ཟླ་བ་སྒྲོལ་དཀར་གྱི“ཁྱིམ་ཚང་འགྲུལ་ཁང”
སྟོན་དུས་ཀྱི་ཡུམ་བུ་བླ་མཁར་དུ་ཧ་ཅང་འཁྲུག་ཆ་དོད། སྙན་གྲགས་ལ་སྨོན་ནས་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་བ་ཚོ “བོད་ཀྱི་ཕོ་བྲང་དང་པོའི ”ཡིད་དབང་འཕྲོག་ཤུགས་མྱོང་ཚོར་ཐུབ་ཡོད། ཡུམ་བུ་བླ་མཁར་འོག་གི་སྣེ་གདོང་རྫོང་ཁྲ་འབྲུག་གྲོང་རྡལ་སྨོན་གྲོང་སྒང་གྲོང་མི་ཨུ་ཡོན་ལྷན་ཁང་གི་ཟླ་བ་སྒྲོལ་དཀར་གྱི་ཁྱིམ་མདུན་གྱི་བོད་རྒྱ་ཡིག་རིགས་གཉིས་ཀྱི་ཐོག་ནས་བྲིས་པའི “ཁྱིམ་ཚང་འགྲུལ་ཁང ”ཞེས་པའི་ཡིག་ཆེན་དེ་དག་དེ་བས་མངོན་གསལ་དོད།
སྦྱིན་བདག་གི་སྣེ་ཁྲིད་འོག་གསར་འགོད་པས་ཁོང་གི་ཁྱིམ་དུ་འགྲོ་སྐབས་མིག་ལམ་དུ་ནིའུ་གསིང་ཁྲོད་བྱང་ལ་ཁ་ཕྱོགས་པའི་མཛེས་སྡུག་ལྡན་པའི་བོད་བཟོའི་ཐོག་བརྩེགས་ཉིས་ལྡན་གྱི་ཁང་པ་ཞིག་འཆར་བྱུང་།
སྨོན་གྲོང་སྒང་གྲོང་མི་ཨུ་ཡོན་ལྷན་ཁང་གི་གྲོང་མི་དཀྱུས་མ་ཞིག་ཡིན་པའི་ཟླ་བ་སྒྲོལ་དཀར་ནི་ཁྱིམ་ཚང་གིས་སྦྱིན་བདག་ཡིན་ལ་ཁྱིམ་ཚང་འགྲུལ་ཁང་གི་གཙོ་གཉེར་བའང་ཡིན་པ་དང་ལས་ཀ་བྱེད་སྐབས་བདེ་ལྕག་འཁྱུག་པོ་དང་འཇོན་པོ་ཡོད་པ་རེད། ཏང་གི་དམངས་ཕྱུག་སྲིད་ཇུས་ཀྱི་སྣེ་ཁྲིད་འོག་ཁོང་གིས་རང་ཉིད་ཀྱི་འབད་བརྩོན་བརྒྱུད་གྲོང་གསེབ་ཀྱི་བུད་མེད་དཀྱུས་མ་ཞིག་ནས་དེ་གར་སྐད་གྲགས་ཆོད་པའི་བུད་མེད་ཕྱུག་འགྱུར་འཇོན་ཐང་ཅན་ཞིག་ཏུ་འགྱུར་བ། འགྲུལ་ཁང་འཛུགས་པ་ནས་ད་བར་ཚོང་ཇེ་ཡག་ཏུ་འགྲོ་བ་དང་ད་ལྟ་ཁོང་ནི་གྲོང་ཚོའི་ཁྱིམ་ཚང་འགྲུལ་ཁང་ནང་གི་ཚོང་ཡག་ཤོས་ཡིན་པའི “བུད་མེད་སྦྱིན་བདག ”ཅིག་ཏུ་འགྱུར་ཡོད།
གསར་འགོད་པས་ཁོང་ལ་དེ་སྔོན་ཁྱིམ་ཚང་འགྲུལ་ཁང་གཉེར་དགོས་དོན་གང་ཡིན་ནམ་ཞེས་འདྲི་སྐབས་ཟླ་བ་སྒྲོལ་དཀར་གྱིས་རང་ཉིད་ཀྱི “ཕྱུག་འགྱུར་ཐབས་མཆོག ”བཤད་བྱུང་།
ཁྲ་འབྲུག་གྲོང་རྡལ་གྱི་སྣ་མང་ཕུན་སུམ་ཚོགས་པའི་ཡུལ་སྐོར་ཐོན་ཁུངས་ལ་བརྟེན་ནས་ཟླ་བ་སྒྲོལ་དཀར་གྱིས་ཁྱིམ་ཚང་འགྲུལ་ཁང་ནང་མི་རིགས་ཀྱི་ཁྱད་ཆོས་ཟབ་མོ་ལྡན་པའི “བོད་དུད་སྤྲོ་སྐྱིད་ཁང ”བཙུགས་པ་རེད། ཉིན་ལྟར་སྐུ་མགྲོན་སླེབས་དུས་སེམས་རྩ་འཁོལ་བའི་ཁོང་གིས་མགྲོན་པོར་ཁྲ་འབྲུག་གྲོང་རྡལ་གྱི་ཡུལ་སྐོར་མཛེས་ལྗོངས་ཁུལ་ངོ་སྤྲོད་བྱེད་པ་དང་མགྲོན་པོ་རྣམས་བོད་རིགས་མང་ཚོགས་ཀྱི་ཁྱིམ་དུ་ཁྲིད་ནས་བོད་ཟས་བཟའ་བ་དང་བོད་མི་རིགས་ཀྱི་རིག་གནས་མྱོང་ཚོར་ཐུབ་པ་བྱེད་ཀྱི་ཡོད་པས་ཡུལ་སྐོར་བའི་གདེང་འཇོག་བཟང་པོ་ཐོབ་ཡོད།
ཟླ་བ་སྒྲོལ་དཀར་གྱིས་གསར་འགོད་པར་ངའི་ཁྱིམ་གྱི་ཁྱིམ་ཚང་འགྲུལ་ཁང་ལ་ཁྱོན་ཉལ་ཁྲི་30ལྷག་ཙམ་ཡོད་པ་དང་དགོང་མོ་གཅིག་ལ་སྒོར་50ཡིན་པས་ལོ་རེའི་ཡོང་འབབ་སྒོར་ཁྲི་5ལྷག་ཙམ་ཟིན་གྱི་འདུག ད་ལྟ་ནི་ཡུལ་སྐོར་བ་མང་བའི་དུས་ཚིགས་ཡིན་པས་ཆ་སྙོམས་ཉིན་རེར་མགྲོན་པོ་ལྔ་དྲུག་ཡོང་གི་ཡོད་པ་དང་སྐབས་འགར་ད་དུང་ཉལ་ཁྲི་འདང་གི་མི་འདུག་ཅེས་བཤད།
གཞི་ཁྱོན་རྒྱ་ཆེ་རུ་གཏོང་ཆེད་ཟླ་བ་སྒྲོལ་དཀར་གྱིས་མ་དངུལ་གྲབས་གསོག་བྱས་ནས་བརྒྱ་ཟོག་ཚོང་ཁང་ཞིག་བཙུགས་པ་དང་ཁྱིམ་ཚང་གི་ཡོང་འབབ་ཀྱང་དེ་སྔོན་གྱི་ལོ་རེར་སྒོར་ཁྲི་2ནས་སྒོར་ཁྲི་4བར་འཕར་ཡོད། “ད་ལྟ་འཚོ་བ་ཕྱུག་པོ་ཆགས་པ་དེ་དག་ཚང་མ་ནི་ཏང་གི་སྲིད་ཇུས་བཟང་པོ་ལས་བྱུང་བ་ཞིག་ཡིན་པས་ཐུགས་རྗེ་ཆེ་ཞུ་རྒྱུ་ཡིན ”ཞེས་ཟླ་བ་སྒྲོལ་དཀར་གྱིས་སེམས་འགུལ་ཐེབས་པའི་ངང་བཤད།
“ཡུལ་སྐོར་བ་མང་བའི་དུས་ཚིགས་སུ་ལས་ཀ་བྱེད་མཁན་མི་འདང་བས་གྲོང་རྡལ་ནང་གི་ཁྱིམ་ཚང་དབུལ་པོ་ནས་མི་གཉིས་འགྲུལ་ཁང་དུ་ཞབས་ཞུ་བར་བསྡུས་པ་ཡིན། དེ་གར་ལྟོ་ཆས་བཟས་པ་དང་ཞག་སྡོད་ཕུད་ཟླ་རེར་གླ་ཆ་སྒོར་700ལྷག་ཙམ་སྤྲོད་ཀྱི་ཡོད ”ཅེས་ཟླ་བ་སྒྲོལ་དཀར་གྱིས་སྤོབས་སེམས་ཆེན་པོས་བཤད།