འདི་ལོའི་ལོ་སྟོད་ནས་བཟུང་། ལྗོངས་ཡོངས་ཀྱི་ཞིང་ལས་གྲོང་གསེབ་ཁོངས་གཏོགས་ཀྱིས་རྒྱལ་ཡོངས་ཀྱི་དམིགས་ཚད་ལས་འགན་ལ་དམ་པོར་དམིགས་ནས། ཞབས་ཞུས་ཐོན་སྐྱེད་འགན་སྲུང་བྱེད་པར་ཤུགས་སྣོན་བརྒྱབ་སྟེ་ནུས་ཤུགས་ཡོད་རྒུས་ཐོན་ལས་སྤུས་འབྲས་ལེགས་གཉེར་ཡོང་བར་དམ་འཛིན་གྱིས“སྒུལ་བྱེད་གཉིས”ལ་བརྟེན་ནས་ཐོན་ལས་འཕེལ་རྒྱས་གཏོང་བའི་གསོན་ཤུགས་འཕེལ་བར་བྱས་པས་ལྗོངས་ཡོངས་ཀྱི་ཞིང་འབྲོག་ལས་བརྟན་ཐོག་ཡར་འཕེལ་བྱུང་ཡོད།

རང་སྐྱོང་ལྗོངས་བསྡོམས་རྩིས་ཅུས་ཀྱི་གྲངས་གཞི་ལས་མངོན་པར། ལོ་སྟོད་དུ། རང་ལྗོངས་སུ་ཞིང་ལས་ཐོན་ལས་ཅན་གྱི་རྒྱལ་ཁབ་ཀྱི་གཙོ་གནད་སྣེ་འདྲེན་ཁེ་ལས་3མང་དུ་ཕྱིན་པ་དང་། ལྗོངས་ཡོངས་ཀྱི་ཞིང་ལས་དང་། ནགས་ལས། འབྲོག་ལས། ཉ་ལས་བཅས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་84.6ཟིན་པ་དེ་དུས་མཚུངས་ལས་16.6%འཕར་ཞིང་། བོད་ཀྱི་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་མགྱོགས་མྱུར་འཕར་ཚད་རྒྱལ་ཡོངས་ཀྱི་ཨང་གཉིས་པར་སླེབས་ཡོད།

འདི་ལོ་ནས་བཟུང་། རང་ལྗོངས་ཀྱིས་ཐོན་ལས་དར་རྒྱས་ཡོང་བ་བྱ་རྒྱུ་དེ་གྲོང་གསེབ་དར་རྒྱས་གཏོང་བའི་གལ་ཆེའི་ནང་གི་འགངས་ཆེར་བརྩི་རྒྱུ་མཐའ་འཁྱོངས་བྱས་ནས“ཡུལ་ཟོག”བྲིན་ཚོང་ཡག་པོ་མུ་མཐུད་ཡོང་བར་བྱས་ཤིང་། མིག་སྔའི་བར། ལྗོངས་ཡོངས་དང་གྲོང་ཁྱེར་རིམ་པ་ཡན་གྱི་སྣེ་འདྲེན་ཁེ་ལས་182དང་། ལྗོངས་ཡོངས་སུ་ཐོ་བཀོད་པའི་ཞིང་འབྲོག་པའི་ཆེད་ལས་མཉམ་ལས་ཁང་ཁྲི་1.17 ཁྱིམ་ཚང་འབྲོག་ར་ཁྲི་0.94བཅས་ཟིན་གྱི་ཡོད་པ་རེད།

ཚན་རྩལ་དང་སྒྱུར་བཅོས་ལས་གསོན་ཤུགས་འཕེལ་བར་བྱེད་པ་ནི་རང་ལྗོངས་ཀྱི་ཞིང་འབྲོག་ལས་ཐོན་ལས་ཀྱི་འཕེལ་ཕྱོགས་བརྟན་པོ་དང་སྐྱོན་བྲལ་ཡོང་བའི་མན་ངག་ཅིག་རེད། ལོ་སྟོད་དུ་རང་ལྗོངས་ཀྱིས་ལག་རྩལ་གསར་གཏོད་དང་སྒྱུར་བཅོས་ཀྱི་ཐབས་མཆོག་བེད་ཡག་པོ་སྤྱོད་རྒྱུ་མུ་མཐུད་མཐའ་འཁྱོངས་བྱས་ནས་ཚན་རྩལ་གྱི་ཞབས་འདེགས་ཞུ་ནུས་དང་ལག་རྩལ་འགག་སྒྲོལ་བྱེད་ཤུགས་ཆེ་རུ་བཏང་སྟེ། གྲོང་གསེབ་ཀྱི་ས་ཞིང་གཉེར་སྐྱོང་དབང་ཆ་བརྒྱུད་བཤུག་དོ་དམ་ལ་ཤུགས་སྣོན་བརྒྱབ་ནས་ཚོད་ལྟ་སོགས་ཀྱི་ལས་དོན་ཡག་པོ་བསྒྲུབས་ཏེ་ཞིང་འབྲོག་ལས་འཕེལ་རྒྱས་ཀྱི་ཕན་འབྲས་ཟམ་མི་ཆད་པར་ཆེ་རུ་བཏང་ཞིང་། འདི་ལོར་རང་སྐྱོང་ལྗོངས་རིམ་པའི་ནས་དང་། འབྲི་གཡག རྩྭ་ར་བཅས་ཀྱི་ཐོན་ལས་3གྱི་ལག་རྩལ་མ་ལག་སྔ་རྗེས་སུ་བཙུགས་པ་དང་། ལག་རྩལ་རིགས་གཅིག་མཁས་ཅན་5162ཞིང་ནང་དང་མུ་ཁར་བསྐྱོད་དེ་ཞིང་འབྲོག་པ་མི་ཐེངས་ཁྲི་30ལྷག་ཙམ་ལ་ཞབས་འདེགས་ཞུས་ཡོད།

དེ་དང་ཆབས་ཅིག རང་ལྗོངས་ཀྱིས་གྲོང་གསེབ་མཉམ་སྡེབ་ཀྱི“མ་རྩ་གསུམ་འདུས”ལ་ལྟ་འདོམས་བྱེད་པའི་མངོན་གསལ་དོད་པའི་གནད་དོན་ལ་གཅིག་སྡུད་ཆེད་དོན་བཅོས་སྒྲིག་གི་བྱ་སྤྱོད་ཧུར་ཐག་སྤེལ་ནས《བོད་རང་སྐྱོང་ལྗོངས་ཀྱི་བཟོ་ཚོང་ཁེ་ལས་སོགས་སྤྱི་ཚོགས་ཀྱི་མ་དངུལ་བརྒྱུད་བཤུག་ལས་ཐོབ་པའི་ས་ཞིང་གཉེར་སྐྱོང་བྱེད་དབང་དོ་དམ་ལག་བསྟར་བྱ་ཐབས(ཚོད་ལྟའི་ལག་བསྟར)》དང་བྱ་ཐབས་ཀྱི་ཕྱོགས་སྟོན་བཏོན་ཏེ། གྲོང་གསེབ་ཀྱི་ས་ཞིང་གཉེར་སྐྱོང་བྱེད་དབང་བརྒྱུད་བཤུག་ལ་དོ་དམ་བྱེད་ཤུགས་ཆེ་རུ་ཏན་ཏིག་བཏང་ཞིང་། ལྷ་ས་གྲོང་ཁྱེར་གྱི་ཆུ་ཤུར་རྫོང་དང་ལྷོ་ཁ་གྲོང་ཁྱེར་གྱི་སྣེ་གདོང་ཆུས་ཀྱི་གྲོང་གསེབ་ཁང་སའི་ལམ་ལུགས་སྒྱུར་བཅོས་ཚོད་ལྟའི་ལས་དོན་སྤྱིར་ན་ལེགས་སྒྲུབ་བྱས་ལ་ལྷ་ས་གྲོང་ཁྱེར་ལ་གྲོང་ཁྱེར་དང་། རྫོང་། ཤང་བཅས་རིམ་པ་གསུམ་ལ་ཁྱབ་པའི་གྲོང་གསེབ་ཀྱི་བདག་དབང་བརྒྱུད་བཤུག་ཉོ་ཚོང་ལས་སྟེགས་ཀྱང་སྤྱིར་ན་བཙུགས་ཟིན་ཡོད།

རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་གི་འབྲེལ་ཡོད་འགན་འཁུར་བས། གོམ་སྟབས་རྗེས་མར་རང་ལྗོངས་ཀྱིས་ཞིང་འབྲོག་ལས་ཀྱི་ཐོན་སྐྱེད་ལ་མུ་མཐུད་དམ་འཛིན་བྱས་ནས་ཞིང་ལས་ཀྱི་འགག་རྩའི་ལག་རྩལ་འགག་སྒྲོལ་གྱི་ཇུས་གཞི་དོན་འཁྱོལ་ཡོང་བར་སྐུལ་འདེད་ཧུར་ཐག་བཏང་སྟེ། ལག་རྩལ་གསར་གཏོད་དང་ཞིབ་སྤེལ་བྱེད་ཤུགས་ཆེ་རུ་བཏང་ནས“མ་དངུལ་བྱ་དགས་འཐུས་པའི”བྱེད་སྟངས་བརྒྱུད་སྣེ་འདྲེན་ཁེ་ལས་ཀྱིས་སྤུས་འབྲས་ལེགས་གཉེར་དང་། མཉམ་ལས་ཁང་གི་གཞི་ཁྱོན་རྒྱ་སྐྱེད། ཁྱིམ་ཚང་འབྲོག་རའི་ཆེད་ལས་ཚད་ལྡན་བཅས་ཡོང་བར་ལྕག་སྐུལ་གཏོང་རྒྱུ་མ་ཟད། ཞིང་ལས་ཐོན་ལས་ཅན་གྱི་མཉམ་འབྲེལ་སྒྲིག་གཞི་ཚོད་ལྟའི་ངང་བཙུགས་ནས་ཞིང་འབྲོག་ལས་ཀྱི་ཐོན་རྫས་ལས་སྣོན་ལས་རིགས་ཀྱི་རིན་ཐང་བསྡོམས་འབོར་10%ཡན་འཕར་རྒྱུར་འདེགས་སྐྱོར་ཧུར་ཐག་བྱེད་ཀྱི་ཡིན་ཞེས་ངོ་སྤྲོད་བྱས།