ཉེ་ཆར། རང་སྐྱོང་ལྗོངས་ཀྱི་དེང་རབས་ཞིང་ལས་ཐོན་ལས་ལག་རྩལ་མ་ལག་སྟེ་འབྲི་གཡག་ཐོན་ལས་ལག་རྩལ་མ་ལག་གི་འགོ་འཛུགས་ཚོགས་འདུ་ལྷ་སར་འཚོགས་ཤིང་། འགོ་ཚུགས་ཚོགས་འདུར་གཙོ་གཉེར་ཕྱོགས་ཀྱིས་ལས་གནས་རིགས་གཅིག་མཁས་ཅན་དང་ཕྱོགས་བསྡུས་ཚོད་ལྟའི་ས་ཚིགས་ཀྱི་ཀྲེན་ཀྲང་ལ་གདན་ཞུའི་ཡི་གེ་སྤྲད་པ་དང་། རང་སྐྱོང་ལྗོངས་ཀྱི་འབྲི་གཡག་ཐོན་ལས་ལག་རྩལ་མ་ལག་གི་དབུ་བཞུགས་རིགས་གཅིག་མཁས་ཅན་གྱིས་ལས་གནས་རིགས་གཅིག་མཁས་ཅན་དང་ཕྱོགས་བསྡུས་ཚོད་ལྟའི་ས་ཚིགས་ཀྱི་ཀྲེན་ཀྲང་དང་2024ལོའི་ལོ་འཁོར་གྱི་ལས་འགན་ཡི་གེ་སོ་སོར་བཞག་པ་རེད།

ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་ཀྱི་འབྲི་གཡག་ཐོན་ལས་ལག་རྩལ་མ་ལག་གིས་རང་ལྗོངས་ཀྱི་རང་བྱུང་ཆ་རྐྱེན་ཞན་པ་དང་། འབྲི་གཡག་ཐོན་ལས་ཀྱི་རྒྱུད་བཟང་དཀོན་པ། གསོ་ཚགས་ལག་རྩལ་མ་ལག་འཐུས་སྒོ་ཚང་པོ་མེད་པ་སོགས་ཀྱི་གནད་དོན་ལ་དམིགས་ནས“ལག་རྩལ་གྱི་འགག་སྒྲོལ་དང་། འདུས་གྲུབ་གསར་གཏོད། མ་དཔེ་འཛུགས་གཏོད། དཔེ་སྟོན་ཁྱབ་གདལ”བཅས་ཀྱི་སྤྱིའི་བསམ་ཕྱོགས་གཞིར་བཟུང་། འབྲི་གཡག་རྒྱུད་བཟང་ལས་རིགས་ཚན་རྩལ་གསར་གཏོད་ལ་ཤུགས་སྣོན་རྒྱག་པ་དང་། འགག་རྩའི་ལྟེ་བའི་ལག་རྩལ་ཞིབ་བཟོ་བྱེད་པ། འབྲི་གཡག་ཐོན་ལས་ཀྱི་ད་ལྟའི་གནས་ཚུལ་ལ་བརྒྱུད་རིམ་ལྡན་པའི་ངང་བརྟག་ཞིབ་བྱེད་པ། གནས་ཐུབ་པ་དང་། སྒྲུབ་ཐུབ་པ། ཡག་པོ་སྒྲུབ་ཐུབ་པ་བཅས་ཀྱི་གསར་གཏོད་ཤེས་ལྡན་པ་ཁག་གཅིག་གསོ་སྐྱོང་བྱས་ནས་འབྲི་གཡག་ཐོན་ལས་སྤུས་འབྲས་ལེགས་གཉེར་ཡོང་བར་སྐུལ་འདེད་བཏང་ཡོད།

འབྲི་གཡག་ཐོན་ལས་ལག་རྩལ་མ་ལག་གི་རྟེན་གཞིའི་ཚན་པ་དང་ལག་རྩལ་ཞིབ་སྤེལ་ལྟེ་གནས་ཤིག་ཡིན་པའི་རང་སྐྱོང་ལྗོངས་ཞིང་ལས་ཚན་རིག་ཁང་གིས་དབུ་བཞུགས་རིགས་གཅིག་མཁས་ཅན་1དང་། ལས་གནས་རིགས་གཅིག་མཁས་ཅན་6 ཕྱོགས་བསྡུས་ཚོད་ལྟའི་ས་ཚིགས་ཀྱི་ཀྲེན་ཀྲང་4 ཚོགས་པའི་ཁོངས་མི་40བཅས་བདམས་ནས། འབྲི་གཡག་ཐོན་ལས་ཀྱི་བེའུ་མ་བཙས་གོང་དང་། བཙའ་རིང་། བཙས་རྗེས་བཅས་ཀྱི་ལྷུ་ཚིགས་ཁག་དང་། འབྲི་གཡག་ཆེད་ལས་ཁྱབ་ཁོངས་ཀྱི་འགག་རྩའི་ལག་རྩལ་ཞིབ་སྤེལ་དང་། ལག་རྩལ་དཔེ་སྟོན་ཁྱབ་གདལ་བེད་སྤྱོད། དེ་བཞིན་ཚན་རྩལ་བློ་འདྲིའི་ཞབས་ཞུ་བཅས་ཚུད་པའི་མ་ལག་རགས་ཙམ་བཙུགས་ཡོད།