ནམ་སྐྱ་གཏོང་བའི་སྐབས་ཁྱིམ་ཚང་མགྲོན་ཁང་གཉེར་མཁན་རིན་ཆེན་བཟང་མོ་ལས་ལ་བྲེལ་འགོ་ཚུགས།

    “ཉིན་ཤས་གོང་ཁ་པར་ཐོག་ནས་ཁང་པ་མངགས་མཁན་འགྲུལ་པ་ཚོ་དེ་རིང་ཉིན་དགུང་ང་ཚོའི་ཟ་ཁང་ལ་ལྟོ་ཟ་བར་ཡོང་གི་རེད ”ཅེས་མལ་གྲོ་གུང་དཀར་རྫོང་རུ་ཐོག་ཤང་གི་ཞིང་པ་རིན་ཆེན་བཟང་མོས་བཤད།

    རུ་ཐོག་ཤང་ནི་ཁྲོན་བོད་ལམ་ཐོག་གནས་པ་དང་དེ་གའི་ཆུ་ཚན་གྱིས་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བའི་ཡིད་དབང་འཕྲོག་གི་ཡོད། རིན་ཆེན་བཟང་མོའི་ཁྱིམ་ཚང་མགྲོན་ཁང་དེ་རུ་ཐོག་ཆུ་ཚན་གྱི་འགྲམ་དུ་གནས།

    རིན་ཆེན་བཟང་མོའི་ཁྱིམ་ཚང་མགྲོན་ཁང་ནི་དཔེར་འོས་ཀྱི་བོད་བཟོའི་སྒོ་ར་ཞིག་ནང་རྡོ་ཤིང་ལས་གྲུབ་པའི་ཐོག་སོ་ཉིས་ཐོག་མ་ཞིག་ཡིན། སེམས་རྩ་འཁོལ་བའི་རིན་ཆེན་བཟང་མོས་གསར་འགོད་པ་ནང་དུ་འཁྲིད་དེ་འོ་དྲི་འཚུབ་འཚུབ་ཀྱི་ཇ་སྲུབས་མ་བླུགས་བྱུང་། ཁང་པའི་ནང་གི་མཛེས་བཟོ་ཚང་མ་ཤིང་ལས་གྲུབ་འདུག་པས་སྤུས་དག་ལ་གཙང་སྦྲ་ལྡན་པ་ཡང་འདུག རིན་ཆེན་བཟང་མོའི་ཁྱིམ་ཚང་མགྲོན་ཁང་ལ་སྡོད་མཁན་ཡུལ་སྐོར་བར་ཆུ་ཚན་རྒྱག་རྒྱུ་ཡོད་པ་མ་ཟད་བོད་ཟས་ཞིམ་པོ་ཞིག་ཀྱང་བཟའ་རྒྱུ་ཡོད།

    བཅར་འདྲི་བྱེད་རིང་རིན་ཆེན་བཟང་མོས་གསར་འགོད་པར་རྒྱལ་སྟོན་དུས་ཆེན་གྱི་སྔ་ནུབ་ཏུ་ཡོང་ཐེངས་གཅིག་ལ་མི་གྲངས་40ཡོད་པའི་ཡུལ་སྐོར་ཚོགས་པ་ཞིག་སླེབས་བྱུང་ཞེས་ཟེར་བཞིན་དུ་རིན་ཆེན་བཟང་མོར་ཁ་པར་ཞིག་འབྱོར་སོང་བའི་ནང་མི་གྲངས་20ལས་གྲུབ་པའི་ཀོང་ཏུང་གི་ཡུལ་སྐོར་ཚོགས་པ་ཞིག་ཉིན་གསུམ་གྱི་རྗེས་སུ་ཆུ་ཚན་རྒྱག་པ་དང་ས་གནས་དེ་གའི་ཞིང་པའི་འཚོ་བ་ཉམས་ལེན་དང་རུ་ཐོག་གི་ཁྱད་ཆོས་ལྡན་པའི “ཏིག་ཧྲུག ”གི་བྲོ་བ་མྱོང་བར་ཡོང་མཁན་ཡིན་པ་རེད་འདུག

    རིན་ཆེན་བཟང་མོས་རྒྱལ་སྟོན་དུས་ཆེན་རིང་གི་ཁང་པ་ཟླ་ཕྱེད་ཀྱི་གོང་ནས་མངགས་ཟིན་པས་ཡུལ་སྐོར་ཚོགས་པ་འདི་ཁྱིམ་མཚེས་ལ་ངོ་སྤྲོད་བྱ་རྒྱུ་ལས་མ་འདས་ཞེས་བཤད། རུ་ཐོག་ཤང་གི་འབྲེལ་ཡོད་འགན་འཁུར་བས་ཏང་གི་སྲིད་ཇུས་ཡག་པོ་ཡོད་པ་དེས་མི་སེར་གྱིས་སྲོལ་རྒྱུན་གྱི་བསྲེགས་རྨོད་གྲིས་འདེབས་ཀྱི་འཚོ་སྟངས་དོར་ནས་སྣོད་བཅུད་སྲུང་སྐྱོང་དཔལ་འབྱོར་གྱི་ཡུལ་སྐོར་ལས་གཉེར་བྱེད་ཀྱི་ཡོད། རྒྱལ་སྟོན་དུས་ཆེན་རིང་ཤང་འདི་ཡོངས་ཀྱིས་ཡུལ་སྐོར་བར་སྣེ་ལེན་ཞུས་པའི་མི་གྲངས་དང་ཡོང་འབབ་གཉིས་ཀ་དུས་རྒྱུན་གྱི་སྣེ་ལེན་བྱེད་ཚད་ལས་ལྡབ་གསུམ་ནས་ལྔ་བར་མང་དུ་ཕྱིན་ཡོད་ཅེས་ངོ་སྤྲོད་བྱས། རུ་ཐོག་ཤང་དུ་རིན་ཆེན་བཟང་མོ་ལྟ་བུའི་ཁྱིམ་ཚང་20ལྷག་ཙམ་ཡོད་པ་དང་ཁྱིམ་ཚང་མགྲོན་ཁང་ཚང་མར་ལས་བྲེལ་ཆེ་ཞིང་། ཡོང་འབབ་ཡག་པོ་བྱུང་བར་བརྟེན་ཁྱིམ་ཚང་མགྲོན་ཁང་གི་སྦྱིན་བདག་ཚང་མའི་གདོང་ནས་འཛུམ་མདངས་རྒྱས་བཞིན་མཆིས།