ཉེ་ཆར། ཀྲུང་གོ་འཕྲུལ་ཆས་བཟོ་ལས་ཚོགས་པ་ཚད་ཡོད་ཀུང་སིའི(གཤམ་དུ“རྒྱལ་འཕྲུལ་ཚོགས་པ”ཞེས་བསྡུ་རྒྱུ)ས་མཐོའི་འཕྲུལ་གློག་སྒྲིག་ཆས་ཚོད་ལྟ་ཁང་བསྐྲུན་པའི་གན་རྒྱ་གོང་དཀར་རྫོང་དུ་དངོས་སུ་བཞག་ཅིང་། རྣམ་གྲངས་དེར་མ་དངུལ་བསྡོམས་འབོར་སྒོར་དུང་ཕྱུར་2བཏང་ཡོད། ད་དུང་རྒྱལ་འཕྲུལ་ཚོགས་པས་ལྷོ་ཁ་གྲོང་ཁྱེར་དུ་བོད་ལྗོངས་རྒྱལ་འཕྲུལ་ས་མཐོའི་འཕྲུལ་གློག་སྒྲིག་ཆས་ཚན་རིག་ཞིབ་འཇུག་ཚད་ཡོད་ཀུང་སི་ཐོ་བཀོད་ནས་བཙུགས་པ་དང་། དེ་ཐོག་ནས་ལྷོ་ཁ་གྲོང་ཁྱེར་གྱིས“ཁེ་ལས་ཆེ་གྲས་ལ་དམིགས་ནས་ཐོན་ལས་ཀྱི་གྲུབ་ཆ་ལེགས་སུ་གཏོང་བའི”ཐད་གོམ་སྟབས་གལ་ཆེན་ཞིག་སྤོས་པ་མཚོན་ཡོད་པ་རེད།

འཛམ་གླིང་གི་ཁེ་ལས་སྟོབས་ཆེན་500ཡི་གྲས་ཤིག་ཡིན་པའི་རྒྱལ་འཕྲུལ་ཚོགས་པ་ནི་ཀྲུང་དབྱང་གིས་ཐད་ཀར་དོ་དམ་བྱེད་པའི་གཞུང་ཁོངས་རྐང་འཛིན་ཁེ་ལས་གལ་ཆེན་ཞིག་ཡིན་ཞིང་། ལོ་མང་པོ་ཀྲུང་གོའི་འཕྲུལ་ཆས་བཟོ་ལས་སྟོབས་ཆེན་བརྒྱའི་ཨང་རིམ་དང་པོ་བཟུང་ཡོད།