ཤིན་ཧྭ་གསར་འགྱུར་ཁང་བོད་ལྗོངས་ཉིང་ཁྲི་ནས་ཟླ་10ཚེས་19ཉིན་གློག་འཕྲིན་འབྱོར་གསལ། “སྟོན་ཟླ་བཅུ་པར་ཉིང་ཁྲིར་བསྐྱོད ”ཅེས་པ་བརྗོད་བྱ་གཙོ་བོར་བྱེད་པ་དང་དུས་ཡུན་ཉིན་བདུན་ཡིན་པའི་ཡར་ཀླུང་གཙང་པོའི་གྲོག་རོང་ཆེ་མོའི་ཡུལ་སྐོར་དུས་ཆེན་སྐབས་བདུན་པ་ཚེས་18ཉིན་བོད་ལྗོངས་ཉིང་ཁྲི་ས་ཁུལ་བརྒྱད་གཅིག་གྲོང་རྡལ་ཉང་ཆུའི་གཙང་འགྲམ་དུ་འགོ་ཚུགས་པ་རེད།

    བོད་ལྗོངས་ཉིང་ཁྲི་ས་ཁུལ་ཡུལ་སྐོར་ཅུས་ཀྱི་ཅུས་ཀྲང་ཝང་ཅུན་གྱིས “ཡར་ཀླུང་གཙང་པོའི་གྲོག་རོང་ཆེ་མོའི་རིག་གནས་ཡུལ་སྐོར་དུས་ཆེན་ནི་ཉིང་ཁྲིའི་ཡུལ་སྐོར་ཐོན་ཁུངས་འོས་སྦྱོར་བྱེད་པ་དང་ས་གནས་དེ་གའི་བོད་རིགས་དང་། ལྷོ་པ། མོན་པ་བཅས་ཀྱི་ལོ་རྒྱུས་རིག་གནས་མངོན་པ་བྱས་ཏེ་ཉིང་ཁྲིའི་ཡུལ་སྐོར་ལས་རིགས་དང་དཔལ་འབྱོར་དང་རིག་གནས་ཕྱོགས་ཡོངས་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་ཡུལ་སྐོར་གྱི་རྟེན་འབྲེལ་མཛད་སྒོ་ཞིག་ཡིན་ལ་རྨི་ལམ་ལྟ་བུའི་ཡུལ་སྐོར་ལམ་བུ་ཞིག་དེ་བས་ཡིན ”ཞེས་བཤད་པ་རེད།

    ངོ་སྤྲོད་བྱས་པར་གཞིགས་ན། དུས་ཆེན་གྱི་རིང “བོད་ཟས་ཟ་བ་དང་ཀོང་པོ་བ་བྱེད་པའི ”དམངས་སྲོལ་གོམས་འདྲིས་ཉམས་སུ་མྱོངས་བ་དང་། ཀླུ་ནང་རི་ཁུལ་སྐོར་བའི་རྐང་འཁོར་འགྲན་བསྡུར་བྱེད། སེམས་ཀྱི་ཉི་ཟླ་འཚོལ ”ཞེས་པའི་པར་རྒྱག་འགྲན་བསྡུར་ཆེ་མོ་སོགས་ཀྱི་བྱེད་སྒོ་སྤེལ་ནས་ཡུལ་སྐོར་བ་ཚོར་ཀོང་པོའི་དམངས་སྲོལ་གོམས་འདྲིས་ཇི་མ་ཇི་བཞིན་ཞིག་ལོངས་སུ་སྤྱོད་དུ་འཇུག་པ་བཅས་བྱས་པ་དང་། ལྷན་འཛོམས་ཀྱིས་རྐང་ཐང་མར་བསྐྱོད་པ་དང་པར་རྒྱག་ལ་བརྟེན་ནས་དམངས་གཞས་འཚོལ་བསྡུ་བྱེད་པ་སོགས་ཀྱི་བྱེད་སྒོ་སྤེལ་བ་དེས་གྲོག་རོང་ཆེ་མོའི་ཡུལ་སྐོར་མྱུལ་དཔྱད་ཀྱི “བསྡུ་རུབ་བརྡ ”བཏང་བ་དང་། གཞན་ཡང་ཀླུ་ནང་ཡུལ་ལྗོངས་ཁུལ་དུ་རྟ་བཞོན་པ་དང་མདའ་འཕེན་འགྲན་བསྡུར་དང་དེ་བཞིན་གནས་ཡུལ་ལུང་ཤུར་གྱི་ལྷོ་པའི་དམངས་སྲོལ་གོམས་འདྲིས་ཀྱི་མེ་ཕུང་བསྲེགས་ཟས་དགོང་ཚོགས་བཅས་ཀྱིས་གྲོག་རོང་ཆེ་མོའི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཐུན་མོང་མ་ཡིན་པའི་རྣམ་པ་གཞན་ཞིག་མངོན་པ་བྱས་པ་རེད།

    རིག་གནས་དུས་ཆེན་རིང་ཡུལ་སྐོར་བ་ཡོང་མང་བའི་གླེང་སྟེགས་འཚོགས་ནས་རྒྱལ་ཕྱི་རྒྱལ་ནང་གི་ཡུལ་སྐོར་ལས་རིགས་ཀྱི་མཁས་དབང་དང་། ཡུལ་སྐོར་མཛེས་ལྗོངས་ཁུལ་གྱི་གཉེར་སྐྱོང་པ། ཚོགས་པ་སྒྲིག་འཛུགས་ཁང་གི་འགན་འཁུར་མི་སྣ་སོགས་གདན་ཞུས་ལྟར་དུས་བཞིའི་ཡུལ་སྐོར་གྱི་བརྗོད་བྱ་གཙོ་བོར་དམིགས་ནས་ཆེད་ལས་ཞིབ་བསྡུར་སྤེལ་ཏེ་ཉིང་ཁྲི་ས་ཁུལ་དུ་དུས་བཞིའི་ཡུལ་སྐོར་ཆེད་རྩ་ཆེན་གྱི་ཉམས་མྱོང་དང་བསམ་ཕྱོགས་འདོན་རྒྱུ་ཡིན་པ་རེད།