འདི་ལོའི་ཟླ་3པར། གཞིས་རྩེ་གྲོང་ཁྱེར་གྲོ་མོ་རྫོང་གི་2023ལོའི་ལོ་འཁོར་གྱི་སྔོན་ཐོན་མཉམ་སྡེབ་དང་སྔོན་ཐོན་མི་སྒེར་གྱི་ཚོགས་ཆེན་ཐོག་ཤར་གསིང་མ་སྡེ་ཁུལ་ཏང་ཀྲི་པུའི་ཧྲུའུ་ཅི་ཕུར་བུ་དབང་འདུས་ཀྱིས་སྡིངས་ཆའི་ཐོག་འཛེགས་ནས“གྲོང་ཚོའི་མཉམ་སྡེབ་ཀྱི་ཡོང་འབབ་གཏོད་པའི་བྱ་དགའ་ཨང་དང་པོ”དང་བྱ་དགའི་དངུལ་སྒོར་ཁྲི་50ཡི་གཟེངས་རྟགས་བླངས་པ་རེད།

གནས་ཚུལ་འདི་ཐོས་རྗེས་གྲོང་མི་རྣམས་ལ་སེམས་ཤུགས་ཆེན་པོ་སྐྱེས་པ་རེད།

ལོ་གསུམ་རིང་། ཤར་གསིང་མ་སྡེ་ཁུལ་གྱི་མཉམ་སྡེབ་དཔལ་འབྱོར་ཆུང་བ་ནས་ཆེ་བའི་བར་དང་ཉམས་ཞན་ནས་སྟོབས་ཆེའི་བར་འཕེལ་རྒྱས་བྱུང་སྟེ་ཡོང་འབབ་སྒོར་ཁྲི་121ལྷག་ཙམ་ནས་སྒོར་ཁྲི་333ལྷག་ཙམ་བར་འཕར་ཡོད། 2023ལོར་ཁེ་སྤོགས་སྒོར་ཁྲི་150བགོས་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་པ་རེད།

གཏམ་རྒྱུད་དེའི་སྐོར་2021ལོ་ནས་གླེང་དགོས།

2019ལོའི་ཟླ་9པར་བཙུགས་པའི་ཤར་གསིང་མ་སྡེ་ཁུལ་ཉ་ཀུའེ་ཡུས་གསོ་སྤེལ་ཆེད་ལས་མཉམ་ལས་ཁང་དོ་དམ་ཡག་པོ་མ་བྱུང་བའི་དབང་གིས་གསོ་སྤེལ་རྫིང་བུ་14ནས་9སྟོང་པར་གྱུར་པ་དང་བཟོ་པའི་ལས་ཀ་བྱེད་སེམས་ཆུང་དུ་ཕྱིན་ནས་ལོ་མཇུག་ཏུ་བསྡོམས་རྩིས་བརྒྱབ་དུས་གཏོང་ཡོང་མགོ་མི་ཐུག་པར་ལས་མིའི་གླ་ཆ་ཆད་པ་རེད།

ཐོན་ལས་དར་རྒྱས་གཏོང་བ་ནི་གྲོང་གསེབ་ཀྱི་གནད་དོན་མཐའ་དག་ཐག་གཅོད་བྱེད་པའི་སྔོན་འགྲོའི་ཆ་རྐྱེན་ཡིན་ཞིང་། 2021ལོར་ཤར་གསིང་མ་སྡེ་ཁུལ་དུ་བཅའ་སྡོད་རང་སྐྱོང་ལྗོངས་ཏང་ཨུད་གཞུང་དོན་ཐིང་གི་ལས་དོན་རུ་ཁག་དང་སྡེ་ཁུལ་གྱི“ཨུ་ལྷན་གཉིས”ཚན་ཁག་གིས་བརྟག་ཞིབ་གཏིང་ཟབ་བྱས་པ་བརྒྱུད“རྩ་འཛུགས་ཀྱིས་ལམ་སྣེ་ཁྲིད་པ་དང་། ཏང་དང་མང་ཚོགས་མཉམ་དུ་ཕྱུག་པོ་ཆགས་པའི”བསམ་ཕྱོགས་གཞིར་བཟུང་། “ཏང་ཀྲི་པུའུ་དང་། མཉམ་ལས་ཁང་། ཞིང་དུད་བཅས་ཟུང་དུ་འབྲེལ་བའི”རྣམ་པ་བརྒྱུད་སྡེ་ཁུལ་གྱི་ཉ་ཀུའེ་ཡུས་གསོ་སྤེལ་ཆེད་ལས་མཉམ་ལས་ཁང་ལ་སྒྱུར་བཅོས་བྱ་རྒྱུའི་ཐག་བཅད་པ་རེད།

ཉ་ཀུའེ་ཡུས་གསོ་སྤེལ་མཉམ་ལས་ཁང་གི“ཏང་དར་དམར། ཐོན་ལས་དར”ཞེས་པའི་བྱེད་སྒོའི་སློབ་གསོ་རྟེན་གཞི་བསྐྲུན་ནས་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་དེ་ཉ་རྫིང་གཙང་ཕྱགས་དང་གཟན་ཆག་སྐྱེལ་འདྲེན་སོགས་འོས་འགན་ངལ་རྩོལ་དང་མཉམ་འདྲེས་གཏིང་ཟབ་བྱས་ཏེ་རྒྱ་ཆེའི་ཏང་ཡོན་གྱིས་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱེད་པར་ཁྲིད་སྟོན་བྱས་ཡོད།

ཆེད་ལས་སྟོབས་ཤུགས་དང་མཉམ་ལས་བྱས་ཏེ་བོད་ལྗོངས་ཀའོ་ཧྥུང་སྐྱེ་ཁམས་ཚན་རྩལ་ཚད་ཡོད་འགན་འཁྲི་ཀུང་སིས་ཉ་གཅིག་གྱུར་རྒྱུད་སྤེལ་དང་། ཉ་ཕྲུག་གཅིག་གྱུར་མཁོ་འདོན། གཟན་ཆག་གཅིག་གྱུར་མཁོ་སྤྲོད། གསོ་སྤེལ་ཚད་གཞི་གཅིག་གྱུར། ཉོ་སྒྲུབ་གཅིག་གྱུར་བཅས་བྱས་ནས་གསོ་སྤེལ་བརྒྱུད་རིམ་ནང་ཉ་ཕྲུག་དཀོན་པ་དང་། གཟན་ཆག་དཀོན་པ། ཕྱིར་ཚོང་དཀའ་བ་སོགས་ཀྱི་སེམས་ཁྲལ་བསལ་ཡོད།

“སྣ་འདུས་ཐབས་བཟང”ཆ་ཚང་ཞིག་སྤྱད་པས་སྡེ་ཁུལ་གྱི་ཉ་ཀུའེ་ཡུས་གསོ་སྤེལ་གྱི་ཕན་འབྲས་རིམ་བཞིན་ཆེ་རུ་ཕྱིན་པ་རེད། 2022ལོར་ཉ་ཀུའེ་ཡུས་རྒྱ་མ་6833.2བཙོངས་པར་ཡོང་འབབ་སྒོར་ཁྲི་23ལྷག་ཙམ་བྱུང་ནས་ཁེ་སྤོགས་དང་པོ་བགོ་རྒྱུ་བྱུང་བ་རེད། 2023ལོར་ཉ་རྒྱ་མ་9958.6བཙོངས་པར་ཡོང་འབབ་སྒོར་ཁྲི་29.8ལྷག་ཙམ་བྱུང་བ་རེད།

མཉམ་ལས་ཁང་གི་ཆེད་བསྐོས་ལས་བྱེད་པ་བསྟན་འཛིན་ཆོས་སྒྲོན་གྱིས“ཉ་ཀུའེ་ཡུས་གསོ་སྤེལ་ཐོན་ལས་སྐྱོན་བྲལ་ངང་འཕེལ་རྒྱས་ཕྱིན་པ་དེས་མི་ཚང་མ་མཉམ་སྡེབ་དཔལ་འབྱོར་ནང་ཞུགས་པའི་ཡིད་ཆེས་ཆེ་རུ་ཕྱིན་ཡོད”ཅེས་བཤད། ཡང་ཁོང་གིས་གྲོ་མོའི་ཉ་ཀུའེ་ཡུས་སྐྱེ་འཚར་དུས་ཡུན་རིང་བ་དང་། ཉ་ཕྲུག་གཅིག་སྐྱེ་འཚར་ཡོང་བར་སྤྱིར་བཏང་ལོ་གསུམ་དང་ཕྱེད་ཀ་ཙམ་འགོར་གྱི་ཡོད། མིག་སྔར་ཉ་རྫིང་14ལ་ཉ་ཕྲུག་ཆེ་ཆུང་སྣ་ཚོགས་གསོ་ཚགས་བྱེད་ཀྱི་ཡོད། ལོ་ལྟར་ཉ་འཚོང་རྒྱུ་ཡོད་པ་དང་། ལོ་ལྟར་ཉ་ཕྲུག་གསོ་སྤེལ་བྱས་ནས་འཁོར་རྒྱུག་བཟང་པོ་ཡོང་བ་བྱས་པ་དེས་གྲོང་ཚོའི་མཉམ་སྡེབ་ལ་ལོ་ལྟར་ཡོང་འབབ་ཡོད་པ་དང་ཁོངས་མིར་ལོ་ལྟར་ཁེ་སྤོགས་བགོ་རྒྱུ་ཡོད་པའི་འགན་ལེན་བྱས་ཡོད་ཅེས་ངོ་སྤྲོད་བྱས་པ་རེད།

གྲོ་མོ་རྫོང་ལ་ནགས་ཚལ་ཐོན་ཁུངས་ཕུན་སུམ་ཚོགས་པོ་ཡོད་པ་དང་རྩ་ཆེའི་ཤིང་སྡོང་མང་པོ་ཡོད། ཤར་གསིང་མ་སྡེ་ཁུལ་ཁོ་ནར་ནགས་ཚལ་རྒྱ་ཁྱོན་མུའུ་ཁྲི་14.7ལྷག་ཙམ་ཡོད།

ཉེ་བའི་ལོ་ཤས་རིང་། ཤར་གསིང་མ་སྡེ་ཁུལ་གྱི་ལས་བྱེད་པ་དང་གྲོང་སྡོད་ལས་དོན་རུ་ཁག་གིས“སྔོ་ལྗང་རྒྱ་སྐྱེད་དང་། སྔོ་ལྗང་དར་རྒྱས། སྔོ་ལྗང་སྲུང་སྐྱོང”བཅས་ལ་དམིགས་ནས་ཚན་རིག་དང་མཐུན་པའི་སྒོ་ནས་རྒྱལ་ཁབ་ཀྱི་ས་ཆ་སྔོ་འགྱུར་ལ་སྐུལ་འདེད་བཏང་བ་དང་སྡོང་ཕྲུག་འཛུགས་པ་དང་དུས་བསྟུན་ཐབས་སྤྱོད་བཅས་བྱས་ནས་སྡོང་ཕྲུག་འཛུགས་རིམ་བཞིན་གསོན་ཐུབ་པའི་འགན་ལེན་བྱས་ཡོད། “ནགས་དཔོན་དང་ནགས་སྲུང་བ་ཟུང་དུ་འབྲེལ་བའི”རྣམ་པར་བརྟེན་ནས་དྲ་མིག་ཅན་གྱི་དངོས་སྡོད་བཅའ་སྲུང་དང་དམིགས་བཙུགས་ཇུས་བསྟར་བྱས་ཏེ་གང་བྱུང་དུ་ཤིང་གཅོད་པ་དང་ལྐོག་ཏུ་ཤིང་གཅོད་པའི་བྱེད་སྤྱོད་ལ་ཞིབ་བཤེར་ཐག་གཅོད་ནན་པོ་བྱས་པས་སྡེ་ཚན་མཉམ་འགུལ་དང་། འགན་འཁྲི་རྩད་གཅོད་ནུས་ལྡན། རིམ་པ་བཞིན་ལྟ་འདོམས་བཅས་ཀྱི་ནགས་ཚལ་དང་འབྲེལ་བ་ཡོད་པའི་ཁྲིམས་སྒྱུར་འཁོར་འབྲེལ་ཆགས་པར་སྐུལ་འདེད་བཏང་ཡོད།

སྐྱེ་ཁམས་བཟང་པོས“མདུན་ལམ་ཡག་པོ”གཏོད་ཐུབ། ཕུར་བུ་དབང་འདུས་ཀྱིས་2022ལོ་ནས་བཟུང་ཤར་གསིང་མ་སྡེ་ཁུལ་ལ་ཤིང་འཛུགས་ནགས་བཟོ་བྱས་ནས་ཡོང་འབབ་སྒོར་ཁྲི་120ལྷག་ཙམ་བྱུང་ཡོད། “ལྗང་མདོག་དངུལ་ཁང”ལས་བྱུང་བའི་ཕུན་སུམ་ཚོགས་པའི་ནགས་གསེབ་ཐོན་ཁུངས་ལས་འབབ་འཕར་ཐབས་ལམ་རྒྱ་ཆེར་ཕྱིན་ཏེ་ས་གནས་དེ་གའི་མང་ཚོགས་ལ་སྐྱེ་ཁམས་སྲུང་སྐྱོང་བྱེད་རིང“སྐྱེ་ཁམས་ཀྱི་ཕན་འབྲས”ཀྱང་ཐོན་ཡོད།