ཉེ་ཆར། གོང་དཀར་རྫོང་གིས་དུས་ཡུན་ཉིན་7གྱི་2024ལོའི་མི་རིགས་ཀྱི་ཁྱད་ལྡན་ཐོན་ཟོག་འགྲེམས་ཚོང་བྱས་ནས་རྫོང་ཡོངས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་དང་གྲོང་གསེབ་དར་རྒྱས་ལ་རོགས་སྐྱོར་བྱས་ཡོད།

བསྡོམས་རྩིས་བརྒྱབ་པར་གཞིགས་ན། ད་ཐེངས་ཀྱི་ཚོང་འདུས་ཐོག་ཚོང་ཟོག་བྲིན་ཚད་བསྡོམས་སྒོར་ཁྲི་700ལྷག་ཙམ་ཟིན་ཡོད།

སྐབས་དེའི་ཚོང་འདུས་སུ་ཁྱོན་འགྲེམས་གནས་530བཀོད་སྒྲིག་བྱས་པའི་ནང་གཏན་འཇགས་ཀྱི་འགྲེམས་གནས་466དང་སྐོར་སྐྱོད་ཐང་ཁྲོམ་64ཡོད་པ་རེད། འགྲེམས་ཞུགས་ཚོང་དུད་ནང་རྫོང་དེའི་ཤང་དང་གྲོང་རྡལ་10ཡི་ཁེ་ལས་དང་མི་སྒེར་ཚུད་པ་མ་ཟད། ད་དུང་ལྷ་ས་དང་། གཞིས་རྩེ། ཐ་ན་ནེ་པ་ལ་སོགས་ཀྱི་ཚོང་དུད་ཀྱང་ཡོད་པ་རེད། ལས་སྟེགས་དེ་བརྒྱུད། ས་གནས་དེ་ག་དང་ས་གནས་གཞན་དབར་གྱི་རིག་གནས་སྤེལ་རེས་དང་དཔལ་འབྱོར་མཉམ་ལས་ལ་སྐུལ་འདེད་ཐེབས་པ་མ་ཟད། ད་དུང་ཞིང་འབྲོག་མང་ཚོགས་ལ་སྣ་མང་ཅན་གྱི་ཚོང་ཟོག་གདམ་ག་བྱེད་པའི་གོ་སྐབས་སྦྱིན་ནས་འཛད་སྤྱོད་ཀྱི་དགོས་མཁོར་སྐུལ་མ་ནུས་ལྡན་ཐེབས་པ་དང་འབྲེལ་ཡོད་ཐོན་ལས་འཕེལ་རྒྱས་སྟོབས་ཆེར་འགྲོ་བར་སྐུལ་ཁྲིད་ཐུབ་ཡོད།

ཁྲོམ་རའི་གསོན་ཤུགས་སྔར་བས་འཕེལ་བར་བྱ་ཆེད། བྱེད་སྒོ་སྤེལ་རིང་གོང་དཀར་རྫོང་ཚོང་དོན་ཅུས་ཀྱིས“གོང་དཀར་རྫོང་གི་ཉོ་ཚོང་འཁྲུག རྫོགས་ལྡན་སྟོན་དུས་ཨེ་མ་མཚར”ཞེས་པའི་འཛད་སྤྱོད་བྱེད་སྒོ་ཆེད་མངགས་ཇུས་འགོད་དང་ལག་ལེན་བསྟར་ནས། རྒྱ་ཆེའི་འཛད་སྤྱོད་པར་ཁྱོན་སྒོར་ཁྲི་90ཟིན་པའི་འཛད་སྤྱོད་འཛིན་ཤོག་སྤྲད་པ་རེད། བསྡོམས་རྩིས་རགས་ཙམ་བརྒྱབ་པར་གཞིགས་ན། དྲ་ཐོག་ཏུ་འཛད་སྤྱོད་འཛིན་ཤོག་སྤྱོད་པའི་དངུལ་གྲངས་སྒོར་ཁྲི་46.5ཟིན་ཏེ་འཛད་སྤྱོད་ཀྱི་གཏོང་སྒོ་འཕར་མ་སྒོར་ཁྲི་209.79ཙམ་ཟིན་པར་སྐུལ་ཁྲིད་དང་དཔལ་འབྱོར་ཕན་འབྲས་ཡག་པོ་དང་སྤྱི་ཚོགས་ཀྱི་ཚུར་སྣང་ལན་ཆ་བཟང་པོ་བྱུང་ཡོད།