མཁར་སྒང་གྲོང་ཚོའི་ཞིང་པས་བཏབ་པའི་ཀུ་ཤུའི་སྡོང་པོར་འབྲས་བཟང་བཏགས་པ།

གནས་འཕྲོད་ལས་འཚམ་མཛེས་མཐུན་གསུམ་གྱི་མཁར་སྒང་གྲོང་ཚོའི་ཟུར་ཞིག

ཉེ་བའི་ལོ་ཤས་རིང་། མཁར་སྒང་ཤང་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་གྲོང་སྡོད་ལས་དོན་རུ་ཁག་གི་རོགས་སྐྱོར་དང་སྐུལ་ཁྲིད་འོག “ཁྲི་སྟོང་འདུ་འགོད”ཀྱི་ཉམས་མྱོང་ཁྱབ་གདལ་བེད་སྤྱོད་དང་གྲོང་གསེབ་དར་རྒྱས་ཀྱི་འཐབ་ཇུས་ལ་སྐུལ་འདེད་ཏན་ཏིག་བཏང་བ་དང་སྦྲགས། མཁར་སྒང་གྲོང་ཚོས་ཐུན་མོང་མ་ཡིན་པའི་ས་ཁམས་ཁོར་ཡུག་ལ་བརྟེན་ནས་སྒོ་རའི་དཔལ་འབྱོར་འཕེལ་རྒྱས་གཏོང་རྒྱུ་འཚོལ་ཞིབ་ཧུར་ཐག་བྱས་ཏེ་ཡུལ་བབ་དང་བསྟུན་པ་དང་རྒྱུ་ཆ་རང་ས་ནས་བཙལ་ཏེ་སྐྱེ་ཁམས་འཛུགས་སྐྱོང་དང་ཐོན་ལས་འཕེལ་རྒྱས་ཀྱི“གཉིས་ཕན”ལམ་བུར་བསྐྱོད་དེ་གྲོང་མིའི་ཁང་པའི་རྒྱབ་མདུན་གྱི་ས་ཆ་སྦར་ཐིལ་ཙམ་ཡང“འབབ་འཕར་གླིང”དུ་བཏོད་དེ་ཞིང་སྐྱོར་འབབ་འཕར་གྱི་གསོན་ཤུགས་གསར་པ་འཕེལ་བར་བྱས་ཡོད།

མང་ཚོགས་ལ་ཁྲིད་སྟོན་བྱས་ནས་སྒོ་རའི་དངོས་པོ་ཙག་ཙིག་བསྡུ་གསོག་རྒྱག་པ་དང་། མི་ཕྱུགས་ལོགས་དབྱེ་བྱེད་པ། འཚོ་བའི་ཁུལ་དང་འདེབས་གསོ་ཁུལ་འཆར་འགོད་ལུགས་མཐུན་བྱེད་པ། ཁང་པའི་རྒྱབ་མདུན་གྱི་གཙང་སྦྲ་ཡག་པོ་བྱེད་པ། སྒོ་ར་དང་ཁང་པའི་ཉེ་འཁོར་གྱི་ས་རྒོད་བེད་སྤྱད་ཡག་པོ་བྱས་ཏེ་སྒོ་རའི་དཔལ་འབྱོར་འཕེལ་རྒྱས་གཏོང་བར་ལྕག་སྐུལ་དང་། རང་བྱུང་ཁོར་ཡུག་གི་ལེགས་ཆར་གཞི་ཚུགས་པ། སྒོ་རའི་དཔལ་འབྱོར་འཕེལ་རྒྱས་དང་རང་བྱུང་ཁོར་ཡུག་མཉམ་འདྲེས་དང་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་དང་ཕན་ཚུན་སྤེལ་རེས་བཅས་ལ་ཤུགས་སྣོན་བརྒྱབ་སྟེ་སྒོ་རའི་ཕྱི་རོལ་དང་ཞིང་ནང་དང་མུ་ཁར་བརྟེན་ནས་གཞི་ཁྱོན་ཆུང་བའི་གསོ་ཚགས་དང་ཤིང་འབྲས་ལྡུམ་ར་ཆུང་ངུ་ཁག་གཅིག་བསྐྲུན་པ་རེད། “ང་ཚོས་བེད་མེད་ཀྱི་ས་ཆར་སྔོ་ཚལ་ནམ་ཡང་ན་ཤིང་འབྲས་སོགས་བཏབ་པས་སྒོ་ར་མཛེས་སུ་ཕྱིན་པ་མ་ཟད། ཡོང་འབབ་ཀྱང་མང་དུ་ཕྱིན་ནས་གཅིག་གོ་ཉིས་ཆོད་བྱུང་སོང”ཞེས་གྲོང་མི་ཚོས་སྒོ་རའི་དཔལ་འབྱོར་འཕེལ་རྒྱས་གཏོང་བར་མོས་པ་གཅིག་མཐུན་བྱུང་ཡོད།

གཞན་ཡང་། གྲོང་ཚོའི་ཏང་ཀྲི་པུས་ད་དུང་རྩ་འཛུགས་ཀྱི་དགེ་མཚན་ཧུར་ཐག་བཏོན་ཏེ་ཏང་ཡོན་གྱིས་སྣེ་ཁྲིད་ནས་སྒོ་རའི་དཔལ་འབྱོར་འཕེལ་རྒྱས་གཏོང་བར་སྐུལ་སློང་དང་། གྲོང་གསེབ་ཀྱི་ལས་བྱེད་པ་དང་། གྲོང་སྡོད་ལས་དོན་རུ་ཁག ཞིང་ལས་ལག་རྩལ་མི་སྣ་སོགས་སྒྲིག་འཛུགས་བྱས་ནས་ཞིང་དུད་ལ་རྗེས་སྙེགས་ཞབས་འདེགས་ཞུ་བ་དང་དུས་ཐོག་ཏུ་ལག་རྩལ་མཛུབ་ཁྲིད་བྱས་ནས་ཁོང་ཚོའི་ཐོན་སྐྱེད་གཉེར་སྐྱོང་ཁྲོད་ཀྱི་དཀའ་ངལ་དང་གནད་དོན་ཐག་གཅོད་བྱེད་རོགས་བྱས་ཏེ་སྒོ་རའི་དཔལ་འབྱོར་འཕེལ་རྒྱས་གཏོང་བའི་ཞིང་པའི་འཇོན་ཐང་ཆེ་རུ་དང་ཆུ་ཚད་མཐོ་རུ་བཏང་བ་རེད།

སྟོན་མཇུག་ཏུ། མཁར་སྒང་གྲོང་ཚོར“དུད་ཚང་རེར་སྒོ་ར་རེ་ཡོད་པ་དང་ཡུལ་ལུང་རེར་ཡུལ་ལྗོངས་རེ་ཡོད་པའི”མཛེས་སྡུག་ལྡན་པའི་རྣམ་པ་ཡོངས་སུ་མངོན། ཀུ་ཤུ་དང་། རྒུན་འབྲུམ། སྟར་ཁ་སོགས“སྒོ་རའི་ཤིང་འབྲས”རིམ་བཞིན་སྨིན་པས་ཞིང་པ་སོ་སོས་བཟས་མ་ཚར་བ་རྣམས་ཁྲོམ་རར་བཙོངས་ནས་ཡོང་འབབ་གསོག་ཐབས་བྱེད་ཀྱི་ཡོད། མིག་སྔའི་བར། མཁར་སྒང་གྲོང་ཚོའི་དུད་ཚང་30སྒོ་རའི་དཔལ་འབྱོར་ནང་ཞུགས་ནས་རིམ་རྩིས་བྱས་ན་འབབ་འཕར་སྒོར་ཁྲི་5ལྷག་ཙམ་བྱུང་ཡོད་པ་རེད།

གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་བཏང་བས་གྲོང་གསེབ་འཕེལ་རྒྱས་ལ་སྔར་བྱུང་མྱོང་མེད་པའི་གོ་སྐབས་འཕྲད་ཡོད། གོམ་སྟབས་རྗེས་མར། མཁར་སྒང་གྲོང་ཚོས“སྒོ་རའི་དཔལ་འབྱོར”སྲ་བརྟན་རྒྱ་སྐྱེད་དང་སྟོབས་ཆེར་གཏོང་རྒྱུ་མཐའ་འཁྱོངས་བྱེད་པ་དང་ཆབས་ཅིག ཞིང་དུད་ལ་སྒོ་རའི་དོན་དངོས་དང་ཟུང་འབྲེལ་གྱིས“ཞིང་ཁྱིམ་སྤྲོ་སྐྱིད་ཁང་ཆུང་གྲས”དང“སྒོ་རའི་ནང་ལྟ་འཐུ་མཉམ་རོལ”སོགས་འཕེལ་རྒྱས་བཏང་ནས་དཔལ་འབྱོར་ཡོང་འབབ་མང་དུ་གཏོང་བ་དང་གྲོང་གསེབ་དར་རྒྱས་ལ་སྐུལ་འདེད་གཏོང་བར་ཁྲིད་སྟོན་བྱ་རྒྱུ་རེད།