ད་ཕན་ལོ་ཤས་རིང་རང་སྐྱོང་ལྗོངས་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་གིས་གྲོང་ཁྱེར་དང་གྲོང་གསེབ་ཀྱི་སྡོད་ཁང་འགན་ལེན་དང་། གྲོང་ཁྱེར་དང་གྲོང་གསེབ་ཀྱི་རྨང་གཞིའི་སྒྲིག་བཀོད་འཛུགས་སྐྲུན། གྲོང་ཁྱེར་དང་གྲོང་གསེབ་ཀྱི་སྡོད་མལ་ཁོར་ཡུག་ལེགས་གཏོང་བཅས་ལ་དམ་འཛིན་བྱ་རྒྱུ་མཐའ་འཁྱོངས་ཀྱིས་གཙོ་གནད་ཁྱབ་ཁོངས་ཀྱི་རྣམ་གྲངས་འཛུགས་སྐྲུན་ལ་ནུས་ཤུགས་ཡོད་རྒུས་དམ་འཛིན་ཡག་པོ་དང་། ཞན་ཆ་གང་མགྱོགས་སེལ་བ། གྲོང་ཁྱེར་གྱི་བྱེད་ནུས་འཐུས་སྒོ་ཚང་དུ་གཏོང་བ། གྲོང་ཁྱེར་གྱི་སྤུས་ཚད་མཐོ་རུ་གཏོང་བ་བཅས་བྱས་ཏེ། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་གྱི་བྱ་གཞག་ཕྱོགས་སྒྱུར་རིམ་སྤོར་དང་སྤུས་འབྲས་ལེགས་གཉེར་ལ་སྐུལ་འདེད་བཏང་བ་རེད།

རྨང་གཞིའི་སྒྲིག་བཀོད་འཐུས་སྒོ་ཚང་དུ་བཏང་སྟེ་སྡོད་མལ་ཁོར་ཡུག་ལེགས་སུ་བཏང་བ།

ལྷ་སའི་ཁྲོམ་གཞུང་དུ་འགྲོ་སྐབས་ཉིན་རེ་ལས་མ་འདས་པའི་ལྷ་སའི་འཕེལ་རྒྱས་ཀྱི་འགྱུར་ལྡོག་དུས་དང་རྣམ་པ་ཀུན་ཏུ་མྱོང་ཚོར་ཐུབ་ཅིང་། ལྷ་ས་གྲོང་ཁྱེར་ཁྲེང་ཀོན་ཆུས་པེ་ཅིང་ནུབ་ལམ་གྱི་མཐོ་བརྩོན་མེ་ཏོག་ལྡུམ་རའི་ཁུལ་ཆུང་དུ་སྐྱོད་སྐབས་འདྲེན་བྱེད་མདུན་དུ་ཡངས་ཤིང་གཙང་སྦྲ་དོད་པའི་ལམ་བུ་དང་ལམ་སྒྲོན་གསར་རྐྱང་དག་མངོན་གསལ་རབ་ཏུ་འདོད། ཁུལ་ཆུང་དུ་སྡོད་མཁན་ཚོས་དྲན་གསོ་བྱས་པར་གཞིགས་ན། སྒྱུར་བཀོད་མ་བྱས་གོང་ཁུལ་ཆུང་དེའི་ལམ་ངོས་ཕལ་ཆེར་འབར་འབུར་ཡིན་པ། ཆུ་སྙིགས་མདོང་ལམ་རྙིང་ཧྲུལ། ཆུ་འགྲོ་ཡག་པོ་མེད་ཁར། ཁུལ་ཆུང་དུ་གྲོང་སྲིད་ཀྱི་རང་འབབ་ཆུ་ཀ་ལ་ཁྲིད་མེད་སྟབས་གྲོང་མིས་ག་དུས་ཡིན་ཡང་ཆུ་གསོག་མཐོ་ལྕོག་གི་ཆུ་སྤྱོད་པ་ལ་སོགས་གནད་དོན་མང་དག་ལས་མང་ཚོགས་ཀྱི་འཚོ་བར་དཀའ་ངལ་ཆེན་པོ་འཕྲད།

རང་སྐྱོང་ལྗོངས་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་གི་ཏང་ཙུའི་ཁོངས་མི་དང་ཐིང་ཀྲང་གཞོན་པ་ལི་ཅིན་ཀྲུང་གིས་ངོ་སྤྲོད་བྱས་དོན། 2023ལོར་རང་ལྗོངས་ཀྱིས་འཛུགས་སྐྲུན་ཅུང་སྔ་བ་དང་། བདག་སྐྱོང་དང་ཉམས་གསོ། དོ་དམ་བཅས་ཡག་པོ་མ་བྱུང་བ། གྲོང་ཁྱེར་འཛུགས་སྐྲུན་གྱི་རྨང་གཞིའི་ལེ་ལག་ཚང་བའི་སྒྲིག་བཀོད་འཐུས་སྒོ་མི་ཚང་བ། སྡེ་ཁུལ་གྱི་ཞབས་ཞུའི་སྒྲིག་བཀོད་འཐུས་སྒོ་མི་ཚང་བ། གྲོང་མིའི་སྒྱུར་བཀོད་འདུན་པ་ཆེ་བ་བཅས་ཀྱི་གྲོང་ཁྱེར་དང་གྲོང་རྡལ་གྱི་སྡེ་ཁུལ་རྙིང་པ་ཆུང་གྲས་35ཡི་སྒྱུར་བཀོད་ལས་གྲྭ་ལག་བསྟར་བྱས་པ་དང་། ལམ་ངོས་བསྐྱར་སྐྲུན་དང་། ལམ་སྒྲོན་བརྗེ་བ། སྔོ་འགྱུར་རིམ་སྤོར་སོགས་སྡེ་ཁུལ་རྙིང་པ་ཆུང་གྲས་ཀྱི་ཁོར་ཡུག་འཕྲོད་བསྟེན་ཕྱོགས་ཡོངས་ནས་ལེགས་སུ་བཏང་ཐོག ལེ་ལག་ཚང་བའི་རྨང་གཞིའི་སྒྲིག་བཀོད་ཀྱི་ཞབས་ཞུའི་ནུས་པ་རིམ་སྤོར་བྱས་པར། ཁྱོན་དུད་ཚང་2865དང་མང་ཚོགས་8632ལ་ཕན་པ་ཐོབ་ཡོད།

སྐྱེ་ཁམས་སྤུས་ཚད་མཐོ་རུ་བཏང་ནས་ལྗང་མདོག་གྲོང་ཁྱེར་བསྐྲུན་པ།

ད་ཕན་ལོ་ཤས་རིང་རང་ལྗོངས་ཀྱིས་སྐྱེ་ཁམས་ཤེས་དཔལ་འཛུགས་སྐྱོང་ལ་སྐུལ་འདེད་ཧུར་ཐག་བཏང་ནས་གྲོང་ཁྱེར་དང་གྲོང་རྡལ་གྱི་བར་མཐོངས་བཀོད་པ་བཟང་སྒྲིག་དང་སྐྱེ་ཁམས་ཁོར་ཡུག་གི་སྤུས་ཚད་མཐོ་རུ་བཏང་བར། ཁྱོན་བཙོག་ཆུ་གཙང་གསིང་སྒྲིག་བཀོད་12དང་། གད་སྙིགས་གཙང་སེལ་སྒྲིག་བཀོད་རྣམ་གྲངས་8དང་དེ་བཞིན་ས་བབ་མཐོ་བའི་རྫོང་གྲོང་11གི་དྲོད་རླངས་མཁོ་འདོན་སོགས་མཚོན་རྟགས་རང་བཞིན་གྱི་ལས་གྲྭ་ཁག་གཅིག་ལག་ལེན་བསྟར་ཞིང་། ལྗོངས་ཡོངས་ཀྱི་གྲོང་ཁྱེར་དང་རྫོང་གྲོང་དང་དེ་བཞིན་དེ་ཡན་གྱི་གྲོང་ཁྱེར་དང་གྲོང་རྡལ་གྱི་བཙོག་ཆུ་གཙང་གསིང་ཐུབ་ཚད་96.57%དང་86.55%སོ་སོར་ཟིན་པ་དང་། འཚོ་བའི་གད་སྙིགས་གནོད་མེད་ཅན་གྱི་ཐག་གཅོད་ཐུབ་ཚད་99.81%དང་98.21%སོ་སོར་ཟིན་ཏེ། སྔ་སྣུར་དུ“ལོ་ལྔ་ཚན་བཅུ་བཞི་པའི”འཆར་འགོད་དམིགས་ཚད་ལེགས་སྒྲུབ་བྱུང་ཡོད། དུས་མཚུངས་2023ལོའི་ཟླ་5པར་ལྷ་ས་གྲོང་ཁྱེར་འདི་ཉིད་རྒྱལ་ཡོངས་ཀྱི་ཁག་གསུམ་པའི་མ་ལག་ཅན་གྱི་ས་ཁོངས་ཧྲིལ་པོ་འགྱིག་བལ་གྲོང་ཁྱེར་འཛུགས་སྐྲུན་གྱི་དཔེ་སྟོན་གྲོང་ཁྱེར་དུ་སྐུལ་འདེད་གཏོང་བའི་ནང་ཚུད་པ་རེད།

གནས་འཕྲོད་ལས་འཚམ་ལ་དམིགས་ཏེ་རྣམ་གྲངས་འཛུགས་སྐྲུན་ལ་སྐུལ་འདེད་བཏང་བ།

2023ལོར་རང་སྐྱོང་ལྗོངས་ཀྱི་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་གིས“གྲོང་ཁྱེར་གསར་བརྗེ་སྒྱུར་བཀོད་དང་རྫོང་གྲོང་གི་ཞན་ཆ་སེལ་བའི”རྩ་དོན་ལ་དམིགས་ནས་གྲོང་ཁྱེར་འཛུགས་སྐྲུན་གྱི་རྨང་གཞིའི་སྒྲིག་བཀོད་ཀྱི་གཙོ་གནད་རྣམ་གྲངས་ཁག་122ནུས་ཤུགས་ཡོད་རྒུས་ལག་བསྟར་བྱས་པར་མ་དངུལ་གཏོང་ཚད་སྒོར་དུང་ཕྱུར་53.6ཟིན་ཡོད་པ་རེད། 2023ལོའི་ཟླ་10པར་རང་ལྗོངས་ཀྱི་གྲོང་རྡལ་3དང་གྲོང་ཚོ་7རང་སྐྱོང་ལྗོངས་ཀྱི་ལོ་རྒྱུས་རིག་གནས་ཀྱི་གྲགས་ཅན་གྲོང་རྡལ་དང་གྲོང་ཚོར་བདམས་པ་རེད།

2024ལོར་རང་སྐྱོང་ལྗོངས་ཀྱི་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་གིས་མུ་མཐུད་གནས་འཕྲོད་ལམ་འཚམ་དང་། ཁམས་གསོ་ཡུལ་སྐོར་ལ་འཚམ་པར་དམིགས་ཏེ་གྲོང་ཁྱེར་འཛུགས་སྐྲུན་གྱི་གཞུང་ལམ་དང་། གྲོང་ཁྱེར་དང་གྲོང་རྡལ་གྱི་ཆུ་མཁོ་འདོན་དང་ཆུ་འབུད། གྲོང་ཁྱེར་དང་གྲོང་རྡལ་གྱི་དྲོད་རླངས་མཁོ་འདོན། སྤྱི་གླིང་གི་སྤང་ལྗོངས། ས་འོག་ཕྱོགས་བསྡུས་མདོང་ལམ་སོགས་གྲོང་ཁྱེར་འཛུགས་སྐྲུན་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་སྟེ། གྲོང་ཁྱེར་གྱི་གྲོང་མིའི་གནས་འཕྲོད་ཆུ་ཚད་མཐོ་རུ་གཏོང་རྒྱུ་རེད། སྡེ་ཁུལ་རྙིང་པ་ཆུང་གྲས་38སྒྱུར་བཀོད་བྱས་ཏེ་གྲོང་ཁྱེར་གྱི་ཆུ་འབུད་དང་ཞོད་འགོག་རྣམ་གྲངས་རེ་ཞུ་ཧུར་ཐག་བྱེད་པ་དང་གྲོང་ཁྱེར་གྱི་ཆུ་འཁྱིལ་སླ་བའི་ཁུལ་བརྒྱུད་རིམ་ལྡན་པའི་ངང་བཅོས་སྒྲིག་བྱེད་རྒྱུ་རེད། གཞན་ཡང་རྫོང་གྲོང་7གྱི་དམིགས་བསལ་ཆོག་འཐུས་གཉེར་སྐྱོང་གི་དྲོད་རླངས་མཁོ་འདོན་ཚོད་ལྟའི་ལས་དོན་གྱི་རྣམ་གྲངས་ཕྱོགས་ཡོངས་ནས་ལག་བསྟར་བྱེད་འགོ་འཛུགས་པ་དང་། ས་ཁུལ(གྲོང་ཁྱེར)ཁག་གིས་ནུས་རྒྱུ་གཙང་མའི་གཅིག་སྡུད་དྲོད་རླངས་མཁོ་འདོན་གྱི་དམིགས་བསལ་ཆོག་འཐུས་གཉེར་སྐྱོང་ཚོད་ལྟའི་ལས་དོན་གྱི་ལག་བསྟར་ཇུས་གཞི་གཞིར་བཟུང་ཚོད་ལྟའི་ལས་དོན་སྤེལ་ཡུལ་གྱི་རྣམ་གྲངས་འཛུགས་སྐྲུན་ལ་མགྱོགས་མྱུར་སྐུལ་འདེད་གཏོང་བར་མཛུབ་ཁྲིད་བྱེད་རྒྱུ་དང་། སྲིད་གཞུང་གི་མ་འཇོག་བརྒྱུད་ལྗོངས་ཡོངས་ཀྱི་ས་བབ་མཐོ་ཚད་སྨི་5000ཡན་གྱི་ཤང་དང་གྲོང་རྡལ་སྲིད་གཞུང་གནས་སའི་ལས་ཁུངས་དང་བྱ་གཞག་ཚན་པའི་གཞུང་དོན་ཁུལ་དང་། ལས་ཤག དེ་བཞིན་ཞིང་འབྲོག་ཁུལ་གྱི་གྲོང་མིའི་སྡོད་ཁང་གི་དྲོད་རླངས་མཁོ་འདོན་ཐེངས་གཅིག་ལ་ཐག་གཅོད་བྱེད་རྒྱུ་དང་། ས་བབ་མཐོ་བའི་ས་ཁུལ་གྱི་ལས་བྱེད་པ་དང་མང་ཚོགས་ཀྱི་འཚོ་བའི་ཁོར་ཡུག་ལེགས་སུ་གཏོང་བ། སྤྱི་པའི་ཞབས་འདེགས་ཞུ་ནུས་ཆེ་རུ་གཏོང་བ་བཅས་བྱེད་རྒྱུ་རེད།