ད་ལོ་ཚུན། ཆབ་མདོ་གྲོང་ཁྱེར་བྲག་གཡབ་རྫོང་གིས“རྣམ་གྲངས་གཙོ་བོར་འཛིན་པའི”འདུ་ཤེས་རྒྱུན་འཁྱོངས་བྱས་ཏེ“ལས་འགོ་གང་མགྱོགས་འཛུགས་པ་དང་། རྒྱུ་རྐྱེན་ཀུན་འདུས། གནད་སྨིན་ཅན”བཅས་ཀྱི་བྱེད་ཐབས་ཆེན་པོ་གསུམ་བརྒྱུད་རྣམ་གྲངས་དང་། ཐོན་ལས། དཔལ་འབྱོར“གནས” “རྒྱུད” “ཁྱོན”བཅས་མཐུན་སྦྱོར་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ། རྫོང་ཁོངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད།

ལས་འགོ་གང་མགྱོགས་བཙུགས་ནས་རྣམ་གྲངས་ཕྱོགས་སྒྱུར་གྱི་ལམ་བུ་གསར་པ་བཏོད་ཅིང་། “གཟའ་འཁོར་རེར་བཀོད་གཏོང་རེ་དང་། ཉིན་བཅུ་རེར་དབྱེ་ཞིབ་རེ། ཟླ་རེར་ཕྱོགས་སྡོམ་རེ”བཅས་ཀྱི་ལས་ཀའི་རྣམ་པ་སྤྱད་དེ་རྣམ་གྲངས་ཀྱི་དུས་འགོའི་ལས་དོན་བསྒྲུབ་པའི་དུས་ཚོད་མཚམས་ཚིགས་དང་འཆར་གཞིའི་མྱུར་ཚད་ཁ་གསལ་བཟོས་ནས་ནུས་ཤུགས་ཡོད་རྒུས་རྣམ་གྲངས་འཛུགས་སྐྲུན་ལ་སྐུལ་འདེད་བཏང་ཡོད། ཟླ་2པའི་ཟླ་མཇུག་བར། 2025ལོའི་རྨང་གཞིའི་འཛུགས་སྐྲུན་རྣམ་གྲངས་ཁྱོན་41ཡོད་པར་མ་དངུལ་བསྡོམས་འབོར་སྒོར་དུང་ཕྱུར་15.83བཏང་ནས་འཆར་གཞིའི་དུང་ཕྱུར་11.98ལེགས་སྒྲུབ་ཟིན་པའི་ནང་མཐུད་སྐྲུན་རྣམ་གྲངས་13ཡོད་པར་ལས་འགོ་བསྐྱར་དུ་ཚུགས་ཚད་100%ཟིན་པ་དང་། གསར་སྐྲུན་རྣམ་གྲངས་28ནང་ནས་རྣམ་གྲངས་16ལས་འགོ་ཚུགས་པ། འོས་སྐུལ་འོས་དཔོད་རྣམ་གྲངས་12ཡོད་པར་དུས་འགོའི་ལས་དོན་ལེགས་སྒྲུབ་བྱེད་ཚད་100%ཟིན་ཡོད།

རྒྱུ་རྐྱེན་ཀུན་བཏུས་ཀྱིས་རྣམ་གྲངས་ཀྱི་ཕུགས་ཕན་འགན་སྲུང་གི་བཙན་རྫོང་བརྟན་པོ་བསྐྲུན་ཞིང་། “འགོ་ཁྲིད་ཀྱིས་འགན་འཁྲི་གཙང་ལེན་དང་། ལས་དོན་ཆེད་སྒྲུབ་ཚན་ཁག་གིས་ཞབས་འདེགས་ཞུ་བ། དུས་བཀག་ལྟར་བཀོད་གཏོང་བྱེད་པ། ནུས་ཤུགས་ཡོད་རྒུས་སྐུལ་འདེད་གཏོང་བ”བཅས་ཀྱི་རྩ་དོན་ལྟར། 《བྲག་གཡབ་རྫོང་གི་2025ལོའི་རྣམ་གྲངས་གལ་ཆེན་གྱི་འགན་འཁྲི་གཙང་ལེན་ལ་སྐུལ་འདེད་གཏོང་བའི་ལས་ཀའི་ལམ་སྲོལ་གྱི་ཞིབ་ཕྲའི་རེའུ་མིག》འཐུས་སྒོ་ཚང་དུ་བཏང་ནས། མ་གྲངས་ཀྱི་རྒྱུ་རྐྱེན་གཙོ་བོ་འགན་སྲུང་ཆ་ཚང་བ་དང་ཕན་ནུས་ཆེ་བའི་སྒོ་ནས་སྐུལ་འདེད་གཏོང་ཐུབ་པར་བྱས་ཡོད།

གནད་སྨིན་ཅན་ལ་བརྟེན་ནས་རྣམ་གྲངས་གྲབས་གསོག་ནུས་ལྡན་བྱེད་པའི་འཆར་གཞི་ཆེན་པོ་བཀོད་ཅིང་། “ལོ་ལྔ་ཚན་བཅོ་ལྔ་པའི”འཆར་འགོད་བཟོ་བའི་གོ་སྐབས་དམ་འཛིན་གྱིས་སྲིད་ཇུས་ཞིབ་འཇུག་གི་ཆེད་སྒྲུབ་ཚན་ཁག་བཙུགས་ནས་ཆེད་དོན་བགྲོ་གླེང་ཚོགས་འདུ་ཐེངས་5འཚོགས་ཏེ། རྒྱལ་ཁབ་ཀྱི་ཐོན་ལས་སྲིད་ཇུས་ཀྱི་སྟོན་ཕྱོགས་གོ་རིམ་ལྡན་པའི་སྒོ་ནས་གསེད་བཀྲོལ་བྱས་པ་དང“དོན་ཆེན་བཞིར”དམིགས་ནས་གཙོ་གནད་ཐོག་ནུས་རྒྱུ་གསར་པ་དང་། སྐྱེ་ཁམས་ཡུལ་སྐོར། ཁྱད་ལྡན་ཞིང་ལས་སོགས་ཀྱི་ཁྱབ་ཁོངས་སུ་རྣམ་གྲངས་གལ་ཆེན་484གྲབས་གསོག་འཆར་འགོད་བྱས་པར་བསྡོམས་མ་དངུལ་སྒོར་དུང་ཕྱུར་121.45བཏང་ཡོད།