ཉེ་ཆར། ལོ་གཅིག་དུས་གཅིག་གི་མངའ་རིས་ས་ཁུལ་གྱི“འཛད་སྤྱོད་ལ་སྐུལ་སྤེལ། མཁོ་སྤྲོད་ལ་འགན་ལེན”ཞེས་པའི་ཞིང་འབྲོག་ཐོན་ཟོག་གི་ཚོང་འདུས་སྐབས་བཅུ་པ་སེང་གེ་ཁ་འབབ་ལུས་རྩལ་ཐང་གི་ཕྱི་རོལ་དུ་འགོ་ཚུགས་པ་རེད།

ཚོང་འདུས་ཀྱི་ས་གནས་ས་ཐོག་ཏུ་ཞིང་འབྲོག་ཐོན་ཟོག་འགྲེམ་ཚོང་ཁུལ་དང་། ཁྱད་ལྡན་ཐོན་ཟོག་འགྲེམ་ཚོང་ཁུལ། ཁེ་ལས་དང་ཚོང་དུད་ཀྱི་འགྲེམ་ཚོང་ཁུལ། བཅའ་ཁྲིམས་དང་ཁྲིམས་སྲོལ་དྲིལ་བསྒྲགས་ཁུལ་བཅས་ཁག་སོ་སོར་བཙུགས་ཡོད་པ་གསར་འགོད་པས་མཐོང་བྱུང་། ཁྲོམ་བཀྱག་ཆེ་ཆུང་སོ་སོར་ཁྱད་ལྡན་ཐོན་རྫས་དང་མི་རིགས་ཀྱི་ལག་ཤེས་བཟོས་རྫས་སྣ་ཚོགས་ཀྱིས་ཁེངས་ཡོད་ཅིང་། དེར་རུ་ཐོག་གི་མཚོ་མོ་ངང་ལྷའི་བདུག་རྫས་དང་། རྩྭ་མདའི་ཤིང་སྟར་བུའི་ཁུ་བ། སྤུ་ཧྲེང་གི་ཞི་བདེའི་རྩམ་པ་སོགས་འདུག དེའི་ཁྲོད་ནས་སྐྱེ་བོ་ཀུན་གྱི་ཡིད་དབང་འཕྲོག་ཤོས་དང་ཉོ་ཚོང་གི་འཁྲུག་ཆ་དོད་ཤོས་ནི་རྫོང་ཁག་ནས་ཁྱེར་ཡོང་བའི་ཚགས་ཤ་དང་། ལུག་ཤ ཕྱུར་བ། མར་སོས་པ་སོགས་འབྲོག་ལས་ཐོན་ཟོག་དག་རེད།

“ད་རེས་ང་ཚོས་དགེ་རྒྱས་རྫོང་ནས་ལུག་ཤ་དང་ཚགས་ཤ་ཁྱེར་འོང་བ་ཡིན”ཞེས་དགེ་རྒྱས་རྫོང་སན་བུ་གྲོང་ཚོའི་དཔལ་འབྱོར་མཉམ་ལས་ཁང་གི་ཁྲིམས་མི་པད་མས་ཚོང་ཤག་འགུགས་ཞོར་དུ་གསར་འགོད་པར་བཤད་བྱུང་། ཁོང་གིས་སན་བུ་གྲོང་ཚོ་ནི་འབྲོག་ལས་རྐྱང་པའི་གྲོང་ཚོ་ཞིག་ཡིན་པས། ཡུལ་མིར་སྔར་བས་འབབ་འཕར་ཕྱུག་འགྱུར་ཡོང་བར་རོགས་རམ་བྱ་ཆེད། གྲོང་ཚོས་2019ལོར་གྲོང་ཚོའི་དཔལ་འབྱོར་མཉམ་ལས་ཁང་བཙུགས་ཤིང་། མཉམ་ལས་ཁང་འཁོར་རྒྱུག་ཡག་པོ་བྱུང་བར་བརྟེན་ཡུལ་མིའི་ཡོང་འབབ་ཉིན་བཞིན་མང་དུ་སོང་ལ་འཚོ་བའང་ཇེ་ཡག་ཏུ་ཕྱིན་ཡོད་ཅེས་བཤད།

འཇམ་དབྱངས་ནི་སན་བུ་གྲོང་ཚོའི་ཚོགས་ཆུང་གཉིས་པ་ནས་ཡིན་པ་དང་། ད་རེས་ཞིང་འབྲོག་ཐོན་ཟོག་གི་ཚོང་འདུས་ལ་ཞུགས་ཐེངས་ཐོག་མ་རེད། “ང་ད་རེས་ཚོང་འདུས་ཆེན་པོ་འདི་འདྲར་ཞུགས་ཐེངས་ཐོག་མ་ཡིན་པས། སེམས་འགུལ་ཐེབས་བྱུང་ལ་དངངས་སྐྲག་ཀྱང་སྐྱེ་གི་འདུག ད་རེས་ངས་ལུག་ཤ་ཙམ་མ་ཟད་མར་ཕྱུར་སོགས་དཀར་ཆུའི་ཐོན་ཟོག་ཀྱང་ཁྱེར་ཡོད་པས། ད་རེས་ཀྱི་ཚོང་འདུས་ནང་ཚང་མ་བྲིན་ཐུབ་རྒྱུའི་རེ་བ་བྱེད་ཀྱི་ཡོད”ཅེས་འཇམ་དབྱངས་ཀྱིས་ཅུང་འཚེར་སྣང་ངང་བཤད།

སྤུ་ཧྲེང་རྫོང་གི་ཁྱད་ལྡན་ཐོན་ཟོག་འགྲེམ་ཚོང་ཁུལ་དུ་འཁྲུག་ཆ་ཧ་ཅང་དོད། དེ་གའི་ཁྲོམ་བཀྱག་ཚང་མའི་མདུན་དུ་མིས་ཁེངས་ཤིང་། དེར་ནེ་ལ་པའི་ཤིང་ཕོར་དང་རྒྱན་ཆ་སྤུས་དག་ཡོད་པ་མ་ཟད། སྤུ་ཧྲེང་རྫོང་གི་ནས་དཀར་པོའི་རྩམ་པ་དང་ནས་ཀྱི་ཏན་ཞིམ་སོགས་ཁྱད་ལྡན་ཐོན་ཟོག་ཀྱང་ཡོད་པ་རེད།

“ད་རེས་ཀྱི་ཚོང་འདུས་སུ་སྤུ་ཧྲེང་རྫོང་གི་ཚོང་དུད་47འགྲེམ་ཚོང་ནང་ཞུགས་ཤིང་། མཐའ་མཚམས་ཉོ་ཚོང་ཐོན་ཟོག་དང་། ཁྱད་ལྡན་ཐོན་ཟོག ཞིང་འབྲོག་ལས་ཀྱི་ཐོན་ཟོག་བཅས་འགྲེམས་ཁུལ་ཁག་གསུམ་ལ་ཕྱེ་ཡོད་པའི་ནང་མཐའ་མཚམས་ཉོ་ཚོང་ཐོན་ཟོག་གཙོ་བོར་བྱས་ཡོད། སྲོལ་རྒྱུན་གྱི་མཐའ་མཚམས་ཉོ་ཚོང་ས་ཚིགས་སླར་གསོ་བྱས་པ་ནས་བཟུང་། སྤུ་ཧྲེང་རྫོང་གི་མཐའ་མཚམས་ཉོ་ཚོང་ཐོན་ཟོག་གི་སྣ་ཁ་སྔར་བས་ཕུན་སུམ་ཇེ་ཚོགས་སུ་གྱུར་ལ་རིན་གོང་ཡང་ཧ་ཅང་འཚམ་པོ་ཡོད”ཅེས་སྤུ་ཧྲེང་རྫོང་མཁོ་འཚོང་མཉམ་ལས་ཁང་གི་ཀྲུའུ་རེན་གཞོན་པ་ཚེ་བརྟན་སྒྲོལ་མས་ངོ་སྤྲོད་བྱས།

མངའ་རིས་ས་ཁུལ་ཚོང་དོན་ཅུས་ཀྱི་ནང་ཁུལ་ཚོང་དོན་ཁོའོ་ཡི་ཁོའོ་ཀྲང་བློ་བརྟན་གྱིས། ལོ་གཅིག་དུས་གཅིག་གི་ཞིང་འབྲོག་ཐོན་ཟོག་ཚོང་འདུས་ནི་མངའ་རིས་ས་ཁུལ་གྱི་གཞི་ཁྱོན་ཆེ་ཤོས་དང་ཞུགས་མཁན་མི་གྲངས་མང་ཤོས་ཀྱི་དངོས་ཟོག་བརྗེ་རེས་དང་། རིག་གནས་སྤེལ་རེས། ཁྱད་ལྡན་ཐོན་ཟོག་འགྲེམས་སྟོན་བཅས་ཀྱི་ཕྱོགས་བསྡུས་དཔལ་འབྱོར་ཚོང་དོན་བྱ་བ་གཟབ་རྒྱས་ཤིག་ཡིན། འདི་ལོར་ཁྱད་ལྡན་ཐོན་ཟོག་སྣ་ཁ་100ལྷག་ཙམ་བཏོན་པ་དང་། ཚོང་དུད་400ལྷག་ཙམ་ཞུགས་ལ། ཆེད་དོན་མ་དངུལ་སྒོར་ཁྲི་50བཏང་ནས་རྫོང་བདུན་ལ་ས་མཐོའི་ཞིང་ལས་ཁྱད་ལྡན་ཐོན་ཟོག་གི་འཛད་སྤྱོད་འཛིན་ཤོག་སྤྲད་ཡོད་ཅེས་ངོ་སྤྱོད་བྱས།

བློ་བརྟན་གྱིས“ཐེངས་འདིའི་ཚོང་འདུས་གཟབ་རྒྱས་རིང་། མངའ་རིས་མི་དམངས་ཀྱི་འཚོ་བ་ཡར་ངོའི་ཟླ་ལྟར་གོང་ནས་གོང་དུ་འཕེལ་བཞིན་པ་ང་ཚོས་མཐོང་བྱུང་ལ། མངའ་རིས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ཡག་པོ་ཡང་མངོན་ཐུབ་པས། སླད་ཕྱིན། ང་ཚོས་ཚོང་འདུས་མུ་མཐུད་ཡག་པོར་གཉེར་ནས་མངའ་རིས་འཕེལ་རྒྱས་ཡོང་བར་སྒུལ་ཤུགས་ཟམ་མི་ཆད་པར་སྣོན་རྒྱུ་ཡིན”ཞེས་བཤད།