འདི་ནི་ཆུ་གསུམ་རྫོང་གི་ཚོང་འདུས་ནས་མི་རྣམས་ཀྱིས་ས་གནས་དེ་གའི་ཁྱད་ལྡན་ལག་ཤེས་ཐོན་རྫས་ཉོ་བཞིན་པ།

འདི་ལོ་ཚུན་དུ། ལྷོ་ཁ་གྲོང་ཁྱེར་གྱིས་ཞིང་པའི་ཡོང་འབབ་མང་དུ་གཏོང་རྒྱུ་དེ“ཞིང་གསུམ”ལས་ཀའི་ལྟེ་བའི་ལས་འགན་དུ་བརྩིས་ཏེ། ཐབས་བརྒྱ་ཇུས་སྟོང་ངང་ཞིང་པའི་འབབ་འཕར་ཕྱུག་འགྱུར་གྱི་ཐབས་ལམ་རྒྱ་སྐྱེད་བཏང་བས་ཞིང་ལས་སྔར་བས་སྟོབས་ཆེ་དང་། གྲོང་གསེབ་སྔར་བས་མཛེས་པ། ཞིང་པ་སྔར་བས་ཕྱུག་པ་བཅས་ཀྱི་དགའ་འོས་པའི་རྣམ་པ་རྒྱུན་ཆད་མེད་པར་མངོན་ཡོད། ད་ལྟའི་ཡར་ཀླུང་ས་གཞི་ཆེན་པོར་གྲོང་གསེབ་ཀྱི་ཐོན་ལས་འཕེལ་རྒྱས་ཕྱིན་པ་དང་མང་ཚོགས་ཀྱི་ཡོང་འབབ་རྒྱུན་ཆད་མེད་པར་འཕར་ནས་ལས་རིགས་དར་རྒྱས་དང་། ཡུལ་ལྗོངས་མཛེས་པ། དམངས་རྣམས་ཕྱུག་པ་བཅས་ཀྱི་གྲོང་གསེབ་དར་རྒྱས་ཀྱི་རྣམ་པ་མངོན་བཞིན་ཡོད།

ཐོན་ལས་ཀྱི་སྒུལ་ཤུགས་འཕེལ་བར་བྱས་ནས་གཉེར་སྐྱོང་རང་བཞིན་གྱི་ཡོང་འབབ་གསོག་པའི་ཐབས་ལམ་རྒྱ་སྐྱེད་བཏང་བ།

ལྷོ་ཁ་གྲོང་ཁྱེར་གྱིས་ཐོན་ཁུངས་ཀྱི་ལེགས་ཆར་གཞི་ཚུགས་པ་དང་སྲིད་ཇུས་ཀྱི་རོགས་སྐྱོར་དང་། ལས་རྣམ་གཏོད་པ། སྤུས་རྟགས་བཏོད་པ་བཅས་བརྒྱུད་འདེབས་འཛུགས་དང་། གསོ་ཚགས། རིག་གནས་ཡུལ་སྐོར་སོགས་ཁྱད་ལྡན་ཐོན་ལས་གཞི་ཁྱོན་ཅན་དང་སྤུས་ཚད་ཅན་གྱི་འཕེལ་རྒྱས་ལ་སྐུལ་འདེད་བཏང་ནས་ཞིང་འབྲོག་པའི་གཉེར་སྐྱོང་རང་བཞིན་གྱི་ཡོང་འབབ་འཕར་བར་ཡུན་རིང་སྒུལ་ཤུགས་བསྣན་ཡོད།

གྲོང་ཁྱེར་ཡོངས་ཀྱིས་འདེབས་འཛུགས་དུད་ཚང་ཆེ་གྲས་འཕེལ་རྒྱས་གཏོང་བར་གཙོ་གནད་ཐོག་རོགས་སྐྱོར་བྱས་པ་དང་ཆ་རྐྱེན་དང་འཚམ་པའི་གཉེར་སྐྱོང་བྱེད་པོར་ཆེད་དོན་བྱ་དགའ་སྤྲད་ནས་ཞིང་ལས་ཐོན་སྐྱེད་གཞི་ཁྱོན་ཅན་དང་འཕྲུལ་ཆས་ཅན་དུ་འགྱུར་རྒྱུར་སྐུལ་འདེད་བཏང་བས། ཁྱིམ་ཚང་གི་ངལ་རྩོལ་ནུས་ཤུགས་ལ་བཅིངས་འགྲོལ་བཏང་བ་མ་ཟད། གཉེར་སྐྱོང་ཕན་འབྲས་བརྟན་པོའི་ངང་ཆེ་རུའང་ཕྱིན་ཡོད། སྣེ་གདོང་ཆུས་ཀྱིས་བཞོན་མ་གསོ་ཚགས་ལས་རིགས་སྤུས་འབྲས་ལེགས་གཉེར་ཡོང་བར་དམིགས་ཏེ། འོ་མ་སོས་པ་འཚོང་བའི་ཚད་གཞི་ལོན་པའི་ཞིང་དུད་དང་མཉམ་ལས་ཁང་ལ་ཁ་གསབ་རོགས་དངུལ་སྤྲད་པ་དང་རྒྱལ་བཟང་གྲོང་ཚོ་དང་སྨོན་གྲོང་གྲོང་ཚོ་སོགས་གྲོང་ཚོ(སྡེ་ཁུལ)6གི་དུད་ཚང་388ལ་ཧོ་སི་ཐན་སྤུས་ལེགས་རྒྱུད་འདྲེས་བཞོན་མ་སྤྲད་པས་ཕྱུགས་རིགས་རྒྱུད་བཟང་ཁྱབ་གདལ་དང་ཐོན་སྐྱེད་ནུས་པ་ཆེ་རུ་ཕྱིན་ནས་ཞིང་འབྲོག་པའི་གཉེར་སྐྱོང་རང་བཞིན་གྱི་ཡོང་འབབ་མངོན་གསལ་དོད་པོས་འཕར་ཡོད།

མཚོ་སྨད་རྫོང་གིས་རིག་གནས་དང་ཡུལ་སྐོར་མཉམ་འདྲེས་བྱ་རྒྱུ་གཞི་འཛིན་སར་བྱས་ནས་ཡུལ་ལྗོངས་དེ་ཡོང་འབབ་ལ་འགྱུར་བ་བྱས་ཤིང་། “ཡར་ཀླུང་རིག་གནས་ཡུལ་སྐོར་དུས་ཆེན”གྱི་སྐབས་དང་བསྟུན་ནས་ས་གནས་དེ་གའི་ཚོང་པ་18སྒྲིག་འཛུགས་བྱས་ཏེ་འགྲེམས་ཚོང་ནང་ཞུགས་པ་དང་། ཚགས་ཤ་སྐམ་པོ་དང་ཞོ་སོགས་ཁྱད་ལྡན་ཐོན་རྫས་ཕྱིར་ཚོང་གི་དངུལ་འབོར་སྒོར་ཁྲི་21.53ཟིན་ནས་ཞིང་འབྲོག་པར་སྒོ་འགྲམ་གྱི་ཚོང་འདུས་ནས་འཕེལ་རྒྱས་ཀྱི་ཁེ་སྤོགས་མཉམ་སྤྱོད་ཐུབ་ཡོད།

ལས་ཞུགས་ཀྱི་འདེགས་སྐྱོར་བྱེད་ཤུགས་ཆེ་རུ་བཏང་ནས་གླ་ཕོགས་རང་བཞིན་གྱི་ཡོང་འབབ་མང་དུ་བཏང་བ།

ལྷོ་ཁ་གྲོང་ཁྱེར་གྱིས་སྲིད་ཇུས་ཀྱི་སྐུལ་སློང་དང་། རྣམ་གྲངས་ཀྱི་སྐུལ་འདེད། རྩལ་ནུས་མཐོར་གཏོང་སོགས་ཀྱི་བྱ་ཐབས་མང་པོར་བརྟེན་ནས་ཞིང་པ་ས་ཞིང་འདེབས་པ་ནས་ཡོང་འབབ་གསོག་པར་འགྲོ་བར་སྐུལ་ལྕག་བྱས་ཏེ། གླ་ཕོགས་རང་བཞིན་གྱི་ཡོང་འབབ་འཕར་སྣོན་བརྟན་པོ་ཡོང་བར་བྱས་ཡོད།

གྲོང་ཁྱེར་ཡོངས་ཀྱི་རྣམ་གྲངས་སྣ་ཚོགས་འཛུགས་སྐྲུན་བྱེད་རིང་། ས་གནས་དེ་གའི་མང་ཚོགས་ལས་ཀར་ཧུར་ཐག་བསྡུས་ཏེ། ཁྱིམ་གྱི་སྒོ་འགྲམ་གྱི་རྣམ་གྲངས་དེ་ཉིད་ལས་ཞུགས་འབབ་འཕར་གྱི་ཐབས་ལམ་གཙོ་བོར་འགྱུར་བར་བྱས་ཡོད། འཕྱོངས་རྒྱས་རྫོང་གིས་དེང་རབས་ཞིང་ལས་སྒྲིག་བཀོད་འཕེལ་རྒྱས་བཏང་སྟེ“ཤ་ཚལ་སྒོང”གསུམ་གྱི་རྟེན་གཞིའི་རྣམ་གྲངས་འཛུགས་སྐྲུན་ལ་སྐུལ་འདེད་བཏང་བ་དང་། ས་ཞིང་མུའུ་2000ལྷག་ཙམ་བརྒྱུད་བཤུག་བྱས་ནས་ཡུལ་མི་100ལྷག་ཙམ་ལས་ཞུགས་ཐུབ་པར་སྐུལ་ཁྲིད་བྱས་པས། ལོ་ལྟར་མི་རེའི་ཆ་སྙོམས་ཡོང་འབབ་སྒོར་ཁྲི་4ལྷག་ཙམ་འཕར་ཡོད། ཡར་ཀླུང་གཙང་པོའི་བྱང་ངོས་ཀྱི་གཉིས་གཏོད་གླིང་དང་ཞིང་ལས་ཐོན་རྫས་ལས་སྣོན་ཐོན་ལས་གླིང་སོགས་ཀྱི་ལས་སྟེགས་བསྐྲུན་པ་དང་། དེ་བཞིན་རང་བྱུང་འཐུང་ཆུ“སྐལ་བཟང་ཆུ་མིག”གྲུབ་འབྲས་ཐོབ་པའི་ངང་གསར་སྤེལ་བྱས་པ་དེས་མང་ཚོགས་ལ་ལས་ཞུགས་ལས་གནས་བརྟན་པོ་དེ་བས་མང་བ་མཁོ་འདོན་བྱས་ཡོད།

གླེང་རིན་ཡོད་པ་ཞིག་ནི། ལྷོ་ཁ་གྲོང་ཁྱེར་གྱིས་ལོ་ལྟར་མུའུ་རེར་སྒོར་25ཡི་ཚད་གཞི་གཞིར་བཟུང་ཚད་གཞི་མཐོ་བའི་ས་ཞིང་དོ་དམ་གྲོན་དངུལ་དོན་འཁྱོལ་བྱས་ནས། གྲོང་གསེབ་བདེ་སྐྱིད་ཁང་གི་འཁོར་སྐྱོད་བདག་སྐྱོང་ལ་མ་དངུལ་གཏོང་ཤུགས་སྔར་བས་ཆེ་རུ་བཏང་སྟེ། ཞིང་ལས་ཐོན་སྐྱེད་དང་རྒན་གསོའི་ཞབས་ཞུར་འགན་སྲུང་ནུས་ལྡན་བྱས་པ་བརྒྱུད་ངལ་རྩོལ་པ་1000ལྷག་ཙམ་ལ་ཡོང་འབབ་གསོག་ཐུབ་པར་བྱས་ཡོད།

ཐོན་ཁུངས་དང་རྒྱུ་ནོར་གང་ལེགས་སྤྱད་ནས་རྒྱུ་ནོར་རང་བཞིན་གྱི་ཡོང་འབབ་ཀྱི་མི་མངོན་པའི་སྟོབས་ཤུགས་སྔོག་འདོན་བྱས་པ།

ལྷོ་ཁ་གྲོང་ཁྱེར་གྱིས་ས་ཞིང་དང་། སྡོད་ཁང་། ཐུན་མོང་རྒྱུ་ནོར་སོགས་ཀྱི་ཐོན་ཁུངས་གང་ལེགས་སྤྱད་དེ་ཁེ་ཕན་འབྲེལ་མཐུད་ལམ་སྲོལ་འཐུས་སྒོ་ཚང་དུ་བཏང་ནས། ཞིང་འབྲོག་པར་རྒྱུ་ནོར་ཕན་སྒྱུར་ཁྲོད་ནས་རྒྱུ་ནོར་རང་བཞིན་གྱི་ཡོང་འབབ་ཡོང་བ་དང་། གྲོང་གསེབ་སྒྱུར་བཅོས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་བྱས་ཡོད།

ཟངས་རི་རྫོང་གིས་ཐོན་ཁུངས་དང་རྒྱུ་ནོར་གང་ལེགས་སྤྱོད་པ་དང་ཕན་ནུས་ཆེ་རུ་གཏོང་བར་དམིགས་ནས། རྒུན་འབྲུམ་ཐོན་ལས་ཀྱི་ས་ཞིང་མུའུ་9000ལྷག་ཙམ་བརྒྱུད་བཤུག་བཏང་ནས་ཞིང་པར་བོགས་དངུལ་ཡོང་འབབ་སྒོར་ཁྲི་315ལྷག་ཙམ་བྱུང་བ་དང་། བཟོ་ཁང་དང་། ས་ཆ། འཕྲུལ་ཆས་སྒྲིག་ཆས་བཅས་བོགས་མར་བཏང་བ་བརྒྱུད་ཡོང་འབབ་སྒོར་ཁྲི་483ལྷག་ཙམ་ཟིན་པ། ཡུལ་སྐོར་དང་། བོགས་མར་གཏོང་བ། གསོ་སྤེལ་བཅས་གཙོ་བོར་བྱས་པའི་གྲོང་ཚོའི་མཉམ་སྡེབ་དཔལ་འབྱོར་ལ་ཁེ་སྤོགས་སྒོར་ཁྲི་620ལྷག་ཙམ་བགོས་ཡོད།

གྲོང་ཁྱེར་ཡོངས་ཀྱིས་སྤོ་སྒྱུར་རང་བཞིན་གྱི་ཡོང་འབབ་མཐོ་རུ་གཏོང་བའི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ནས་མང་ཚོགས་ཀྱི་ཡོང་འབབ་འཕར་སྣོན་གྱི་ཐབས་ལམ་གསར་པ་བཏོད་ཡོད། གོང་དཀར་རྫོང་གིས་རང་འགུལ་ངང་ལྷོ་རི་བྱང་རིའི་སྔོ་འགྱུར་ལས་གྲྭ་སྦྲེལ་མཐུད་བྱས་ནས་སྔོ་ལྗང་འཛུགས་སྐྲུན་འགན་འཁུར་ཁེ་ལས་26དང་ལས་མི་སྤྱོད་པའི་གྲོས་མཐུན་བཞག་ནས་ལས་གནས་2326གསར་སྤེལ་བྱས་པ་དང་ས་གནས་དེ་གའི་ཞིང་འབྲོག་པ་4695ལས་མིར་བསྡུས་པར་ཡོང་འབབ་སྒོར་ཁྲི་6760ལྷག་ཙམ་བྱུང་ཡོད་པ་རེད།