འདི་ནི་བསྟན་འཛིན་ཁྱོ་ཤུག་གིས་མཉམ་དུ་འུར་རྡོ་བསླ་བཞིན་པ།

འདི་ནི་བསྟན་འཛིན་དང་བཟའ་ཟླས་བསླས་པའི་ཐོན་རྫས་གསར་པ་ཡིན་པ།

འདི་ནི་ཉི་འབྲུག(གཡས་ཀྱི་གཉིས་པ)ལ་དཔལ་འབར་རྫོང་གི་བསླས་འཐག་རིགས་ཀྱི་བྱ་དགའ་ཨང་དང་པོ་ཐོབ་པ།

ཆབ་མདོ་གྲོང་ཁྱེར་དཔལ་འབར་རྫོང་མར་ཤོག་ཤང་ཡུལ་ཁུག་གྲོང་ཚོའི་རི་ལྡེབས་ཀྱི་ན་ཁར། བསྟན་འཛིན་དང་ཁོང་གི་བཟའ་ཟླ་ཉི་འབྲུག་གཉིས་སྐྱིལ་ཀྲུང་དུ་བསྡད་དེ་རྩིད་སྐུད་ཀྱིས་འུར་རྡོ་བསླ་བཞིན་མཆིས།

“སྐུད་པ་སྒྲིམ་དུས་དམ་དྲགས་མི་རུང་། དམ་ལྷོད་འཚམ་པོ་བྱུང་ཚེ་འུར་རྡོའི་རི་མོ་གཞི་ནས་མཛེས་པོ་ཡོང་གི་རེད”ཅེས་བསྟན་འཛིན་གྱིས་ངང་རྒྱུད་རིང་པོས་བཟའ་ཟླར་འུར་རྡོ་བསླ་སྟངས་བསླབས།

འབྲོག་རའི“རྩེད་ཆས”ནས“སོར་མོའི”སྒྱུ་རྩལ་བར།

བསྟན་འཛིན་དང་འུར་རྡོའི་ལས་དབང་ནི་བྱིས་དུས་ཕྱུགས་འཚོ་སྐབས་ནས་འགོ་ཚུགས་ཤིང་། “ཆུང་དུས་ཕྱུགས་འཚོ་སྐབས་རོགས་པ་ཚོ་དང་མཉམ་དུ་སུའི་འུར་རྡོ་མཛེས་མིན་དང་ཐག་རིང་མིན་ལ་བསྡུར་བ་གཏོང་གི་ཡོད། སྐབས་དེ་དུས་འུར་རྡོ་ནི་སྤྱོད་གོ་ཆོད་པའི་ལག་ཆ་ཞིག་རེད་ལ། རྩེད་ཆས་ཤིག་ཀྱང་རེད། འབྲོག་ཁུལ་གྱི་ཕྲུ་གུའི་ལག་ཏུ་འུར་རྡོ་མེད་པ་གཏན་ནས་མེད”ཅེས་བསྟན་འཛིན་གྱིས་འུར་རྡོ་བསླ་བཞིན་བྱིས་དུས་ཀྱི་གནས་ཚུལ་དྲན་གསོ་བྱས།

འོན་ཀྱང་བསྟན་འཛིན་ལོ་16ལ་སླེབས་སྐབས་འུར་རྡོ་བསླ་མཚམས་བཞག་པ་དང་དེ་རྗེས་ཀྱི་ལོ་བཅུ་ལྷག་ཙམ་ནང་ཁོང་གིས་དགེ་རྒན་བསྟེན་ཏེ་ཐང་ག་དང་ལྡེབས་རིས་བཞེངས་རྩལ་སྦྱངས། ཚོན་རིས་ནི་འཚོ་ཐབས་འཚོལ་བའི་ལག་ཤེས་ཡག་པོ་ཞིག་ཡིན་ཡང་ས་ཆ་གང་སར་འགྲོ་དགོས་པ་དང་ད་དུང་མི་མང་པོས་གཞོགས་འདེགས་བྱེད་དགོས་ཀྱི་ཡོད། དེས་ན་ཕྲུ་གུ་སྐྱེས་རྗེས་བསྟན་འཛིན་ཕྱིར་འགྲོ་མ་ཐུབ་པས། ཕྱིས་སུ་ཁོང་གིས་རི་མོ་འབྲི་མཚམས་བཞག་ནས་གཏན་འཇགས་དང་ཁྱིམ་ལ་ལྟ་རྟོག་ཐུབ་པའི་འཚོ་བ་ཞིག་སྐྱེལ་འགོ་ཚུགས་པ་རེད།

འོན་ཀྱང་འུར་རྡོ་བསླ་སྟངས་དེ་ཁོང་གི་དྲན་ཤེས་ཀྱི་གཏིང་རུམ་དུ་འཇགས་ཡོད་པས་ནམ་ཡང་བརྗེད་ཐབས་བྲལ་བ་ཞིག་རེད།

2025ལོའི“དམར་མདངས་ཆབ་མདོ། དར་རྒྱས་ཡར་བརྩོན”གྱི་མང་ཚོགས་རང་བཞིན་གྱི་འགྲན་བསྡུར་བྱེད་སྒོ་སྐབས་དང་པོ་སྤེལ་བའི་གནས་ཚུལ་ཐོས་རྗེས། ཁོང་གི་སེམས་ཁོངས་སུ་དགའ་ཞེན་གྱི་མེ་ལྕེ་བསྐྱར་དུ་འབར་ནས“ངས་འཇོན་པ་འདུག”བསམས་ཏེ་སླར་ཡང་འུར་རྡོ་བསླ་འགོ་ཚུགས།

འགྲན་བསྡུར་ལ་གྲ་སྒྲིག་བྱེད་པའི་ཉིན་ཁ་ཤས་ནང་བསྟན་འཛིན་གྱིས་ནམ་གུང་བར་རྩིད་སྐུད་རེ་རེ་བཞིན་བསྒྲིམས་ནས་གཅིག་ཏུ་འདྲིལ། ཆབ་མདོ་གྲོང་ཁྱེར་རིམ་པའི་མཐའ་བསྡུར་བྱ་ཡུལ་དུ་ཁོང་གི་བསླས་འཐག་གི་ལག་ཤེས་བྱང་ཆུབ་པོ་དང་དམིགས་བསལ་ཁྱད་ཆོས་ལྡན་པའི་སྒྱུ་རྩལ་གྱི་ཉམས་འགྱུར་ལས་བདམས་ཐོན་པ་མང་པོའི་ཁྲོད་ནས་གཟེངས་སུ་ཐོན་ཏེ་བྱ་དགའི་དངུལ་སྒོར་ཁྲི་5རག་པ་རེད།

“ཆུང་དུས་ཀྱི་རྩེད་ཆས་ཀྱིས་ང་ལ་འགྱུར་ལྡོག་དེ་འདྲ་ཡོང་གི་ཡོད་པ་བསམ་ཡུལ་ལས་འདས་སོང”ཞེས་བསྟན་འཛིན་གྱིས་བཤད།

ཁྱིམ་འཛིན་མ་ཞིག་ནས་བྱ་དགའ་བླངས་པའི་བུད་མེད་ཅིག་བར།

གཟི་བརྗིད་ལག་ཁྱེར་རག་ནས་དཔལ་འབར་དུ་ལོག་རྗེས། བསྟན་འཛིན་ལ་བསམ་ཚུལ་ཞིག་བྱུང་བ་སྟེ། མི་ཞིག་ཐག་རིང་དུ་སྐྱོད་མི་ཐུབ་ནའང་ལག་ཤེས་སྣ་གཅིག་དེ་མི་མང་པོས་རྒྱུན་འཛིན་བྱེད་དུ་འཇུག་དགོས་ཀྱི་འདུག དེའི་ཐད་ཁོང་གིས་ཐོག་མར་རང་ཉིད་ཀྱི་བཟའ་ཟླ་བློ་ལ་འཆར།

“གལ་ཏེ་ཁྱོད་ཀྱིས་འུར་རྡོ་བསླ་སྟངས་ཤེས་ན་ཡོང་འབབ་མང་དུ་འགྲོ་སྲིད”ཅེས་བསྟན་འཛིན་གྱིས་ཉི་འབྲུག་ལ་ཁ་ཏ་ཐེངས་མང་བྱས། ཕྱིས་སུ་ཁོང་གིས་བཟའ་ཟླར་ལས་བྲེལ་མེད་སྐབས་སུ་འུར་རྡོ་བསླ་སྟངས་ཞིབ་ཕྲ་བསླབས།

ཁྱོ་གའི་མཛུབ་ཁྲིད་དང་སྐུལ་ལྕག་འོག ཉི་འབྲུག་གིས་ཉིན་མཚན་མེད་པར་དཀའ་སྤྱད་སྦྱངས་པ་བྱས་མཐར་བསླ་རྩལ་ཤེས་པ་མ་ཟད། རི་མོ་སྤེལ་སྟངས་ཀྱང་བྱང་ཆུབ་པོར་གྱུར། 2026ལོར“དམར་མདངས་ཆབ་མདོ། དར་རྒྱས་ཡར་བརྩོན”གྱི་འགྲན་བསྡུར་སྐབས་གཉིས་པ་འགོ་ཚུགས་པ་དང་། ཉི་འབྲུག་གིས་རང་འགུལ་ངང་མིང་ཐོ་བཀོད། ཁོང་གིས་བསམ་བློ་ཡུན་རིང་བཏང་རྗེས། མི་རིགས་ཁག“སེ་འབྲུའི་རྡོག”ལྟར་མཐུན་སྒྲིལ་རྡོག་རྩ་གཅིག་ཏུ་སྒྲིལ་བའི་ནང་དོན་ལྡན་པའི་བརྩམས་ཆོས་ཤིག་གསར་རྩོམ་བྱ་རྒྱུའི་ཐག་བཅད། མ་ཟད་བརྩམས་ཆོས་རྩེ་གྲ་ཞིག་གསར་རྩོམ་བྱ་ཆེད། ཁོང་གིས་ཚོས་གཞི་དང་རི་མོ་སྤེལ་སྟངས་བཅུ་ལྷག་ཙམ་ཚོད་ལྟ་བྱས།

འགྲན་བསྡུར་གྱི་ཉིན་དེར་ཉི་འབྲུག་གིས་སྐྱིལ་ཀྲུང་དུ་བསྡད་དེ་རང་ཉིད་ཀྱི་རྣམ་དཔྱོད་དང་སྙིང་རུས་ལ་བརྟེན་ནས་ཚོན་རིས་རྣམ་པར་བཀྲ་བའི་འུར་རྡོ་ཞིག་ཁྲ་ལྷམ་མེར་ལྟད་མོ་བ་དང་དཔྱད་ཞིབ་པ་ཚོའི་མིག་ལམ་དུ་བཤམས།

“ཨང་དང་པོ། ཉི་འབྲུག”ཅེས་གཙོ་སྐྱོང་པས་འབོད་མ་ཐག ཉི་འབྲུག་གི་མིག་ཟུང་ལ་མཆི་ཞག་འཁོར་བ་དང་། གར་སྟེགས་འོག་བསྟན་འཛིན་གྱིས་ཁོ་མོར་དགའ་བསུ་ཞུ་བཞིན་ཡོད། གར་སྟེགས་ནས་མར་བབས་རྗེས་བཟའ་ཟླས་ཁོ་མོའི་ལག་ནས་འཇུས་ཏེ“རང་གིས་དཀའ་ལས་རྒྱག་རིན་ཆོག་འདུག”ཅེས་བཤད།

སྒོ་ར་ཆུང་ཆུང་ནས་སྤང་གཤོངས་དང་ཆུ་འགྲམ་བར་གྱི་དགོད་སྒྲ།

ཁྱོ་ཤུག་གིས་བསླས་འཐག་ལག་ཤེས་ལ་བརྟེན་ནས་སྔ་རྗེས་སུ་འགྲན་བསྡུར་ནང་བྱ་དགའ་ལེན་པའི་གནས་ཚུལ་དེས་བསྟན་འཛིན་དང་ཉི་འབྲུག་སྐབས་ཤིག་རིང་ས་ཆ་དེར་སྐད་གྲགས་ཆོད་པ་མ་ཟད། ཚོང་ལམ་ཡང་རྒྱ་སྐྱེད་ཐུབ་པ་བྱུང་།

2025ལོའི་ཟླ་10པར། བསྟན་འཛིན་གྱིས་རང་གི་བརྩམས་ཆོས་ཁྱེར་ནས་རྫོང་གི་ཚོང་འདུས་ལ་ཞུགས་ཐེངས་དང་པོར་ཉིན་7རིང་ཐོན་རྫས་བཙོངས་པར་སྒོར་1000ལྷག་ཙམ་རག་པ་དང་། ད་ལོའི་ཟླ་3པའི་ཚོང་འདུས་ཀྱི་ཉིན་དང་པོར་ཐོན་རྫས་བཙོངས་པར་སྒོར་2800ལྷག་ཙམ་རག་ཡོད། དཔལ་འབར་རྫོང་རིག་གནས་ཡུལ་སྐོར་ཅུས་ཀྱིས་ད་དུང་སྒོར་ཁྲི་2ཀྱི་མངགས་ཐོ་སྤྲད་ཡོད། ཐོན་རྫས་དེ་ཐོག་མའི་སྲོལ་རྒྱུན་གྱི་འུར་རྡོ་ནས་རླངས་འཁོར་གྱི་མཛེས་རྒྱན་དང་། ཁུག་མ། སྨྱུག་སྣོད། འགེལ་ཆས་སོགས་ཐོན་རྫས་སྣ་ཚོགས་བར་འཕེལ་རྒྱས་ཕྱིན་པ་དང་རིན་གོང་ཡང་སྒོར་30ནས་སྒོར་350བར་མི་འདྲ་བ་ཡོད། བསྟན་འཛིན་གྱིས་ད་དུང་ཁྱུག་དབྱིངས་སོགས་ལས་སྟེགས་བརྒྱུད་དྲ་ཐོག་ནས་ཕྱིར་ཚོང་བྱེད་སྟངས་སྦྱངས་པས་གཞིས་རྩེ་སོགས་སུ་ཐོན་རྫས་ཕྱིར་ཚོང་ཐུབ་ཡོད།

མངགས་ཐོ་མང་དུ་སོང་བས་ཁོང་གཉིས་ཀྱིས་བསླས་ཚར་གྱི་མེད་པར་བརྟེན། བསྟན་འཛིན་གྱིས་ཐབས་ཤེས་ཤིག་བཏོན་པ་སྟེ། ལག་ཤེས་སྦྱོང་འདོད་ཡོད་པའི་གྲོང་པ་ཁྱིམ་མཚེས་ལ་རིན་མེད་ངང་བསླབས་པ་དང་ཁོང་ཚོས་བསླས་པའི་ཐོན་རྫས་དག་ཁོང་གིས་ཚུར་བསྡུ་གི་ཡོད། ཡུལ་མི་སྤུན་ཟླ་ཚོས་མ་དངུལ་སྐར་མ་གཅིག་ཀྱང་གཏོང་མི་དགོས་པར་ལག་ཤེས་ཤེས་པ་མ་ཟད། ད་དུང་ཡོང་འབབ་ཀྱང་རག་ཡོད།

“རང་ཉིད་ཕྱུག་པོ་ཆགས་པ་ཕྱུག་པོ་མིན། ཡུལ་མི་ཚོ་མཉམ་དུ་ཕྱུག་པོ་ཆགས་ཚེ་གཞི་ནས་ཕྱུག་པོ་ཡིན” ཁོང་གཉིས་ཀྱིས་རང་ཁྱིམ་གྱི་ཚོམས་ཆེན་གྱི་སྒྲོག་ཙེ་དང་རྐུབ་སྟེགས་བསྡུ་གསོག་བརྒྱབ་ནས་བསླས་འཐག་ལག་ཤེས་བསླབ་སར་བྱས་པ་དང་ཞིང་དལ་སྐབས“སློབ་ཁང”དེ་ཁྱིམ་གྱི་ཁ་སྤྲོད་ཀྱི་རི་ལྡེབས་སུ་སྤོས། གྲོང་ཚོའི་ནང་གི་བུད་མེད་ཁ་ཤས་གཅིག་རྗེས་གཉིས་མཐུད་ངང་དེའི་ནང་ཞུགས་པ་དང་ཚང་མ་སྤང་གཤོངས་དང་ཆུ་འགྲམ་དུ་བསྡད་ནས་འུར་རྡོ་བསླ་བའི་ལས་ལ་བྲེལ།

དཔལ་འབར་རྫོང་ཨུད་དང་རྫོང་སྲིད་གཞུང་གིས་སྲོལ་རྒྱུན་ལག་ཤེས་བཟོ་རྩལ་སྲུང་སྐྱོང་དང་རྒྱུན་འཛིན་ལ་ཚད་མཐོའི་མཐོང་ཆེན་བྱས་ནས་རྫོང་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ནང་འཇུག་པར་སྐུལ་འདེད་ཧུར་ཐག་གཏོང་བཞིན་ཡོད་པ་དང་། ཤང་ཏང་ཨུད་དང་སྲིད་གཞུང་གིས་ཀྱང་ཚོང་འདུས་སྣ་ཚོཌ་བརྒྱུད་བསྟན་འཛིན་ཁྱོ་ཤུག་ལ་འགྲེམས་ཚོང་གི་ལས་སྟེཌ་བཏོད་ཡོད།