ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། གསར་འགོད་པས་ཤེས་རྟོགས་བྱུང་བར་གཞིགས་ན། ཡུལ་སྐོར་བའི་ཡིད་དབང་འཕྲོག་ཐབས་བྱ་ཆེད་འདི་ལོའི་ཟླ་བ་བཅུ་གཅིག་པའི་ཚེས་གཅིག་ཉིན་ནས་ཟླ་བ་གསུམ་པའི་ཚེས་སོ་གཅིག་ཉིན་བར་བོད་ཀྱིས “དགུན་དུས་བོད་དུ་ཡུལ་སྐོར་དུ་འགྲོ་བ ”ཞེས་པའི་གཟིགས་སྐྱོང་སྲིད་ཇུས་མུ་མཐུད་ལག་བསྟར་བྱ་རྒྱུ་ཡིན་པ་སྟེ། མཛེས་ལྗོངས་ཁུལ་དང་མཛེས་ལྗོངས་ས་ཚིགས་མང་ཆེ་བར་ཡུལ་སྐོར་དུ་ཡོང་མཁན་ཉུང་བའི་དུས་ཚིགས་ཀྱི་རིན་གོང་ལག་བསྟར་བྱས་ཏེ་སྤ་སེའི་རིན་གོང་50%གཅོག་རྒྱུ་དང་མགྲོན་ཁང་གི་རིན་གོང་ཡང་40%ནས་60%བར་གཅོག་རྒྱུ་དང་ཆབས་ཅིག་ཡུལ་སྐོར་ལས་དོན་ཁང་མང་ཆེ་བས་ད་དུང་འགྲོ་སོང་ཆུང་ལ་སྐྱོད་རིན་ཆེ་བའི་རྩ་ཆེའི་ཡུལ་སྐོར་འགྲོ་ལམ་མང་པོ་ཞིག་བསྟན་རྒྱུ་ཡིན་པ་རེད།

    ཡུལ་སྐོར་བ་སྣ་ཚོགས་ཀྱི་དགོས་མཁོ་བསྐངས་ནས་དགུན་དུས་བོད་དུ་ཡུལ་སྐོར་དུ་སྐྱོད་མཁན་ཚོར་མིག་གི་ལོངས་སྤྱོད་གྱ་ནོམ་པ་ཞིག་ཡོང་བ་བྱ་ཆེད་འདི་ལོའི “དགུན་དུས་བོད་དུ་ཡུལ་སྐོར་དུ་འགྲོ་བ ”ཞེས་པའི་བྱེད་སྒོ་སྤེལ་རིང་བོད་རང་སྐྱོང་ལྗོངས་ཡུལ་སྐོར་ཅུས་ཀྱིས་སྲོལ་རྒྱུན་ཡུལ་སྐོར་འགྲོ་ལམ་འགའ་ཞིག་བསྐྱར་སྒྲིག་བྱས་ནས “ཉིང་ཁྲིའི་སྣོད་བཅུད་ལ་བལྟ་བ ”དང་། “བོད་བྱང་ཐང་གི་རི་སྐྱེས་སྲོག་ཆགས་ལ་བལྟ་བ ”“མངའ་རིས་ཀྱི་གནས་རི་དང་བླ་མཚོར་བལྟ་བ ”ལ་སོགས་པའི་ཁྱད་ཆོས་མི་འདྲ་བའི་དགུན་དུས་ཡུལ་སྐོར་ལམ་ཐིག་བདུན་བསྟན་རྒྱུ་ཡིན་པ་རེད།