འབྲས་ལྡན་དུས་ཚིགས་སུ་མི་ཡུལ་གྱི་གནས་མཆོག་དང་མཁའ་དབྱིངས་ཀྱི་བོད་ལྗོངས་ཀྱིས་ཕྱོགས་བཞི་མཚམས་བརྒྱད་ཀྱི་སྐུ་མགྲོན་བསུས་ཤིང་།

ཟླ་9ཚེས་10ཉིན་གྱི་དགོང་མོ། ཀྲུང་དབྱང་དང་རྒྱལ་ཁབ་འབྲེལ་ཡོད་པུའུ་ཨུད། འབྲེལ་ཡོད་ཞིང་ཆེན་དང་གྲོང་ཁྱེར་གྱི་འཐུས་མི། རྒྱལ་ཁབ་ཕྱི་ནང་གི་ཡུལ་སྐོར་དང་། རིག་གནས། ཚོང་དོན། བོད་ལུགས་གསོ་རིག་དང་བོད་སྨན་ལས་རིགས་བཅས་ཀྱི་འཐུས་མི། སྨྱན་སྦྱོར་ཚན་པའི་སྐུ་མགྲོན། མི་རིགས་ཁག་གི་མང་ཚོགས་སོགས་མི་གྲངས་7000ལྷག་ཙམ་བོད་ལྗོངས་འགྲེམས་ཚོགས་ལྟེ་གནས་ཐང་ཆེན་དུ་འདུ་འཛོམས་བྱས་ཏེ་གཟབ་ཤིང་རྒྱས་པའི་དུས་སྐབས་དེ་འཆར་རྒྱུར་ཐུན་མོང་ཐོག་རེ་སྒུག་བྱེད་བཞིན་མཆིས།

ཆུ་ཚོད་8དང་སྐར་མ་30ཡི་ཐོག་རིག་གནས་པུའུ་དང་། རྒྱལ་ཁབ་ཡུལ་སྐོར་ཅུས། བོད་རང་སྐྱོང་ལྗོངས་མི་དམངས་སྲིད་གཞུང་བཅས་ཀྱིས་ཐུན་མོང་ཐོག་གཙོ་གཉེར་བྱས་པའི་སྐབས་གསུམ་པའི་ཀྲུང་གོའི་བོད་ལྗོངས་ཡུལ་སྐོར་རིག་གནས་རྒྱལ་སྤྱིའི་འགྲེམས་ཚོགས་གཟབ་རྒྱས་ངང་འགོ་ཚུགས་པ་རེད།

བོད་ལྗོངས་འགྲེམས་ཚོགས་ནི་རང་ལྗོངས་ཀྱིས་ཕྱི་ཕྱོགས་སྒོ་དབྱེའི་དུས་བབ་གསར་པ་དང་བསྟུན་ནས། འཛམ་གླིང་གི་ཡུལ་སྐོར་དམིགས་ས་གལ་ཆེན་འཛུགས་སྐྲུན་མགྱོགས་པོ་བྱ་ཆེད་བློ་རྩེ་གཅིག་སྒྲིམ་གྱིས་བཏོད་པའི་ལྟ་ན་སྡུག་པའི་མིང་བྱང་ཞིག་ཡིན་པ་དང་། ད་བར་འགྲེམས་ཚོགས་སྐབས་གཉིས་ཕུན་སུམ་ཚོགས་པོའི་ངང་འཚོགས་ཡོད་པ་རེད།

སྐབས་གསུམ་པའི་བོད་ལྗོངས་འགྲེམས་ཚོགས་ཐོག“མི་ཡུལ་གྱི་གནས་མཆོག མཁའ་དབྱིངས་ཀྱི་བོད་ལྗོངས”ཞེས་པའི་བརྗོད་བྱ་གཙོ་བོ་མུ་མཐུད་གཏིང་ཟབ་ཏུ་བཏང་སྟེ། རྒྱལ་ཁབ་ཀྱི“རྒྱུད་གཅིག་ལམ་གཅིག”གི་འཐབ་ཇུས་གོ་སྐབས་དམ་འཛིན་ལྷོད་མེད་བྱེད་པ་དང་། “ཡུལ་སྐོར་ཆེན་པོ་དང་། ཐོན་ལས་ཆེན་པོ། འཕེལ་རྒྱས་ཆེན་པོ”བཅས་ལ་དམིགས་པ། “ལེགས་གྲས་དང་། ཁྱད་ལྡན། རྩེར་སོན”བཅས་མངོན་གསལ་དོད་པོ་ཡོང་བ་བྱེད་པ། བོད་ཀྱི་ཡུལ་སྐོར་རིམ་སྤོར་པར་གཞི་ནུས་ཤུགས་ཡོད་རྒུས་གཏོད་པ་བཅས་ཀྱི་ཐོག་ནས་འཛམ་གླིང་གི་ཡུལ་སྐོར་དམིགས་ས་གལ་ཆེན་དང་། ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་བྱ་ཡུལ་གལ་ཆེན། ཨེ་ཤེ་ཡ་ལྷོ་མར་ཕྱོགས་ནས་སྒོ་མོ་དབྱེ་བའི་བགྲོད་ལམ་གལ་ཆེན་བཅས་འཛུགས་སྐྲུན་ཧུར་ཐག་བྱས་ཡོད།

“རང་ལྗོངས་ཀྱི་ཡུལ་སྐོར་ལས་རིགས་ནི་དུས་རབས་གོང་མའི་ལོ་རབས་80པར་དར་རྒྱས་འགྲོ་འགོ་ཚུགས་པ་དང་ལོ་30ལྷག་ཙམ་གྱི་འཕེལ་རྒྱས་ཕྱིན་ཡོད། མེད་པ་ནས་ཡོད་པའི་བར་དང་། ཆུང་བ་ནས་ཆེ་བའི་བར། ཐོག་མའི་སྣེ་ལེན་བྱ་གཞག་རྣམ་པ་ནས་སྤྱིར་བཏང་གི་དཔལ་འབྱོར་ཐོན་ལས་རྣམ་པའི་བར་དང་། དེ་ནས་སླར་ཡང་ཀ་རྟེན་ཐོན་ལས་རྣམ་པའི་བར་མཆོང་སྐྱོད་བྱུང་ཡོད”ཞེས་རང་སྐྱོང་ལྗོངས་འཕེལ་སྒྱུར་ཨུ་ལྷན་ཏང་ཙུའི་ཧྲུའུ་ཅི་ཤའོ་ཁྲོན་ཅང་གིས་ངོ་སྤྲོད་བྱས། ན་ནིང་ཁོ་ནར་རང་ལྗོངས་ཀྱིས་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་2017.53ལ་སྣེ་ལེན་ཞུས་པར་ཡུལ་སྐོར་གྱི་སྤྱིའི་ཡོང་འབབ་སྒོར་དུང་ཕྱུར་281.92བྱུང་བ་དེ་ལོ་དེ་གའི་ལྗོངས་ཡོངས་ཀྱི་GDPཡི་27.5%དང་ཧ་ལམ་མཚུངས་ཀྱི་ཡོད།

ཀྲུང་དབྱང་དང་རང་སྐྱོང་ལྗོངས་ཀྱིས་སྔར་ནས་ད་བར་བོད་ཀྱི་ཡུལ་སྐོར་ཐོན་ལས་འཕེལ་རྒྱས་ལ་ཚད་མཐོའི་མཐོང་ཆེན་གནང་གི་ཡོད། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་ཏང་ཀྲུང་དབྱང་གིས་བོད་འདི་ཉིད་འཛམ་གླིང་གི་ཡུལ་སྐོར་དམིགས་ས་གལ་ཆེན་དང་ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་བྱ་ཡུལ་གལ་ཆེན་ཞིག་ཏུ་འཛུགས་སྐྲུན་བྱེད་པར། སྲིད་ཇུས་དང་། རྣམ་གྲངས། མ་དངུལ། ཤེས་ལྡན་པ་སོགས་ཀྱི་གཏོང་ཆ་གཏོང་ཤུགས་མུ་མཐུད་ཆེ་རུ་གཏོང་དགོས་ཞེས་ཁ་གསལ་བཏོན་ཡོད། དེ་ཐོག་ནས་བོད་ཀྱི་ཡུལ་སྐོར་ཀ་རྟེན་ཐོན་ལས་འཕེལ་རྒྱས་དང་རིག་གནས་རྒྱུན་འཛིན་དང་སྲུང་སྐྱོང་ཐད་ཁ་ཕྱོགས་གསལ་སྟོན་དང་། གཞི་འཛིན་ས་མཁོ་འདོན། འགན་ལེན་ནུས་ལྡན་བཅས་བྱས་ཡོད།

ད་ཆ། ཡུལ་སྐོར་ཐོན་ལས་དེ་རང་ལྗོངས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་འདེགས་སྐྱོར་གལ་ཆེན་ཞིག་དང་། སྤྱི་ཚོགས་ཀྱི་ལས་ཞུགས་དང་མང་ཚོགས་ལ་འབབ་འཕར་ཡོང་བའི་ཐབས་ལམ་གལ་ཆེན་ཞིག ཕྱི་ཕྱོགས་ལ་སྤེལ་རེས་བྱེད་པའི་ལས་སྟེགས་གལ་ཆེན་ཞིག མ་དངུལ་ནང་འདྲེན་བྱེད་པའི་ཁྱབ་ཁོངས་གལ་ཆེན་ཞིག སྤྱི་ཚོགས་རིང་ལུགས་ཀྱི་བོད་ལྗོངས་གསར་པའི་འགྱུར་ལྡོག་གསར་པ་དང་། འཚོ་བ་གསར་པ། འཕེལ་རྒྱས་གསར་པ་བཅས་མངོན་པར་བྱེད་པའི་སྐར་ཁུང་གལ་ཆེན་ཞིག་བཅས་སུ་གྱུར་ཡོད།

རང་ལྗོངས་ཀྱིས་འདི་ལོ་ནི་ཡུལ་སྐོར་ཞབས་ཞུ་ཚད་ལྡན་ཅན་འཛུགས་སྐྱོང་ལོར་གཏན་འཁེལ་བྱ་རྒྱུ་དང་འབྲེལ་ཡུལ་སྐོར་མཛེས་ལྗོངས་ཁུལ་རྩེར་སོན་ཅན་གྱི་དཔེ་སྟོན་ལས་དོན་ཧུར་ཐག་སྤེལ་རྒྱུ་རེད། དེའི་དམིགས་ཡུལ་ནི་ཡུལ་སྐོར་གྱི་རྨང་གཞིའི་སྒྲིག་བཀོད་འཛུགས་སྐྲུན་བྱེད་ཤུགས་སྔར་བས་ཆེ་རུ་གཏོང་བ་དང་། ཕྱོགས་བསྡུས་ཞབས་ཞུའི་ཆུ་ཚད་མཐོ་རུ་གཏོང་བ། ཡུལ་སྐོར་གྱི་སྤུས་ཚད་ལྟ་སྐུལ་ལ་ཤུགས་སྣོན་རྒྱག་པ། འཕྲལ་སྡོམ་རོགས་སྐྱོབ་ལམ་སྲོལ་འཐུས་སྒོ་ཚང་དུ་གཏོང་བ་བཅས་ཀྱི་ཐོག་ནས་ཡུལ་སྐོར་བ་སྣང་བ་སྐྱིད་པོ་དང་། སེམས་ཁྲལ་མེད་པ། བློ་བདེ་པོ་བཅས་ཡོང་བ་བྱ་རྒྱུ་དེ་རེད།

“རྒྱུད་གཅིག་ལམ་གཅིག”འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་བའི་རྒྱབ་ལྗོངས་ཆེན་པོའི་འོག་རང་ལྗོངས་ཀྱི་ཡུལ་སྐོར་དང་རིག་གནས་བྱ་གཞག་མཉམ་འདྲེས་འཕེལ་རྒྱས་གཏོང་རྒྱུ་དང་། དར་གོས་ལམ་བུའི་བོད་ལྗོངས་ནི་དཀར་གཙང་ཁ་བཏགས་ཞིག་དང་འདྲ་བར་ཨེ་ཤེ་ཡ་ལྷོ་མར་སྒོ་མོ་དབྱེ་བའི་བགྲོད་ལམ་གལ་ཆེན་གྱི་ཉམས་འགྱུར་ངོམ་བཞིན་ཡོད།