ཉེ་བའི་ལོ་ཤས་རིང་།　ཆབ་མདོ་གྲོང་ཁྱེར་གྱིས་སྣོད་བཅུད་མ་ལག་གལ་ཆེན་སྲུང་སྐྱོང་དང་སླར་གསོའི་འདུ་འགོད་གལ་ཆེན་ལག་བསྟར་ཤུགས་ཆེན་བྱས་པར་བརྟེན་སྣོད་བཅུད་མ་ལག་གི་སྤུས་ཚད་དང་བརྟན་པོའི་རང་བཞིན་རྒྱུན་ཆད་མེད་པར་ལེགས་སུ་ཕྱིན་པ་དང་བོད་ཤར་ས་མཐོའི་རྩྭ་རྩི་ཤིང་དང་རི་ཀླུང་སྲུང་སྐྱོང་ཡག་པོ་ཐུབ་ནས་མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་མ་ཐེབས་ཡོད།

ཆུའི་སྣོད་བཅུད་སྲུང་སྐྱོང་ལ་སྐུལ་འདེད་ཏན་ཏིག་བཏང་ནས་ཆུ་དེ་བས་དྭངས་གཙང་ཡོང་བ་བྱས་ཤིང་།　རྫ་ཆུ་དང་།　རྒྱལ་མོ་རྔུལ་ཆུ།　འབྲི་ཆུ་བཅས་ཀྱི་ཆུ་རྩྭ་གསོ་འཁྱོངས་ཁུལ་གྱི་ནུས་པའི་ཁུལ་གྱི་སྒྲིག་བཀོད་འཐུས་སྒོ་ཚང་དུ་བཏང་ནས་བཙོག་ཆུའི་གད་སྙིགས་གནོད་མེད་ཅན་གྱི་ཐོག་ནས་གཙང་སེལ་བྱས་པ་དང་།　སྒོར་ཁྲི་6000ཙམ་བཏང་ནས་རྫོང་11（ཆུས）ལ་གཅིག་སྡུད་རྣམ་པ་དང་གྲོང་གསེབ་472ལ་འཐུང་ཆུའི་ཆུ་ཁུངས་སྲུང་སྐྱོང་འདུ་འགོད་བསྐྲུན་པར་བརྟེན་མང་ཚོགས་ཚོར་ཆུ་གཙང་མ་འཐུང་རྒྱུ་བྱུང་ཡོད།　2013ལོ་ནས་ད་བར་ཆབ་མདོ་གྲོང་ཁྱེར་ལ་ཁྱོན་ཆུའི་ཁོར་ཡུག་སྤུས་ཚད་ལྟ་ཞིབ་ཚད་ལེན་གྱི་གྲངས་གཞི་7000ཟིན་ཏེ་གྲོང་ཁྱེར་ཡོངས་ཀྱི་ཆུའི་ཁོར་ཡུག་སྤུས་ཚད་མུ་མཐུད་ལེགས་སུ་ཕྱིན་པ་དང་།　Ⅲརིགས་ཡན་གྱི་ཆུའི་སྤུས་ཚད་100%ཟིན་ཡོད་པ་རེད།

རང་བྱུང་ནགས་ཚལ་སྲུང་སྐྱོང་ལག་བསྟར་ཤུགས་ཆེན་བྱས་ཏེ་རི་ཀླུང་དེ་བས་སྔོ་ལྗང་ལྡན་པ་བྱས་ཤིང་།　ཕྱོགས་ཡོངས་ནས་རང་བྱུང་ནགས་ཚལ་གཅོད་རྒྱུ་བཀག་འགོག་བྱས་པ་དང་ནགས་སྲུང་བའི་དོ་དམ་ལམ་ལུགས་བཟོས་པ་དང་འབྲེལ་ནགས་སྲུང་བ་ཁྲི་13ལ་རིམ་དབྱེ་དང་རིགས་དབྱེའི་དོ་དམ་ལག་བསྟར་བྱས་ཁར་ཕྱོགས་ཡོངས་ནས“དམ་འཛིན་བརྒྱད་དང་སྔོན་འགོག་བརྒྱད”ཀྱི་ལས་ཀའི་འགན་འཁྲི་ལག་བསྟར་བྱས་པར་བརྟེན་ནགས་ཚལ་ཁྱབ་ཚད་དང་ནགས་ཚལ་གསོག་ཚད“གཉིས་འཕར”མངོན་འགྱུར་བྱུང་ཡོད།　2013ལོ་ཚུན་དུ་གྲོང་ཁྱེར་དེ་ཡོངས་སུ་ཤིང་འཛུགས་ནགས་བཟོ་མུའུ་ཁྲི་170.64བྱས་པ་དང་ནུས་ཤུགས་ཡོད་རྒུས་གྲོང་ཁྱེར་ཡོངས་ཀྱི་ས་བབ་སྨི་4300མན་གྱི་གྲོང་ཚོ་368དང་དུད་ཚང་ཁྲི་3.61ལ་ཤིང་འཛུགས་ནགས་བཟོ་བྱས་པ་མ་ཟད།　སྡོང་ཕྲུག་རྐང་ཁྲི་130བཏབ་ཡོད་པ་རེད།

རང་བྱུང་སྲུང་སྐྱོང་ཁུལ་འཛུགས་སྐྲུན་ལ་མཉམ་དུ་སྐུལ་འདེད་བཏང་ནས་སྐྱེ་དངོས་ཀྱི་སྣ་ཁ་མང་དུ་བཏང་ཞིང་།　རི་བོ་ཆེར་ཤྭ་བ་སེར་ཆེན་རང་བྱུང་སྲུང་སྐྱོང་ཁུལ་དང་།　སྨར་ཁམས་དུ་ཡུན་ནན་གྱི་སྤྲེལ་ཁྲའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ།　དཔའ་ཤོད་ར་འོག་མཚེའུ་ཡི་འདམ་རར་རང་སྐྱོང་ལྗོངས་རིམ་པའི་རང་བྱུང་སྲུང་སྐྱོང་ཁུལ་བཅས་བསྐྲུན་པའི་སྤྱིའི་རྒྱ་ཁྱོན་སྤྱི་ཆིང་ཁྲི་31.26ཟིན་ཡོད་པ་དང་།　གྲོང་ཁྱེར་ཡོངས་སུ་བདག་ཏུ་མ་བཟུང་བའི་སྲོག་ཆགས་རིགས་400ལྷག་ཙམ་མང་དུ་སོང་བའི་ནང་རྒྱལ་ཁབ་ཀྱི་རིམ་པ་དང་པོའི་བདག་ཏུ་མ་བཟུང་བའི་སྲོག་ཆགས་རིགས་17དང་།　རྒྱལ་ཁབ་ཀྱི་རིམ་པ་གཉིས་པའི་བདག་ཏུ་མ་བཟུང་བའི་སྲོག་ཆགས་རིགས་65　རྒྱལ་ཁབ་ཀྱི་རིམ་པ་དང་པོའི་སྲུང་སྐྱོང་སྲོག་ཆགས་ཡུན་ནན་གྱི་སྤྲེལ་ཁྲ་900ལྷག་ཙམ།　བདག་ཏུ་མ་བཟུང་བའི་ཤྭ་བ་སེར་ཆེན་8000ལྷག་ཙམ་བཅས་ཡོད་པ་རེད།