འདི་ནི་སྦེ་པ་གྲོང་རྡལ་འཛིན་པ་གྲོང་ཚོའི་ཀུ་ཤུ་འདེབས་འཛུགས་རྟེན་གཞིའི་ཟུར་ཞིག་ཡིན་པ། 

ཉིང་ཁྲི་གྲོང་ཁྱེར་བྲག་ཡིབ་ཆུས་སྦེ་པ་གྲོང་རྡལ་འཛིན་པ་གྲོང་ཚོར་གནས་པའི་ཀུ་ཤུ་འདེབས་འཛུགས་རྟེན་གཞིར་འབྱོར་སྐབས། ཀུ་ཤུའི་སྡོང་ཕྲུག་སྟར་པ་མང་པོ་ཡལ་འདབ་རྒྱས་ཤིང་སྔོ་ཐིང་ཐིང་ངང་སྐྱེས་སྟོབས་ཀྱི་དཔལ་འབར་ཞིང་། གྲོང་མི་ཚོས་ཕྱུག་འགྱུར་གྱི་རེ་བས་ཁེངས་པའི་ཀུ་ཤུའི་སྡོང་པོ་དེ་དག་ལ་བདག་སྐྱོང་ཡག་པོ་བྱེད་པ་སོགས་ཀྱི་ལས་ཀ་སྣ་ཚོགས་ལ་གཞོལ་ནས་གང་སར་བྲེལ་འཚུབ་ཀྱི་རྣམ་པས་ཁེངས། 

དགུན་དཔྱིད་གཉིས་ལ་རྒྱུན་དུ་ལྷགས་པ་ཆེ་བ་དང་། དབྱར་སྟོན་གཉིས་ལ་སེར་བ་འབབ་པ་མང་བས། གནམ་གཤིས་ལས་འབྲས་ཤིང་གི་སྐྱེ་འཚར་ལ་འགོག་རྐྱེན་མང་པོ་བཟོ་གི་ཡོད། དེར་བརྟེན་རྟེན་གཞིར་གནམ་གཤིས་ས་ཚིགས་ཆུང་གྲས་ཤིག་བཀོད་སྒྲིག་བྱས་ནས། འདུས་གྲུབ་ཚོར་ཆས་ལག་རྩལ་དང་། གྲངས་གཞི་ཐག་གཅོད་ལག་རྩལ། དེ་བཞིན་སྐུད་མེད་འཕྲིན་གཏོང་ལག་རྩལ་བཅས་སྤྱད་པ་བརྒྱུད། གནམ་གཤིས་ས་ཚིགས་ཆུང་གྲས་ཀྱིས་མཁའ་རླུང་གི་དྲོད་ཚད་དང་། བརླན་ཚད། རླུང་གི་མྱུར་ཚད། རླུང་ཕྱོགས། ཆར་པ་འབབ་ཚད་སོགས་གནམ་གཤིས་དཔྱད་གྲངས་སྣ་ཚོགས་ལ་ལྟ་ཞིབ་ཚད་ལེན་ཐུབ་པ་དང་། 

རྟེན་གཞིའི་དོ་དམ་པས་གནམ་གཤིས་འགྱུར་ལྡོག་ལ་འཕྲལ་མར་ཁ་གཏད་གཅོག་པའི་བྱ་ཐབས་སྤྱོད་རོགས་ཐུབ་ཅིང་། ཆུ་འདྲེན་གྱི་འཆར་གཞི་ལེགས་སྒྲིག་དང་འབྲས་བུ་སྔ་སྣུར་དུ་བཏོག་ཐུབ་སྟེ་གནམ་གཤིས་ངན་པས་ཀུ་ཤུའི་སྐྱེ་འཚར་ལ་ཤུགས་རྐྱེན་ཐེབས་ཚད་ཆུང་དུ་གང་ཐུབ་བཏང་ཡོད། རྟེན་གཞིའི་ཆུ་ལུད་གཞི་གཅིག་ཅན་གྱི་ཆུ་འདྲེན་མ་ལག་དེའང་སྤུས་ཚད་མཐོ་བའི་ཀུ་ཤུ་འདེབས་གསོ་བྱེད་པའི་ཐབས་མཆོག་ཅིག་ཡིན་ཞིང་། མདོང་ལམ་ནས་ཐིགས་ཆུ་བཏང་བ་བརྒྱུད་སྡོང་ཕྲུག་གི་རྩ་བ་ནས་ཆུ་ལུད་ཀྱི་རྒྱུན་སྲུང་ཚད་དང་ས་རྒྱུའི་སྐྱེ་ལྡན་རྫས་བཅུད་འདུས་ཚད་མང་དུ་ཕྱིན་ཏེ་ཀུ་ཤུའི་སྡོང་པོ་ཡག་པོ་སྐྱེ་ཐུབ་ཡོད། མདོང་ལམ་ནང་རྒྱུ་བའི་ཀུ་ཤུའི་སྡོང་པོའི་འཚོ་བཅུད་གཤེར་ཁུའང་ཆུ་ལུད་གཞི་གཅིག་དང་སྦྱོར་ཚད་གནད་ལ་འཁེལ་བས། རྟེན་གཞིའི་ཀུ་ཤུ་སྡོང་པོར་ཆེ་ཆུང་དང་མངར་ཚད་གཅིག་མཚུངས་ཀྱི་འབྲས་བུ་སྨིན་ཐུབ་ཡོད། 

ངོ་སྤྲོད་བྱས་པར་གཞིགས་ན། མིག་སྔར་འཛིན་པ་གྲོང་ཚོའི་ཀུ་ཤུ་འདེབས་འཛུགས་རྟེན་གཞིའི་མུའུ་རེའི་ཐོན་འབབ་རྒྱ་མ་5000ཙམ་ཟིན་པ་དང་། དུས་སང་མུའུ་རེ་ནས་ཐོན་འབབ་རྒྱ་མ་8000ཟིན་ཐུབ་རྒྱུ་ཡིན་པ་རེད། “2021ལོའི་གོང་། སྦེ་པ་གྲོང་རྡལ་གྱི་ཀུ་ཤུ་མང་ཆེ་བ་ནི་དུད་ཚང་འགའ་རེས་ཐར་ཐོར་ངང་འདེབས་འཛུགས་བྱེད་ཀྱི་ཡོད་ཅིང་། འདེབས་འཛུགས་གཞི་ཁྱོན་ཆེན་པོ་མེད་པ་དང་། ཐོན་འབབ་ཉུང་བ། བཟོ་ལྟ་ཡག་པོ་མེད་པ་བཅས་ལས་ཀུ་ཤུའི་སྤུས་རྟགས་ཀྱི་ཕན་འབྲས་ཅུང་ཞན་པ་དང་། ཁྲོམ་རར་བྲིན་ཁ་རྒྱུག་པོ་མེད་པ། ཞིང་འབྲོག་པའི་འབབ་འཕར་མངོན་གསལ་དོད་པོ་མེད་པ་བཅས་ཀྱི་གནས་ཚུལ་ཐོན་ཡོད། 

2021ལོར་བྲག་ཡིབ་ཆུས་ཀྱི་ཀུ་ཤུའི་སྤུས་ཚད་ཡག་ཏུ་གཏོང་བ་དང་། སྦེ་པ་གྲོང་རྡལ་གྱི་ཀུ་ཤུའི་སྤུས་རྟགས་གཏོད་པ་དང་ཁྲོམ་རའི་འགྲན་རྩོད་ནུས་པ་སྔར་བས་ཆེ་རུ་གཏོང་ཆེད། བོད་རང་སྐྱོང་ལྗོངས་དང་ཉིང་ཁྲི་གྲོང་ཁྱེར་གྱིས་བྲག་ཡིབ་ཆུས་གྲོང་གསེབ་དར་རྒྱས་ཅུས་ཀྱི་འབྲེལ་ཡོད་ལས་དོན་པ་དང་མཉམ་དུ་ཧྲན་ཏུང་གཡན་ཐའེ་རུ་ཏ་ཧྲན་ཤིང་འབྲས་ལས་རིགས་ལ་རྟོག་ཞིབ་བྱེད་པར་བསྐྱོད་པ་དང་། ཚོང་འགུགས་མ་འདྲེན་བརྒྱུད་ཁེ་ལས་བྲག་ཡིབ་ཆུས་སུ་ནང་འདྲེན་བྱས་པ་དང་འབྲེལ། སྦེ་པ་གྲོང་རྡལ་འཛིན་པ་གྲོང་ཚོར་བཙུགས་ཡོད”ཅེས་བྲག་ཡིབ་ཆུས་ཞིང་ལས་དང་གྲོང་གསེབ་ཅུས་ཀྱི་ཏང་ཙུའི་ཁོངས་མི་དང་ཅུས་ཀྲང་གཞོན་པ་ཀའོ་དབྱང་གིས་ངོ་སྤྲོད་བྱས། 

2022ལོའི་ཟླ་7པར། རྟེན་གཞིས་མུའུ་200ཟིན་པའི་ཀུ་ཤུའི་སྡོང་པོ་འདེབས་འཛུགས་ཀྱི་འཆར་གཞི་ལེགས་སྒྲུབ་བྱས་པ་དང་འབྲེལ། ཚན་རྩལ་གསར་གཏོད་དམ་འཛིན་བྱ་གཞིར་བྱས་ནས་སྤུས་ལེགས་སྡོང་ཕྲུག་འདེབས་གསོ་བྱས་ཤིང་། བྲོ་བ་ཞིམ་ལ་དྲི་ཞིམ་འཐུལ་བ་དང་། ནད་འགོག་ནུས་པ་ཆེ་བ། ཐོན་འབབ་མང་བ་བཅས་ཀྱི“གནམ་ལྕགས”ཀུ་ཤུ་ནི་རྟེན་གཞི་དེས་རང་བརྟེན་འདེབས་གསོ་བྱས་པའི་རིགས་ཤིག་རེད་ལ། མིག་སྔར་ཁྲོམ་རའི་གདེང་འཇོག་ཡག་ཤོས་ཐོབ་པའི་རིགས་ཀྱང་རེད།