མི་དམངས་ཉིན་རེའི་ཚགས་པར་ལྷ་ས་ནས་གློག་འཕྲིན་འབྱོར་གསལ། “ལྕི་བ་ཉོ་མཁན་ཡོད་དམ”“ད་དུང་བསྲེགས་ཟས་ཟ་ཁང་འཛུགས་རྩིས་ཡོད་དམ”བོད་རང་སྐྱོང་ལྗོངས་ནག་ཆུ་གྲོང་ཁྱེར་དཔལ་མགོན་རྫོང་ཤེ་སྒེར་ཤང་ལུག་པོ་གྲོང་ཚོའི་ཏང་དང་མང་ཚོགས་ཞབས་ཞུ་ལྟེ་གནས་སུ་འབྲོག་པ་ཚོ་དགོད་སྒྲས་ཁེངས།

“དེ་ནི་གཙང་མ་གསར་པ་ཞིག་ཡིན་པས་ང་ཚོ་རང་ཉིད་ཀྱིས་བེད་སྤྱོད་བཏང་ན་ཁོར་ཡུག་སྦགས་བཙོག་བཟོ་མི་སྲིད་པ་མ་ཟད། ད་དུང་བཙོང་ཐུབ་ཀྱི་རེད” “ཉེ་འགྲམ་དུ་བསྲེགས་ཟས་ཟ་ཁང་མེད་པས། གྲོང་ཚོའི་ནང་བསྲེགས་ཟས་བཟོ་ཤེས་པའི་གཞོན་ནུ་ཞིག་ཡོད་པས་ཚང་མས་ལས་ཀ་མཉམ་དུ་བྱས་ན་ཡག་པོ་ཡོད”ཅེས་བོད་རང་སྐྱོང་ལྗོངས་ཏང་ཨུད་སྲིད་ཇུས་ཞིབ་འཇུག་ཁང་གི་གྲོང་སྡོད་ལས་དོན་རུ་ཁག་གི་རུ་དཔོན་ཀྲའོ་ཅ་ཆིང་གིས་ངང་རྒྱུད་རིང་པོས་འགྲེལ་བཤད་རྒྱག་བཞིན་ཡོད།

ལུག་པོ་གྲོང་ཚོར་ས་བབ་མཐོ་ཚད་སྨི་5000ཙམ་ཡོད། དུས་ཡུན་རིང་པོའི་ནང་གྲོང་ཚོ་དེའི་མཉམ་སྡེབ་དཔལ་འབྱོར་ནི་འབྲོག་ལས་གཙོ་བོར་བྱས་ནས་འབྲི་གཡག་འབོར་ཆེན་གསོ་སྤེལ་བྱས་ཡོད། དེ་གར་ལྕི་བ་མང་པོ་ཡོད་པས་འབྲོག་པ་མང་ཆེ་བས་ལྕི་བ་སྐམ་ནས་རྒྱུན་དུ་དྲོད་ལེན་པ་དང་ལྟོ་ཆས་བཟོ་བའི་འབུད་ཤིང་དུ་བྱེད་ཀྱི་ཡོད། འདི་ལོའི་ཟླ་དང་པོར་གྲོང་སྡོད་རུ་མི་རེས་མོས་བྱས་ཚུན། ལྗོངས་ཏང་ཨུད་སྲིད་ཇུས་ཞིབ་འཇུག་ཁང་གི་གྲོང་སྡོད་ལས་དོན་རུ་ཁག་གིས་ཡུལ་བབ་དང་བསྟུན་པ་དང་། རྒྱུ་ཆ་རང་ས་ནས་ལེན་པ། འབྲོག་ཁུལ་གྱི་ཁྱད་ཆོས་དང་ལེགས་ཆ་མངོན་པ་བཅས་བྱས་ནས་གྲོང་ཚོར་ལྕི་བ་སྐྱེ་དངོས་ནུས་རྒྱུའི་འབུད་ཤིང་ལས་སྣོན་བཟོ་གྲྭ་འཛུགས་རྒྱུར་མཛུབ་ཁྲིད་བྱས་པ་རེད།

ལུག་པོ་གྲོང་ཚོར་མི་འབོར་ཅུང་ཉུང་བ་དང་རྨང་གཞིའི་ཆ་རྐྱེན་ཞན་པས་གྲོང་སྡོད་ལས་དོན་རུ་ཁག་གིས་ཁྱིམ་མཚེས་བདེ་ཆེན་གྲོང་རྡལ་གྱི་དེ་སྔའི་རི་དྭགས་འགོག་སྲུང་ས་ཚིགས་ཀྱི་ཁང་པ་རྙིང་པར་དཔལ་མགོན་རྫོང་གི་གྲོང་ཚོ་རིམ་པའི་ས་གྲོལ་དཔལ་འབྱོར་རྟེན་གཞི་ཐོག་མ་དེ་འཛུགས་རྒྱུའི་བརྩོན་ལེན་ཧུར་ཐག་བྱས་པ་རེད། ཟླ་གསུམ་པར་བཟོ་ཁང་བསྐྲུན་ཟིན་ཡང་འཕྲུལ་ཆས་འབྱོར་མེད། དེའི་རིང་བཟོ་ཁང་བེད་མེད་དུ་མི་ལུས་པ་བྱ་ཆེད་གྲོང་ཚོ་ཨུ་ལྷན་དང་གྲོང་སྡོད་ལས་དོན་རུ་ཁག་གིས་བསྲེགས་ཟས་ཟ་ཁང་འཛུགས་རྒྱུའི་ཐག་བཅད་པ་རེད། “ང་ཚོར་རྒྱུ་གཙང་སྤུས་གཙང་གི་ཚགས་ཤ་ཡོད། ལྕི་བ་འབུད་ཤིང་ལ་བྱས་ནས་བསྲེགས་ཟས་བཟོ་ཆོག མང་ཚོགས་ལས་ཀ་ཡོད་པ་བྱེད་དགོས”ཞེས་གྲོང་ཚོའི་ཏང་ཀྲི་པུའི་ཧྲུའུ་ཅི་ཚེ་རིང་དགྲ་འདུལ་གྱི་དེ་ལྟར་བཤད།

ད་ཆ་གྲོང་ཚོའི་མི་20ལྷག་ཙམ་བསྲེགས་ཟས་ཟ་ཁང་གཉེར་སྐྱོང་ལ་ཞུགས་པ་དང་ཟ་ཁང་དུ་བསྲེགས་ཟས་ཟ་བར་ཡོང་མཁན་ཡང་ཇེ་མང་དུ་འགྲོ་བཞིན་ཡོད། “ལྕི་བ་བཙོངས་ནས་ཡོང་འབབ་གསོག་ཐུབ་པས་ཧ་ཅང་ཡག་པོ་འདུག”ཅེས་དེ་སྔ་ལྷ་སའི་བསྲེགས་ཟས་ཟ་ཁང་དུ་ལས་ཀ་བྱེད་མྱོང་བའི་འབྲོག་པ་དངོས་གྲུབ་རྡོ་རྗེས་བཤད།

ངོ་སྤྲོད་བྱས་པར་གཞིགས་ན། གོམ་སྟབས་རྗེས་མར་ལུག་པོ་གྲོང་ཚོས་ཐོན་ལས་འཁོར་འབྲེལ་རིང་དུ་བཏང་ནས་ལྕི་བའི་སྐྱེ་དངོས་ནུས་རྒྱུའི་རྡོག་རིལ་དང་ལྕི་བའི་ཐཱན་རིལ་སོགས་ཀྱི་ཐོན་རྫས་ཐོན་སྐྱེད་བྱ་རྒྱུ་དང་འབྲེལ། མཐའ་འཁོར་དུ་ཁྲོམ་ར་རྒྱ་སྐྱེད་ཧུར་ཐག་བཏང་ནས་ཐོན་ལས་འཕེལ་རྒྱས་ལ་བརྟེན་ནས་འབྲོག་པ་ཕྱུག་པོའི་ལམ་དུ་འཁྲིད་རྒྱུ་ཡིན་པ་རེད།

(《མི་དམངས་ཉིན་རེའི་ཚགས་པར་གྱི་ཕྱི་རྒྱལ་པར་ངོས》2024ལོའི་ཟླ་5ཚེས་27ཉིན་གྱི་པར་ངོས་05པ་ནས་བརྒྱུད་འགོད་བྱས)