ཉེ་བའི་ལོ་ཤས་རིང་། རྒྱལ་རྩེ་རྫོང་གིས་མཉམ་ལས་ཁང་ལ་རོགས་སྐྱོར་དང་ཚོང་འགུགས་མ་འདྲེན་སོགས་ཀྱི་བྱེད་ཐབས་བརྒྱུད། ནས་ཞིབ་བཟོའི་ཐོན་ལས་འཕེལ་རྒྱས་ཤུགས་ཆེན་བཏང་བས། ནས་ཀྱི་ཏན་ཞིམ་དང་ནས་ཀྱི་ཐུག་པ་སོགས་ཁྲོམ་རར་དགའ་པོ་བྱེད་པའི་ཐོན་རྫས་ཁག་གཅིག་རིམ་བཞིན་ཐོན་ཡོད་པ་རེད།

2020ལོའི་ཟླ་5པར། ནས་ཀྱི་ཐོན་རྫས་ཞིབ་འཇུག་གསར་སྤེལ་དང་། ཐོན་སྐྱེད། ཕྱིར་ཚོང་བཅས་གཞི་གཅིག་ཅན་གྱི་ཁེ་ལས་ཡིན་པའི་བོད་ལྗོངས་བསམ་གཏན་སྒང་ནས་ཆང་ལས་རིགས་ཚད་ཡོད་འགན་འཁྲི་ཀུང་སི(གཤམ་དུ“བསམ་གཏན་སྒང་ཆང་ལས”ཞེས་བསྡུ་རྒྱུ)དངོས་སུ་རྒྱལ་རྩེར་བཙུགས་པ་དང་འབྲེལ། རྒྱལ་རྩེའི་ནས་ཞིབ་བཟོ་ལས་རིགས་ཀྱི་སྣེ་འདྲེན་ཁེ་ལས་སུ་འཕེལ་རྒྱས་མྱུར་པོ་བྱུང་ཡོད།

“མིག་སྔར། ཀུང་སིར་ལོ་རེར་ནས་ཆང་ཏུན་ཁྲི་ཐོན་པའི་ཆེས་སྔོན་ཐོན་གྱི་འཁོར་ཁང་1དང་ལོ་རེར་ནས་ཀྱི་སྦི་རག་ཏུན་ཁྲི་5ཐོན་པའི་འཁོར་ཁང་2ཡོད། ཐོན་སྐྱེད་བྱེད་པའི‘བཞེས་གྲུང·རྒྱལ་རྩེའི་ནས་ཆང’རྟགས་ཅན་གྱི་ཐོན་རྫས་རབ་དང་རིམ་པ་བོད་ཡོངས་སུ་ཁྱབ་ཡོད་པ་མ་ཟད། ད་དུང་མཚོ་སྔོན་སོགས་སུའང་ཁྲོམ་རའི་གཞི་ཁྱོན་ངེས་ཅན་བཟུང་ཡོད”ཅེས་བསམ་གཏན་སྒང་ཆང་ལས་ཀུང་སིའི་ཏུང་ཧྲི་ཀྲང་བཀྲ་ཤིས་རབ་རྒྱས་ཀྱིས་བརྗོད་ཅིང་།

ཁོང་གིས་2021ལོ་ནས་2023ལོའི་བར་ཀུང་སིས་ནས་ཆང་སྒམ་ཁྲི་102བཙོངས་པར་ཚོང་གཉེར་ཡོང་འབབ་སྒོར་ཁྲི་5030ཟིན་ནས་ཁྲལ་བསྡུའི་ཡོང་འབབ་སྒོར་ཁྲི་208དང་ཁེ་སྤོགས་སྒོར་ཁྲི་403བྱུང་ཞེས་ངོ་སྤྲོད་བྱས།

ལས་ཞུགས་ལ་སྐུལ་ཁྲིད་མཐའ་འཁྱོངས་ཀྱིས་ས་གནས་དེ་གའི་དཔལ་འབྱོར་འཕེལ་རྒྱས་དང་དམངས་འཚོ་ལེགས་གཏོང་ལ་སྐུལ་འདེད་གཏོང་བ་ནི་ཁེ་ལས་ཀྱི་སྤྱི་ཚོགས་འགན་འཁྲི་ཞིག་རེད། བསྡོམས་རྩིས་བྱས་པར་གཞིགས་ན། 2021ལོ་ནས་ད་བར་ཀུང་སིས་ནས་རྒྱ་མ་གང་ལ་ཁྲོམ་རའི་རིན་གོང་ལས་སྒོར་0.4ཡིས་མཐོ་བའི་ཚད་གཞི་ལྟར་རིམ་རྩིས་བྱས་ན་ས་གནས་དེ་གའི་ནས་ཏུན་3010ལྷག་ཙམ་ཉོས་པ་དང་། ནས་འདེབས་དུད་ཚང་1000ལྷག་ཙམ་ལ་ཡོང་འབབ་འཕར་མ་སྒོར་ཁྲི་240བྱུང་བར་སྐུལ་ཁྲིད་བྱས་ཡོད།

ལྷུན་གྲུབ་ནི་རྒྱལ་རྩེ་རྫོང་ལ་འཛེགས་གྲོང་མི་ཨུ་ལྷན་གྱི་ས་སྐྱེས་རྡོ་སྐྱེས་ཀྱི་ཞིང་པ་ཞིག་རེད། 2021ལོར་བསམ་གཏན་སྒང་ཆང་ལས་ཀུང་སིས་ས་གནས་དེ་གའི་ནས་རིན་གོང་མཐོ་པོས་ཉོ་རྒྱུ་ཡིན་པ་ཤེས་རྗེས། ཁོང་གིས་ས་གནས་དེ་གའི་ཞིང་པ་དུད་ཚང་300ལྷག་ཙམ་དང་འབྲེལ་བ་བྱས་ཏེ་ཀུང་སིར་ནས་བཙོངས་པས། ཁྲོམ་རའི་ཁེ་འབབ་ལས་དེ་བས་མཐོ་བ་རག་པ་མ་ཟད། ནས་ཕྱིར་ཚོང་ལའང་ཚོང་ལམ་གསར་པ་ཞིག་བཏོད་ཡོད།

“དེ་སྔ་ནས་འདེབས་པར་ཚོང་ལམ་ནི་མི་རྣམས་ཀྱི་སེམས་ཁྲལ་ཆེ་ཤོས་བྱེད་ས་ཞིག་རེད། རིན་གོང་དམའ་བ་མ་ཟད། ཕྱིར་ཚོང་གི་ཐབས་ལམ་ཡང་ཧ་ཅང་ཉུང་། 2020ལོར་བསམ་གཏན་སྒང་ཆང་ལས་ཀུང་སི་བཙུགས་རྗེས་ཚང་མར་འགྱུར་ལྡོག་བྱུང་ནས་རིན་གོང་མཐོ་པོ་རག་པ་མ་ཟད། ཚོང་ལམ་ལ་ཡང་སེམས་ཁྲལ་བྱེད་དགོས་མེད”ཅེས་ལྷུན་གྲུབ་ཀྱིས་གསར་འགོད་པར་བཤད།

ས་གནས་དེ་གའི་ལས་ཞུགས་གནད་དོན་ཐག་གཅོད་ནུས་ལྡན་བྱ་ཆེད། བསམ་གཏན་སྒང་ཆང་ལས་ཀུང་སིས་ས་གནས་དེ་གའི་ཡུལ་མི་སྔོན་ལ་ལས་ཀར་བསྡུས་ཤིང་། ད་ཡོད་ལས་བཟོའི་ཁྲོད་ས་གནས་དེ་གའི་ལས་མིས་95%ཟིན་པ་ལས་སློབ་ཆེན་སློབ་མ་15དང་དེ་སྔའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་32ཡོད་པ་རེད།

ཉེ་བའི་ལོ་ཤས་རིང་། བསམ་གཏན་སྒང་ཆང་ལས་ཀུང་སིས་གཟབ་ནན་གྱི་ཆེད་ལས་རྣམ་འགྱུར་དང་ཐོན་རྫས་སྤུས་ཀ་དག་པོར་བརྟེན་ནས་ཁྲོམ་རའི་ཁས་ལེན་ཐོབ་ཡོད། དེ་དང་ཆབས་ཅིག་རང་ཉིད་ཀྱི་སྤྱི་ཚོགས་འགན་འཁྲི་ཐོག་མཐའ་བར་གསུམ་དུ་བློ་ལ་བརྟན་པོར་ངེས་ནས་གྲོང་གསེབ་དར་རྒྱས་གཏོང་བའི་འཐབ་ཇུས་ལ་སྐུལ་འདེད་གཏོང་ཆེད་ཁེ་ལས་ཀྱི་སྟོབས་ཤུགས་སྐྱེས་སུ་ཕུལ་བར་སྤྱི་ཚོགས་ལས་རིགས་ཁག་གི་གདེང་འཇོག་བཟང་པོ་རྒྱ་ཁྱབ་ཏུ་ཐོབ་པ་དང་། བོད་རང་སྐྱོང་ལྗོངས་ཀྱི་2022ལོ་དང་2023ལོའི་ཚན་རྩལ་ཁེ་ལས་འབྲིང་ཆུང་གི་མཚན་སྙན་དང“བོད་ཀྱི་ཞིང་འབྲོག་ཐོན་ལས་ཅན་གྱི་གཙོ་གནད་སྣེ་འདྲེན་ཁེ་ལས”ཀྱི་མཚན་སྙན་སྔ་རྗེས་སུ་ཐོབ་པ་མ་ཟད། 2023ལོར“རྒྱལ་ཁབ་རིམ་པའི་མཐོ་གསར་ལག་རྩལ་ཁེ་ལས”ཀྱི་ཁས་ལེན་ཐོབ་ནས“རྒྱལ་ཁབ་ཀྱི་གཞི་ཁྱོན་ཡན་གྱི་ཁེ་ལས”ཀྱི་ཚད་གཞི་ལོན་ཡོད་པ་རེད།