ཉིན་ཤས་གོང་། གསར་འགོད་པར་རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་ནས་ཤེས་རྟོགས་བྱུང་བར། ཉེ་བའི་ལོ་ཤས་རིང་། ནག་ཆུ་གྲོང་ཁྱེར་གྱིས“ཁག་གཅིག་འཕེལ་རྒྱས་གཏོང་བ་དང་། ཁག་གཅིག་ཚད་ལྡན་དུ་གཏོང་བ། ཁག་གཅིག་མཐོར་གཏོང་བྱེད་པ། ཁག་གཅིག་འོས་སྦྱོར་བྱེད་པ”བཅས་ཀྱི་བསམ་ཕྱོགས་མཐའ་འཁྱོངས་ཀྱིས་དཔེ་སྟོན་འཛུགས་གཏོད་དམ་འཛིན་བྱ་གཞིར་བྱེད་པ་དང་། གསར་གཏོད་ལམ་སྲོལ་འདེགས་སྐྱོར་དུ་བྱས་ཏེ། བྱ་དགས་ཁ་གསབ་དངུལ་གྱི་ཚབ་བྱས་ནས་བྱ་དགའ་སྤྲད་ནས་གཞི་ཁྱོན་འོས་འཚམ་དང་། ཐོན་སྐྱེད་ལེགས་བསྡུས་ཞིབ་གཉེར། དོ་དམ་སྔོན་ཐོན། ཕན་འབྲས་མངོན་གསལ་དོད་པ་བཅས་ཀྱི་ཁྱིམ་ཚང་འབྲོག་ར་འབོར་ཆེན་ཞིག་མགྱོགས་མྱུར་སྐྱེད་སྲིང་བྱས་ཡོད། 2024ལོར་གྲོང་ཁྱེར་ཡོངས་ཀྱིས་རིམ་རྩིས་བརྒྱབ་ན། ཁྱིམ་ཚང་འབྲོག་ར་3442ཀྱི་ཐོ་བཀོད་ཚད་ལྡན་དུ་བཏང་སྟེ། ནག་ཆུ་གྲོང་ཁྱེར་གྱི་གྲོང་གསེབ་ཕྱོགས་ཡོངས་ནས་དར་རྒྱས་ལ་སྐུལ་འདེད་བཏང་བ་དང་ཞིང་ལས་དང་གྲོང་གསེབ་དེང་རབས་ཅན་མངོན་འགྱུར་བྱེད་པའི་རྨང་གཞི་རྒྱུན་ཆད་མེད་པར་བརྟན་དུ་བཏང་ཡོད།

ནག་ཆུ་གྲོང་ཁྱེར་གྱིས་གཞི་གྲངས་མཐིལ་རྟོགས་བྱེད་པ་དང་ཁྱིམ་ཚང་འབྲོག་རའི་འཕེལ་རྒྱས་གནས་ཚུལ་གནད་སྨིན་ངང་ཁོང་དུ་ཆུད་པའི་རྨང་གཞིའི་ཐོག ཁྲོམ་ར་ལྟ་འདོམས་སྡེ་ཚན་གྱིས་དེབ་སྐྱེལ་ཐོ་བཀོད་བྱས་པའི་ཁྱིམ་ཚང་འབྲོག་རར་འཇུག་འཐུས་ཐོབ་ཐང་ཞིབ་བཤེར་ནན་པོ་བྱེད་པའི་འགན་འཁྲི་ཁ་གསལ་བཟོས་པ་དང་། ཞིབ་དཔྱད་དང་སྤྱི་བསྒྲགས་ཐེངས་མང་བྱས་པ་བརྒྱུད་ཁ་གསབ་ཚབ་ཏུ་བྱ་དགའ་སྤྲོད་པའི་སྲིད་ཇུས་དོན་འཁྱོལ་གནད་སྨིན་ཐུབ་པའི་འགན་ལེན་བྱས་ཡོད། གྲོང་ཁྱེར་དང་རྫོང་རིམ་གཉིས་ནོར་སྲིད་ཀྱིས་7:3གྱི་བསྡུར་གྲངས་ལ་གཞིགས་ནས་མ་དངུལ་སྒོར་ཁྲི་5567གྲབས་གསོག་བྱས་ཏེ། གྲོང་ཁྱེར་ཡོངས་ཀྱི་ཁ་གསབ་ཚབ་ཏུ་བྱ་དགའ་སྤྲོད་པའི་སྲིད་ཇུས་ལོངས་སྤྱོད་ཀྱི་རེ་འདུན་ཞུ་མཁན་གྱི་ཁྱིམ་ཚང་འབྲོག་རར་ལག་ཡོད་ནོར་ལུག་གི་གྲངས་འབོར་ལ་གཞིགས་ཏེ་ཁ་གསབ་སྒོར་ཁྲི་1ནས་5བར་སྤྲད་ནས་འབྲོག་ལས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་ནུས་ལྡན་བྱས་ཡོད་པ་རེད།

ལས་རིགས་ཀྱི་གྲངས་གཞི་ལས་མངོན་པར། ན་ནིང་ནག་ཆུ་གྲོང་ཁྱེར་ལ་ལག་ཡོད་འབྲི་གཡག་མགོ་གྲངས་ཁྲི་22.81ཡོད་པ་དེ་དུས་མཚུངས་ལས་5.43%འཕར་བ་དང་། ལག་ཡོད་ལུག་ཁྲི་29.52ཡོད་པ་དེ་དུས་མཚུངས་ལས་3.73%འཕར་ཡོད་པ་རེད། ལག་ཡོད་ཕྱུགས་ཟོག་སླར་གསོའི་རང་བཞིན་གྱི་འཕེལ་ཚུལ་མངོན་ཏེ་གྲོང་ཁྱེར་ཡོངས་ཀྱི་འབྲོག་ལས་ཐོན་ལས་ཀྱི་རྒྱུན་མཐུད་ཆོག་པའི་འཕེལ་རྒྱས་ལ་རྨང་གཞི་བཏིང་ཡོད། ཁ་གསབ་ཚབ་ཏུ་བྱ་དགའ་སྤྲོད་པའི་སྲིད་ཇུས་ཀྱི་སྣེ་ཁྲིད་བརྒྱུད་འཕེལ་རྒྱས་གཏོང་སྟངས་རྒྱུན་ཆད་མེད་པར་འཚོལ་ཞིབ་བྱས་པ་དང་། ནག་ཆུ་གྲོང་ཁྱེར་དུ“གསོ་ཚགས་དུད་ཆེན་དང་། ཁྱིམ་ཚང་འབྲོག་ར། རྟེན་གཞི། མཉམ་ལས་ཁང་། ཁེ་ལས”བཅས་ཟུང་དུ་འབྲེལ་བའི་འཕེལ་རྒྱས་གཏོང་སྟངས་རགས་ཙམ་ཆགས་ནས་འབྲོག་ལས་ཐོན་ལས་གཞི་ཁྱོན་ཅན་དང་ཐོན་ལས་ཅན་གྱི་འཕེལ་རྒྱས་ལ་སྐུལ་འདེད་བཏང་ཡོད་པ་རེད།