འདི་ནི་མཛེས་སྡུག་ལྡན་པའི་སྨར་ཁམས་རྫོང་སྤང་མདའ་ཤང་འབུམ་ནས་གྲོང་ཚོ་ཡིན་པ།

2022ལོ་ནས་བཟུང་། སྨར་ཁམས་རྫོང་གིས་ཀྲེ་ཅང་གི“ཁྲི་སྟོང་ལས་གྲྭ”རྨང་གཞིར་བྱེད་པ་དང་མ་ལག་ཅན་གྱི་བསམ་གཞིག་བཀོད་འདོམས་ཕྱོགས་སྟོན་དུ་བྱས་ཏེ། ས་བབ་མཐོ་ཚད་སྨི་3800ཟིན་པའི་ས་མཐོར་བོད་ཀྱི་ཡུལ་སྲོལ་གོམས་གཤིས་དང་དེང་རབས་ཀྱི་སྣང་ཚུལ་གཉིས་ལྡན་གྱི་གྲོང་གསེབ་དར་རྒྱས་ཀྱི་རྣམ་པ་གསར་པ་བཏོད་ཡོད།

“སྔོན་ཆད་ང་ཚོའི་གྲོང་ཚོ་ནི་གང་སར་ཐོར་བའི་ཇ་ནག་ལྟ་བུ་ཡིན་མོད། འོན་ཀྱང་ད་ཆ་ཇ་ཕོར་ཐོག་ཕྲ་བཏབ་པའི་གཡུ་ལྟ་བུར་གྱུར་ཡོད”ཅེས་སྨར་ཁམས་རྫོང་རོང་མེ་གྲོང་རྡལ་ལ་འོག་གྲོང་ཚོའི་ཡུལ་མི་བསོད་ནམས་ཚེ་རིང་གིས་གྲོང་ཚོའི་ལོ་རྒྱུས་ཁང་གི་རྣམ་པ་གསར་རྙིང་བསྡུར་བའི་རི་མོར་ལྟ་བཞིན་སེམས་འགུལ་ཆེན་པོས་བརྗོད།

ཉེ་བའི་ལོ་ཤས་རིང་། སྨར་ཁམས་རྫོང་གིས“འདུ་ཤེས་གསུམ”ལ་བརྟེན་ནས་གྲོང་གསེབ་ཀྱི་འཆར་གཞི་སླར་ཡང་བཀོད་པ་སྟེ། “དྭངས་གཙང་གི་འདུ་ཤེས”སྤྱད་ནས་རྨང་གཞིའི་སྒྲིག་བཀོད་བསྐྱར་སྐྲུན་བྱས་པས་གྲོང་ཚོ་14ཡི་དུད་ཚང་1706གི་རྣམ་པ་གསར་རྐྱང་དུ་གྱུར་པ་དང་། “ཁྱད་ལྡན་གྱི་འདུ་ཤེས”ལ་བརྟེན་ནས་རིག་གནས་ཀྱི་རྨང་གཞི་སྤྱད་དེ་བོད་ལུགས་ཀྱི་སྒེའུ་ཁུང་བརྐོས་མ་དང་ཉི་ནུས་ལམ་སྒྲོན་བཟོས་པས་ལྷག་པར་མཛེས་པ། “བབ་ཆགས་ཀྱི་འདུ་ཤེས”ལ་བརྟེན་ནས་ཡུལ་དེ་གའི་དྲན་ཤེས་ལ་སྲུང་སྐྱོབ་བྱས་པས་སྲོལ་རྒྱུན་གྱི་ས་གྱང་ལ་དེང་རབས་ཀྱི་བཟོ་རྩལ་སྤྱད་ནས་གསོན་ཤུགས་གསར་པ་ཞིག་མངོན་ཡོད།

སྤང་མདའ་ཤང་འབུམ་ནས་གྲོང་ཚོའི་གྲོས་དོན་ཁང་གི་ཅོག་ཙེའི་འགྲམ་དུ་ཡུལ་མིའི་འཐུས་མིས་སྐར་གསོག་བརྗེ་རེས་ཀྱི་དོན་དག་ལ་གྲོས་བསྡུར་འཁྲུག་པོ་བྱེད་བཞིན་ཡོད། དམངས་གཙོའི་དོན་གྲོས་ཀྱི་རྣམ་པ་དེ་རིགས་ད་ཆ་སྨར་ཁམས་རྫོང་གི་གྲོང་ཚོ(སྡེ་ཁུལ)67ལ་རྒྱུན་དུ་མཐོང་རྒྱུ་ཡོད། རྫོང་དེས་གསར་གཏོད་བྱས་པའི“སྐལ་བཟང་མེ་ཏོག་སྐར་གསོག་ལམ་ལུགས”དེས་གྲོང་གསེབ་བཅོས་སྐྱོང་མིག་མཐོང་ལག་ཟིན་ཐུབ་པ་བྱུང་བ་དང་། སྒོ་རར་གཙང་སྦྲ་བྱས་པར་སྐར་མ་5སྣོན་པ་དང་གྲོང་ཚོའི་ལས་དོན་ནང་ཞུགས་པར་སྐར་མ་3སྣོན་པ་སོགས་མང་པོ་ཡོད།

སྐར་མ་བསགས་ན་འཚོ་བའི་མཁོ་ཆས་བརྗེ་ཐུབ་པ་མ་ཟད། ཤེལ་དཔལ་ཁྱིམ་ཚང་གི“གཟི་བརྗིད་གཟེངས་རྟགས”འདེམས་བསྐོའི་ནང་དུའང་ཞུགས་ཆོག་གི་ཡོད། ཆེད་སྤྱོད་མ་དངུལ་སྒོར་ཁྲི་2206.65བཏང་བ་དང་ཆབས་ཅིག“རང་སྐྱོང་རྨང་གཞིར་བྱེད་པ་དང་། ཁྲིམས་སྐྱོང་རྩ་བར་བྱེད་པ། སྤྱོད་བཟང་སྔོན་སྐྱོང་བཅས་ཀྱི་བཅོས་སྐྱོང་མ་ལག་ཆ་ཚང་ཞིག་ཆགས་བཞིན་ཡོད་པ་དང་། གྲོང་ཚོའི་སྡོད་གནས་ཀྱི་སྒྱུར་བཀོད་སྐོར་གླེང་སྐབས་འབུམ་ནས་གྲོང་ཚོ་ནི་ཚང་མའི་གླེང་གཞི་གཙོ་བོར་གྱུར་ཡོད། “སྔོན་ཆད་མི་ཕྱུགས་མཉམ་དུ་སྡོད་པ་དང་། ད་ཆ་ནོར་ལུག་ལ་སྤྱི་པའི་ལྷས་ར་ཡོད”ཅེས་ཡུལ་མི་དབང་འདུས་ཀྱིས་འཛུམ་དམུལ་དམུལ་ངང་བརྗོད།

ད་ཆ་སྨར་ཁམས་རྫོང་གི་རྫོང་ཡོངས་ཀྱི་དུད་ཚང་3726གི་མི་ཕྱུགས་ལོག་དབྱེའི་འདུ་འགོད་ལེགས་གྲུབ་བྱུང་ནས་ས་གནས་དེ་གའི་མང་ཚོགས་ཀྱི་འཚོ་བ་སྐྱེལ་སྟངས་ལ་འགྱུར་ལྡོག་བྱུང་བ་མ་ཟད། ས་མཐོར“ཁང་པའི་མདུན་དུ་སྐལ་བཟང་མེ་ཏོག་བཞད་པ་དང་རྒྱབ་ཏུ་ཀུ་ཤུའི་ལྡུམ་ར་ཡོད་པའི”སྐྱེ་ཁམས་ཀྱི་རྣམ་པ་གསར་པ་ཞིག་ཀྱང་བཏོད་ཡོད།

འགོ་ཚུགས་ས་གསར་པར་སྨར་ཁམས་རྫོང་གིས་གྲོང་གསེབ་དར་རྒྱས་ཀྱི་རིམ་སྤོར་འཆར་གཞི་བཀོད་ཡོད་པ་སྟེ། འབྱུང་འགྱུར་ལོ་གསུམ་ནང་གྲོང་གསེབ་ཀྱི་གཞུང་ལམ་ཕྱོགས་ཡོངས་ནས་ཤར་གཏོང་ཐུབ་པ་དང་ཆུ་གློག་མདོང་དྲ་བཅས་གྲོང་ཚོ་ཚང་མར་ཁྱབ་པར་བྱེད་རྒྱུ་དང་། “རིག་ལྡན་གྲོང་གསེབ”ལས་སྟེགས་ཀྱིས་སྐར་གསོག་ལམ་ལུགས་དོ་དམ་ལ་གྲངས་གཞི་ཅན་གྱི་གཤོག་ཟུང་སྒར་རྒྱུ་རེད། དེ་དང་ཆབས་ཅིག མི་ཕྱུགས་ལོག་དབྱེའི་ལས་དོན་ལ་མུ་མཐུད་སྐུལ་འདེད་བཏང་ནས་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་གྲོང་གསེབ་དར་རྒྱས་ཀྱི་རྣམ་པ་གཏོད་རྒྱུ་རེད།