ཉིང་ཁྲི་གྲོང་ཁྱེར་མེ་ཏོག་རྫོང་བདེ་ཞིང་ཤང་བདེ་ཞིང་གྲོང་ཚོའི་ཤིང་འབྲས་འབྲུག་སིལ་གྱི་རྟེན་གཞིར་མོན་པ་རིགས་ཀྱི་སློབ་ཆེན་སློབ་མ་ནོར་བུ་ཚེ་རིང་གིས་ཡུལ་སྐོར་བར་ཤིང་འབྲས་འབྲུག་སིལ་འཐུ་སྟངས་སློབ་བཞིན་ཡོད། དམར་སྨུག་གི་ཤིང་འབྲས་འབྲུག་སིལ་དཔྱངས་འཕྲུལ་དུ་བཏགས་ཡོད། གྲོང་ཁྱེར་གྱི་ལས་ཀ་བློས་བཏང་ནས་ཚ་ཁུལ་གྱི་ཤིང་འབྲས་ས་མཐོར་འདེབས་མཁན་གཞོན་ནུ་ཁོང་གིས་འབྲས་ཤིང་སྡོང་རྐང་200ཚོད་འདེབས་བྱས་པ་ནས་མུའུ་17ཟིན་པའི་ཤིང་འབྲས་ར་བར་ཐོན་ལེགས་བྱུང་བའི་བར་དང་། རང་ཉིད་གཅིག་པུས་འཚོལ་ཞིབ་བྱེད་པ་ནས་ཡུལ་མི་མཉམ་དུ་ཕྱུག་པོ་ཆགས་པར་སྣེ་ཁྲིད་བྱེད་པའི་བར་མེ་ཏོག་གི་ཡུལ་འདིར་ལས་གཏོད་ཀྱི་གཏམ་རྒྱུད་ཅིག་བརྩམས་བཞིན་མཆིས།

● ལོ་ལེགས་འབྲས་བཟང་འཕྱུར་བའི་རྣམ་པ།

ནོར་བུ་ཚེ་རིང་གི་ཤིང་འབྲས་འབྲུག་སིལ་གྱི་འདེབས་འཛུགས་རྟེན་གཞིར་སྐྱོད་སྐབས། ལྡུམ་རའི་ནང་ཐོན་ལེགས་ཀྱི་རྣམ་པས་ཁེངས་པ་སྟེ། དེ་ག་མཐའ་འཁོར་མང་ཚོགས་ཀྱིས་གཟའ་མཇུག་ལ་ཕྲུ་གུ་ཁྲིད་ནས་ཉམས་ལེན་བྱ་ཡུལ་ཡག་པོ་ཞིག་ཏུ་གྱུར། “གཟབ་གཟབ་བྱེད་ཨཱ། སྡོང་པོར་སྐྱོན་མི་ཤོར་བ་བྱེད་ཅིག”ཅེས་མགོ་ལ་རྩྭ་ཞྭ་དང་འདམ་གྱིས་འཚོས་པའི་འགྱིག་ལྷམ་གྱོན་པའི་ནོར་བུ་ཚེ་རིང་གིས་ཡུལ་སྐོར་བ་འགའ་ཞིག་ལ་ཤིང་འབྲས་འཐུ་སྟངས་བསླབས་ཟིན་མ་ཐག སླར་ཡང་ལས་མིར་དབྱེ་གསེས་བྱེད་སྟངས་སློབ་བཞིན་དེ་ལྟར་བཤད། ཁོས་གིས་ལག་པ་བརྐྱངས་ནས་སྨིན་ཟིན་པའི་ཤིང་འབྲས་འབྲུག་སིལ་ཞིག་གི་མཐིལ་ནས་བཟུང་སྟེ། གཅུས་སྒྲིམ་བརྒྱབ་པས་དེ་མུར་ཤིང་འབྲས་སི་རའི་ནང་ལྷུངས།

ཁོང་གི་བཟའ་ཟླ་ཤེས་རབ་མཚོ་མོས་དབྱེ་གསེས་ཁུལ་དུ་ཤིང་འབྲས་ཀྱི་ཆེ་ཆུང་ལ་གཞིགས་ནས་སི་རའི་ནང་བླུག་བཞིན་ཡོད་ཅིང་། ཉེ་འགྲམ་དུ་སི་ར་མང་པོའི་ནང་ཤིང་འབྲས་བྱུར་བུར་བཀངས་ནས་ཡོད། ཡུལ་མི་འགའ་ཞིག་གིས་ཤིང་འབྲས་བླུགས་པའི་སི་ར་འཁོར་གསུམ་རྐང་འཁོར་ནང་བླུག་པར་བྲེལ། ཡུལ་སྐོར་བ་ཚོའི་བསྔགས་བརྗོད་ཀྱི་སྒྲ་དང་བྱིས་པའི་དགོད་སྒྲ་དེ་ཐོན་ལེགས་བྱུང་བའི་སྙན་པའི་དབྱངས་དང་གཉིས་སུ་མ་མཆིས།

ད་ལོ་ལོ་30ལ་སླེབས་པའི་ནོར་བུ་ཚེ་རིང་གི་ལག་མཐིལ་ཤ་རོས་ཁེངས། ཚིགས་ཐོག་ལའང་འབྲུག་སིལ་གྱི་ཚེར་མ་ཟུག་ནས་བཟོས་པའི་རྨ་ཤུལ་མང་པོ་ལུས་ཡོད། “ཐོག་མར་གཉན་ཁ་རྒྱས་ཀྱི་འདུག ཡིན་ནའང་ད་ཆ་གོམས་འདུག”ཅེས་ཁོང་གིས་ལག་པའི་རྨ་ཤུལ་དག་སྟོན་གྱིན་གདོང་ལས་ཐོན་ལེགས་ཀྱི་དགའ་སྤྲོས་ཁེངས་ཤིང་བཤད། “ད་ལྟ་གཟའ་མཇུག་ལ་མི་མང་ཤོས་ཡོང་གི་འདུག ལ་ལ་ནང་མི་ཚང་མ་ཤིང་ཏོག་འཐུ་བར་ཡོང་བ་དང་། ལ་ལ་ཆེད་མངགས་པར་རྒྱག་པར་ཡོང་གི་འདུག ཤིང་འབྲས་ལྡུམ་རའི་ནང་སྔོན་ཆད་དང་མི་འདྲ་བར་ཧ་ཅང་འཁྲུག་ཆ་དོད”ཅེས་དང“འདི་དག་རྫོང་གྲོང་དུ་ཡོད་པའི་ཤིང་འབྲས་ཚོང་ཁང་ནང་སྐྱེལ་དགོས་པས་གཙང་མར་བཀྲུ་དགོས”ཞེས་འཁོར་གསུམ་རྐང་འཁོར་ནང་ཤིང་འབྲས་སི་ར་བླུགས་ཚར་རྗེས་ཤེས་རབ་མཚོ་མོས་འདམ་བག་འགོས་པའི་ཤིང་ཏོག་འཁྲུ་བཞིན་བཤད།

● དཀའ་ཚེགས་ཀྱི་ལས་གཏོད་ལམ་བུ།

“ཡུལ་མི་ཚང་མས་ང་ལ་སློབ་ཆེན་ཐོན་རྗེས་སྔར་བཞིན་ཞིང་པ་བྱས་ན་ཆོ་གང་ཡོད་ཅེས་ཤོད་ཀྱི་འདུག”ཅེས་ནོར་བུ་ཚེ་རིང་གིས་ཤིང་འབྲས་ལྡུམ་རའི་ཟུར་ཞིག་ཏུ་བསྡད་ནས་ཐོག་མར་ལས་གཏོད་བྱེད་སྐབས་ཀྱི་གནས་ཚུལ་ཕྱིར་དྲན་བྱས། 2018ལོར་སི་ཁྲོན་མཐོ་སློབ་ནས་ཐོན་པའི་ཁོང་གིས་སེམས་ཐག་གཙང་བཅད་ཀྱིས་གྲོང་ཁྱེར་དུ་ལས་ཀ་བྱེད་པའི་གོ་སྐབས་དོར་ནས“ཤེས་བྱ་གསར་པ”ཁྱེར་ཏེ་ཕ་ཡུལ་དུ་ལོག ཐེངས་གཅིག་བརྙན་ཐུང་སྟེགས་བུ་ཞིག་ནས་ཀོང་ཤིས་ཀྱི་ཞིང་དུད་ཅིག་གིས་ཤིང་འབྲས་འབྲུག་སིལ་འདེབས་འཛུགས་བྱས་པའི་བརྙན་ཐུང་ཞིག་མཐོང་བྱུང་། ཤིང་འབྲས་དེ་རིགས་ལོ་རེར་ཐེངས་གསུམ་བཞི་སྨིན་ནས་འཐུ་ཆོག་པ་དང་། སྐྱེ་འཚར་བྱེད་རིང་འབུ་གནོད་ཕོག་ཉུང་བ་མ་ཟད། ད་དུང་འདེབས་འཛུགས་བྱེད་བདེ་པོ་ཡོད་པའང་ཤེས་རྟོགས་བྱུང་།“མེ་ཏོག་ཏུ་དབྱར་ཁ་དྲོད་ཆེ་ཞིང་ཆར་ཆུ་འབེལ་བས། གཅིག་བྱས་ན་འདེབས་འཛུགས་བྱེད་ཐུབ”ཁོང་ལ་དུས་དེ་ནས་བཟུང་ཚོད་འདེབས་བྱ་རྒྱུའི་བསམ་ཚུལ་ཞིག་བྱུང་། ཐོག་མར་ནང་མིས“ང་ཚོ་མི་རབས་ནས་མི་རབས་བར་ནས་དང་གྲོ་འདེབས་པ་ལས་ཤིང་འབྲས་འབྲུག་སིལ་འདེབས་སྲོལ་མེད”ཅེས་ངོ་རྒོལ་མཐའ་གཅིག་ཏུ་བྱས་མོད། འོན་ཀྱང་ནོར་བུ་ཚེ་རིང་གིས་སེམས་ཐག་གཙང་བཅད་ཀྱིས་ཀོང་ཤིས་ཀྱི་དྲ་ཐོག་ཚོང་ཁང་ཞིག་ནས་སྡོང་རྐང་200ཉོས་ཏེ་རང་ཁྱིམ་གྱི་ཞིང་ཁའི་ནང་དུ་དྲོད་ཁང་སྟབས་བདེ་ཞིག་བརྒྱབ་ཅིང་། གསལ་བཤད་ཡི་གེ་ལྟར་ཆུ་འདྲེན་པ་དང་། ལུད་རྒྱག་པ། རྩྭ་ངན་འཐུ་བ་སོགས་འདེབས་འཛུགས་བྱས་མ་ཐག་གི་ཟླ་བ་གསུམ་རིང་ཞིང་ནང་ནས་ཁ་བྲལ་མེད། དགུན་ཁ་ཤར་རྗེས་འདེབས་འཛུགས་བྱས་པའི་སྡོང་པོ་ཕྱེད་ཀ་ཡན་སྐམ་སོང་། སྡོང་པོ་སེར་པོར་གྱུར་པ་མཐོང་སྐབས་ཉིན་འགའ་ཞིག་གཉིད་ཀྱང་ཁུག་མ་བྱུང་ལོ་གཉིས་པའི་དབྱར་ཁར་སྐྱེས་འཚར་བྱུང་བའི་སྡོང་པོར་མཐར་མེ་ཏོག་བཞད་ནས་འབྲས་བུ་བཏགས། ཤིང་འབྲས་འབྲུག་སིལ་དང་པོ་དེ་སྨིན་པའི་སྐབས་སུ། ནང་མི་ཚང་མས་སྒོ་རའི་ནང་དུ་བསྡད་ནས་དེའི་བྲོ་བ་བལྟས། མངར་བསིལ་ལྡན་པའི་ཤིང་འབྲས་བཟའ་རྒྱུ་བྱུང་བའི་དུས་སུ་དཀའ་ངལ་བརྒྱབ་པ་ཚང་མ་རྒྱག་རིན་ཆོག་པར་གྱུར།

ཚོད་ལྟ་ཡང་ཡང་བྱས་པ་བརྒྱུད། ནོར་བུ་ཚེ་རིང་གིས་ས་རྒྱུ་ལེགས་བཅོས་བྱས་ནས་སྐྱི་ཁེབས་དྲོད་སྲུང་དང་ཐིགས་འདྲེན་ཆུ་ཚོད་འཛིན་སོགས་ཀྱི་ལག་རྩལ་ཚོད་ལྟ་བྱས་མཐར། ཤིང་འབྲས་འབྲུག་སིལ་གསོན་ཚད་ཐོག་མའི་50%ནས་ད་ཆའི་70%བར་འགན་ལེན་ཐུབ། ཤེས་རབ་མཚོ་མོས་རང་ཁྱིམ་གྱི་ཤིང་འབྲས་འབྲུག་སིལ་ལ་རྫོང་གྲོང་དང་ས་ཆ་གཞན་གྱི་ཡུལ་སྐོར་བས་དགའ་པོ་བྱེད་པ་ཤེས་རྟོགས་བྱུང་བ་དང་། སྤུས་རྟགས་སྔར་བས་ཡག་པོ་གཏོད་ཆེད། ཁོང་གིས་མེ་ཏོག་རྫོང་གྲོང་དུ་ཚོང་ཁང་བཙུགས་པ་མ་ཟད། ཚོང་རྟགས་ཐོ་འགོད་ཀྱང་བྱས། 2022ལོར་མེ་ཏོག་གི་བདེ་སྒོ་ཁྱིམ་ཚང་ཞིང་ར་ཚད་ཡོད་ཀུང་སི་ཐོ་འགོད་བྱས་ནས་འཛུགས་སྐབས་འདེབས་འཛུགས་གཞི་ཁྱོན་ཐོག་མའི་མུའུ་2ནས་ཕྱིས་སུ་མུའུ་17བར་རྒྱ་སྐྱེད་སོང་། ད་ཆ་ཁོང་ཚོའི་ཤིང་འབྲས་འབྲུག་སིལ་གྱིས་ཉིང་ཁྲི་དང་ལྷ་ས་དང་ཐ་ན་ལྗོངས་ཕྱིའི་ཞིང་ཆེན་དང་གྲོང་ཁྱེར་གྱི་ཉོ་མཁན་གྱི་ཡིད་དབང་བཀུག་ཡོད།

● རོགས་སྐྱོར་གྱི་ཐབས་བཟང་།

“སྲིད་གཞུང་གི་རོགས་རམ་མེད་ན། ངའི་ཤིང་འབྲས་ལྡུམ་ར་འཕེལ་རྒྱས་དེ་ལྟ་བུ་ཡོང་ག་ལ་སྲིད”ཅེས་ནོར་བུ་ཚེ་རིང་གིས་མྱོང་ཚོར་ཟབ་མོས་བཤད།

ནོར་བུ་ཚེ་རིང་དེ་བས་དགའ་པོ་བྱུང་དོན་ནི་ལས་གཏོད་བྱེད་པའི་ཐོག་མའི་དུས་སུ་རེ་ཞུ་བྱས་པའི་སློབ་ཆེན་སློབ་མའི་ལས་གཏོད་ཐེབས་རྩའི་སྒོར་ཁྲི་5དང་དམངས་འཚོའི་རོགས་སྐྱོར་མ་དངུལ་སྒོར་ཁྲི་30ཡིས་འདེབས་འཛུགས་གཞི་ཁྱོན་ཆེ་རུ་གཏོང་བར་དུས་ཐོག་ཏུ་མ་དངུལ་གྱི་རྒྱབ་སྐྱོར་ཐོབ་པས་རེད།

ད་ཆ་ནོར་བུ་ཚེ་རིང་གི་ཤིང་འབྲས་ལྡུམ་ར་ནས་ལོ་རེར་ཤིང་འབྲས་འབྲུག་སིལ་རྒྱ་མ་8000ནས་10000བར་ཐོན་པ་དང་ལོ་རེར་ཡོང་འབབ་སྒོར་ཁྲི་11ཙམ་རག་གི་ཡོད། ཁོང་གིས་གྲོང་ཚོ་ཡོངས་ལ་ཤིང་འབྲས་འབྲུག་སིལ་འདེབས་འཛུགས་བྱེད་པར་སྣེ་ཁྲིད་བྱེད་པ་དང་འབྲེལ། རིན་མེད་ངང་ཤིང་འབྲས་ཀྱི་མྱུ་གུ་སྤྲད་པ་དང་ལག་རྩལ་ཡང་བསླབ་ཀྱི་ཡོད།

ནོར་བུ་ཚེ་རིང་གིས། 2018ལོར་ཕ་ཡུལ་དུ་ལོག་པ་ནས་ད་བར་གྱི་ལོ་བདུན་ནང་ངས་ཤིང་འབྲས་འབྲུག་སིལ་སྣ་ཁ་དྲུག་ཚོད་འདེབས་བྱེད་མྱོང་། དེ་དག་ཚང་མའི་སྐྱེ་འཚར་གྱི་གྲངས་གཞི་ཟིན་ཐོར་ཞིབ་ཕྲ་བཀོད་པ་དང་། གསོན་ཚད་དང་། ཐོན་ཚད། བྲོ་བ། ཁྲོམ་རའི་དགའ་བསུ་ཐོབ་ཚད་བཅས་ལ་གཞིགས་ནས་འོས་ཤིང་འཚམ་པའི་ཤིང་འབྲས་སྣ་ཚོགས་བདམས་ནས་རྒྱ་སྐྱེད་བཏང་བ་ཡིན། མིག་སྔར་ངས་ཤིང་འབྲས་འཕན་སིལ་དང་། ཐང་འབྲས ཁ་ཧྥེ་སོགས་ཚ་ཁུལ་གྱི་ཤིང་འབྲས་ཚོད་འདེབས་བྱས་ནས་སྣ་ཁ་མང་དུ་གཏོང་བཞིན་ཡོད་ཅེས་ངོ་སྤྲོད་བྱས།

ད་ཆ་བདེ་ཞིང་གྲོང་ཚོར་ཤིང་འབྲས་འབྲུག་སིལ་ནི་བྲོ་བ་ཞིམ་པའི་ཤིང་འབྲས་ཤིག་རེད་ལ། འཚོ་བ་གསར་པའི་སྒོ་མོ་འབྱེད་པའི་ལྡེ་མིག་ཀྱང་དེ་བས་རེད། ནོར་བུ་ཚེ་རིང་གིས“གྲོང་གསེབ་དར་རྒྱས་གཏོང་བའི་ཐབས་ལམ་གཙོ་བོ་ནི་དོན་འཁྱོལ་བྱ་རྒྱུ་དེ་རེད”ཅེས་ཡང་ཡང་བཤད།