ཡུན་རིང་མ་སོང་གོང་། བོད་རང་སྐྱོང་ལྗོངས་ཞིང་ལས་གྲོང་གསེབ་ཐིང་གི་ལས་ཁུངས་ཀྱི་སྒོ་རའི་ནང་གློ་བུར་དུ་མེ་ཆེན་པོ་འབར་བ་དང་། མེ་གསོད་ཡོ་ཆས་ཁྱེར་བའི་ལས་བྱེད་ལས་བཟོས་གོ་རིམ་ལྡན་པའི་ངང་མེ་འཕྲལ་མར་བསད་པ་རེད།

དེ་ནི་བོད་རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས་གཉེར་བའི་དགུན་དུས་མེ་ཟོན་གྱི་ས་གནས་ས་ཐོག་གི་ནང་སྦྱོང་ཞིག་རེད། ཉེ་བའི་ལོ་ཤས་རིང་། ལྗོངས་ཡོངས་ཀྱི་ཞིང་ལས་དང་གྲོང་གསེབ་སྡེ་ཚན་གྱིས་དུས་བདེ་འཛུགས་སྐྱོང་ཐད་བསམ་ཕྱོགས་དོན་གཉེར་དང་། བྱ་ཐབས་གསར་པ་འདོན་པ། འགོག་ཟོན་ནུས་ལྡན། རྒྱུན་གཏན་དོ་དམ་བཅས་བྱས་པའི་ཁར། ལམ་ལུགས་འཛུགས་པ་དང་འཐུས་སྒོ་ཚང་དུ་གཏོང་བ་དང་། རྒྱུན་གཏན་གྱི་དོ་དམ་ལ་ཤུགས་སྣོན་རྒྱག་པ། འཕྲལ་སྡོམ་ནང་སྦྱོང་བྱེད་ཤུགས་ཆེ་རུ་གཏོང་བ་སོགས་ཀྱི་བྱ་ཐབས་སྣ་མང་བཏོན་ནས་དུས་བདེ་སྲུང་སྐྱོང་བྱས་ཡོད།

ཉེ་བའི་ལོ་ཤས་རིང་། ལྗོངས་ཡོངས་སུ་ཞིང་ལས་འཕྲུལ་ཆས་རྒྱ་ཁྱབ་ངང་སྤྱད་པ་དང་བསྟུན་ནས་བཀོལ་སྤྱོད་ཀྱི་ཆུ་ཚད་དང་ཞིང་འཕྲུལ་གྱི་སྤུས་ཚད་སོགས་རྒྱུ་རྐྱེན་སྣ་ཚོགས་དབང་གིས་ཐོན་སྐྱེད་བདེ་འཇགས་ཀྱི་མི་མངོན་པའི་རྐྱེན་ངན་ཡང་དེ་མཚུངས་ཀྱིས་མང་དུ་ཕྱིན་ཡོད། ལྗོངས་ཡོངས་ཀྱི་ཞིང་ལས་གྲོང་གསེབ་སྡེ་ཚན་གྱིས་གནད་དོན་ཐག་གཅོད་ཀྱི་ལམ་བུ་འཚོལ་ཞིབ་ཧུར་ཐག་བྱས་ཤིང་། མི་མེད་གནམ་གྲུས་ཞིང་འཕྲུལ་གྱི་ཚབ་བྱས་ནས་ཐོན་སྐྱེད་བདེ་འཇགས་ལ་འགན་ལེན་བྱེད་པར་སྐུལ་འདེད་ཤུགས་ཆེན་བཏང་བ་དང་། རྩི་ཤིང་སྲུང་སྐྱོང་གི་མི་མེད་གནམ་གྲུས་སྲོལ་རྒྱུན་འཕྲུལ་ཆས་ལས་སྒྲུབ་ཀྱི་ཚབ་བྱས་ནས་ཞིང་སྨན་གཏོར་བ་སོགས་ཀྱི་ལས་ཀར་སྤྱད་དེ་ཐོན་སྐྱེད་བདེ་འཇགས་ཀྱི་མངོན་མེད་རྐྱེན་ངན་ཐག་གཅོད་བྱས་པ་དང་ཆབས་ཅིག སྨན་རྫས་འཕྲོ་བརླག་མི་འགྲོ་བ་དང་སྲོལ་རྒྱུན་འཕྲུལ་ཆས་ལས་མཐའ་འཁོར་གྱི་ཁོར་ཡུག་ལ་ཤུགས་རྐྱེན་ཐེབས་ཤུགས་ཆུང་དུ་བཏང་བས་བཀོལ་སྤྱོད་གནད་དུ་འཁེལ་ཚད་དང་ལས་ཕྱོད་ཆེ་རུ་ཤུགས་ཆེན་ཕྱིན་ཡོད། 2022ལོ་ནས་བཟུང་། རིམ་རྩིས་བྱས་ན། ལྗོངས་ཡོངས་ཀྱིས་མི་མེད་གནམ་གྲུ་གཏོང་སྟངས་ཀྱི་རྩལ་ནུས་གསོ་སྦྱོང་ལ་མ་དངུལ་སྒོར་ཁྲི་56.5བཏང་བ་དང་ལག་ཁྱེར་ཡོད་པའི་ཞིང་འབྲོག་བཀོལ་སྤྱོད་པ་113གསོ་སྦྱོང་བྱས་ཡོད།

མི་ཕྱུགས་གཉིས་ཀར་ཕོག་སླ་བའི་ནད་རིགས་འགོག་བཅོས་དང་འབྲོག་ལས་ཐོན་རྫས་ཀྱི་བདེ་འཇགས་ནི་སྤྱི་ཚོགས་བདེ་འཇགས་དང་འབྲེལ་བའི་དོན་ཆེན་ཞིག་རེད། 2021ལོ་ནས་བཟུང་། ལྗོངས་ཡོངས་ཀྱི་ཞིང་ལས་དང་གྲོང་གསེབ་སྡེ་ཚན་གྱིས“བོད་ཀྱི་འབྲོག་ལས་སྐྱེལ་འདྲེན་ཤར་བགྲོད”མ་ལག་དང“ཚད་གཞི་གསུམ་གཅིག་ཏུ་སྦྲེལ་བའི་ཁུངས་འདེད་མ་ལག”ཕྱོགས་ཡོངས་ནས་ཁྱབ་གདལ་དང་བེད་སྤྱོད་བཏང་བ་དང་། “བོད་ཀྱི་འབྲོག་ལས་སྐྱེལ་འདྲེན་ཤར་བགྲོད”མ་ལག་གི་གསོ་ཚགས་ཀྱི་ཡིག་ཚགས་དོ་དམ་དང་། འགན་བཅོལ་སྦྲེལ་མཐུད། བོད་རྒྱ“སྐད་གཉིས”སོགས་ཀྱི་བྱེད་ནུས་ཟམ་མི་ཆད་པར་ལེགས་སུ་བཏང་བས། གསོ་སྤེལ་དང་། གཏོང་འདྲེན། དོན་འཁྱོལ། བཤས་གཏོང་སོགས་གཙོ་གནད་ལྷུ་ཚིགས་ཀྱི་འཁོར་འབྲེལ་ཧྲིལ་པོའི་ཁུངས་འདེད་ཆོག་པའི་ལྟ་འདོམས་མངོན་འགྱུར་བྱུང་ཞིང་། སྲོག་ཆགས་ཀྱི་རིམས་ནད་སྔོན་འགོག་དང་རིམས་ནད་ཞིབ་བཤེར་བྱས་ནས་མང་ཚོགས་ལ་ཞབས་འདེགས་ཞུ་བའི“མཐའ་མའི་འགག་གནད”བཤངས་ཐུབ་ཡོད། མིག་སྔའི་བར། ལྗོངས་ཡོངས་ཀྱི་རྫོང(ཆུས་དང་གྲོང་ཁྱེར)ཁག་ཚང་མར་སྲོག་ཆགས་དང་དེ་བཞིན་སྲོག་ཆགས་ཀྱི་ཐོན་རྫས་ཀྱི་ལག་ཁྱེར་Bཤོག་མེད་ཅན་བཏོན་ཡོད།

དུས་བདེ་འཛུགས་སྐྱོང་བྱེད་པའི་འགག་རྩ་ནི་ལམ་ལུགས་ལ་ཐུག་ཡོད། ཉེ་བའི་ལོ་ཤས་རིང་། ལྗོངས་ཡོངས་ཀྱི་ཞིང་ལས་གྲོང་གསེབ་སྡེ་ཚན་གྱིས་སྤྱི་ཚོགས་བརྟན་ལྷིང་དང་། ཐོན་སྐྱེད་བདེ་འཇགས། མེ་ཟོན་སོགས་ལ་དམིགས་ནས་ལས་ཀའི་ལམ་ལུགས་རབ་དང་རིམ་པ་བཟོས་པ་དང་། ཐིང་ཁོངས་གཏོགས་སུ་སྔ་རྗེས་སུ་ས་གནས་ས་ཐོག་ཏུ་ཞིབ་བཤེར་ཐེངས་མང་བྱས་ནས་བཅོས་སྒྲིག་གི་བསམ་འཆར་བཏོན་ཏེ་བདེ་འཇགས་ཀྱི་མི་མངོན་པའི་རྐྱེན་ངན་མེད་པར་བཟོས་ཡོད། དེ་དང་ཆབས་ཅིག་གཞི་རིམ་དུ་བརྟག་ཞིབ་དང་གྲོང་སྡོད་ལས་དོན་དང་ཟུང་འབྲེལ་གྱིས་ཞིང་འབྲོག་ཁུལ་དུ་དུས་བདེ་འཛུགས་སྐྱོང་གི་དྲིལ་བསྒྲགས་བྱེད་སྒོ་སྤེལ་ནས་ཞིང་འབྲོག་མང་ཚོགས་ཀྱི་བདེ་འཇགས་འདུ་ཤེས་ཟབ་ཏུ་བཏང་ཡོད། རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་གི་ཐིང་ཀྲང་གཞོན་པ་ཙུའོ་ཁྲུན་ཝུའེ་ཡིས་ངོ་སྤྲོད་བྱས་པར་གཞིགས་ན། 2023ལོར་ལྗོངས་ཡོངས་ཀྱི་གྲོང་ཁྱེར་དང་ས་ཁུལ་ཁག་གི་ཞིང་ལས་དང་གྲོང་གསེབ་སྡེ་ཚན་དང་ཐིང་ཁོངས་གཏོགས་ཀྱི་དུས་བདེ་འཛུགས་སྐྱོང་ལས་དོན་ལ་སྐུལ་འདེད་ཏན་ཏིག་བཏང་ནས། ལྗོངས་ཡོངས་ཀྱི་ཞིང་ལས་གྲོང་གསེབ་ལས་དོན་བདེ་འཇགས་ངང་འཁོར་རྒྱུག་ཐུབ་པར་རྨང་གཞི་བརྟན་པོ་འདིང་བ་དང་ལྗོངས་ཡོངས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཡོང་བར་ཞིང་ལས་གྲོང་གསེབ་ཁོངས་གཏོགས་ཀྱིས་སྟོབས་ཤུགས་སྐྱེས་སུ་ཕུལ་ཡོད།