ཉིན་ཤས་གོང་། ལྷོ་ཁ་གྲོང་ཁྱེར་སྣེ་གདོང་ཆུས་ཀྱི་ཤང་མང་པོའི་གནོད་འཚེ་ཕོག་པའི་མང་ཚོགས་ལ་སྲིད་ཇུས་རང་བཞིན་གྱི་ཞིང་ལས་འགན་བཅོལ་གྱི་གྱོང་གསབ་དངུལ་སྒོར་ཁྲི་47.83དང་གྲོང་གསེབ་དར་རྒྱས་ཀྱི་འགན་བཅོལ་གྱི་གྱོང་གསབ་དངུལ་སྒོར་ཁྲི་100རགས་པ་རེད། འགན་བཅོལ་གྱོང་གསབ་ཀྱི་དངུལ་དེ་དག་བེད་སྤྱོད་བཏང་ནས་གནོད་འཚེ་ཕོག་པའི་མང་ཚོགས་ཀྱིས་དཀའ་གནད་ལས་སྒྲོལ་བ་དང་ཐོན་སྐྱེད་སླར་གསོ་བྱེད་པར་དུས་ཐོག་ཏུ་རམ་འདེགས་ནུས་ལྡན་ཐུབ་རྒྱུ་རེད།

ཤེས་རྟོགས་བྱུང་བར་གཞིགས་ན། ཟླ་7ཚེས་15ཉིན། སྣེ་གདོང་ཆུས་ཕོ་བྲང་ཤང་དང་། ཡར་སྟོད་ཤང་། རྡོ་ཕོ་བྲང་ཤང་བཅས་ས་ཁུལ་ཁག་གཅིག་ལ་དྲག་ཆར་དང་སེར་བ་སོགས་འབབ་པའི་གནམ་གཤིས་ངན་པ་བསྟན་ནས་ཞིང་འབྲོག་པའི་སྡོད་ཁང་དང་། འདེབས་འཛུགས་ལས་རིགས། གསོ་སྤེལ་ལས་རིགས་སོགས་ལ་ཚད་གཞི་མི་འདྲ་བའི་གནོད་སྐྱོན་ཕོག་ཡོད། གནོད་འཚེ་ཕོག་རྗེས། སྣེ་གདོང་ཆུས་ཨུད་དང་ཆུས་སྲིད་གཞུང་གིས་ཀྲུང་གོ་མི་དམངས་རྒྱུ་ནོར་འགན་བཅོལ་ལྷོ་ཁ་ཡན་ལག་ཀུང་སི་དང་། འབྲེལ་ཡོད་ལས་རིགས་ཀྱི་སྡེ་ཚན། དེ་བཞིན་གནོད་འཚེ་ཕོག་པའི་ཤང་ཁག་གི་ཏང་ཨུད་དང་སྲིད་གཞུང་བཅས་སྒྲིག་འཛུགས་བྱས་ནས་གནོད་འཚེ་ཕོག་ཁུལ་དུ་བསྐྱོད་དེ་སྡོད་ཁང་དང་། འདེབས་འཛུགས་ལས་རིགས། གསོ་སྤེལ་ལས་རིགས་བཅས་ཀྱི་གནོད་སྐྱོན་ཞིབ་བཤེར་དང་གྱོང་གསབ་རྩིས་རྒྱག་ལས་དོན་ལེགས་པར་བསྒྲུབས་ནས་གནད་སྨིན་གྱོང་གསབ་ཐུབ་ཆེད་གྲངས་གཞིའི་རྨང་གཞི་བཏིང་ཡོད།

གྱོང་གསབ་དངུལ་སྤྲོད་ཡུལ་དུ་སྣེ་གདོང་ཆུས་ཕོ་བྲང་ཤང་མདའ་ཐང་གྲོང་ཚོའི་ཡུལ་མི་པ་སངས་ཀྱིས། རང་བྱུང་གནོད་འཚེ་བྱུང་རྗེས་ཆུས་ཨུད་དང་སྲིད་གཞུང་གིས་འཕྲལ་སྡོམ་བྱ་ཐབས་དུས་ཐོག་ཏུ་སྤྱད་དེ། ཡུལ་མིའི་གྱོང་གུན་ཆུང་དུ་གཏོང་གང་ཐུབ་བྱས་སོང་། དེ་རིང་ཡང་དེ་མཚུངས་ཀྱི་འགན་བཅོལ་གྱོང་གསབ་དངུལ་རག་བྱུང་། སྲིད་གཞུང་གིས་སྲིད་ཇུས་ཡག་པོ་དེ་འདྲ་ལག་ལེན་བསྟར་གནང་བར་ཐུགས་རྗེ་ཆེ་ཞུ་གི་ཡིན་ཞེས་བཤད།

གསར་འགོད་པར་རང་སྐྱོང་ལྗོངས་ནོར་སྲིད་ཐིང་གིས་འདི་ལོའི་ཟླ་5པར་པར་སྐྲུན་བྱས་པའི《བོད་རང་སྐྱོང་ལྗོངས་ཀྱི་ཞིང་འབྲོག་མང་ཚོགས་ཀྱིས་ནོར་སྲིད་ཁ་གསབ་གཟིགས་སྐྱོང་སྲིད་ཇུས་ལོངས་སུ་སྤྱོད་པའི་གསལ་རྟོགས་གཱ(2024ལོའི་པར་གཞི)》ནས་ཤེས་རྟོགས་བྱུང་བར། རང་ལྗོངས་སུ་ཞིང་འབྲོག་ལས་ཀྱི་ཐོན་སྐྱེད་གཉེར་སྐྱོང་འགན་བཅོལ་ནང་ཞུགས་འདོད་ཡོད་པའི་ཞིང་འབྲོག་དུད་ཚང་དང་ཞིང་འབྲོག་ལས་ཀྱི་ཐོན་སྐྱེད་གཉེར་སྐྱོང་རྩ་འཛུགས(ཞིང་པའི་ཆེད་ལས་མཉམ་ལས་ཁང་དང་། ཞིང་ལས་ཁེ་ལས། དེ་བཞིན་ཞིང་ལས་ཐོན་སྐྱེད་གཉེར་སྐྱོང་རྩ་འཛུགས་གཞན་དག་བཅས་ཚུད་པ)ཚང་མ་ཞིང་ལས་འགན་བཅོལ་ནང་ཞུགས་ཆོག་པ་མ་ཟད། གཏན་འབེབས་ཀྱི་བསྡུར་ཚད་ལྟར་འགན་བཅོལ་གྲོན་དངུལ་གྱི་ཁ་གསབ་ལོངས་སུ་སྤྱོད་རྒྱུ་ཡོད་པ་དཔེར་ན། ནས་ཀྱི་འགན་བཅོལ་གྲོན་དངུལ་མུའུ་རེར་སྒོར་7.6ཡིན་པ་དང་། ཞིང་དུད་རང་ཉིད་ཀྱིས་འགན་བཅོལ་གྲོན་དངུལ་མུའུ་རེར་སྒོར་0.304འཇལ་དགོས་པ། གྱོང་གསབ་དངུལ་མུའུ་རེར་སྒོར་380སྤྲོད་རྒྱུ་ཡིན་པ། འབྲི་གཡག་གི་འགན་བཅོལ་གྲོན་དངུལ་མགོ་གྲངས་རེར་སྒོར་150ཡིན་པ་དང་། ཞིང་དུད་རང་ཉིད་ཀྱིས་འགན་བཅོལ་གྲོན་དངུལ་མགོ་གྲངས་རེར་སྒོར་6འཇལ་དགོས་པ། གྱོང་གསབ་དངུལ་མགོ་གྲངས་རེར་སྒོར་5000སྤྲོད་རྒྱུ་ཡིན་པ། ཞིང་འབྲོག་མང་ཚོགས་ཀྱི་སྡོད་ཁང་གི་འགན་བཅོལ་གྲོན་དངུལ་སྟར་པ་རེར་སྒོར་140ཡིན་པ་དང་། ཞིང་དུད་རང་ཉིད་ཀྱིས་འགན་བཅོལ་གྲོན་དངུལ་སྟར་པ་རེར་སྒོར་5.6འཇལ་དགོས་པ། གྱོང་གསབ་དངུལ་སྟར་པ་རེར་སྒོར་14000སྤྲོད་རྒྱུ་ཡིན་པ། དྲོད་ཁང་ཆེན་པོའི་སྔོ་ཚལ་གྱི་འགན་བཅོལ་གྲོན་དངུལ་མུའུ་རེར་སྒོར་120ཡིན་པ་དང་། ཞིང་དུད་རང་ཉིད་ཀྱིས་འགན་བཅོལ་གྲོན་དངུལ་མུའུ་རེར་སྒོར་4.8འཇལ་དགོས་པ། སྐྱིན་ཚབ་འཇལ་དངུལ་མུའུ་རེར་སྒོར་2000སྤྲོད་རྒྱུ་ཡིན་པ་བཅས་རེད།

ཀྲུང་གོ་མི་དམངས་རྒྱུ་ནོར་འགན་བཅོལ་ལྷོ་ཁ་ཡན་ལག་ཀུང་སིའི་འགན་འཁུར་བས། རྗེས་མཐུད་ལས་དོན་ཁྲོད་ཀུང་སིས་སྲིད་ཇུས་རང་བཞིན་གྱི་ཞིང་ལས་འགན་བཅོལ་ལམ་ལུགས་མུ་མཐུད་འཐུས་སྒོ་ཚང་དུ་དང་ལེགས་སུ་གཏོང་བ་དང་། རོགས་སྐྱོར་བྱེད་ཤུགས་ཆེ་རུ་གཏོང་བ། འགན་བཅོལ་འགན་ལེན་གྱི་ཆུ་ཚད་མཐོ་རུ་གཏོང་བ་བཅས་བྱས་ཏེ། རྒྱ་ཆེའི་ཞིང་འབྲོག་མང་ཚོགས་ལ་ཞིང་ལས་ཐོན་སྐྱེད་ཁྲོད་དུ་དེ་བས་གདེང་ཚོད་ཡོད་པ་དང་དེ་བས་བློ་བདེའི་ངང་འཕེལ་རྒྱས་ཡོང་བ་བྱེད་ཀྱི་ཡིན་ཞེས་བཤད་པ་རེད།