ཉེ་བའི་ལོ་ཤས་རིང་། ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་ཀྱིས་གྲོང་གསེབ་འཛུགས་སྐྲུན་བྱ་སྤྱོད་གཏིང་ཟབ་སྤེལ་ནས་གྲོང་གསེབ་ཀྱི་ཐོན་སྐྱེད་དང་འཚོ་བའི་ཆ་རྐྱེན་རྒྱུན་ཆད་མེད་པར་ལེགས་སུ་བཏང་ཞིང་། གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་མགྱོགས་མྱུར་བསྐྲུན་པ་རེད།

སྟོད་ལུང་བདེ་ཆེན་ཆུས་ཀྱི་མངོན་གསལ་དོད་པའི་དཔེ་སྟོན་འཛུགས་གཏོད་ཀྱི་ཁྲིད་སྟོན་འོག་བདེ་ཆེན་གྲོང་ཚོ་དང་ཆུ་བཟང་གྲོང་ཚོ་སོགས་མཛེས་སྡུག་ལྡན་པའི་གྲོང་གསེབ་ཀྱི་དཔེ་སྟོན་གྲོང་ཚོ་8འཛུགས་སྐྲུན་བྱས་པར་མིག་སྔའི་བར“ཁག་བརྒྱད་གྲོང་ཚོར་དོན་འཁྱོལ་དང་། གྲོང་ཚོར་ཡོད་པ་བཅུ། ཁག་བཅུ་དུད་ཚང་དུ་དོན་འཁྱོལ”བཅས་ཀྱི་དམིགས་ཚད་གཞི་རྩའི་ཆ་ནས་མངོན་འགྱུར་བྱུང་ནས་རྗེས་མཐུད་ཀྱི་གྲོང་གསེབ་འཛུགས་སྐྲུན་ལ་རྨང་གཞི་ཡག་པོ་བཏིང་བ་དང་། རྨང་གཞིའི་སྒྲིག་བཀོད་ལེགས་སུ་བཏང་སྟེ་གྲོང་གསེབ་ཀྱི་ལམ་དྲ་རྒྱུན་ཆད་མེད་པར་ལེགས་སུ་བཏང་བ་དང་གྲོང་ཚོ་དང་ཚོགས་ཆུང་ཚང་མར་ཤར་གཏོང་ཐུབ་པའི་ལམ་སྒྱུར་བཀོད་དང་རིམ་པ་སྤར་ཡོད། མིག་སྔར། གྲོང་ཁྱེར་འཆར་འགོད་ཁུལ་ཕུད། གྲོང་ཚོ་ཚང་མའི་སྡོད་མལ་ཁོར་ཡུག་བཅོས་སྒྲིག་བྱེད་པའི་རྣམ་གྲངས་བཀོད་སྒྲིག་བྱས་ཟིན་ནས་དུད་ཚང་དུ་ཆུ་ཀ་ལ་དང་ཆུ་འགྲོ་དང་ཨར་འདམ་ལམ་ཤར་གཏོང་སོགས་ཀྱི་ལས་དོན་ལ་སྐུལ་འདེད་ཤུགས་ཆེན་གཏོང་སྒང་ཡིན་པ། སྡོད་མལ་ཁོར་ཡུག་ལེགས་བཅོས་མངོན་གསལ་དོད་པོར་བཞག་སྟེ་2023ལོར་སྡོད་མལ་ཁོར་ཡུག་བཅོས་སྒྲིག་རྣམ་གྲངས་ཁག་8ལག་ལེན་བསྟར་ནས་མིག་སྔར་ལས་གྲྭའི་སྤྱིའི་འཕེལ་རིམ་གྱི་65%ཟིན་པ། “གསང་སྤྱོད་གསར་བརྗེར”རྒྱུན་མཐུད་སྐུལ་འདེད་བཏང་ནས་2023ལོར་དུད་ཚང་200ཡི་གསང་སྤྱོད་སྒྱུར་བཀོད་བྱེད་པའི་ལས་འགན་ནས་མིག་སྔར་དུད་ཚང་79ལེགས་སྒྲུབ་ཟིན་ནས་ལེགས་གྲུབ་བྱུང་ཚད་40%ཟིན་པ། མི་ཕྱུགས་ལོགས་དབྱེ་ལེགས་གྲུབ་ཐུབ་ཚད་དུད་ཚང་338ཟིན་ནས་ལེགས་གྲུབ་བྱུང་ཚད་43%ཟིན་ཡོད། དུས་མཚུངས། གྲོང་གསེབ་ཀྱི་འཚོ་བའི་གད་སྙིགས་བཅོས་སྒྲིག་དང་གྲོང་ཚོའི་རྣམ་པ་ལེགས་སུ་གཏོང་བ་སོགས་ཀྱི་གཙོ་གནད་དང་དཀའ་གནད་ལ་དམིགས་ཏེ་དུས་བཀག་ལྟར། གྲོང་ཚོ་གཙང་མའི་བྱ་སྤྱོད་སྤེལ་ནས་ལྗོངས་ཡོངས་ཀྱི་གྲོང་གསེབ་ཀྱི་སྡོད་མལ་ཁོར་ཡུག་རྒྱུན་མཐུད་ལེགས་སུ་འགྲོ་བར་སྐུལ་འདེད་བཏང་བས་ཞིང་པ་མང་ཚོགས་ཀྱི་སྐྱིད་སྣང་དང་ཐོབ་སྣང་མངོན་གསལ་དོད་པོས་ཆེ་རུ་ཕྱིན་ཡོད།