“བོད་ཀྱི་སྔོ་ལྗང་མཛེས་ལྗོངས་ཁུལ”ཞེས་འབོད་པའི་ཉིང་ཁྲི་གྲོང་ཁྱེར་ལ་བརྗིད་ཆགས་ཡིད་དུ་འོང་བའི་རང་བྱུང་མཛེས་ལྗོངས་ཡོད་པ་ཕུད། ད་དུང་ཐུན་མིན་གྱི་སྐྱེ་འཚར་ལ་འཚམ་པའི་ཆུ་དང་། ཉི་འོད། ས་རྒྱུ་བཅས་ཀྱི་ལེགས་ཆ་ལྡན་པས་ས་མཐོའི་ཤིང་ཏོག་ཐོན་ཁུལ་གལ་ཆེན་ཞིག་ཏུ་གྱུར་ཡོད། དེའང་ཀུ་ཤུ་ཚབ་མཚོན་དུ་བྱས་པའི་ལྷན་སྐྱེས་སྐྱེ་ལྡན་ཤིང་ཏོག་ནི་ས་གནས་དེ་གའི་ལྗང་མདོག་མིང་བྱང་ཞིག་རེད་ལ། ཞིང་ལས་ཐོན་ལས་ཅན་ལ་བརྟེན་ནས་གྲོང་གསེབ་དར་རྒྱས་ལ་སྐུལ་འདེད་གཏོང་བའི་སྒུལ་བྱེད་འཕྲུལ་འཁོར་སྟོབས་ཆེན་ཞིག་ཀྱང་རེད།

དེའི་ནང་གི་བྲག་ཡིབ་ཆུས་སྦེ་པ་གྲོང་རྡལ་འཛིན་པ་གྲོང་ཚོ་ནི་ཀུ་ཤུར་བརྟེན་ནས་དར་རྒྱས་བྱུང་བ་དང་། ཕྱུག་པོ་ཆགས་པ། མཛེས་སྡུག་ལྡན་པར་གྱུར་པ་བཅས་ཀྱི་གྲོང་ཚོ་ཞིག་རེད།

དཔྱིད་འགོའི་ཤིང་ཏོག་ལྡུམ་རར་ལྗང་མདོག་རབ་ཏུ་རྒྱས་ཡོད།

ཟླ་2པར་ཁ་བ་ཐེངས་ཁ་ཤས་བབས་པ་ལས། བོད་ལྗོངས་ས་མཐོའི་ཤིང་འབྲས་སོན་མྱུག་ཚན་རྩལ་གླིང་གི་ཡུན་རིང་གཉིད་དུ་ཡུར་བའི་རྩི་ཤིང་དག་གྲུང་ཤ་དོད་པོར་གྱུར་ཅིང་། རིམ་པ་སྟར་ཆགས་སུ་གནས་པའི་ཀུ་ཤུའི་སྡོང་པོར་གསོན་ཤུགས་རབ་ཏུ་རྒྱས་ནས་སྐྱེ་འཚར་ཡག་པོ་བྱུང་བ་དང་། ལྕུག་ཕྲན་གྱི་ཡལ་ག་དག་ལའང་ཉིན་རེ་ལས་མ་འདས་པར་མཆེ་བ་བཏང་ནས་རེ་བའི་འབྲས་བཟང་འདོགས་རེ་བྱེད་བཞིན་མཆིས།

“ཀུ་ཤུའི་སྡོང་པོ་དེ་དག་ང་ཚོའི་གཅེས་ནོར་ཡིན། ཆེ་ཆུང་སྙོམས་ལ་ཁ་དོག་ལེགས་པ་དང་། ཁུ་བ་མང་བ། བྲོ་བ་ཞིམ་པ། ཁྲོམ་རར་བྲིན་ཁ་རྒྱུག་པ་བཅས་ཀྱི་ཀུ་ཤུ་དག་ནི་ང་ཚོ་མི་སེར་ཚོར་ཡོང་འབབ་འཕར་བའི་ཕྱུག་འགྱུར་གྱི་འབྲས་བུ་ཞིག་རེད”ཅེས་འཛིན་པ་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་པད་མ་ཚེ་རིང་གིས་བཤད།

འཛིན་པ་གྲོང་ཚོའི་ཀུ་ཤུ་དར་རྒྱས་ཀྱི་ལམ་བུའི་སྐོར་གླེང་ན་ལོ་ལྔའི་གོང་ནས་གླེང་དགོས་ཀྱི་ཡོད་པ་སྟེ། 2021ལོར་རྟོག་ཞིབ་དང་འཆར་འགོད་བྱས་པ་བརྒྱུད། བྲག་ཡིབ་ཆུས་སྦེ་པ་གྲོང་རྡལ་གྱིས་ཀུ་ཤུ་ཐོན་ཁུལ་གཙོ་བོ་ཧྲན་ཏུང་ཞིང་ཆེན་ནས་ཡན་ཐའེ་ཏ་ཧྲན་ཤིང་ཏོག་ལས་རིགས་གསར་སྤེལ་ཚད་ཡོད་ཀུང་སི་གདན་དྲངས་ཏེ་བོད་ལྗོངས་ཧྲང་ཁྲེང་བདེ་ཐང་ཐོན་ལས་ཚད་ཡོད་ཀུང་སི་བཙུགས་པ་དང་། འཛིན་པ་གྲོང་ཚོར་མུའུ་200ཡོད་པའི་ཀུ་ཤུའི་སྡོང་ཕྲུག་འདེབས་འཛུགས་རྟེན་གཞི་བསྐྲུན་ནས་ཁེ་ལས་དང་། རྟེན་གཞི། ཞིང་དུད་བཅས་ཟུང་དུ་འབྲེལ་བའི་བྱེད་ཐབས་བརྒྱུད་ཀུ་ཤུའི་ཐོན་ལས་ཀྱིས་གྲོང་གསེབ་དར་རྒྱས་ལ་རམ་འདེགས་བྱེད་ཐབས་འཚོལ་ཞིབ་བྱེད་འགོ་བརྩམས་ཡོད།

ལོ་ཤས་རིང་གྲོང་ཚོ་དང་ཁེ་ལས་ཀྱིས་སེམས་མཐུན་ཤུགས་སྒྲིལ་གྱིས་འཚོལ་ཞིབ་བྱེད་ཞོར་ལག་བསྟར་བྱས་མཐར། ཉིང་ཁྲིའི་ས་ཁམས་ཆགས་སྟངས་དང་གནམ་གཤིས་ཀྱི་ཁྱད་ཆོས་དང་འཚམ་པའི་ཀུ་ཤུ་འདེབས་སྟངས་རྙེད་དེ“ཞང་ཧྥུའུ”དང“གནམ་ལྕགས”སོགས་སྤུས་ལེགས་སོན་སྣ་ཆེ་གྲས་4བདམས་ནས་བཏབ་ཡོད།

འཛིན་པ་གྲོང་ཚོའི་ཀུ་ཤུ་འདེབས་འཛུགས་རྟེན་གཞིའི་ལག་རྩལ་མི་སྣ་ལིའུ་ཁྲོན་ཧའེ་ཡིས། ཚན་རྩལ་གསར་གཏོད་བྱས་པ་བརྒྱུད། “ལོ་གསུམ་ནང་འབྲས་བུ་ཐེངས་རེ་འདོགས་པ་དང་ལོ་ལྔ་རེར་ཐོན་འབབ་མང་པོ་ཐེངས་རེའི”ཡུལ་དེ་གའི་སྔོན་མའི་ཀུ་ཤུ་ཐོན་སྐྱེད་བྱེད་ཚུལ་ལ་འགྱུར་ལྡོག་བྱུང་སྟེ། ཀུ་ཤུ་བཏབ་ནས་ལོ་གཅིག་ལས་མ་འགོར་བར་བདེ་བླག་ངང་འབྲས་བུ་བཏགས་ཡོད། ད་ཆ་མུའུ་རེ་ནས་ཀུ་ཤུ་རྒྱ་མ་5000ཡས་མས་ཐོན་ཞིང་། ད་ལོ་ཐོན་འབབ་མང་བའི་དུས་སུ་མུའུ་རེ་ནས་ཀུ་ཤུ་རྒྱ་མ་7000ནས་8000བར་ཐོན་བཟོ་ཡོད་ཅེས་ངོ་སྤྲོད་བྱས་བྱུང་།

“ན་ནིང་ཟླ་4ཚེས་10ཉིན་བོད་ཀྱིས་ནེ་པ་ལར་ཐེངས་དང་པོ་ཕྱིར་གཏོང་བྱས་པའི་ཀུ་ཤུ་ཏུན་23.8དང་། ད་ལོའི་དང་པོའི་བཅོ་ལྔའི་དུས་ཆེན་རིང་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་དང་པོའི་བཅོ་ལྔའི་དགོང་ཚོགས་སུ་བསྟན་པའི་ཀུ་ཤུ་ཚང་མ་ང་ཚོའི་རྟེན་གཞི་ནས་ཐོན་པ་ཡིན”ཞེས་བོད་ལྗོངས་ཧྲང་ཁྲེང་བདེ་ཐང་ཐོན་ལས་ཚད་ཡོད་ཀུང་སིའི་ཏུང་ཧྲི་ཀྲང་ལིན་ཁྲོན་ཆིང་གིས་དགའ་ཚོར་ཆེན་པོས་བཤད་ཅིང་། ཁོང་གིས་ན་ནིང་ནས་བཟུང་འཛིན་པ་གྲོང་ཚོའི་ཀུ་ཤུ་ནེ་པ་ལར་ཕྱིར་གཏོང་ཐེངས་མང་བྱས་པ་མ་ཟད། ད་དུང་ཐེ་ལན་དང་མ་ལེ་ཞི་ཡ་སོགས་ཨེ་ཤེ་ཡ་ཤར་ལྷོའི་ཁྲོམ་སྒོ་ཡང་ཕྱེ་བས་མངགས་ཐོ་ཇེ་མང་དུ་འགྲོ་ཡི་འདུག་ཅེས་བཤད།

“2024ལོར་རྟེན་གཞིས་ཞིང་པ་ལས་མི་ཁོ་ནར་སྤྲད་པའི་གླ་ཕོགས་སྒོར་ཁྲི་100ལྷག་ཙམ་ཟིན་པ་མ་ཟད། ད་དུང་ས་ཞིང་འཁོར་རྒྱུག་མ་དངུལ་སྒོར་ཁྲི་70ལྷག་ཙམ་གྲོང་ཚོའི་མཉམ་སྡེབ་ཀྱི་རྩིས་ཁྲར་བླུགས་ཡོད། ཡོང་འབབ་དེ་དག་ཡོད་པས་མང་ཚོགས་ལ་བགོ་འགྲེམས་རྒྱག་པ་དང་། གྲོང་ཚོའི་མཉམ་སྡེབ་དཔལ་འབྱོར་གྱི་རྣམ་གྲངས་གཞན་དག་གཉེར་བ། མི་སེར་ལ་བྱ་བ་དངོས་སྒྲུབ་པ་སོགས་གང་བྱས་ཀྱང་མ་རྩ་འདང་ངེས་ཡོད་ལ་གྲོང་གསེབ་དར་རྒྱས་གཏོང་བར་ཡང་གདེང་ཚོད་དེ་བས་ཆེ་རུ་ཕྱིན་སོང”ཞེས་པད་མ་ཚེ་རིང་གིས་བཤད།

ད་ཆ་ཀུ་ཤུ་འདེབས་འཛུགས་རྟེན་གཞིའི་དུས་རིམ་གཉིས་པའི་རྣམ་གྲངས་ཀྱི་མུའུ་600ཡི་ཤིང་འབྲས་ལྡུམ་ར་མགྱོགས་མྱུར་སྐྲུན་བཞིན་ཡོད་པ་དང་། ཀུ་ཤུ་འདེབས་འཛུགས་རྒྱ་ཁྱོན་ཆེ་རུ་དང་ཐོན་འབབ་མང་དུ་འགྲོ་བ་དང་ཆབས་ཅིག མང་ཚོགས་དེ་བས་མང་བར་ཤིང་འབྲས་ཐོན་ལས་འཕེལ་རྒྱས་ཀྱི་ཕན་པ་ཐོབ་རྒྱུ་རེད།

འཛིན་པ་གྲོང་ཚོའི་ཀུ་ཤུའི་དཔལ་འབྱོར་ནི་ཉིང་ཁྲི་གྲོང་ཁྱེར་གྱིས་ཡུལ་བབ་དང་བསྟུན་ནས་དཔལ་འབྱོར་འབྲས་ཤིང་འཕེལ་རྒྱས་བཏང་བའི་བསྡུས་རིས་ཤིག་རེད། དེ་གར་བྲག་ཡིབ་ཆུས་སྨན་རི་ཤང་ཐོག་སྨད་གྲོང་ཚོ་དང་། སྨན་གླིང་གྲོང་ཁྱེར་ཆབ་ནག་ཤང་གླིང་པ་གྲོང་ཚོ། སྣང་རྫོང་དུང་དཀར་གྲོང་རྡལ་བཀྲ་ཤིས་ཐང་གྲོང་ཚོ་སོགས་ས་མཐོའི་གྲོང་གསེབ་སྔར་ལས་མང་པོ་ཀུ་ཤུ་བཏབ་ནས་དར་རྒྱས་ཀྱི་ལམ་བུར་བསྐྱོད་དང་སྐྱོད་མུས་རེད།