འདི་ནི་སྨོན་སྐྱིད་གྲོང་ཚོའི་ཡུལ་མིས་2024ལོའི་གྲོང་ཚོའི་མཉམ་སྡེབ་ཀྱི་བགོ་འགྲེམས་དངུལ་ལེན་བཞིན་པ།

འདི་ནི་སྨོན་སྐྱིད་གྲོང་ཚོའི་ཡུལ་མིའི་འཐུས་མི་ཀླུ་ནང་གི“འཛམ་གླིང་རིམ་པའི་སྐྱེ་ཁམས་རིག་གནས་ཡུལ་སྐོར་དམིགས་ས”གཏོད་པའི་སློབ་སྦྱོང་རྟོག་ཞིབ་བྱེད་སྒོར་ཞུགས་བཞིན་པ།

འདི་ནི་སྨོན་སྐྱིད་གྲོང་ཚོའི་ཏང་ཡོན་གྱིས“ཏང་འཛུགས་སྐྱོང་གིས་དང་བླངས་པར་སྣེ་ཁྲིད་བྱེད། མཛེས་སྡུག་ལྡན་པའི་ཁྱིམ་གཞིས་ང་ཡིས་སྐྲུན”ཞེས་བརྗོད་དོན་གཙོ་བོར་བྱས་པའི་ཀྲི་པུའུ་མཉམ་འཛུགས་བྱེད་སྒོར་ཧུར་ཐག་ཞུགས་བཞིན་པ།

ཉིང་ཁྲི་གྲོང་ཁྱེར་བྲག་ཡིབ་ཆུས་ཀླུ་ནང་གྲོང་རྡལ་སྨོན་སྐྱིད་གྲོང་ཚོ་ནི་སྤྱི་ཡོངས་གནས་སྤོའི་གྲོང་ཚོ་ཞིག་ཡིན་པ་དང་། 2019ལོར་སྤྱི་ལེ་བརྒྱ་ཕྲག་ཁ་ཤས་ཆོད་པའི་ཆབ་མདོ་གྲོང་ཁྱེར་གོ་འཇོ་རྫོང་ནས་གནས་འདིར་སྤོས་ཡོད། “གྲོང་ཚོའི་སྡོད་ཁང་ཚང་མ་སྲིད་གཞུང་གིས་གཅིག་གྱུར་བཀོད་སྒྲིག་བྱས་ནས་བསྐྲུན་པ་ཞིག་རེད”ཅེས་སྨོན་སྐྱིད་གྲོང་ཚོའི་ཏང་ཀྲི་པུའི་ཧྲུའུ་ཅི་གཞོན་པ་དཔལ་ལྡན་གྱིས་ངོ་སྤྲོད་བྱས་པ་དང་། ཁོང་གིས“གནས་སྤོས་རྗེས་སྨོན་སྐྱིད་གྲོང་ཚོའི་མང་ཚོགས་ཀྱི་འཚོ་བའི་སྤུས་ཚད་ཧ་ཅང་ལེགས་སུ་ཕྱིན་པ་དང་། ལྷག་པར་དུ་གྲོང་ཚོའི་འགྲམ་གྱི་གཞུང་ལམ་གྱི་འགྲིམ་འགྲུལ་སྟབས་བདེ་བས་གྲོང་ཚོར་འཕེལ་རྒྱས་ཀྱི་གོ་སྐབས་གསར་པ་སྦྱིན་ཡོད”ཅེས་ངོ་སྤྲོད་བྱས།

གནས་སྤོའི་མང་ཚོགས་འཚོ་བའི་ཁོར་ཡུག་གསར་པའི་ནང་གང་མགྱོགས་མཉམ་འདྲེས་ལ་སྐུལ་འདེད་གཏོང་ཆེད། ཀླུ་ནང་གྲོང་རྡལ་ཏང་ཨུད་ཀྱིས་ཏང་འཛུགས་སྐྱོང་གིས་སྣེ་ཁྲིད་མཐའ་འཁྱོངས་དང་སྡེ་ཚན་ཁག་དང་གྲོང་ཚོ་ཁག་གི་ལེགས་ཆ་འདོན་སྤེལ་བྱས་ཏེ། སེམས་ནུས་གཅིག་སྒྲིལ་གྱིས་སྨོན་སྐྱིད་གྲོང་ཚོའི་འཕེལ་རྒྱས་ཀྱི་དཀའ་གནད་ཐག་གཅོད་དང་། མང་ཚོགས་དང་གྲོང་ཚོའི་མཉམ་སྡེབ་ལ་འབབ་འཕར་ཡོང་བར་སྐུལ་འདེད་གཏོང་བ། མི་རིགས་མཐུན་སྒྲིལ་ཟབ་ཏུ་གཏོང་བ་དང་དམངས་འཚོའི་བདེ་སྐྱིད་ལེགས་སུ་གཏོང་བ་བཅས་བྱས་ཏེ། གནས་སྤོའི་མང་ཚོགས་གནས་སྤོ་ཐུབ་པ་དང་། གཞིས་ཆགས་ཐུབ་པ། ཕྱུག་པོ་ཆགས་ཐུབ་པ་བཅས་འགན་ལེན་བྱས་ཡོད།

སེམས་ནུས་གཅིག་སྒྲིལ་གྱིས་འཕེལ་རྒྱས་ལ་སྐུལ་འདེད་བཏང་བ།

གནས་སྤོ་བྱས་ཚུན་སྨོན་སྐྱིད་གྲོང་ཚོའི་མང་ཚོགས་ཀྱིས་རྨོ་ཞིང་ཐོབ་པའི་རེ་བ་རྟག་ཏུ་འཆང་གི་ཡོད། མ་དངུལ་དཀོན་པ་སོགས་ཀྱི་རྒྱུ་རྐྱེན་དབང་གིས་ཐོག་མཐའ་བར་གསུམ་དུ་ཐག་གཅོད་ཐུབ་མེད། དེའི་ཐད་ཀླུ་ནང་གྲོང་རྡལ་ཏང་ཨུད་ཀྱིས་ཆེད་དོན་ཚོགས་འདུ་ཐེངས་མང་འཚོགས་ནས་བྲག་ཡིབ་ཆུས་ཨུད་ལ་སྙན་སེང་ཧུར་ཐག་ཞུས།

ཕྱོགས་མང་པོའི་ཐུན་མོང་འབད་བརྩོན་འོག མིག་སྔར་སྨོན་སྐྱིད་གྲོང་ཚོའི་རྨོ་ཞིང་གི་གནད་དོན་ལ་དངོས་ཡོད་རང་བཞིན་གྱི་འཕེལ་རྒྱས་བྱུང་ཡོད། 2024ལོའི་ཟླ་10པ་ནས་བཟུང་། ཀླུ་ནང་གྲོང་རྡལ་ཏང་ཨུད་ཀྱིས་དུད་ཚང་ཁག་གི་རྨོ་ཞིང་སྟོང་ཆའི་རྒྱ་ཁྱོན་ཞིབ་དཔྱད་ཧུར་ཐག་བྱས་པ་མ་ཟད། ས་ཞིང་བརྒྱུད་བཤུག་སོགས་ཀྱི་རྣམ་པའི་ཐོག་ནས་རྨོ་ཞིང་ཁ་གསབ་བྱས་ཏེ་སྨོན་སྐྱིད་གྲོང་ཚོའི་མང་ཚོགས་ཀྱི་རྨོ་ཞིང་གི་དགོས་མཁོ་ཏན་ཏིག་བསྐངས་ཡོད། དེའི་རྨང་གཞིའི་ཐོག་ནོར་བུ་གྲོང་ཚོར་གནས་པའི་སྲིད་གཞུང་གི་གྲབས་གསོག་ས་ཆ་མུའུ་45.14སྨོན་སྐྱིད་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་གཏོང་བར་སྤྲད་ཡོད།

2024ལོར་སྨོན་སྐྱིད་གྲོང་ཚོའི་མཉམ་སྡེབ་ཡོང་འབབ་སྒོར་ཁྲི་100ལྷག་ཙམ་ཟིན་པ་དང་ལོ་འཁོར་གྱི་བགོ་འགྲེམས་སྒོར་ཁྲི་75ཟིན་ཡོད།

འགྲོ་འོང་དང་སྤེལ་རེས་བྱས་ནས་མཐུན་སྒྲིལ་ལ་སྐུལ་འདེད་བཏང་བ།

ཀླུ་ནང་ཀོང་གཞས་དམངས་སྲོལ་རིག་གནས་ཡུལ་སྐོར་བྱེད་སྒོ་སྐབས་བདུན་པའི་འགོ་ཚུགས་མཛད་སྒོའི་ཐོག་སྨོན་སྐྱིད་གྲོང་ཚོའི་ཞབས་བྲོའི་ཡིད་དབང་འགུག་ཤུགས་ཆེ་བ་དང་། ཀོང་པོའི་སྲོལ་རྒྱུན་ལུས་རྩལ་འགྲན་རར་སྨོན་སྐྱིད་གྲོང་ཚོའི་ན་གཞོན་ཚོའི་ཉམས་འགྱུར་ལེགས་པ་དང་འབྲས་བཟང་བརྩོན་ལེན་གྱིས་གནས་སྤོས་མང་ཚོགས་གང་མགྱོགས་ཁོར་ཡུག་གསར་པ་དང་འཚོ་བ་གསར་པ་དང་འཚམ་པར་སྐུལ་འདེད་གཏོང་ཆེད། ཀླུ་ནང་གྲོང་རྡལ་ཏང་ཨུད་ཀྱིས་སྤེལ་རེས་དང་འགྲོ་འོང་བྱེད་སྒོ་སྣ་ཚོགས་ཧུར་ཐག་སྤེལ་ཏེ་རིག་རྩལ་བྱེད་སྒོ་དང་། འཚམས་འདྲི་རོགས་སྐྱོར། ཆེད་དོན་འཆད་ཁྲིད་སོགས་ལ་བརྟེན་ནས་མི་རིགས་མཐུན་སྒྲིལ་ཟབ་ཏུ་བཏང་སྟེ་གནས་སྤོའི་མང་ཚོགས་དང་ཡུལ་དེ་གའི་མང་ཚོགས་དབར་སྤེལ་རེས་དང་། འགྲོ་འོང་། མཉམ་འདྲེས་བཅས་ལ་ཤུགས་སྣོན་བརྒྱབ་ཡོད།

ཀོང་པོའི་ལོ་གསར་སྐབས་ཀླུ་ནང་གྲོང་རྡལ་ཏང་ཨུད་ཀྱིས་སྨོན་སྐྱིད་གྲོང་ཚོའི་རོགས་སྐྱོར་ལས་བྱེད་པ་དང་མཐུན་སྦྱོར་བྱས་ནས་འཚམས་འདྲི་དང་རོགས་སྐྱོར་བྱེད་སྒོ་སྤེལ་ཏེ། ཁོངས་གཏོགས་ཁེ་ལས་ཀྱིས་སྨོན་སྐྱིད་གྲོང་ཚོའི་དཀའ་ངལ་ཡོད་པའི་མང་ཚོགས་བཀྲ་ཤིས་ཉི་མར་ཞལ་འདེབས་སྒོར་ཁྲི་གཅིག་བརྒྱབ་ནས་དཀའ་ངལ་ལས་སྒྲོལ་རོགས་བྱ་རྒྱུའི་འབོད་སྐུལ་བྱས་ཡོད།

ཐབས་མང་མཉམ་སྤྱོད་ཀྱིས་དམངས་འཚོར་ཕན་པ་བཏགས་པ།

ཀླུ་ནང་གྲོང་རྡལ་འཕྲོད་བསྟེན་ཁང་ལ་གཞོགས་འདེགས་བྱས་ནས་སྨོན་སྐྱིད་གྲོང་ཚོའི་ཞིང་འབྲོག་པའི་གཟུགས་པོར་བརྟག་དཔྱད་བྱས་ཏེ་མང་ཚོགས་ཀྱི་བདེ་ཐང་གནད་དོན་དུས་ཐོག་ཏུ་ཤེས་རྟོགས་དང་ཐག་གཅོད་བྱས་པ་དང་འབྲེལ། བདེ་ཐང་ཤེས་བྱ་དྲིལ་བསྒྲགས་ཧུར་ཐག་བྱས་ནས་སྨོན་སྐྱིད་གྲོང་ཚོའི་མང་ཚོགས་ཀྱི་གཟུགས་གཞི་བདེ་ཐང་ལ་ནུས་ཤུགས་ཡོད་རྒུས་སྲུང་སྐྱོང་བྱས་པ་དང་། མ་མཐའི་འཚོ་བའི་འགན་བཅོལ་དུད་ཚང་དང་། དབང་པོ་སྐྱོན་ཅན། དམིགས་བསལ་དཀའ་ངལ་ཡོད་མཁན་སོགས་མི་ཚོགས་ལ་དོ་ཁུར་དང་གཅེས་སྐྱོང་བྱས་ཏེ་དམངས་ཕན་སྲིད་ཇུས་སྒྲོག་འགྲེལ་བྱས་ནས་སྨོན་སྐྱིད་གྲོང་ཚོའི་མང་ཚོགས་ཀྱི་དམངས་ཕན་སྲིད་ཇུས་ཤེས་རྟོགས་བྱེད་ཚད་མཐོ་རུ་བཏང་བ། དུད་ཚང་དུ་བསྐྱོད་དེ་སྨོན་སྐྱིད་གྲོང་ཚོའི་སྐྱེ་ཁམས་ལས་གནས་ཀྱི་གཱ་གཅིག་ཀུན་འཐུས་ཀྱི་ཡིག་རིགས་འཚོལ་བསྡུ་བྱས་ནས་སྐྱེ་ཁམས་ལས་གནས་ཀྱི་གླ་ཕོགས་དུས་ཐོག་དང་གྲངས་ཚང་སྤྲོད་རྒྱུའི་འགན་ལེན་བྱས་པ། འབྲེལ་ཡོད་སྡེ་ཚན་དང་མཐུན་སྦྱོར་བྱས་ནས་སྨོན་སྐྱིད་གྲོང་ཚོའི་དབང་པོ་སྐྱོན་ཅན་12ཀྱི་སྡོད་གནས་ལ་འགོག་མེད་སྒྱུར་བཀོད་བྱས་པ། ཐུའོ་ཡུས་ཀུང་སིས་སྨོན་སྐྱིད་གྲོང་ཚོའི་མཉམ་སྡེབ་ཀྱི་འཕྲུལ་ཆས་བོགས་གཏོང་གྲོན་དངུལ་ཆད་འགྱངས་བྱས་པའི་གནད་དོན་མཐུན་སྦྱོར་དང་ཐག་གཅོད་ཧུར་ཐག་བྱས་ཏེ་སྨོན་སྐྱིད་གྲོང་ཚོའི་མཉམ་སྡེབ་འཕྲུལ་ཆས་བོགས་གཏོང་གྲོན་དངུལ་དུས་ཐོག་ཏུ་སྤྲོད་ཐུབ་པར་བྱས་ཡོད།

དེ་དང་ཆབས་ཅིག“ཏང་འཛུགས་སྐྱོང་གིས་དང་བླངས་པར་སྣེ་ཁྲིད་བྱེད། མཛེས་སྡུག་ལྡན་པའི་ཁྱིམ་གཞིས་ང་ཡིས་སྐྲུན”ཞེས་བརྗོད་དོན་གཙོ་བོར་བྱས་པའི་ཀྲི་པུའུ་མཉམ་འཛུགས་བྱེད་སྒོ་སྤེལ་ནས་སྨོན་སྐྱིད་གྲོང་ཚོའི་མི་སྡོད་ཁོར་ཡུག་གི་ཆུ་ཚད་མཐོ་རུ་བཏང་སྟེ་ཏང་དང་མང་ཚོགས་དབར་གྱི་བརྩེ་སེམས་འབྲེལ་ཐག་དམ་ཏུ་བཏང་བ་དང་། བོད་སྐྱོར་མ་དངུལ་སྒོར་ཁྲི་297.4བརྩོན་ལེན་བྱས་ཏེ་སྨོན་སྐྱིད་གྲོང་ཚོའི་མི་སྡོད་ཁོར་ཡུག་ལེགས་སུ་གཏོང་བའི་ལས་གྲྭ་ལག་བསྟར་བྱས་ནས་སྨོན་སྐྱིད་གྲོང་ཚོའི་ཁོར་ཡུག་འཕྲོད་བསྟེན་འགན་ལེན་གྱི་ཆུ་ཚད་མངོན་གསལ་དོད་པོས་མཐོ་རུ་བཏང་ཡོད།