ཀྲུང་དབྱང་ཁོར་ཡུག་སྲུང་སྐྱོང་ལྟ་བཤེར་གྱི་གནད་དོན་ཁག་བཅོས་སྒྲིག་ནུས་ལྡན་བྱས་པ།

བོད་ཀྱི་སྐོར་གླེང་ན། མི་མང་པོའི་བློ་ཡིད་དུ་འཆར་བ་ནི་ལྟ་ན་སྡུག་པའི་སྣོད་བཅུད་ཀྱི་མཛེས་རིས་ཤིག་ཡིན་ཏེ། སྔོ་ཞིང་དྭངས་པའི་མཁའ་དབྱིངས་སུ་སྤྲིན་དཀར་ཚོམ་བུ་དལ་གྱིས་རྒྱུ་ཞིང་། རྒྱང་མིག་བགྲད་དུས་གངས་རི་དཀར་པོ་འགྱིང་ངེར་འགྲངས་ལ། གངས་རིའི་གཤམ་དུ་དྭངས་གཙང་ཆུ་མོ་ལྷང་ལྷང་དུ་འབབ་པ་དང་། ཡངས་ཤིང་རྒྱ་ཆེ་བའི་རྩྭ་ཐང་དུ་རྟ་ནོར་ལུག་གསུམ་རྩྭ་ཆུར་ཅི་དགར་རོལ། མཐོ་རིས་སུན་རྩེན་ཡུལ་ལ་འགྲན་ནུས་པའི་ཡུལ་ལྗོངས་འདི་ལྟ་བུ་ནི་རང་བྱུང་ཁམས་ཆེན་པོའི་ཁྱད་དུ་འཕགས་པའི་བཟོ་བཀོད་ལྟར་དུ་ཕྱོགས་བཞི་མཚམས་བརྒྱད་ཀྱི་མགྲོན་པོ་ཀུན་གྱི་དང་བ་དབང་མེད་དུ་དྲངས་བྱུང་།

ཁོར་ཡུག་སྲུང་སྐྱོང་ལྟ་བཤེར་ལས་དོན་ལ་དོན་ཆུང་གཏན་ནས་མེད། ཀྲུང་དབྱང་ཁོར་ཡུག་སྲུང་སྐྱོང་ལྟ་བཤེར་དག་ཐེར་གྱི་བླང་བྱ་དོན་འཁྱོལ་བྱེད་རིང་། རང་ལྗོངས་ཀྱི་ས་ཁུལ་ཁག་དང་སྡེ་ཚན་ཁག་གིས་བསྒྲུབ་རྒྱུར་སྤྲད་པའི་གྱོད་གཞི་ཚང་མར་ལས་དོན་མགྱོཌ་མྱུར་སྤེལ་ཞིང་། ཐག་གཅོད་ནན་ཏན་དང་དག་ཐེར་ཏན་ཏིག་བྱས་པས་ལས་བྱེད་པ་དང་མང་ཚོགས་ཀྱི་བསྔགས་བརྗོད་རྒྱ་ཁྱབ་ཐོབ་ཅིང་། ཁོར་ཡུག་སྲུང་སྐྱོང་དང་ལྗང་མདོག་འཕེལ་རྒྱས་ཀྱི་འདུ་ཤེས་འགོ་ཁྲིད་ལས་བྱེད་པ་དང་། ཁེ་ལས་ལས་བཟོ། མང་ཚོགས་བཅས་ཀྱི་སེམས་སུ་གཏིང་ཟབ་ཟུག་ཡོད་པ་རེད།

2018ལོའི་ཟླ་10པའི་ཟླ་མཇུག་བར། དག་ཐེར་ཇུས་གཞིའི་བླང་བྱར་གཞིགས་ནས། ལྗོངས་ཡོངས་ཀྱི་དག་ཐེར་ལས་འགན་45དང་ཞིབ་བཤེར་བྱེད་ཐབས་ཁག་179རྩ་བའི་ཆར་དག་ཐེར་གྱི་དམིགས་ཚད་དུ་སླེབས་པ་དང་ཆབས་ཅིག་དུས་མཚམས་རང་བཞིན་གྱི་ཕན་འབྲས་ཐོན་པ་དང་། ལྗོངས་ཡོངས་ཀྱིས་བསྒྲུབ་རྒྱུར་སྤྲད་པའི་ཁོར་ཡུག་གི་ཡིག་བསྐུར་ངོ་བཅར་གྱི་གནད་དོན་1022གྱོད་ཐག་བཅད་ནས་ལེགས་སྒྲུབ་ཟིན་པ་དང་ལེགས་སྒྲུབ་ཐུབ་ཚད་100%ཟིན་ཡོད་པ་རེད།

སྲུང་སྐྱོང་ལ་དམ་འཛིན་དང་འཛུགས་སྐྲུན་ལ་སྣང་ཆེན་གྱིས་སྣོད་བཅུད་སྲུང་སྐྱོང་བྱས་པས་དམངས་ལ་ཕན་པ་ཐོབ་པ།

ལྗོངས་ཏང་ཨུད་དང་སྲིད་གཞུང་གིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་བསམ་ཕྱོགས་དང་བྱེད་ཐབས་གསར་རྐྱང་དང་། ཆོད་སེམས་དང་ཤུགས་ཚད་དེ་བས་ཆེ་བའི་སྒོ་ནས་དམིགས་བསལ་ཁྱད་ཆོས་ལྡན་པའི་སྣོད་བཅུད་ཤེས་དཔལ་འཛུགས་སྐྱོང་གི་ལམ་བུའི་ཐོག་སྐྱོད་ཡོད་པ་རེད། 《བོད་རང་སྐྱོང་ལྗོངས་ཀྱི་སྣོད་བཅུད་སྲུང་སྐྱོང་གི་དམར་ཐིག་དབྱེ་འབྱེད་གཏན་འབེབས་ཀྱི་ལས་ཀའི་ཇུས་གཞི》གཞིར་བཟུང་། རང་ལྗོངས་ཀྱི་རྫོང་དང་ཆུས་74ཡི་སྣོད་བཅུད་སྲུང་སྐྱོང་དམར་ཐིག་དབྱེ་འབྱེད་གཏན་འབེབས་ཀྱི་ཇུས་གཞི་གཏན་འཁེལ་རགས་ཙམ་བྱས་ཤིང་། སྣོད་བཅུད་སྲུང་སྐྱོང་དམར་ཐིག་གི་ས་མཚམས་ཐིག་ལེན་དང་ཚད་གཞི་གཏན་འཁེལ་བྱེད་པའི་ཚོད་ལྟའི་ལས་དོན་སྤེལ་འགོ་ཚུགས་པ་རེད། རང་བྱུང་སྲུང་སྐྱོང་ཁུལ་གྱི་ཚད་ལྡན་ཅན་གྱི་འཛུགས་སྐྲུན་དང་དོ་དམ་ལ་ཤུགས་སྣོན་བརྒྱབ་ནས། ལྗོངས་ཡོངས་ཀྱི་རང་བྱུང་སྲུང་སྐྱོང་ཁུལ་47གྱི་རྨང་གཞིའི་གནས་ཚུལ་མཐིལ་རྟོགས་བརྟག་དཔྱད་ལེགས་སྒྲུབ་ཟིན་ཡོད་པ་རེད། གྲོང་གསེབ་དར་རྒྱས་འཐབ་ཇུས་ཀྱི་སྣོད་བཅུད་དར་རྒྱས་འཆར་གཞི་བཟོས་ཤིང་། མ་དངུལ་སྒོར་ཁྲི་8193དོན་འཁྱོལ་བྱས་ནས་སྲིད་འཛིན་གྲོང་ཚོ་825རུ་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྐྱོང་བྱས་པ་རེད།

འགོག་བཅོས་ལ་དམ་འཛིན་གྱིས་འགག་སྒྲོལ་དོན་གཉེར་བྱས་པས་ཁོར་ཡུག་གི་སྤུས་ཚད་རྒྱུན་མཐུད་ངང་ལེགས་སུ་ཕྱིན་པ།

2018ལོར་རང་ལྗོངས་ཀྱིས“སྔོ་ཞིང་དྭངས་པའི་རི་ཆུ་གསེར་རི་དངུལ་རི་ཡིན་ལ། གངས་འཁྱགས་ཀྱིས་བསྡམས་པའི་ས་གཞི་ཡང་གསེར་རི་དངུལ་རི་ཡིན་པའི”འདུ་ཤེས་བརྟན་པོ་བཙུགས་ནས་སྦགས་བཅོས་འགོག་བཅོས་ཀྱི་འགག་སྒྲོལ་དམག་འཐབ་ལ་རྒྱལ་ཁ་ལེན་ཆེད་འབད་འབུངས་ཡར་བརྩོན་བྱས་ཤིང་། ཐབས་མང་མཉམ་སྤྱོད་དང་འགན་འཁྲི་བརྟན་དུ་བཏང་ནས་བོད་ཀྱི་ནམ་མཁའ་དེ་བས་སྔོ་བ་དང་། ས་གཞི་དེ་བས་སྔོ་ལྗང་ལྡན་པ། ཆུ་མོ་དེ་བས་དྭངས་གཙང་ཡོང་བར་བྱས་ཡོད།

ལྗོངས་ཡོངས་ཀྱི་སྣོད་བཅུད་ཁོར་ཡུག་སྲུང་སྐྱོང་གི་ཚོགས་ཆེན་གྲུབ་འབྲས་ལྡན་པའི་ངང་འཚོགས་ནས་ལྗོངས་ཡོངས་ཀྱིས་སྣོད་བཅུད་ཁོར་ཡུག་སྲུང་སྐྱོང་ལ་ཤུགས་སྣོན་བརྒྱབ་སྟེ་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་རྒྱག་རྒྱུའི་ཐད་ཕྱོགས་ཡོངས་ནས་བཀོད་སྒྲིག་བྱས་པ་རེད། 《སྣོད་བཅུད་ཁོར་ཡུག་སྲུང་སྐྱོང་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་རྒྱག་རྒྱུའི་སྐོར་གྱི་ལག་བསྟར་བསམ་འཆར》དང《ཏང་འཛུགས་སྐྱོང་ལ་སྔར་བས་ཤུགས་སྣོན་བརྒྱབ་ནས་བོད་ཀྱི་སྣོད་བཅུད་ཁོར་ཡུག་སྲུང་སྐྱོང་གི་ཞུམ་མེད་དཔུང་ཁག་གཏོད་རྒྱུའི་སྐོར་གྱི་བསམ་འཆར》བཅས་བསམ་འཆར་ཁག་གཉིས་བཟོས་པ་རེད།

བོད་རང་སྐྱོང་ལྗོངས་ཀྱི་ཆུའི་སྦགས་བཙོག་འགོག་བཅོས་ཀྱི་བྱ་སྤྱོད་འཆར་གཞིའི་ལས་དོན་ཇུས་གཞི་བཟོས་ནས་པར་འགྲེམས་བྱས་པ་དང་། སྣོད་བཅུད་ཁོར་ཡུག་སྲུང་སྐྱོང་པུའུ་དང་མཐུན་སྦྱོར་བྱས་ནས་ཆབ་མདོ་གྲོང་ཁྱེར་གྱི་འབྲི་ཆུ་དང་། རྫ་ཆུ། རྒྱལ་མོ་རྔུལ་ཆུ་བཅས་རྒྱུག་ཁུལ་གྱི་ཆུའི་སྦགས་བཙོག་འགོག་བཅོས་རྣམ་གྲངས་ཀྲུང་དབྱང་གི་གྲབས་གསོག་མཛོད་ནང་བཅུག་པ་རེད། 2017ལོ་འཁོར་གྱི་ས་རྒྱུའི་སྦགས་བཙོག་འགོག་བཅོས་ཀྱི་བྱ་སྤྱོད་འཆར་གཞིའི་ལས་ཀའི་གནས་ཚུལ་ལ་དཔྱད་གླེང་བྱས་པ་དང་། 2017ལོ་འཁོར་གྱི་ཡུན་གནས་རང་བཞིན་གྱི་སྐྱེ་ལྡན་སྦགས་བཙོག་དང་ལྗོངས་ཡོངས་ཀྱི་ལྕི་བའི་ལྕགས་རིགས་ལས་རིགས་ཀྱི་གསལ་ཐོའི་བསྡོམས་རྩིས་ལས་དོན་ལེགས་སྒྲུབ་བྱས་པ་རེད།