ཟླ་དྲུག་པར་ལྷོ་ཁ་གྲོང་ཁྱེར་འཕྱོངས་རྒྱས་རྫོང་ཤ་གསོས་ཤང་ཚོགས་རྒྱལ་གྲོང་ཚོའི་གང་སར་བསིལ་རླུང་དལ་གྱིས་ལྡང་བ་དང་། གྲོང་ཚོའི་རིག་ལྡན་ཁྱིམ་སྡོད་ཞབས་ཞུའི་ས་ཚིགས་སུ་དྲོ་སྐྱིད་ལྷག་པར་ལྡན། གོག་ཏོ་ཆགས་པའི་དེ་སྔའི་གྲོང་ཚོ་རིམ་པའི་བྱེད་སྒོ་སྤེལ་ས་དེ་ད་ཆ་རྣམ་པ་གསར་ལ་འཁྲུག་ཆ་དོད་པའི་གྲོང་ཚོ་ཡོངས་ཀྱི་ཡུལ་མི་ཚོས་བློས་འགེལ་ཆོག་པའི་དམངས་ཕན་གྱི་ཁྱིམ་གཞིས་ཤིག་ཏུ་གྱུར་ཡོད།

ས་ཚིགས་ཀྱི་ཐོག་སོ་དང་པོའི་ལུས་གསོ་ཁུལ་དུ་སྐྱོད་སྐབས། གྲོང་ཚོའི་སྨན་པ་ཆོས་སྒྲོན་གྱིས་མི་ཧྲེང་རྒན་མོ་སྐལ་བཟང་མཚོ་མོར་ཁྲག་ཤེད་ལྟ་བཞིན་ཡོད་པ་དང་། དེའི་འགྲམ་དུ་གསོ་རླུང་རྔུབ་ཆས་དང་འཕུར་མཉེད་རྐུབ་སྟེགས་གསར་རྐྱང་གྲལ་སྟར་འགྲིག་པོས་བཞག་ཡོད། སྐལ་བཟང་མཚོ་མོས་གྱང་ལྡེབས་ཀྱི་བརྡ་གཏོང་མཐེབ་གནོན་སྟོན་བཞིན“དེ་སྔ་གཅིག་པུར་སྡོད་སྐབས་གཟུགས་པོ་མི་བདེ་བའམ་ཡང་ན་གློ་བུར་དུ་འགྱེལ་བ་སོགས་བྱུང་ན་རོགས་པའང་བྱེད་མཁན་མེད། ད་ཆ་མཐེབ་གནོན་དེ་ངའི‘སྲོག་སྐྱོབ་མཁན’རེད”ཅེས་འཛུམ་དམུལ་དམུལ་ངང་བཤད།

མིག་སྔར་གྲོང་ཚོ་ཡོངས་ཀྱི་མི་ཧྲེང་རྒན་རྒོན་དུད་ཚང་གསུམ་ཀར་བརྙན་ལམ་བརྡ་གཏོང་བསྒར་ཡོད་པས། ལག་ཐོགས་ཁ་པར་གྱི་བྱ་རིམ་ཆུང་གྲས་ནས་རོགས་སྐྱོབ་རེ་ཞུ་བྱེད་ཆོག་གི་ཡོད། ས་ཚིགས་སྤྱོད་འགོ་ཚུགས་པ་ནས་བཟུང་། རིམ་རྩིས་བརྒྱབ་ན་རོགས་སྐྱོབ་རེ་ཞུ་ཐེངས་420ལྷག་ཙམ་དང་ལེན་དང་ཐག་གཅོད་བྱས་ཤིང་། རེ་ཞུ་ཚང་མ་སྐར་མ་3ནང་ཚུན་དུ་དང་ལེན་བྱས་པ་དང་གནད་དོན་98%སྐར་མ་བཅུའི་ནང་ཚུན་དུ་སྒོ་རྩར་ཐག་གཅོད་བྱེད་པར་བསྐྱོད་ཡོད།

གཞན་ཡང་། ས་ཚིགས་ཀྱིས་ད་དུང་གྲོང་ཚོའི་ཡུལ་མི་487ལ་དྲ་ཐོག་གི་བདེ་ཐང་ཡིག་ཚགས་བཟོས་པས། ཕྱིར་གླ་པར་སྐྱོད་མཁན་བུ་ཕྲུག་ཚོས་རང་ཉིད་ཀྱི་ལག་ཐོཌ་ཁ་པར་ནས་ནང་མིའི་ཁྲག་ཤེད་དང་སྙིང་འཕར་ཚུལ་སོཌ་ཀྱི་བདེ་ཐང་གྲངས་གཞིར་འཕྲལ་མར་ལྟ་ཐུབ་སྟེ། ནང་མིའི་གཟུགས་གཞིའི་གནས་ཚུལ་དུས་ཐོག་ཏུ་ཤེས་ཀྱི་ཡོད།

དེ་ནས་ཐོག་སོ་གཉིས་པར་སླེབས་སྐབས། མངར་བསིལ་ལྡན་པའི་ཇ་མངར་མོའི་དྲི་ཞིམ་ལྷང་ལྷང་དུ་འཐུལ་འོང་བ་དང་། རྒན་རྒོན་ཁ་ཤས་མཉམ་དུ་བསྡད་ནས་སྐྱིད་སྣང་དོད་པོས་ཅི་འཕྲོས་མོལ་འཕྲོས་བྱེད་བཞིན་འདུག “ལོ་60ཡན་གྱི་རྒན་རྒོན་གྱིས་ཇ་བཏུངས་ན་རིན་གོང་བཅུ་ཆ་གསུམ་གཅོག་གི་འདུག་པས། ང་ཚོ་རྒན་རྒོན་ཚོར་ངལ་གསོ་རྒྱག་ས་དང་ཁ་བརྡ་གློད་ས་ཡག་པོ་ཞིག་བྱུང་སོང་ལ་འཚོ་བའང་སྔར་བས་བདེ་སྐྱིད་ལྡན་པ་ཞིག་འདུག”ཅེས་ཡུལ་མི་ཟླ་བས་ཇ་འཐུང་ཞོར་ཏང་ཡོན་ཚོ་དང་ཅི་འཕྲོས་མོལ་འཕྲོས་བྱས་ནས་གྲོང་ཚོའི་འགྱུར་ལྡོག་གསར་པ་གླེང་བཞིན་འདུག ཇ་ཁང་ཆུང་ངུ་དེ་ལས་གྲོང་ཚོའི་མཉམ་སྡེབ་ལ་ལོ་ལྟར་འབབ་འཕར་སྒོར་ཁྲི་1བྱུང་ནས་མཉམ་སྡེབ་དཔལ་འབྱོར་གྱི་རྨང་གཞི་བརྟན་དུ་ཕྱིན་པ་མ་ཟད། མང་ཚོགས་ལ་ཞབས་འདེགས་ཞུ་བའི་གདེང་ཚོད་ཀྱང་དེ་བས་ཆེ་རུ་ཕྱིན་ཡོད།

ས་ཚིགས་ཀྱིས་ལས་ཀའི་ཉིན་མོར་རྒྱུན་རྣམ་ཅན་གྱི་ཞབས་ཞུ་མཐའ་འཁྱོངས་བྱས་ཤིང་། རྒན་རྒོན་མང་ཆེ་བས་རིག་ནུས་ལག་ཐོགས་ཁ་པར་དང་རོགས་སྐྱོབ་རེ་ཞུའི་བྱ་རིམ་ཆུང་གྲས་སྤྱོད་མི་ཤེས་པ་སོགས་ཀྱི་གནད་དོན་ལ་དམིགས་ནས། ལས་དོན་པས་ཐོག་མཐའ་བར་གསུམ་དུ་ངང་རྒྱུད་རིང་ལ་ཞིབ་ཚགས་པོས་རྒན་རྒོན་ཚོར་བེད་སྤྱོད་བྱེད་སྟངས་སློབ་ཀྱི་ཡོད། གད་སྙིགས་རིགས་དབྱེའི་སྐར་གསོག་ལམ་ལུགས་ཁྱབ་གདལ་བཏང་ཞིང་། ཡུལ་མི་ཚོས་ཁྲོམ་གཞུང་དང་སྲང་ལམ་གྱི་གད་སྙིགས་གཙང་འཕྱག་དང་གད་སྙིགས་རིགས་ཕྱེ་ནས་གཡུག་པར་བརྟེན་ནས་སྐར་མ་གསོག་པ་ལས་རང་ཉིད་ལ་མཁོ་བའི་འཚོ་བའི་མཁོ་ཆས་བརྗེ་ཐུབ་པ་ཟད། གྲོང་ཚོའི་རྣམ་པ་གསར་རྐྱང་དུ་འགྱུར་བར་སྐུལ་ཁྲིད་ནུས་ལྡན་ཡང་ཐུབ་ཡོད། ཞིང་པའི་དཔེ་དེབ་ཁང་རྒྱུན་གཏན་ནས་སྒོ་ཕྱེ་བ་དང་། སློབ་ཚན་ཟུར་ཁྲིད་དང་སྲིད་ཇུས་སྒྲོག་འགྲེལ་སོགས་དམངས་ཕན་བྱེད་སྒོ་སྤེལ་ནས་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་བཏང་སྟེ། གྲོང་གསེབ་བཅོས་སྐྱོང་གོ་རིམ་ལྡན་པ་དང་ཡུལ་སྲོལ་ཡ་རབས་ལྡན་པར་བྱས་ཡོད།

“ཁ་པར་བརྒྱབ་མ་ཐག་ལས་བྱེད་པ་འབྱོར་བ་དང་། མཐེབ་གནོན་མནན་མ་ཐག་ཞབས་ཞུ་སྒྲུབ་མཁན་སླེབས་ཀྱི་ཡོད”ཅེས་པའི་ཡུལ་མི་ཚོའི་ཁ་ཡོད་ལག་ཡོད་ཀྱི་མྱོང་བ་འདི་ནི་ཚོགས་རྒྱལ་གྲོང་ཚོའི་རིག་ལྡན་ཁྱིམ་སྡོད་ཞབས་ཞུའི་ས་ཚིགས་ཀྱི་མཚོན་ཚུལ་གསོན་ཉམས་དོད་ཤོས་ཤིག་རེད། ད་ཆ་ས་ཚིགས་ཀྱི་དམངས་ཕན་ཞབས་ཞུའི་ཕན་འབྲས་ལ་ཁས་ལེན་རྒྱ་ཁྱབ་ཐོབ་ནས་ཉེ་འཁོར་གྱི་རྫོང་དང་ཆུས་ཁག་གི་ལས་བྱེད་པའང་གཅིག་རྗེས་གཉིས་མཐུད་ངང་ལྟ་སྦྱོང་བྱེད་པར་ཡོང་གི་ཡོད། ས་ཚིགས་ཆུང་ཆུང་དེས་སྤུས་འདེགས་རིམ་སྤོར་བྱེད་པ་བརྒྱུད་ཏང་འཛུགས་སྐྱོང་ལ་བརྟེན་ནས་དང་བླངས་ཞབས་ཞུར་སྣེ་ཁྲིད་བྱས་པ་དང་གཞི་རིམ་བཅོས་སྐྱོང་ལ་མཐུན་རྐྱེན་གནད་སྨིན་སྦྱར་ནས་ས་མཐོའི་གྲོང་གསེབ་ཏུ་དྲོ་སྐྱིད་ལྡན་པའི་དམངས་འཚོའི་ལེའུ་ཞིག་བརྩམས་དང་རྩོམ་མུས་རེད།