བོད་རང་སྐྱོང་ལྗོངས་ཡུལ་སྐོར་ཅུད་ཀྱི་བསྡོམས་རྩིས་ལས་གསལ་བར། རྒྱལ་སྟོན་དུས་ཆེན་གྱི་གུང་གསེང་རིང་བོད་ཀྱིས་རིམ་རྩིས་བྱས་ན་ཡུལ་སྐོར་བ་མི་ཐེངས་ཁྲི་43.17ལ་སྣེ་ལེན་བྱས་པ་དང་ན་ནིང་གི་དུས་མཚུངས་ལས་བརྒྱ་ཆ་26.5འཕར་སྣོན་བྱུང་ཡོད།

    དེའི་ནང་ནས་ཞག་སྡོད་བྱེད་མཁན་གྱི་ཡུལ་སྐོར་བ་མི་ཐེངས་ཁྲི་18.05ལ་སྣེ་ལེན་བྱས་པ་དང་། ཉིན་གཅིག་ཡུལ་སྐོར་བྱེད་མཁན་གྱི་ཡུལ་སྐོར་བ་མི་ཐེངས་ཁྲི་25.12ལ་སྣེ་ལེན་བྱས་པས། ཁག་སོ་སོར་དུས་མཚུངས་ལས་བརྒྱ་ཆ་21.2དང་བརྒྱ་ཆ་28.9འཕར་སྣོན་བྱུང་ཡོད་པ་དང་། ཡུལ་སྐོར་ཡོང་འབབ་སྒོར་དུང་ཕྱུར་1.73མངོན་གྱུར་བྱུང་བ་དང་དུས་མཚུངས་ལས་བརྒྱ་ཆ་31.6འཕར་སྣོན་བྱུང་ཡོད་ཅིང་། བོད་ཀྱི་ཡུལ་སྐོར་ལས་རིགས་དེ་འདི་ལོའི་ནང་ཚུན་དུ་མགྱོགས་མྱུར་འཕེལ་རྒྱས་འགྲོ་བའི་རྣམ་པ་རྒྱུན་མཐུད་ཐུབ་ནས་ལོ་རྒྱུས་ཐོག་དུས་མཚུངས་ཀྱི་ཆུ་ཚད་ཡག་ཤོས་བཏོད་ཡོད།

    བོད་རང་སྐྱོང་ལྗོངས་ཡུལ་སྐོར་ཅུད་ཀྱི་འགན་ཁུར་བས་ངོ་སྤྲོད་གནང་བར། ད་ལོའི་རྒྱལ་སྟོན་དུས་ཆེན་གྱི་གུང་གསེང་རིང་བོད་ཀྱི་ཡུལ་སྐོར་ཚན་པས་དུས་ཆེན་གོང་དུ་བཀོད་སྒྲིག་སྔ་ཙམ་བྱེད་པ། འཆར་འགོད་སྔ་ཙམ་འདིང་བ། གྲ་སྒྲིག་སྔ་ཙམ་བྱེད་པ། དུས་ཆེན་གཏོང་སྐབས་དོ་དམ་ནན་པོ་བྱེད་པ། བརྟག་དཔྱད་དང་ལྟ་སྐུལ་སྣེ་ཁྲིད་ནན་པོ་བྱེད་པ་བཅས་ལག་བསྟར་ལེགས་པོ་བྱས་ནས། ད་ལོའི་རྒྱལ་སྟོན་དུས་ཆེན་རིང་གི་ཡུལ་སྐོར་སྣེ་ལེན་ལས་དོན་ལེགས་གྲུབ་གང་ལེགས་ཡོང་བར་འགན་ལེན་ཏན་ཏིག་བྱས་པས། “བདེ་འཇགས། སྤུས་ཚད། སྒྲིག་གཞི། ཕན་ནུས ”བཅས་བཞི་གཅིག་འགྱུར་གྱི་དམིགས་ཚད་མངོན་གྱུར་བྱུང་ཡོད།

    ཤེས་རྟོགས་བྱུང་བར་གཞིགས་ན། བོད་ཀྱི་སྲོལ་རྒྱུན་གྱི་ལྗོངས་ཡུལ་ཁག་ལ་སྔར་བཞིན་ལྟ་སྐོར་བྱེད་མཁན་མང་པོ་ཡོད། རྒྱལ་སྟོན་དུས་ཆེན་གྱི་གུང་གསེང་རིང་ཕོ་བྲང་པོ་ཏ་ལ་དང་ལྷ་ལྡན་གཙུག་ལག་ཁང་། བཀྲ་ཤིས་ལྷུན་པོ། ཇོ་རི། གནམ་མཚོ། ཉིང་ཁྲི་གྲོག་རོང་ཆེན་མོ་སོགས་གྲགས་ཅན་ལྗོངས་ཁུལ་ནི་ལྟ་སྐོར་བྱེད་སའི་དམིགས་ས་གཙོ་བོ་ཡིན་པ་རེད། སྲོལ་རྒྱུན་གྱི་ལྟ་སྐོར་ཚོགས་པས་ཡུལ་སྐོར་བྱེད་པ་དེ་སྔར་རྒྱུན་བཞིན་མང་དུ་འགྲོ་བའི་ཁར། ད་དུང་ལྗོངས་ནང་ཁོངས་ཀྱི་ཉིན་གཅིག་ཡུལ་སྐོར་དང་གྲོང་ཁྱེར་ཉེ་འདབས་ཀྱི་ཉིན་གཅིག་ཡུལ་སྐོར་སོགས་ལམ་ཐག་ཐུང་བའི་ཡུལ་སྐོར་ལ་ཡུལ་སྐོར་བ་ཚོའི་དགའ་བསུ་ཆེན་པོ་ཐོབ་ཀྱི་ཡོད། གྲོང་ཁྱེར་མཛེས་ལྗོངས་ཡུལ་སྐོར་དང་གྲོང་ཁྱེར་ཉེ་འདབས་སུ་གནས་པའི་ཤང་ལ་སྤྲོ་འཆམ་བྱེད་པ་དེ་གུང་གསེང་རིང་ཡུལ་སྐོར་བ་ཚོས་སྤྲོ་གསེང་བྱེད་པ་དང་དམངས་སྲོལ་མྱོང་རོལ་བྱེད་པ། སྣོད་བཅུད་ལ་མྱོང་རོལ་བྱེད་པའི་ནང་དོན་གཙོ་བོར་གྱུར་ཡོད། མ་ཟད་སྒེར་གྱི་རླངས་འཁོར་བཏང་ནས་ཡུལ་སྐོར་བྱེད་པ་དང་རྐང་འཁོར་བཏང་ནས་ཡུལ་སྐོར་བྱེད་པ་དེ་ད་ལོའི་བོད་ཀྱི་རྒྱལ་སྟོན་དུས་ཆེན་གྱི་གུང་གསེང་རིང་ཡུལ་སྐོར་ཁྲོམ་རའི་བཀྲག་མདངས་འཚེར་ས་ཞིག་ཏུ་གྱུར་ཡོད།