མི་དམངས་དྲ་བའི་འཕྲིན། “རྒྱུད་གཅིག་ལམ་གཅིག”གི་འཐབ་ཇུས་ལག་བསྟར་བྱེད་པ་དང་ལན་ཀྲོའུ་ནས་ཤིན་ཅང་བར་གྱི་མྱུར་སྐྱོད་མེ་འཁོར་ཤར་གཏོང་བྱེད་པ་དང་ཆབས་ཅིག་“ལྔ་གཅིག”གུང་གསེང་ཐུང་ངུའི་སྐབས་སུ་མཚོ་སྔོན་ཞིང་ཆེན་གྱི་ཡུལ་སྐོར་ཚོང་ར་དར་ཞིང་རྒྱས་པ་དང་། མཚོ་སྔོན་ཞིང་ཆེན་དུ་ཡུལ་སྐོར་བ་མང་བའི་དུས་སྔོན་ཆད་ལས་སྔ་སྣུར་སླེབས་རྒྱུ་ཡིན་པས། མཚོ་སྔོན་པོའི་མཛེས་ལྗོངས་ཁུལ་གྱི་སྒོ་འཛིན་ནི་ཡུལ་སྐོར་བ་མང་བའི་དུས་ཚིགས་ཀྱི་རིན་གོང་ལྟར་བཙོང་བཞིན་ཡོད་པ་རེད།

ཟི་ལིང་གྲོང་ཁྱེར་ཡུལ་སྐོར་ཅུས་ཀྱི་ཅུས་ཀྲང་ལེ་ཀུའེ་དབྱིན་གྱིས་མཚམས་སྦྱོར་བྱས་པ་ལྟར་ན། འདི་ལོར་མཚོ་སྔོན་ཞིང་ཆེན་ནང་ཁུལ་གྱི་ཡུལ་སྐོར་ལས་དོན་ཁང་གིས་ཡུལ་སྐོར་ཚོགས་པ་སྣེ་ལེན་བྱས་ཚད་དང་སྔོན་མངག་བྱས་ཚད་ན་ནིང་གི་དུས་མཉམ་དང་བསྡུར་ན་10%ཡན་འཕར་བ་དང་། ན་ནིང་གི་ཟླ་6པའི་ཟླ་འགོའི་ཡུལ་སྐོར་བ་སྣེ་ལེན་བྱས་ཚད་དང་མཚུངས་པས། འདིའི་ཐོག་ནས་ད་ལོར་མཚོ་སྔོན་ཞིང་ཆེན་དུ་ཡུལ་སྐོར་བ་མང་བའི་དུས་སྔ་སྣུར་སླེབས་པ་མཚོན་ཡོད་པ་རེད།

མཚོ་སྔོན་ཞིང་ཆེན་གྱི་སྡོམ་རྩིས་ཅུས་ཀྱིས་ཁྱབ་བསྒྲགས་བྱས་པའི་གཞི་གྲངས་གསར་ཤོས་ལས་མངོན་པ་ལྟར་ན། 2016ལོའི་དུས་ཚིགས་དང་པོར་མཚོ་སྔོན་ཞིང་ཆེན་གྱིས་རྒྱལ་ཁབ་ཕྱི་ནང་གི་ཡུལ་སྐོར་བ་བསྡོམས་པས་མི་ཐེངས་ཁྲི་225སྣེ་ལེན་བྱས་ཤིང་། ཡུལ་སྐོར་ཡོང་འབབ་སྒོར་དུང་ཕྱུར་22.69ཟིན་ཡོད་པ་རེད།