བོད་ལྗོངས་གནམ་མཚོར་འདི་ལོ་A4རིམ་པའི་མཛེས་ལྗོངས་ཀྱི་དཔྱད་བསྡུར་གཏན་འབེབས་ཐོབ་རེ་ཡོད་པ།
ཉེ་ཆར་རང་སྐྱོང་ལྗོངས་ཡུལ་སྐོར་སྤྲོ་འཆམ་ཅུས་ཀྱི་ཅུས་ཀྲང་གཞོན་པ་ཝང་སུང་ཕིང་གིས་རུ་སྣེ་འཁྲིད་པའི་ལྗོངས་ཡུལ་སྐོར་སྤྲོ་འཆམ་ཅུས་ཁྲིམས་འཛིན་སྤྱི་ཁྱབ་རུ་ཁག་དང་ལས་རིགས་ལྟ་སྐུལ་དོ་དམ་ཁྲུའུ་སོགས་ལས་གྲུབ་པའི་ཞིབ་བཤེར་ཚོགས་ཆུང་དང་བཅས་པས་གནམ་མཚོའི་མཛེས་ལྗོངས་ཁུལ་དུ་ལྟ་ཞིབ་བྱས་པ་རེད།
ཝང་སུང་ཕིང་དང་བཅས་པས་གནམ་མཚོ་A4རིམ་པའི་མཛེས་ལྗོངས་ཁུལ་དུ་འཇུག་རྒྱུའི་ཡིག་ཐོག་སྙན་ཞུ་འབུལ་བའི་སྐོར་གྱི་ལས་དོན་སྤེལ་ཚུལ་སྙན་ཞུ་ཉན་ཞིང་། ཝང་སུང་ཕིང་གིས “གནམ་མཚོའི་ཡུལ་སྐོར་སྤྲོ་འཆམ་མཛེས་ལྗོངས་ཁུལ་འདི་ཉིད་ལྷ་སའི་གལ་ཆེའི་ཡུལ་སྐོར་སྤྲོ་འཆམ་མཛེས་ལྗོངས་ཁུལ་ཞིག་ཡིན་པའི་ངོས་ནས་རང་སྐྱོང་ལྗོངས་ཡུལ་སྐོར་ཅུས་ཀྱིས ‘ལོ་ལྔ་ཚན་བཅུ་གཉིས་པའི ’རིང་གཏན་འཁེལ་བྱས་པའི་རྒྱལ་ཁབ་སྤྱི་གླིང་ཆེ་གྲས་བཞི་ཡི་གྲས་ཤིག་ཏུ་འཇུག་པར་ལྷ་ས་གྲོང་ཁྱེར་ཡུལ་སྐོར་ཅུས་དང་འདམ་གཞུང་རྫོང་ཡུལ་སྐོར་ཅུས་ཀྱིས་ངེས་པར་དུ་རྒྱལ་ཁབ་ཀྱི་ཚད་གཞི་གཞིར་བཟུང་མཛེས་ལྗོངས་ཁུལ་གྱི་སྒྲིག་བཀོད་ཁག་འཐུས་སྒོ་ཚང་དུ་བཏང་སྟེ་འདི་ལོ་A4རིམ་པའི་མཛེས་ལྗོངས་ཁུལ་གྱི་དཔྱད་བསྡུར་གཏན་འབེབས་བདེ་བླག་ཡོང་བའི་བརྩོན་ལེན་བྱེད་དགོས ”ཞེས་བཤད་པ་རེད།
དེ་རྗེས་ཞིབ་བཤེར་ཚོགས་ཆུང་གིས་གནམ་མཚོའི་མཛེས་ལྗོངས་ཁུལ་ནང་གི་ཡུལ་སྐོར་ཁྲོམ་རའི་ཁོར་ཡུག་དང་ཡུལ་སྐོར་ཚོགས་པ་དང་རུ་ཁག་ལ་ཞིབ་བཤེར་བྱས་པས་བཙན་བཤེད་ཀྱིས་ཉོ་བའམ་འཚོང་བ་སོགས་ཚད་མཐུན་མིན་པའི་རྣམ་པ་མཐོང་རྒྱུ་མེད་པ་རེད།