འདི་ནི་ཁེ་སྤོགས་བགོ་འགྲེམས་མཛད་སྒོ་གཉེར་ཡུལ་ཡིན་པ།

ཉེ་དུས། ནག་ཆུ་གྲོང་ཁྱེར་སོག་རྫོང་རོང་པོ་གྲོང་རྡལ་བླ་མདའ་ཐང་གྲོང་ཚོའི་རང་བྱུང་རྩམ་པ་ལས་སྣོན་ཆེད་ལས་མཉམ་ལས་ཁང་གིས་ཁེ་སྤོགས་བགོ་འགྲེམས་མཛད་སྒོ་འཚོགས་ཤིང་། སོག་རྫོང་རོང་པོ་གྲོང་རྡལ་ཏང་ཨུད་ཀྱི་ཧྲུའུ་ཅི་དང་གྲོང་ཚོར་བཅའ་སྡོད་ལས་དོན་རུ་ཁག གྲོང་ཚོ་ཨུ་ལྷན་གཉིས། དེ་བཞིན་མང་ཚོགས་50ལྷག་ཙམ་མཛད་སྒོར་ཞུགས་ཡོད།

ཤེས་རྟོགས་བྱུང་བར་གཞིགས་ན། མཉམ་ལས་ཁང་དེ་2016ལོར་བཙུགས་པ་དང་། གཙོ་བོ་རྩམ་ཚོང་རྒྱག་གི་ཡོད་ཅིང་། དེ་ཡང་མཉམ་ལས་ཁང་བཙུགས་པ་ནས་བཟུང་། “ཡོད་པ་གསུམ”གྱི་གཉེར་སྐྱོང་བྱེད་ཐབས(མཉམ་ལས་ཁང་དང་། མང་ཚོགས། དགེ་མཚན་ལྡན་པའི་ཐོན་ཁུངས་བཅས་གསུམ་ཡོད་པ)སྤྱད་པས་གྲོང་ཚོ་དེ་གའི་མང་ཚོགས་200ལྷག་ཙམ་ལས་ཞུགས་ཐུབ་ནས་ཁོང་ཚོ་འབབ་འཕར་ཕྱུག་འགྱུར་ཡོང་བར་སྒུལ་ཤུགས་གསར་པ་སྦྱིན་ཡོད། ད་ལོ་ཁྱིམ་དུད་54ལ་རིན་གོང་སྒོར་3120རི་བའི་ཚོང་རྟགས་གྲགས་ཅན་གྱི་གློག་སྒུལ་སྦག་སྦག་རེ་སྤྲད་པ་རེད།

གསར་འགོད་པ་རོང་པོ་གྲོང་རྡལ་བླ་མདའ་ཐང་གྲོང་ཚོ་ཨུ་ལྷན་དུ་སླེབས་སྐབས། གློག་སྒུལ་སྦག་སྦག་གསར་པ་50གྲལ་འགྲིག་པོར་བཞག་ཡོད་པ་དང་ལུས་ལ་གཟབ་མཆོར་སྤྲད་པའི་མང་ཚོགས་ཀྱི་ངོ་གདོང་ནས་དགའ་བའི་མཛུམ་མདངས་འཕྱུར་བཞིན་མཆིས།

ཁེ་སྤོགས་བགོ་འགྲེམས་མཛད་སྒོར་མཉམ་ལས་ཁང་གི་འགན་འཁུར་བས་ད་ལོའི་མཉམ་ལས་ཁང་གི་གཉེར་སྐྱོང་གནས་ཚུལ་ངོ་སྤྲོད་བྱས་པ་དང་ཆབས་ཅིག ཞིབ་ཕྲའི་གསལ་ཐོའང་སྒྲོག་སྦྱངས་བྱས་པ་རེད།

ད་རེས་ཀྱི་ཁེ་སྤོགས་བགོ་འགྲེམས་མཛད་སྒོ་གཉེར་བ་བརྒྱུད་རྒྱ་ཆེའི་ཞིང་འབྲོག་མང་ཚོགས་ཀྱིས་རང་ཉིད་ཀྱི་ལག་གཉིས་ལ་བརྟེན་ནས་ཕྱུག་འགྱུར་ལམ་བུར་སྐྱོད་པའི་སེམས་ཤུགས་དང་ཡིད་ཆེས་སྔར་བས་འཕེལ་བ་དང་སྦྲགས་ཁོང་ཚོའི་སྐྱིད་སྣང་དང་། ཐོབ་སྣང་། བདེ་སྣང་བཅས་ཆེ་རུ་ཕྱིན་ནས། སླད་ཕྱིན་མཉམ་ལས་ཁང་དེ་བས་འཕེལ་རྒྱས་དང་རྒྱ་སྟོབས་ཆེ་རུ་འགྲོ་བར་རྨང་གཞི་བརྟན་པོ་བཏིང་བ་རེད།