ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ཉེ་ཆར། གསར་འགོད་པར་བོད་རང་སྐྱོང་ལྗོངས་ཡུལ་སྐོར་འཕེལ་རྒྱས་ཨུ་ལྷན་ནས་ཤེས་རྟོགས་བྱུང་བར་གཞིགས་ན། བོད་ཀྱིས“ལོ་ལྔ་ཚན་བཅུ་གཉིས་པའི”རིང་རིམ་རྩིས་བྱས་ན་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་6789ལ་སྣེ་ལེན་ཞུས་ནས་ཡུལ་སྐོར་ཡོང་འབབ་སྒོར་དུང་ཕྱུར་874བྱུང་ཡོད་པ་རེད།

“ལོ་ལྔ་ཚན་བཅུ་གཉིས་པའི”རིང་བོད་ཀྱི་ཡུལ་སྐོར་གྱི་རྨང་གཞིའི་སྒྲིག་བཀོད་ཐད་ལོ་རྒྱུས་རང་བཞིན་གྱི་ལེགས་བཅོས་བྱུང་ཡོད། མཚོ་བོད་ལྕགས་ལམ་ལྷ་ས་ནས་གཞིས་རྩེ་དུམ་བུའི་བར་མེ་འཁོར་ཤར་གཏོང་ཐུབ་ནས་གཉེར་སྐྱོང་བྱེད་འགོ་ཚུགས་པ་དང་། ལྷ་ས་ནས་ཉིང་ཁྲི་བར་གྱི་རིམ་མཐོའི་གཞུང་ལམ་ཤར་གཏོང་ཐུབ་ནས་ཡུལ་སྐོར་འགྲིམ་འགྲུལ་གྱི་འཇུར་མིག་གནད་དོན་ཐག་གཅོད་ཐུབ་ཡོད་པ་རེད།

རྨང་གཞིའི་སྒྲིག་བཀོད་ལེགས་སུ་ཕྱིན་པ་དང་ཆབས་ཅིག“འཛམ་གླིང་གི་ཡུལ་སྐོར་བྱ་ཡུལ”གྱི་འཐབ་ཇུས་ཆེན་པོའི་ངེས་གནས་དང་བཀོད་སྒྲིག་ལ་དམིགས་ཏེ་བོད་ཀྱིས་ཡུལ་སྐོར་ལས་རིགས་རིམ་སྤོར་ཧུར་ཐག་བྱས་ཡོད་པ་རེད། འདས་ཟིན་པའི་ལོ་བཅུ་ཕྲག་ཁ་ཤས་རིང་གཙུག་ལག་ཁང་དེ་ཉིད་A5རིམ་པའི་མཛེས་ལྗོངས་ཁུལ་དུ་རིམ་སྤོར་བྱས་པ་དང་། རྩྭ་མདའ་ས་ཚལ་—གུ་གེ་དེ་ཉིད་རྒྱལ་ཁབ་རིམ་པའི་མཛེས་ལྗོངས་གྲགས་ཅན་ཁུལ་དུ་གྱུར་བ། དངོས་ལྗོངས་ཟློས་གར《འུན་ཤིང་ཀོང་ཇོ》རྒྱུན་གཏན་ཅན་གྱི་ཚོང་ལས་འཁྲབ་སྟོན་ཐུབ་ནས་རིག་གནས་དང་ཡུལ་སྐོར་ཟུང་འབྲེལ་སྔར་བས་དམ་ཟབ་ཏུ་ཕྱིན་ཡོད་པ་རེད།

ཡུལ་སྐོར་ཐོན་ལས་དབྱར་མཚོ་རྒྱས་པ་བཞིན་འཕེལ་རྒྱས་བྱུང་བ་དང་དེའི་དམངས་ཕྱུག་ནུས་པ་རྒྱུན་ཆད་མེད་པ་མངོན་གསལ་དོད་དུ་ཕྱིན་ནས་ཡུལ་སྐོར་ལས་རིགས་ནང་ཞུགས་མཁན་ཞིང་འབྲོག་པ་ཇེ་མང་དུ་སོང་ཡོད། བོད་ཤར་རྒྱུད་ཀྱི་ར་འོག་མཚོའི་ཉེ་འཁོར་གྱི་གྲོང་མི་མང་པོ་ཞིག་གིས་ཐུན་མོང་མ་ཡིན་པའི་རི་དང་། མཚེའུ། འཁྱག་རོམ་བཅས་ཀྱི་ལེགས་ཆར་བརྟེན་ནས“བོད་ཁྱིམ་སྤྲོ་སྐྱིད་ཁང”གི་ཁྱིམ་ཚང་མགྲོན་ཁང་གཉེར་བས་ཡུལ་སྐོར་བའི་དགའ་བསུ་ཆེན་པོ་ཐོབ་ཡོད་པ་རེད། ཉིང་ཁྲིའི་ཁྱིམ་ཚང་མགྲོན་ཁང་ཡང་ཆར་རྗེས་ཀྱི་མྱུ་གུ་བཞིན་འཕེལ་རྒྱས་བྱུང་བ་དང་སྦྲགས་གྲོང་ཁྱེར་ཡོངས་ཀྱི་ཁྱིམ་ཚང་མགྲོན་ཁང་གི་གྲངས་འབོར་200ལས་བརྒལ་ཡོད་པ་རེད།