གསལ་བའི་དེ་སྔའི་གནས་བཞི་ཤང་འཇའ་རྫ་གྲོང་ཚོ་རེད།

ད་ཆ་གྲོང་ཚོར་འགྱུར་ལྡོག་ཆེན་པོ་དེ་ལྟ་བུ་ཡོང་དོན་དེ་ལོ་3གོང་ནས་ཤོད་དགོས་པ་ཞིག་རེད།

2016ལོར་མཚོ་སྨད་རྫོང་སྐར་མ་བཅུ་རིམ་པའི་དཔེ་སྟོན་གྲོང་ཚོར་བདམས་ཀྱང་འཇའ་རྫ་གྲོང་ཚོར“ཁོར་ཡུག་མཛེས་བཟོའི་སྐར་མ”རག་མེད་པས་གྲོང་ཚོའི་ཏང་ཀྲི་པུའུ་ཧྲུའུ་ཅི་དང་གྲོང་ཚོ་ཨུ་ལྷན་གྱི་ཀྲུའུ་རེན་ཚེ་རིང་དངོས་གྲུབ་སེམས་ཁྲལ་ཆེན་པོ་ལངས།

དེས་ན་གྲོང་ཚོའི“ཨུ་ལྷན་གཉིས”ཀྱིས་གྲོང་མིའི་ཚོགས་ཆེན་འཚོགས་ནས་མཚན་མོའི་སློབ་གྲྭ་དང་བདེ་ཐང་ཤེས་བྱའི་འཆད་འཁྲིད་སོགས་གཉེར་ནས་མང་ཚོགས་ལ“སྔོ་ཞིང་དྭངས་བའི་རི་ཆུ་གསེར་རི་དངུལ་རི་ཡིན་པའི”འདུ་ཤེས་དང་ཁོར་ཡུག་འཕྲོད་བསྟེན་གྱི་ཤེས་བྱ་སྒྲོག་འགྲེལ་བྱས་ནས་གྲོང་མི་ཚོར་གད་སྙིགས་དང་ཁ་ལུད་སྣ་ལུད་གང་བྱུང་དུ་དབྱུགས་པ་སོགས་ཀྱི་གོམས་གཤིས་ངན་པ་འདོར་ནས་ཡ་རབས་ཀྱི་གྲོང་མི་ཡག་པོ་ཞིག་བྱེད་དགོས་པའི་ཁྲིད་སྟོན་བྱས།

དེ་དང་ཆབས་ཅིག་གྲོང་ཚོའི“ཨུ་ལྷན་གཉིས”ཀྱིས་རང་ངོས་འཛུགས་སྐྱོང་ལ་ཤུགས་སྣོན་བརྒྱབ་པ་དང་། ཏང་ཡོན་གྱིས་མང་ཚོགས་ལ་མིག་དཔེ་སྟོན་པ་དང་ལས་བྱེད་པས་མང་ཚོགས་ཀྱི་སྣེ་ཁྲིད་ནས་ལས་དོན་སྒྲུབ། ཚེ་རིང་དངོས་གྲུབ་ཀྱིས་དུས་བཀག་ནང་གྲོང་མིའི་སྣེ་ཁྲིད་ནས་སྲང་ལམ་ཁག་དང་ཁང་པའི་བརྒྱབ་མདུན་གྱི་སྤྱི་པའི་ས་ཆར་གད་ཕྱིས་རྒྱག་རྒྱུ་མཐའ་འཁྱོངས་བྱས་པ་དང་། གྲོང་མིའི་སྣེ་ཁྲིད་ནས་རི་ལྡེབས་ཀྱི་གད་སྙིགས་བསྒྲུགས། འཇའ་རྫ་གྲོང་ཚོའི་ཏང་ཡོན་ལས་བྱེད་པ་ཚང་མས་བྱ་སྤྱོད་དེར་ཧུར་ཐག་ཞུགས་ཏེ་གྲོང་ཚོའི་ལོ་མང་རིང་གི་གད་སྙིགས་རང་འགུལ་ངང་གཙང་སེལ་བྱས་པ་དང་། བེད་མེད་དངོས་པོ་བསྡུ་གསོག་བརྒྱབ་སྟེ་རང་མོས་ངང་ཁོར་ཡུག་གཙང་སྦྲ་བྱེད་མཁན་དང་ལྟ་སྐུལ་པ་བྱས་ཡོད།

དེ་ལྟར་ཟླ་ནས་ཟླ་བར་དང་ལོ་ནས་ལོ་བར་རྒྱུན་མཐུད་པས་གྲོང་མིའི་ཁོར་ཡུག་སྲུང་སྐྱོང་གི་འདུ་ཤེས་ཟབ་ཏུ་ཕྱིན་པ་དང་སྦྲགས་གྲོང་ཚོའི་བཀོད་པ་ལའང་འགྱུར་ལྡོག་བྱུང་ཡོད།

དེ་ནས་བཟུང་ཟླ་རེའི་ཚེས་15དང་30ཉིན་ནི་འཇའ་རྫ་གྲོང་ཚོའི“ཁོར་ཡག་འཕྲོད་བསྟེན་བཅོས་སྒྲིག་ཉིན་མོར”གཏན་འཁེལ་བྱས་པ་དང་། ཚོགས་ཆུང་ཁག་དབར་གྱི་ཁོར་ཡུག་འཕྲོད་བསྟེན་གྱི་དཔྱད་བསྡུར་བྱེད་སྒོ་གོ་རིམ་ལྡན་པའི་ངང་སྤེལ་ཡོད།

དེ་དང་ཆབས་ཅིག་གྲོང་ཚོའི“ཨུ་ལྷན་གཉིས”ཀྱིས་མ་དངུལ་བརྩོན་ལེན་བྱས་ནས་གྲོང་ཚོ་ཡོངས་ལ་གད་སྙིགས་བླུག་སྣོད་70སྒྲིག་སྦྱོར་བྱས་པ་དང་། གཟའ་འཁོར་རེར་གཅིག་སྡུད་གཙང་སེལ་ཐེངས་རེ་བྱེད་ཀྱི་ཡོད། ད་དུང་དབུལ་སྐྱོར་ལས་གནས་སྤྱི་འདོམས་བྱས་ཏེ་དུད་ཚང་དབུལ་པོ་28ཁོར་ཡུག་འཕྲོད་བསྟེན་པར་བདམས་པ་དང་། གཟའ་འཁོར་རེར་གཙང་སྦྲ་རེ་བྱེད་དུ་བཅུག་པ་མ་ཟད། དུས་ངེས་མེད་དུ་ཁྲོམ་གཞུང་དང་གཞུང་ལམ་རྒྱུད་དུ་ཁོར་ཡུག་སྲུང་སྐྱོང་གི་སྐོར་གཡེང་བྱས་ཡོད།

ཁོར་ཡུག་བཅོས་སྒྲིག་བྱས་པས་མཛེས་སྡུག་ལྡན་པའི་གྲོང་གསེབ་གཏོད་པའི་འདུ་ཤེས་ཟབ་ཏུ་སོང་བ་དང་བྱང་ཚད་མཐོ་རུ་ཕྱིན་པས་ཡུལ་སྲོལ་ཡ་རབས་ལྡན་པ་ཞིག་ཆགས་པར་སྐུལ་འདེད་ཐེབས་ཡོད། ད་ཆ་འཇའ་རྫ་གྲོང་ཚོར་སྐྱོད་སྐབས་མཛེས་སྡུག་ལྡན་པའི་གྲོང་གསེབ་ཀྱི་ཉམས་འགྱུར་ཞིག་མིག་ལམ་དུ་འཆར་ཡོང་བ་དང་ཡ་རབས་ཀྱི་སྲོལ་བཟང་ནི་དཔྱིད་ཀྱི་རླུང་བུ་དང་འགྲོགས་ནས་ཕྱོགས་མཚམས་གང་སར་ལྡང་བཞིན་འདུག