དེང་གི་ཆར་ལྗོངས་ཡོངས་ཀྱི་ས་ཁུལ་ཁག་གི་འབྲུ་རིགས་ཐོན་ཁུལ་གཙོ་བོའི་སྟོན་བསྡུའི་ལས་དོན་སྤེལ་མཇུག་འགྲིལ་ཞིང་། ལྷ་ས་གྲོང་ཁྱེར་ཆུ་ཤུར་རྫོང་ཚལ་སྣེ་ཤང་ཤེལ་གྲོང་གྲོང་ཚོའི་ཞིང་ཁའི་མུ་ཁར་འདོན་འཇུག་འཕྲུལ་འཁོར་གྱིས་ས་དམར་ལམ་འགྲམ་དུ་དབོར་བ་དང་ཡང་དེ་ནས་འདྲུད་འཐེན་འཕྲུལ་འཁོར་གྱིས་ཁག་བགོས་ནས་ཞིང་ཁའི་ཕྱོགས་གང་སར་དབོར་བཞིན་ཡོད། “ད་ཆ་ནས་ཞིང་ཚང་མ་བརྔས་ཚར་སོང་། ས་དམར་ཞིང་ཁའི་ནང་དུ་ཁ་སྣོན་བྱས་ན་ས་རྒྱུའི་གྲུབ་ཆ་ཡག་ཏུ་གཏོང་ཐུབ་ལ། ཞིང་ལས་སྐྱེ་དངོས་ཀྱི་ཐོན་འབབ་དང་སྤུས་ཚད་ཀྱང་མཐོ་རུ་གཏོང་ཐུབ”ཅེས་ཤེལ་གྲོང་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་ཕུན་ཚོགས་རྣམ་རྒྱལ་གྱིས་ངོ་སྤྲོད་བྱས།

ཤེལ་གྲོང་གྲོང་ཚོར་ཁྱོན་རྨོ་ཞིང་མུའུ་8000ལྷག་ཙམ་ཡོད་ཅིང་། མིག་སྔར་ཚད་གཞི་མཐོ་བའི་ས་ཞིང་མུའུ་5000ལྷག་ཙམ་བསྐྲུན་ཟིན་པ་དང་། གཞན་ཡང་མུའུ་3000ཙམ་སྐྲུན་བཞིན་ཡོད། ཕུན་ཚོགས་རྣམ་རྒྱལ་གྱིས་ད་ལོ་ནས་ཞིང་མུའུ་15བཏབ་ཅིང་། ཁོང་གིས“དེ་སྔོན་ས་ཞིང་གི་རྒྱ་ཁྱོན་ཆུང་བའི་ཁར། ས་ཁོད་སྙོམས་པོ་མེད་པས། མི་ཤུགས་ལ་བརྟེན་ནས་རྨོ་འདེབས་བྱེད་ཀྱི་ཡོད། སྐབས་དེར་དཀའ་ལས་ཆེན་པོ་བརྒྱབ་ཀྱང་ཐོན་འབབ་དེ་ཙམ་ཡག་པོ་མེད”ཅེས་མྱོང་བ་ཟབ་མོས་བཤད།

ཚད་གཞི་མཐོ་བའི་ས་ཞིང་འཛུགས་སྐྲུན་བྱས་ཏེ། སྲོལ་རྒྱུན་གྱི་རྨོ་འདེབས་བྱེད་སྟངས་ལ་འགྱུར་ལྡོག་མཐར་ཕྱིན་པ་བཏང་བ་དང་། ཞིང་ལས་ཐོན་སྐྱེད་ཀྱི་མ་གནས་དང་ཞིང་པའི་ལས་འབོར་ཉུང་དུ་བཏང་བ་དང་། རྨོ་འདེབས་ཀྱི་ལས་ཕྱོད་ཆེ་རུ་བཏང་བས་ས་ཞིང་འདེབས་པའི་ཞིང་པའི་ཧུར་སེམས་མངོན་གསལ་དོད་པོས་ཆེ་རུ་ཕྱིན་ཡོད།

“མིག་སྔར་གྲོང་ཚོའི་མཉམ་ལས་ཁང་གིས་ཡུལ་མིར་སོན་འདེབས་དང་བརྔ་བསྡུ་སོགས་ཀྱི་འཕྲུལ་ཆས་ཀྱི་ལས་སྒྲུབ་ཞབས་འདེགས་གཅིག་གྱུར་ཞུས་པ་ལས། ཡུལ་མི་ཚོ་ལྗིད་རྫོབས་ཆེ་བའི་ཞིང་ལས་ཁྲོད་ནས་བཅིངས་འགྲོལ་ཐོབ་སྟེ། ཚང་མར་ཕྱིར་གླ་པ་རྒྱུག་པར་སྐྱོད་པའི་དུས་ཚོད་བྱུང་བས། འབྲུ་འདེབས་དང་འབབ་འཕར་གཉིས་ཀ་འཐུས་ཤོར་སོང་མེད”ཅེས་ཤེལ་གྲོང་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་སྤེན་པ་ཚེ་རིང་གིས་བཤད།

ད་ཆ། ཤེལ་གྲོང་གྲོང་ཚོར་སོན་འདེབས་དང་བརྔ་བསྡུའི་བརྒྱུད་རིམ་ཧྲིལ་པོ་འཕྲུལ་ཆས་ཅན་དུ་གྱུར་ཞིང་། ཡུལ་མི་ཚོས་དེང་རབས་ཞིང་ལས་འཕེལ་རྒྱས་ཕྱིན་པ་ལས་སྟབས་བདེ་མང་པོ་བྱུང་བ་མྱོང་ཚོར་ཐུབ་ཡོད།

ཉེ་བའི་ལོ་ཤས་རིང་། རང་སྐྱོང་ལྗོངས་ཀྱིས་ཞིང་ལས་ལོ་ཏོག་གི་ཐོན་ཚད་མཐོ་རུ་གཏོང་རྒྱུ་དམིགས་ཡུལ་དུ་བཟུང་སྟེ། “ཞིང་བརྟེན་འབྲུ་གསོག་དང་རྩལ་བརྟེན་འབྲུ་གསོག”གི་འཐབ་ཇུས་ལག་ལེན་གཏིང་ཟབ་བསྟར་བ་དང་།“འཛུཌ་སྐྲུན་ལ་བརྟེན་ནས་སྲུང་སྐྱོང་ལ་སྐུལ་འདེད་གཏོང་བའི”བསམ་ཕྱོགས་མཐའ་འཁྱོངས་བྱས་ནས་འབྲུ་རིགས་ཐོན་སྐྱེད་བྱེད་ནུས་ཁུལ་དང་གཏན་འཇགས་གཞི་རྩའི་ས་ཞིང་གཙོ་གནད་དུ་བཟུང་ཞིང་། ས་ཁོད་ལེགས་སྙོམས་དང་། ས་རྒྱུ་ལེགས་གཏོང་། ཡུར་བུའི་ལེ་ལག་ཚང་སྒྲིག གཞུང་ལམ་མཁྲེགས་བཟོ་སོགས་ལས་གྲྭའི་སྒྲིག་བཀོད་བརྒྱུད་ཚད་གཞི་མཐོ་བའི་ས་ཞིང་འཛུགས་སྐྲུན་ལ་རྒྱུན་མཐུད་ནས་སྐུལ་འདེད་བཏང་ཡོད།

“ལོ་ལྔ་ཚན་བཅུ་བཞི་པའི”རིང་རང་ལྗོངས་ཀྱིས་ཚད་གཞི་མཐོ་བའི་ས་ཞིང་འཛུགས་སྐྲུན་བྱེད་པར་མ་དངུལ་སྒོར་དུང་ཕྱུར་74.1142བཏང་ཡོད། ད་ལོའི་ཟླ་8པའི་ཟླ་མཇུག་བར་ལྗོངས་ཡོངས་སུ་རིམ་རྩིས་བརྒྱབ་ན་ཚད་གཞི་མཐོ་བའི་ས་ཞིང་མུའུ་ཁྲི་450ལྷག་ཙམ་འཛུགས་སྐྲུན་བྱས་པ་དང་མུའུ་ཁྲི་65ལྷག་ཙམ་སྒྱུར་བཀོད་རིམ་སྤོར་བྱས་ཏེ། “ལོ་ལྔ་ཚན་བཅུ་བཞི་པའི”འཛུགས་སྐྲུན་གྱི་དམིགས་ཚད་སྔ་སྣུར་དུ་ལེགས་པར་བསྒྲུབས་ཡོད། མིག་སྔར་ལྗོངས་ཡོངས་ཀྱི་རྨོ་ཞིང་ཕྱེད་ཀ་ཡན“ས་ཞིང་ཡུག་འབྲེལ། ཆུ་ཡུར་མཉམ་མཐུད། ལམ་བུ་མཉམ་སྦྲེལ། ཐན་པ་སྟོན་སྐབས་ཞིང་ཆུ་འདྲེན་ཐུབ་པ། ཞོད་སྐྱོན་བྱུང་སྐབས་ཆུ་གཤོང་ཐུབ་པ”བཅས་བྱུང་ཞིང་། ཚད་གཞི་མཐོ་བའི་ས་ཞིང་མུའུ་རེར་ཆ་སྙོམས་ཐོན་འཕར་5%ཡན་བྱུང་ནས་འབྲུ་རིགས་ཀྱི་ཐོན་འབབ་བརྟན་པོ་དང་འཕར་བར་རྨང་གཞི་བརྟན་པོ་བཏིང་ཡོད།

རང་སྐྱོང་ལྗོངས་ཞིང་ལས་གྲོང་གསེབ་ཐིང་གི་འབྲེལ་ཡོད་འགན་འཁུར་བས། ཚད་གཞི་མཐོ་བའི་ས་ཞིང་འཛུགས་སྐྲུན་བྱས་པ་བརྒྱུད། ཞིང་ལས་ཐོན་སྐྱེད་ཀྱི་ཆ་རྐྱེན་ལེགས་སུ་ཕྱིན་པ་མ་ཟད། ཞིང་ལས་ཀྱི་སོན་གསར་པ་དང་། ལག་རྩལ་གསར་པ། སྒྲིག་ཆས་གསར་པ་བཅས་ཁྱབ་གདལ་དང་བེད་སྤྱོད་བྱེད་མགྱོགས་སུ་ཕྱིན་ཡོད། མིག་སྔར་ལྗོངས་ཡོངས་ཀྱི་ཞིང་ལས་སྐྱེ་དངོས་ཀྱི་སོན་བཟང་ཁྱབ་ཚད་དང་རྨོ་འདེབས་བསྡུ་གསུམ་གྱི་ཕྱོགས་བསྡུས་འཕྲུལ་ཆས་ཅན་དུ་འགྱུར་ཚད་གཉིས་ཀ་ཚད་བརྒལ་བྱུང་སྟེ། ཞིང་ལས་ཐོན་སྐྱེད་ཐད་ཞིང་སྨན་གྲོན་ཆུང་དང་རྫས་ལུད་གྲོན་ཆུང་10%ཡོང་བར་བྱས་ནས། ཚད་གཞི་མཐོ་བའི་ས་ཞིང་དེ་ཉིད་ཞིང་པའི་ཡོང་འབབ་རྒྱུན་མཐུད་འཕར་སྣོན་གྱི“ཕྱུག་འགྱུར་གྱི་ས་ཞིང”ལ་དངོས་སུ་འགྱུར་བར་བྱས་ཡོད་ཅེས་བཤད།

རེ་བས་ཁེངས་པའི་ས་མཐོའི་ཞིང་སའི་སྟེང་དུ་རྨང་གཞིའི་སྒྲིག་བཀོད་མཐོར་གཏོང་དང་ཞིང་ལས་ཚན་རྩལ་ལ་བརྟེན་ནས་མཐུན་རྐྱེན་སྦྱོར་བའི་སྒུལ་ཤུགས་ཀྱི་འཁོར་ལོ་གཉིས་ཀ་བསྐོར་ཏེ། འབྲུ་རིགས་བདེ་འཇགས་ཀྱི་རྨང་གཞི་བརྟན་དུ་བཏང་བ་མ་ཟད། ཞིང་པའི་ཡོང་འབབ་འཕར་སྣོན་གྱི་ཐབས་ལམ་ཡང་དེ་བས་རྒྱ་ཆེར་བཏང་ཡོད། ཚད་གཞི་མཐོ་བའི་ས་ཞིང་འཛུགས་སྐྲུན་ལ་མུ་མཐུད་སྐུལ་འདེད་བཏང་བ་དང་ཆབས་ཅིག “ཞིང་ལས་སྟོབས་ཆེན་དང་། གྲོང་གསེབ་མཛེས་སྡུག ཞིང་པ་ཕྱུག་འགྱུར”བཅས་ཀྱི་གྲོང་གསེབ་དར་རྒྱས་ཀྱི་རྣམ་པ་གསར་པ་ཞིག་གངས་ལྗོངས་ས་མཐོ་ནས་རིམ་བཞིན་མངོན་བཞིན་ཡོད།