གསར་འགོད་པས་རང་སྐྱོང་ལྗོངས་ཡུལ་སྐོར་ཅུས་ནས་ཤེས་རྟོགས་བྱུང་བར་གཞིགས་ན། ད་ལོའི་ཟླ་དང་པོ་ནས་བརྒྱད་པའི་བར་བོད་ཀྱི་ཡུལ་སྐོར་ལས་རིགས་རྒྱུན་བསྲིང་ངང་འཕེལ་རྒྱས་ཕྱིན་ནས་ཟླ་དང་པོ་ནས་བརྒྱད་པ་བར་ལྗོངས་ཡོངས་ཀྱིས་རིམ་རྩིས་བྱས་ན་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་621ལ་སྣེ་ལེན་ཞུས་པ་དེ་དུས་མཚུངས་དང་བསྡུར་ན་22.1%འཕར་བ་དང་སྤྱིའི་ཡོང་འབབ་མི་དམངས་ཤོག་སྒོར་དུང་ཕྱུར་63.4ཟིན་པ་དེ་དུས་མཚུངས་དང་བསྡུར་ན་42.7%འཕར་ཡོད་པ་རེད།

    རང་སྐྱོང་ལྗོངས་ཡུལ་སྐོར་ཅུས་ཀྱི་ཅུས་ཀྲང་གཞོན་པ་ཝང་སུང་ཕིང་གིས་ད་ལོ་ནི་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་ལོ་ཞིག་ཡིན་པར་བརྟེན་ཡུལ་སྐོར་བ་དེ་བས་མང་བ་བོད་དུ་ལོ་60ཡི་རིང་གངས་ལྗོངས་ས་མཐོར་བྱུང་བའི་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་ཆེན་པོ་མྱོང་བར་ཡོང་གི་ཡོད། ད་ལོ་བོད་ཀྱི་དུས་ཆེན་གྱི་རྟེན་འབྲེལ་ཡུལ་སྐོར་དེ་ཚད་བརྒལ་རང་བཞིན་ངང་འཕེལ་རྒྱས་ཕྱིན་ནས་ལོ་སྟོད་ཀྱི་བོད་ཀྱི་ལོ་གསར་ནས་དཔྱིད་དུས་ཀྱི་ཉིང་ཁྲིའི་ཁམ་བུའི་མེ་ཏོག་དུས་ཆེན་དང་། དབྱར་དུས་ཀྱི་མངའ་རིས་ཞང་ཞུང་རིག་གནས་དུས་ཆེན་དང་གཞིས་རྩེའི་ཇོ་རིའི་རིག་གནས་དུས་ཆེན་བར་དང་ལྷ་སའི་ཞོ་སྟོན་བཅས་བར་དུས་ཆེན་གྱི་རྟེན་འབྲེལ་ཡུལ་སྐོར་དེ་བོད་ཀྱི་ཡུལ་སྐོར་ལས་རིགས་ཀྱི་མིང་བྱང་གསར་པ་ཞིག་ཏུ་འགྱུར་བ་མ་ཟད། ཡུལ་སྐོར་ལས་རིགས་འཕེལ་རྒྱས་འགྲོ་བའི་སྐུལ་གཏོང་ཡོ་བྱད་ལྟ་བུར་གྱུར་ནས་ལྷ་སའི་ཞོ་སྟོན་རིང་གི་ཉིན་7ཁོ་ནར་བོད་ཀྱིས་ཡུལ་སྐོར་བ་མི་ཐེངས་ཁྲི་90.64ལ་སྣེ་ལེན་ཞུས་ཡོད་ཅེས་བཤད་པ་རེད།

འདི་ནི་ཡུལ་སྐོར་བས་བཀྲས་ལྷུན་དགོན་དུ་ལྟ་སྐོར་བྱེད་བཞིན་པ།