ད་ལོའི་ཟླ་5ཚེས་1ཉིན་ནག་ཆུ་གྲོང་ཁྱེར་ཨ་མདོ་རྫོང་བྲག་སྨུག་གི་བྱང་སྒོ་ཆེ་མོའི་སྦྲེལ་ཚུགས་གསར་པ་གཉེར་སྐྱོང་བྱེད་འགོ་ཚུགས་པ་དང་བསྟུན་ནས་བོད་ཀྱི“བྱང་སྒོ་ཆེ་མོར”གློག་འཕྲིན་དང་སྒུལ་བདེའི་དྲ་རྒྱ་ཁྱོན་ཡོངས་ལ་ཁྱབ་སྟེ། ས་གནས་འདི་གའི་མང་ཚོགས་ཀྱི་འཕྲིན་གཏོང་ཞབས་ཞུའི་དགོས་མཁོ་ནུས་ལྡན་བསྐངས་བ་རེད། ས་གནས་དེ་གའི་འཕྲིན་གཏོང་གི་རེ་ཞུ་ཤེས་རྟོགས་བྱུང་རྗེས། ཀྲུང་གོ་གློག་འཕྲིན་ནག་ཆུ་ཡན་ལག་ཀུང་སིས་ཀྲུང་དབྱང་ཁེ་ལས་ཀྱི་འགན་འཁྲི་རང་འགུལ་ངང་འཁུར་བ་དང་ལག་ལེན་བསྟར་ནས་ཨ་མདོ་རྫོང་བྲག་སྨུག་གི་བྱང་སྒོ་ཆེ་མོའི་སྦྲེལ་ཚུགས་གསར་སྐྲུན་ལས་འགན་དང་ལེན་བྱས་ཏེ་ཕྱོགས་ཁག་གི་སྟོབས་ཤུགས་སྒྲིག་འཛུགས་ཧུར་ཐག་གིས་ཟླ་4ཚེས་14ཉིན་ནས་བཟུང་ལས་འགོ་བཙུགས་ཏེ་སྦྲེལ་ཚུགས་ཀྱི་ལེ་ལག་ཚང་བའི་གློག་ཁུངས་གསར་སྐྲུན་དང་། འོད་སྐུད་ཚི་སྐུད་ཁྲིད་པ། སྙོམས་སྒྲིག་ཚད་འཇལ་སྒྲིག་ཆས་སྒྲིག་སྦྱོར་བཅས་མགྱོགས་མྱུར་བྱས་པ་དང་ཆབས་ཅིག ཐོན་ཁུངས་མཉམ་སྤྱོད་ཀྱི་ངོ་འཕྲད་གྲོས་མོལ་བྱས་ཏེ་མཉམ་སྐྲུན་མཉམ་སྤྱོད་ལ་སྐུལ་འདེད་བཏང་བ་རེད།

ད་ཐེངས་གསར་སྐྲུན་དང་ཉམས་གསོ་བྱས་པ་དེས་ཨ་མདོ་རྫོང་བྲག་སྨུག་གི་སྒུལ་བདེའི་འཕྲིན་གཏོང་གི་བརྡ་རྟགས་བདེ་བླག་ངང་ཉམས་གསོ་ཐུབ་ནས་རི་སྐྱེས་སྲོག་ཆགས་སྲུང་སྐྱོང་ཁུལ་དང་དེ་བཞིན་གཙོ་གནད་འགྲིམ་འགྲུལ་གཞུང་ལམ་གྱི་འཕྲིན་གཏོང་བརྡ་རྟགས་ཀྱི་ཞན་ཆ་ནུས་ལྡན་ངང་བསལ་ནས་གྲོང་གསེབ་དར་རྒྱས་ལ་དྲ་རྒྱའི་རྨང་གཞིའི་སྒྲིག་བཀོད་ཀྱི་འདེགས་སྐྱོར་ནུས་ལྡན་ཐུབ་ཡོད་པ་རེད།

ཉེ་བའི་ལོ་ཤས་རིང་། ནག་ཆུ་གྲོང་ཁྱེར་གྱིས་དྲ་རྒྱའི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་མགྱོགས་མྱུར་བཏང་བར་མིག་སྔར་གྲུབ་འབྲས་མངོན་གསལ་དོད་པོ་ཐོབ་ཡོད་པ་དེའི་ནང་5Gསྦྲེལ་ཚུགས་གསར་སྐྲུན་དང་། དྲ་ཆེན་དྲ་རྒྱ་རིམ་སྤོར། འཕྲིན་གཏོང་བརྡ་རྟགས་ཁྱབ་རྒྱ་ཆེར་གཏོང་སོགས་ཚུད་པའི་བོད་བྱང་ཐང་གི་ཞིང་འབྲོག་པར་དེ་བས་སྟབས་བདེ་དང་ནུས་ཆེའི་དྲ་རྒྱའི་ཞབས་འདེགས་ཞུས་ཏེ་ནག་ཆུ་གྲོང་ཁྱེར་གྱི་གྲངས་འཛིན་དཔལ་འབྱོར་འཕེལ་རྒྱས་དང་སྤྱི་པའི་ཞབས་ཞུའི་ཆུ་ཚད་མཐོ་རུ་འགྲོ་བར་རམ་འདེགས་བྱས་པ་རེད།

ཤེས་རྟོགས་བྱུང་བར་གཞིགས་ན། ནག་ཆུ་གྲོང་ཁྱེར་གྱིས་5Gདྲ་རྒྱའི་རྨང་གཞིའི་སྒྲིག་བཀོད་འཛུགས་སྐྲུན་ལ་གོ་རིམ་ལྡན་པའི་ངང་སྐུལ་འདེད་བཏང་བས། གྲོང་ཁྱེར་དང་། རྫོང་། ཆུས། ཤང་གྲོང་བཅས་ལ་5Gདྲ་རྒྱ་ཡོངས་སུ་ཁྱབ་ནས་འཕྲིན་གཏོང་མྱུར་ཚད་སླར་ཡང་མགྱོགས་སུ་ཕྱིན་པ་རེད། མིག་སྔར་གྲོང་ཁྱེར་ཡོངས་ཀྱི་5Gབརྡ་རྟགས་དེ་གྲོང་ཁྱེར་ཡོངས་ཀྱི་རྫོང(ཆུས)11དང་། ཤང་གྲོང་114 མཚོ་བོད་ལྕགས་ལམ་གྱི་ལམ་རྒྱུད་བཅས་དང་དེ་བཞིན་ཡུལ་སྐོར་མཛེས་ལྗོངས་ཁུལ་ལ་ཁྱབ་པ་དང་ཤང་གྲོང་ཡན་ལ་5Gབརྡ་རྟགས་ཁྱབ་ཚད་100%ཟིན་ཡོད་པ་རེད།

དྲ་རྒྱའི་རྨང་གཞིའི་སྒྲིག་བཀོད་ལེགས་སུ་ཤུགས་ཆེན་ཕྱིན་པ་དང་བསྟུན་ནས་ནག་ཆུ་གྲོང་ཁྱེར་གྱི་ཆ་འཕྲིན་ཅན་གྱི་གཙོ་གནད་རྣམ་གྲངས་འཛུགས་སྐྲུན་གྱི་མྱུར་ཚད་ཀྱང་མགྱོགས་སུ་ཕྱིན་ཡོད། ཆ་འཕྲིན་ཅན་གྱི་གཙོ་གནད་རྣམ་གྲངས་ལས་དོན་ཡག་པོ་སྒྲུབ་ཆེད། ནག་ཆུ་གྲོང་ཁྱེར་གྱིས་ཟླ་རེའི་ལྟ་ཞིབ་ཚད་ལེན་ལམ་སྲོལ་བཙུགས་ནས་གྲོང་ཁྱེར་ཡོངས་སུ་སྐྲུན་བཞིན་པའི་ཆ་འཕྲིན་ཅན་གྱི་གཙོ་གནད་རྣམ་གྲངས་ལྟ་ཞིབ་ཚད་ལེན་གྱི་ཁྱབ་ཁོངས་ནང་བཅུག་སྟེ་རྣམ་གྲངས་ཀྱི་འཕེལ་རིམ་སོགས་ཀྱི་གནས་ཚུལ་ལ་དུས་ཐོག་ཏུ་རྗེས་སྙེགས་བྱས་ནས་ཁོང་དུ་ཆུད་པར་བྱས་ཡོད། ཟླ་6པའི་བར་སྐྲུན་བཞིན་པའི་ཆ་འཕྲིན་ཅན་གྱི་གཙོ་གནད་རྣམ་གྲངས་39ཡི་འགུལ་རྣམ་གསེད་བཀྲོལ་ཕྱོགས་སྡོམ་བྱས་པར་མ་དངུལ་བསྡོམས་འབོར་སྒོར་ཁྲི་52595.88གཏོང་རྩིས་ཡོད་པ་དང་2024ལོར་མ་དངུལ་སྒོར་ཁྲི་26310.2གཏོང་རྩིས་ཡོད་པ་དེ་དག་རིག་ལྡན་ཁོར་ཡུག་སྲུང་སྐྱོང་དང་། རིག་ལྡན་འབྲོག་ར། རིག་ལྡན་འགྲིམ་འགྲུལ། རིག་ལྡན་སོག་རྫོང་། 5Gསྦྲེལ་ཚུགས། གློག་འཕྲིན་ཡོངས་ཁྱབ་ཞབས་ཞུ་ཁག་བཅུ་པ་སོགས་ཀྱི་རྣམ་གྲངས་དང་འབྲེལ་བ་ཡོད་པར་མ་དངུལ་སྒོར་ཁྲི་11971.22བཏང་ཟིན་པ་དང་མ་དངུལ་བཏང་ཟིན་ཚད་45.50%ཟིན་ཡོད་པ་རེད།