གསར་འགོད་པར་བོད་རང་སྐྱོང་ལྗོངས་ཡུལ་སྐོར་སྡེ་ཚན་ནས་ཤེས་རྟོགས་བྱུང་བར། བོད་འདི་ཉིད“འཛམ་གླིང་གི་ཡུལ་སྐོར་དམིགས་ས”གལ་ཆེན་དུ་བསྐྲུན་ནས་བོད་ལ་དགུན་དུས་ཡུལ་སྐོར་བྱ་རྒྱུ་ཁྱབ་གདལ་གཏོང་ཆེད། བོད་རང་སྐྱོང་ལྗོངས་ཀྱིས་ཟླ་2ཚེས་1ཉིན་ནས་ཟླ་4ཚེས་30ཉིན་བར། “དགུན་དུས་བོད་ལ་ཡུལ་སྐོར་བྱེད·སའི་གོ་ལའི་ཡང་རྩེར་མཉམ་དུ་རོལ”ཞེས་པའི་བྱེད་སྒོ་སྤེལ་ནས་ལྗོངས་ཡོངས་ཀྱི་Aརིམ་པའི་ཡུལ་སྐོར་མཛེས་ལྗོངས་ཁུལ་ཚང་མར་རིན་པ་སྤྲོད་མི་དགོས་པར་ཡུལ་སྐོར་བར་སྒོ་ཕྱེ་བ་དང་ཆབས་ཅིག་མགྲོན་ཁང་དུ་ཞག་སྡོད་དང་། ཡུལ་སྐོར་རླངས་འཁོར། མཁའ་འགྲུལ་དང་ལྕགས་ལམ་འགྲུལ་སྐྱེལ། ཡུལ་སྐོར་ཚོགས་སྒྲིག་སོགས་ཕྱོགས་མང་པོ་ཚུད་པའི་གཟིགས་སྐྱོང་བྱ་ཐབས་བཏོན་པ་རེད།

འདི་ནི་དྲོད་འཇམ་ཉི་འོད་ཀྱིས་ཁྲ་ཆིལ་ལེར་རྒྱན་པའི་ཕོ་བྲང་པོ་ཏ་ལ་ཡིན་པ།

ངོ་སྤྲོད་བྱས་པར་གཞིགས་ན། བྱེད་སྒོ་སྤེལ་རིང་། བོད་ཀྱིས་ལྗོངས་ཡོངས་ཀྱི་Aརིམ་པའི་ཡུལ་སྐོར་མཛེས་ལྗོངས་ཁུལ་ཚང་མ་ཡུལ་སྐོར་བར་རིན་མེད་ངང་སྒོ་དབྱེ་རྒྱུ་དང་། ལྗོངས་ཡོངས་ཀྱི་སྐར་རིམ་གསུམ་ཡན་གྱི་ཡུལ་སྐོར་མགྲོན་ཁང་གི་ཁང་རིན་ན་ནིང་གི་དུས་མཚུངས་ཀྱི་གོང་ཁེའི་རིན་གོང་གི་50%ལས་མཐོ་མི་རུང་བ་བྱས་པ། ཡུལ་སྐོར་རླངས་འཁོར་གྱི་བདལ་གླ་ཡུལ་སྐོར་བ་མང་དུས་སྐབས་ཀྱི་50%ལས་མཐོ་མི་རུང་བ་བྱས་པ་རེད། བོད་དུ་འཕུར་མཁན་གནམ་གྲུའི་མདོ་ཚང་གི་རིན་གོང་ལ་ཁྲོམ་རའི་རིན་གོང་གི་རྨང་གཞིའི་ཐོག ཡུལ་སྐོར་བར་བསྡུར་ཚད་མི་འདྲ་བའི་གཟིགས་སྐྱོང་བྱས་ཡོད། མིག་སྔར། བོད་ལྗོངས་མཁའ་འགྲུལ་ཀུང་སིས་ཟླ་2ཚེས་1ཉིན་ནས་བཟུང་པ་སེའི་རིན་གོང་དམའ་རུ་གཏོང་འགོ་བཙུགས་པ་དང་། བོད་དུ་བསྐྱོད་པའི་མཁའ་འགྲུལ་ཀུང་སི་གཞན་དག་གིས་ཀྱང་སྤ་སེའི་རིན་གོང་གི་གཟིགས་སྐྱོང་བྱ་ཐབས་ལ་མཐུན་སྦྱོར་བྱེད་བཞིན་ཡོད་ཅིང་། སྐབས་དེ་དུས་ཡུལ་སྐོར་གྱི་གཞུང་ཕྱོགས་དྲ་བའི་ཐོག་ཁྱབ་བསྒྲགས་བྱ་རྒྱུ་རེད།

འདི་ནི་རྐང་ཐང་མར་རི་བོ་ཧི་མ་ལ་ཡ་སྒྲོལ་མཁན་གྱིས་གངས་རིའི་ཕྱོགས་སུ་སྐྱོད་པའི་གནས་ཚུལ་ཡིན་པ།

ལྷ་ས་ནས་ཉིང་ཁྲི་དང་། ཆབ་མདོ། མངའ་རིས་བཅས་དབར་གྱི་གནམ་གྲུའི་གྲངས་འབོར་ཉུང་དུ་མི་གཏོང་བའི་གནས་ཚུལ་འོག ལྷ་ས་ནས་མངའ་རིས་བར་ཉིན་ལྟར་གནམ་གྲུ་གཏོང་ཐེངས་གཅིག་མང་དུ་བཏང་བ་དང་། ལྷ་ས་ནས་མངའ་རིས་བར་འགྲོ་འོང་བྱེད་མཁན་གྱི་གནམ་གྲུ་ཚང་མ་དང་། ལྷ་ས་ནས་ཉིང་ཁྲི་དང་ཆབ་མདོ་བར་མང་དུ་བཏང་བའི་གནམ་གྲུའི་སྤ་སེར་ཁྲོམ་རའི་རིན་གོང་གི་རྨང་གཞིའི་ཐོག་30%དམའ་རུ་བཏང་བ་དང་། དམའ་རུ་བཏང་བའི་ཆ་ཤས་དེ་བོད་རང་སྐྱོང་ལྗོངས་མི་དམངས་སྲིད་གཞུང་གིས་ཁ་གསབ་སྤྲོད་རྒྱུ་ཡིན་པ་རེད།

གནམ་གྲུ་དང་ཆེད་སྤྱོད་མེ་འཁོར་གླས་ནས་བོད་དུ་ཡུལ་སྐོར་སྒྲིག་འཛུགས་བྱེད་མཁན་གྱི་ཁེ་ལས་ལ་ཚད་གཞི་གཞིར་བཟུང་བྱ་དགའ་སྤྲོད་རྒྱུ་ཡིན་ཞིང་། ཚད་གཞི་ནི་གཙང་གླས་གནམ་གྲུ་གཏོང་ཐེངས་རེར་མི་100ལས་བརྒལ་ཚེ་བྱ་དགའ་སྒོར་ཁྲི་10སྤྲོད་རྒྱུ་དང་། མི་200ལས་བརྒལ་ཚེ་བྱ་དགའ་སྒོར་ཁྲི་15སྤྲོད་རྒྱུ། ཆེད་སྤྱོད་མེ་འཁོར་གཏོང་ཐེངས་རེར་མི་300ལས་བརྒལ་ཚེ་བྱ་དགའ་སྒོར་ཁྲི་20སྤྲོད་རྒྱུ་དང་མི་400ལས་བརྒལ་ཚེ་བྱ་དགའ་སྒོར་ཁྲི་25སྤྲོད་རྒྱུ་ཡིན་པ་རེད། ལྗོངས་ཕྱི་ནང་གི་ཡུལ་སྐོར་ལས་དོན་ཁང་གིས་ཚོགས་པ་སྒྲིག་འཛུགས་བྱས་ནས་རིམ་རྩིས་བྱས་ན་མི་500ཡན་ལོན་ཚེ་བྱ་དགའ་སྒོར་ཁྲི་10སྤྲོད་རྒྱུ་དང་། མི་100རེ་མང་དུ་སོང་ན་བྱ་དགའ་སྒོར་ཁྲི་5ཁ་སྣོན་རྒྱག་རྒྱུ་ཡིན་པ་རེད།