རང་སྐྱོང་ལྗོངས་ཡུལ་སྐོར་ཅུས་ཀྱི་འགན་འཁུར་བས་རང་ལྗོངས་ཀྱི་དེང་སྐབས་ཡུལ་སྐོར་ལས་རིགས་ཀྱི་འཕེལ་རྒྱས་ཐད་དབྱེ་ཞིབ་བྱེད་སྐབས་ལྷ་སའི་ཞོ་སྟོན་དང་གཞིས་རྩེའི་ཇོ་མོ་གླང་མའི་རིག་གནས་དུས་ཆེན་སོགས་ཀྱི་དུས་སྟོན་བྱེད་སྒོ་བདེ་བླག་ངང་སྤེལ་བ་དེས་དང་ཐོག་འཕེལ་རྒྱས་བྱུང་བཞིན་པའི་བོད་ཀྱི་ཡུལ་སྐོར་སྔར་བས་འཕེལ་རྒྱས་ཆེན་པོ་བྱུང་བ་དང་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་བ་ས་མཐོར་སླེབས་ནས་གངས་ལྗོངས་ཀྱི་མཛེས་ཉམས་དང་ཐུན་མོང་མ་ཡིན་པའི་ཡུལ་སྲོལ་གོམས་གཤིས་ཉམས་སུ་མྱོང་གི་ཡོད་ཅེས་བརྗོད་པ་རེད།

    བསྡོམས་རྩིས་བྱས་པར་གཞིགས་ན། ཟླ་དང་པོ་ནས་བརྒྱད་པའི་བར་ལྗོངས་ཡོངས་ཀྱིས་རིམ་རྩིས་བྱས་ན་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་621ལ་སྣེ་ལེན་ཞུས་པ་དེ་ན་ནིང་གི་དུས་མཚུངས་ལས་22.1%འཕར་ཡོད་པ་དང་ཡུལ་སྐོར་ཡོང་འབབ་ཁྱོན་བསྡོམས་སྒོར་ཁྲི་634103བྱུང་བ་དེ་དུས་མཚུངས་ལས་42.7%འཕར་ཡོད་པའི་ནང་ཟླ་བརྒྱད་པར་ལྗོངས་ཡོངས་ཀྱིས་ཡུལ་སྐོར་བ་མི་ཐེངས་ཁྲི་22ལ་སྣེ་ལེན་ཞུས་པ་དེ་ན་ནིང་གི་ཟླ་བརྒྱད་པ་ལས་26.9%འཕར་ཡོད་པ་རེད།

    གསར་འགོད་པས་ཡུལ་སྐོར་ལས་དོན་ཁང་དང་མགྲོན་ཁང་ཆེ་གྲས་ཁག་ནས་ཤེས་རྟོགས་བྱས་པར་གཞིགས་ན། ཟླ་བདུན་པ་ཤར་ཚུན་བོད་དུ་ཡུལ་སྐོར་དུ་ཡོང་མཁན་མགྱོགས་མྱུར་ངང་མང་དུ་སོང་ནས་མགྲོན་ཁང་དང་ཨར་ཁང་ནང་སྡོད་ཚད་སྔོན་ཆད་ལས་མཐོ་རུ་ཆེས་ཆེར་ཕྱིན་ཡོད། ཡུལ་སྐོར་ལས་དོན་ཁང་མང་པོ་ཞིག་དང་དེ་བཞིན་ཡུལ་སྐོར་ཞབས་ཞུའི་ཚོང་པས་ཟླ་བདུན་པར་བོད་དུ་ཡུལ་སྐོར་ལ་ཡོང་མཁན་མི་གྲངས་ཟླ་དྲུག་པ་ལས་57%ཙམ་འཕར་ཡོད་པ་དང་ཟླ་བརྒྱད་པར་ཡུལ་སྐོར་དུ་ཡོང་མཁན་མི་གྲངས་20%ཙམ་མུ་མཐུད་འཕར་ཡོད་ཅེས་བརྗོད་ཡོད་པ་རེད།

    བོད་ལྗོངས་གཞོང་པ་ལྷ་ཆུ་ཨར་ཁང་ཆེ་མོའི་ཚོང་གཉེར་པུའི་སྤྱི་གཉེར་བ་ནོར་སྒྲོན་གྱིས “ཞོ་སྟོན་རིང་ང་ཚོའི་ཨར་ཁང་ནང་མགྲོན་པོ་སྡོད་ཚད་96%ཡན་ཟིན་པ་དང་དུས་ཚོད་མང་ཆེ་བའི་ནང 100%ལོན་ཡོད་ལ་སྤྱིར་བཏང་གི་ཚད་ལྡན་ཁང་མིག་གཅིག་གི་རིན་གོང་ནི་སྒོར་320ཡིན ”ཞེས་བརྗོད་པ་དང་ཁོང་གིས་ཞོ་སྟོན་ཚར་རྗེས་སྐར་རིམ་གསུམ་པའི་མགྲོན་ཁང་ཁ་ཤས་ནང་མགྲོན་པོ་སྡོད་ཚད་དམའ་རུ་ཕྱིན་པ་དང་གཞོང་པ་ལྷ་ཨར་ཁང་ཆེ་མོའི་ནང་མགྲོན་པོ་སྡོད་ཚད་ནི་60%ཡིན། འོན་ཀྱང་ཟླ་དགུ་པར་ཡུལ་སྐོར་བ་ཉུང་དུ་ཕྱིན་པའི་དབང་གིས་གྲ་སྒྲིག་ཨང་བསར་བྱས་པ་བརྒྱུད་ཟླ་བཅུ་པ་ཤར་དུས་རང་ལྗོངས་ཀྱི་ཡུལ་སྐོར་ལས་རིགས་ཀྱིས “རྒྱལ་སྟོན ”གྱི་སྤྲོ་སྐྱིད་གཟའ་འཁོར་བསུ་རྒྱུ་ཡིན་པ་དང་དེའི་ཐད་ཡུལ་སྐོར་ཁེ་ལས་ཆེ་གྲས་ཁག་ལ་ཡིད་ཆེས་ཀྱིས་ཁེངས་ནས་ཡོད་ཅེས་བརྗོད་པ་རེད།