2023ལོ་ཚུན་དུ། ལྷ་ས་གྲོང་ཁྱེར་སྟག་རྩེ་ཆུས་ཀྱིས་བཞོན་མ་སྒོ་རའི་ནང་གསོ་ཚགས་བྱེད་པ་དེ་ཞིང་འབྲོག་པར་འབབ་འཕར་ཡོང་བར་རོགས་རམ་བྱེད་པའི་ཐབས་བཟང་གལ་ཆེན་ཞིག་ཏུ་བརྩིས་ནས། དེ་སྔའི“དངུལ་དང་དངོས་པོ་སྤྲོད་པའི”སྲོལ་རྒྱུན་རྣམ་པ་དེ“མ་དངུལ་དང་། ལག་རྩལ། ཞབས་ཞུ་བཅས་ཟུང་དུ་འབྲེལ་བའི”ཞིབ་ཕྲའི་རོགས་སྐྱོར་བྱེད་ཕྱོགས་སུ་བསྒྱུར་ཏེ། སྲིད་གཞུང་གིས་ཞིང་དུད་ལ་ཁ་གསབ་སྤྲོད་པ་མ་ཟད། ལག་རྩལ་པ་མངགས་ནས་བརྒྱུད་རིམ་ཧྲིལ་པོར་མཛུབ་ཁྲིད་དང་གསོ་སྤེལ་ལག་རྩལ་དམར་ཁྲིད་བྱས་ནས་ཞིང་དུད་ཀྱི་ནང་གནས་སྒུལ་ཤུགས་འཕེལ་བར་བྱས་ཡོད།

“ཞིང་དུད་ཀྱིས་གསོ་ཚགས་མ་བྱས་གོང་། ང་ཚོས་ས་གནས་ས་ཐོག་ཏུ་ལྟ་ཞིབ་བྱེད་པར་ཐེངས་མང་སྐྱོད་དགོས་ཀྱི་ཡོད”སྟག་རྩེ་ཆུས་ཞིང་ལས་གྲོང་གསེབ་ཅུས་ཀྱི་ཅུས་ཀྲང་ཚེ་རྡོར་གྱིས་གསར་འགོད་པར“གཙོ་བོ་ས་ཆ་དང་། ཆ་རྐྱེན། འདོད་མོས། ཆོད་སེམས། རྨང་གཞི། མི་མངོན་པའི་སྟོབས་ཤུགས། ཡིད་རྟོན། འགན་འཁྲི་འཁུར་ཐུབ་མིན་བཅས་ལ་ཞིབ་བཤེར་བྱས་ཏེ་ཚད་མི་ལོན་པ་གཅིག་ཡོད་ཚེ་ཆོག་མཆན་རྩ་བ་ནས་སྤྲོད་ཀྱི་མེད། གསོ་ཚགས་དུད་ཚང་གནད་སྨིན་ངང་འདེམས་པ་ལས‘ཕྱི་ཚུལ་རྣམ་པའི’རོགས་སྐྱོར་གཏན་འགོག་བྱེད་རྒྱུ་ཡིན”ཞེས་བཤད།

གསོ་ཚགས་དོ་དམ་ལ་ཤུགས་སྣོན་རྒྱག་ཆེད། སྟག་རྩེ་ཆུས་ཀྱིས་བ་ཚང་གི་རྒྱ་ཁྱོན་སྨི་ངོས་གྲུ་25ལས་ཆུང་མི་རུང་བ་དང་མི་ཕྱུགས་ལོགས་དབྱེ་ཁྱབ་གདལ་ནན་པོ་གཏོང་བ་དང་ཆབས་ཅིག་གཟན་རྩྭ་འདེབས་འཛུགས་རྒྱ་ཁྱོན་མུའུ་5ལས་མི་ཉུང་བ་བྱེད་དགོས་པའི་བླང་བྱ་ཁ་གསལ་བཏོན་པ་རེད།

ཞིབ་བཤེར་རྩིས་ལེན་བྱས་ནས་ཚད་ལོན་རྗེས། ཧོ་སི་ཐན་གྱི་བཞོན་མ་5ཡན་ཉོས་པའི་ཞིང་དུད་ལ་སྲིད་གཞུང་གིས་དུད་ཚང་རེར་ཁ་གསབ་སྒོར་ཁྲི་10སྤྲོད་པ་དང་ཁ་གསབ་མ་དངུལ་འབྲེལ་ཡོད་རྩིས་ཐོ་བརྒྱུད་ཞིང་དུད་ལ་ཐད་ཀར་སྤྲོད་ཀྱི་ཡོད། དེ་དང་ཆབས་ཅིག “བཞོན་མ་རེར་ཡིག་ཚགས་རེའི”དོ་དམ་མ་ལག་བཙུགས་ཏེ། དུས་བཀག་ལྟར་རྒྱུད་པ་དང་། རིམས་འགོག འོ་མ་ཐོན་ཚད། རྒྱུད་འཕེལ་ཟིན་ཐོ་སོགས་ཀྱི་གྲངས་གཞི་གསར་སྒྱུར་དང་ཞིབ་ཚགས་ཅན་གྱི་དོ་དམ་མངོན་འགྱུར་བྱུང་ནས། སྒོ་རའི་གསོ་ཚགས་དེ“ཁ་ཐོར་གསོ་ཚགས་ཀྱི་ཐོན་འབབ་དམའ་བ”ནས“ཚན་རིག་དང་མཐུན་པའི་ཐོན་འཕར”དུ་འགྱུར་བར་སྐུལ་འདེད་བཏང་སྟེ་གསོ་ཚགས་ཀྱི་ཕན་འབྲས་ཆེ་རུ་བཏང་བ་རེད།

བཞོན་མ་གསོས་ན་ཡོང་འབབ་གསོག་ཐུབ་པ་དང་གཟན་རྩྭ་བཏབ་ན་ཁ་གསབ་ལེན་རྒྱུ་ཡོད། “གཟན་རྩྭ་དཀོན་པའི་གནད་དོན་ཐག་གཅོད་བྱ་ཆེད། ང་ཚོས་ད་དུང་སྲིད་ཇུས་བཏོན་ནས་གཟན་རྩྭ་འདེབས་པར་ཁ་གསབ་སྤྲད་པས། ཞིང་དུད་ཀྱི་ཧུར་སེམས་ཆེས་ཆེར་འཕེལ་ཡོད”ཅེས་ཚེ་རྡོར་གྱིས་ངོ་སྤྲོད་བྱས། སྟག་རྩེ་ཆུས་ཀྱིས་ཡུག་འབྲེལ་ངང་ཐོན་འབབ་མཐོ་བའི་ཡུག་པོ་འདེབས་མཁན་ཞིང་དུད་ལ་དམིགས་ཏེ་མུའུ་རེར་ཁ་གསབ་སྒོར་300སྤྲད་པ་དང་། མ་རྨོས་ལོ་ཏོག་འདེབས་འཛུགས་བྱེད་མཁན་ལ་མུའུ་རེར་ཁ་གསབ་སྒོར་400སྤྲད་པ། སྤུས་ལེགས་འབུ་སུ་ཧང་འདེབས་མཁན་ལ་མུའུ་རེར་ཁ་གསབ་སྒོར་600སྤྲད་པ། ཞིང་དུད་ཀྱིས་ཁང་པའི་རྒྱབ་མདུན་དུ་གཟན་རྩྭ་བཏབ་ན་མུའུ་རེར་ཁ་གསབ་སྒོར་100སྤྲོད་ཀྱི་ཡོད། “བྱམས་པོའི་སྒང་ལ་སྐྱོང་རོགས”ལྟར་གྱི་སྲིད་ཇུས་ཀྱི་གདུབ་ཟུམ་དེ་རིགས་ལས་ཞིང་དུད་ཀྱི་བེད་མེད་དུ་བཞག་པའི་སྒོ་ར་དེ་དེང་རབས་ཀྱི་ཁྱིམ་ཚང་འབྲོག་རར་གྱུར་ཡོད་ཅེས་ངོ་སྤྲོད་བྱས།

དུས་མཚུངས་སུ་སྟག་རྩེ་ཆུས་ཀྱིས་རིམས་འགོག་གི་མཐའ་ཚད་བརྟན་དུ་བཏང་བ་དང་ཚན་རིག་དང་མཐུན་པའི་གསོ་སྤེལ་ཁུལ་དང་འཚོ་བའི་ཁུལ་དབྱེ་ཐོག རིམས་འགོག་ལོགས་དབྱེ་ཁུལ་དང་དུག་སེལ་རྫིང་བུ་བཟོས་ཏེ་་འབྱུང་རྩ་ནས་རིམས་ནད་མཆེད་པའི་ཉེན་ཁ་མེད་པར་བཟོས་པ་དང་། ལོ་རེར་ཕྱུགས་ཟོག་གི་རིམས་ནད་སྔོན་འགོག་དང་ཚོད་འཛིན་གྱི་ཆེད་དོན་མ་དངུལ་སྒོར་ཁྲི་100བཀོད་སྒྲིག་བྱས་ཏེ་སྲོག་ཆགས་ཀྱི་རིམས་ནད་ཚབས་ཆེན་སྔོན་འགོག་ནན་པོ་བྱས་པ་རེད།

བཞོན་མ་གཙོ་བོར་བྱས་པའི་ཐོན་ལས་འཁོར་འབྲེལ་བཟོས་པས། ཕྱུགས་ལས་ཐོན་རྫས་ལས་སྣོན་གཞན་སྒྱུར་ལ་སྐུལ་འདེད་ཤུགས་ཆེན་ཐེབས་ཡོད། ད་ཆ་སྟག་རྩེ་ཆུས་ཀྱི་དཀར་ཆུའི་ལས་རིགས་ཐོན་སྐྱེད་ཡག་པོ་དང་རྩྭ་ཕྱུགས་དོ་སྙོམས་བྱུང་ཡོད། ད་ལོའི་དུས་ཚིགས་དང་པོ་ནས་གསུམ་པའི་བར་སྟག་རྩེ་ཆུས་ཀྱི་འོ་མའི་ཐོན་ཚད་ཏུན་17973.66ཟིན་ཡོད་པ་རེད།