ལྷོ་ཁ་གྲོང་ཁྱེར་འཕྱོངས་རྒྱས་རྫོང་ཆང་ཁྱིམ་གྲོང་ཚོར་ནས་ཆང་བཟོ་གྲྭ་དང་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་ཚོས་ཆང་སྙོལ་སྟངས་ལེགས་སུ་བཏང་བས། ཁྲོམ་རའི་ཐོག་གདེང་འཇོག་ཡག་པོ་ཐོབ་པའི་ནས་ཆང་དེ་ནས་ཐོན་པ་རེད། རྒྱུན་འཛིན་དང་གསར་གཏོད་དེ་རིགས་ལས་གནའ་བོའི་ནས་ཆང་དེ་འཁྲུག་ཆ་དོད་པའི་ཁྲོམ་རའི་འགྲན་རྩོད་ཁྲོད་བཀྲག་མདངས་རབ་ཏུ་འཚེར།

མིག་སྔར། གཞོན་ནུ་མང་པོ་ཞིག་གིས་སྲོལ་རྒྱུན་ནས་ཆང་གི་མདོག་ཁ་དང་བྲོ་བར་དགའ་པོ་དེ་ཙམ་བྱེད་ཀྱི་མེད་སྟབས། ནས་ཆང་གི་སྙོལ་སྟངས་སྒྱུར་བཀོད་རིམ་སྤོར་མི་བྱེད་ཀ་མེད་བྱུང་ཡོད།

དེར་བརྟེན། ཡུལ་དེ་གའི་སྲིད་གཞུང་སྡེ་ཚན་གྱིས་གྲོང་གསེབ་དར་རྒྱས་དང་བོད་སྐྱོར་མ་དངུལ་སྒོར་ཁྲི་800ལྷག་ཙམ་བསྡུ་སྒྲིལ་བྱས་ནས་དེང་རབས་ཅན་གྱི་བཟོ་ཁང་བསྐྲུན་པ་རེད། 2019ལོར་བོད་ལྗོངས་འཕྱོངས་རྒྱས་ཆང་ཁྱིམ་ནས་ཆང་ཚད་ཡོད་ཀུང་སི་བཙུགས་པ་དང་འབྲེལ་ལྷ་སའི་ཆང་སྙོལ་མཁན་དམངས་གཉེར་ཁེ་ལས་ཤིག་དང་མཉམ་ལས་བྱས་ཏེ། ཐོན་སྐྱེད་བརྒྱུད་རིམ་གསར་པ་ནང་འདྲེན་དང་། བཟོ་རྩལ་ལེགས་གཏོང་། ཐོན་རྫས་གསར་པ་འདོན་པ་བཅས་བྱས་ནས། ན་གཞོན་འཛད་སྤྱོད་ཚོགས་སྤྱིའི་གདམ་ག་དང་འཚམ་པར་བྱས་པ་རེད།

ཆང་ཁྱིམ་གྲོང་ཚོའི“ཆང་ཁྱིམ་ནས་ཆང”གི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་བློ་བཟང་རྡོ་རྗེའི་ཁྱིམ་གྱི་ནས་ཆང་ལ་ཡུལ་དེ་གར་སྐད་གྲགས་ཅུང་ཆེན་པོ་ཡོད་ཅིང་། ཁོང་ཡང་བཟོ་རྩལ་སྒྱུར་བཀོད་མཐོར་གཏོང་གི་ལག་རྩལ་སྣེ་ཁྲིད་པར་གྱུར་ཡོད།

རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྒྱུན་འཛིན་པ་བློ་བཟང་རྡོ་རྗེས“མངོན་མིན་རིག་གནས་ཤུལ་བཞག་གི་རྒྱུན་འཛིན་པ་ཞིག་གི་ངོས་ནས་སྲོལ་རྒྱུན་གྱི་ཆང་སྙོལ་སྟངས་ཀྱི་སྙིང་བཅུད་དོར་མི་རུང་བ་སྨོས་མི་དགོས་མོད། འོན་ཀྱང་སྔ་གོམ་སོར་གནས་དང་རྙིང་ཞེན་བག་འཁུམས་དེ་བས་ཀྱང་བྱེད་མི་རུང”ཞེས་བརྗོད། ད་ཆ་ཁོང་ཁྱིམ་ནས་ཟླ་རེར་ནས་ཆང་སྤྱི་རྒྱ་750བསྙལ་ཐུབ་པ་དང་ཐོན་རྫས་ལྗོངས་ཡོངས་སུ་ཕྱིར་ཚོང་བྱེད་པ་མ་ཟད། ད་དུང་ཡུལ་སྐོར་བ་མི་ཉུང་བ་ཞིག་ཆང་ཉོ་བར་ཆེད་མངགས་ཡོང་གི་ཡོད།

ཆང་ཁྱིམ་གྲོང་ཚོའི་ནས་ཆང་བཟོ་གྲྭས་ཆང་སྙོལ་སྟངས་ཀྱི་སྲོལ་རྒྱུན་བཟང་པོ་རྒྱུན་འཛིན་བྱས་པའི་རྨང་གཞིའི་ཐོག་ད་དུང་རྒྱུན་ཆད་མེད་པར་ལེགས་སུ་གཏོང་བ་དང་གསར་གཏོད་བྱེད་བཞིན་ཡོད།

ནས་ཆང་བཟོ་གྲྭ་གྲབས་འཛུགས་བྱེད་པའི་ཐོག་མའི་དུས་སུ་འཕྱོངས་རྒྱས་རྫོང་གིས་གྲོང་ཚོའི་གཞོན་ནུ་3བདམས་ཏེ་ཧུའུ་པེ་བཟོ་ལས་སློབ་ཆེན་དུ་ཨ་རག་སྙོལ་སྟངས་སྦྱོང་བར་བཏང་བ་དང་། ལོ་20ལྷག་ཙམ་ལ་སླེབས་པའི་གྲོང་གསེབ་དར་རྒྱས་ཀྱི་ཆེད་ལས་པ་ཕུན་ཚོགས་དོན་གྲུབ་དེའི་གྲས་ཤིག་རེད།

ད་ལོའི་ཟླ་5པར་ནས་ཆང་བཟོ་གྲྭ་ཚོད་ལྟའི་འཁོར་སྐྱོད་བྱེད་འགོ་ཚུགས་པ་དང་། ཕུན་ཚོགས་དོན་གྲུབ་ཀྱིས་སྦྱངས་པའི་ལག་རྩལ་དག་ནས་ཆང་སྙོལ་བའི་ལྷུ་ཚིགས་ཁག་ཏུ་སྤྱད་ཡོད། ཕུན་ཚོགས་དོན་གྲུབ་ཀྱིས་ནས་ཆང་གི་མདོག་ཁ་ནི་རྒྱུ་ཆའི་ནང་གི་ནས་ནག་དང་ནས་དཀར་གྱི་བསྡུར་ཚད་མི་འདྲ་བའི་དབང་གིས་རེད་ཅེས་གསར་འགོད་པར་བཤད།

ཀྲུང་གོའི་མཛེས་སྡུག་ལྡན་པའི་སྤྲོ་གསེང་གྲོང་གསེབ་དང་ཀྲུང་གོའི་སྲོལ་རྒྱུན་གྲོང་ཚོ་ཞིག་ཡིན་པའི་ཆང་ཁྱིམ་གྲོང་ཚོར་ཡོད་པ་ནས་ཆང་ཁོ་ན་ག་ལ་ཡིན།

ཉེ་བའི་ལོ་ཤས་རིང་། ས་གནས་དེ་གའི་སྲིད་གཞུང་གིས་མ་རྩ་འཇོག་ཤུགས་ཆེ་རུ་ཟམ་མི་ཆད་པར་བཏང་བས། ཆང་ཁྱིམ་གྲོང་ཚོའི་ཡུལ་སྐོར་སྤྲོ་གསེང་དང་། བཟའ་བཏུང་རོལ་རྩེད། གླིང་ཁ། གྲོང་གསེབ་ཀྱི་དམངས་སྲོལ་གནས་ཚང་། སྐར་ཚོགས་སྒར་ས། མངོན་མིན་རིག་གནས་ཤུལ་བཞག་གི་གཱ་ཐོ་འགོད་ས་སོགས་གྲོང་གསེབ་ཀྱི་རིག་གནས་ཡུལ་སྐོར་དཔལ་འབྱོར་གྱི་ལས་རྣམ་འཕེལ་རྒྱས་བརྟན་པོ་ཕྱིན་ཡོད། གྲོང་ཚོ་དེར་ད་ཆ་དམངས་སྲོལ་གནས་ཚང་43དང་ཉལ་ཁྲི་200ལྷག་ཙམ་ཡོད་ཅིང་། མི་720ལྷག་ཙམ་ཡོད་པའི་གྲོང་ཚོ་དེས་མང་ཤོས་སྐབས་ཉིན་གཅིག་ལ་ཡུལ་སྐོར་བ་200ལྷག་ཙམ་ལ་སྣེ་ལེན་ཞུ་གི་ཡོད། མིག་སྔར་ཡུལ་སྐོར་ལས་དོན་ཁང་10ལྷག་ཙམ་དང་ཡུན་རིང་གི་མཉམ་ལས་གྲོས་མཐུན་བཞག་ཡོད་པ་རེད།