ཞིང་འབྲོག་མང་ཚོགས་ཀྱི་འབབ་འཕར་ཡོང་བ་བྱ་རྒྱུ་ནི་གྲོང་གསེབ་ཀྱི་དཔལ་འབྱོར་འཕེལ་རྒྱས་དང་ཞིང་པའི་འཚོ་བའི་སྤུས་ཚད་མཐོ་རུ་གཏོང་བའི་ཐབས་ལམ་གལ་ཆེན་ཞིག་རེད། ལྷོ་ཁ་གྲོང་ཁྱེར་ཟངས་རི་རྫོང་ཁོངས་སུ་ཤང་3དང་། གྲོང་རྡལ་1 སྲིད་འཛིན་གྲོང་ཚོ་43(སྡེ་ཁུལ)གྲོང་མིའི་ཚོགས་ཆུང་83ཡོད་པ་དང་། ཞིབ་རྩིས་བརྒྱབ་པ་བརྒྱུད། 2023ལོའི་དུས་ཚིགས་དང་པོ་ནས་གསུམ་པའི་བར་ཟངས་རི་རྫོང་གི་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་16083(མཐར་རྒྱལ་ཁབ་བསྡོམས་རྩིས་ཅུས་ལྷོ་ཁ་བརྟག་དཔྱད་རུ་ཁག་གི་གྲངས་གཞི་ཚད་གཞིར་འཛིན་རྒྱུ)ཟིན་བཟོ་ཡོད་པ་དུས་མཚུངས་ལས་སྒོར་2900མང་དུ་ཕྱིན་པ་དང་འཕར་ཚད་22%ཟིན་ནས་ལོ་མཇུག་གི་དམིགས་ཚད་ལས་འགན་གྱི་67%ལེགས་གྲུབ་ཟིན་གྱི་ཡོད། ཟངས་རི་རྫོང་གི་ཞིང་པ་ཕྱུག་འགྱུར་འབབ་འཕར་གྱི་མགྱོགས་ལམ་དུ་ཇི་ལྟར་བསྐྱོད་པའི་ཐད་གསར་འགོད་པ་དང་མཉམ་དུ་ཅིག་གཟིགས་དང་།

བདེ་སྐྱིད་འཚོ་བ་བསྐྲུན་པ།

རྒུན་འབྲུམ་ཐོན་ལས་གཉེར་བས་མི་སེར་ཐག་ཉེ་སར་ལས་ཞུགས་ཐུབ་པ།

ཟངས་རི་རྫོང་གི་ས་བབ་ཧ་ཅང་མཐོ་བའི་རྒུན་འབྲུམ་འདེབས་འཛུགས་རྟེན་གཞིར་སྐྱོད་སྐབས། གྲལ་སྟར་འགྲིག་པའི་རྒུན་འབྲུམ་གྱི་སྒྲོམ་སྟེགས་སུ་ལོ་འདབ་རྒྱས་པའི་རྒུན་འབྲུམ་གྱི་སྡོང་ཕྲན་སྐྱེ་འཚར་བཟང་བ་དང་། དེར་རྡོག་བུ་ཆེ་ལ་ཞིམ་མདོག་ཁ་བའི་རྒུན་འབྲུམ་བཏགས་ནས་ཤིང་འབྲས་ཀྱི་དྲི་ཞིམ་ལྡུམ་རའི་གང་སར་འཐུལ་ཞིང་། ཞིང་པ་ཁ་ཤས་ཀྱིས་རྒུན་འབྲུམ་འཐུ་བཞིན་ཡོད་པ་དང་ཁོ་ཚོའི་ངོ་གདོང་ནས་ལོ་ལེགས་ཀྱི་དགའ་སྤྲོའི་འཛུམ་མདངས་འཕྱུར་བཞིན་མཆིས།

མིག་སྔར་ཟངས་རི་རྫོང་གི་ས་བབ་ཧ་ཅང་མཐོ་བའི་རྒུན་འབྲུམ་འདེབས་འཛུགས་རྟེན་གཞི་དེར་ཁྱོན་འདེབས་ཁྱོན་མུའུ་8500ཟིན་པ་དང་། དེ་དག་གཙོ་བོ་རོང་ཤང་རྩྭ་པ་གྲོང་ཚོ་དང་། ཟངས་རི་གྲོང་རྡལ་མཐར་མ་གྲོང་ཚོ། འབོད་ཐོས་ཤང་གཙང་ཁ་གྲོང་ཚོ་བཅས་ཤང་དང་གྲོང་རྡལ་3གྱི་སྲིད་འཛིན་གྲོང་ཚོ(སྡེ་ཁུལ)10ལ་ཁྱབ་ཡོད། “མུའུ་8500ལ་རྒུན་འབྲུམ་བཏགས་རྗེས་མུའུ་2000གི་བཟའ་བྱའི་རྒུན་འབྲུམ་སྡོང་ཕྲན་སྤུས་ལེགས་ནས་སྔོན་དཔག་བྱས་ན་རྒུན་འབྲུམ་སོས་པ་ཏུན་800ཐོན་པ་དང་ཐོན་རྫས་རིན་ཐང་སྒོར་དུང་ཕྱུར་0.48ཟིན་གྱི་ཡོད། མུའུ་6500ཡི་ཆང་སྙོལ་བའི་རྒུན་འབྲུམ་སྤུས་ལེགས་ནས་སྔོན་དཔག་བྱས་ན་རྒུན་འབྲུམ་ཏུན་2800དང་། རྒུན་ཆང་ཁྲི་140 ཐོན་རྫས་རིན་ཐང་སྒོར་དུང་ཕྱུར་2.24བཅས་ཟིན་ནས་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་2.72ཟིན་གྱི་ཡོད” ཅེས་རྒུན་འབྲུམ་འདེབས་འཛུགས་རྟེན་གཞི་དེའི་འབྲེལ་ཡོད་འགན་འཁུར་བ་ཝང་ཧྲུའུ་ཡིས་བཤད།

དབྱངས་ཅན་མཚོ་མོ་ནི་མཐར་མ་གྲོང་ཚོའི་གྲོང་མི་ཡིན་པ་དང་འདི་ལོ་ལོ་41ལ་སླེབས་ཀྱི་ཡོད། 2020ལོར་ཁོང་གིས་ཟངས་རི་རྫོང་གི་གྲོང་གསེབ་དར་རྒྱས་ཀྱི་རྒུན་ཆང་ཞིང་ཞོར་ཐོན་རྫས་འཚོང་ཡུལ་གྱི་ཚོང་པ་བྱས་པ་དང་། ལས་ཀའི་ཁྲོད་དབྱངས་ཅན་མཚོ་མོས་རྒུན་ཆང་གི་ཤེས་བྱ་སློབ་སྦྱོང་བྱས་ནས་བདེ་སྐྱིད་ལྡན་པའི་འཚོ་བ་སྐྱེལ་བར་ཡིད་ཆེས་ཀྱིས་ཁེངས་ཤིང་། “ཡུལ་གཞན་གྱི་ཡུལ་སྐོར་བས་ང་ཚོས་བསྙལ་བའི་རྒུན་ཆང་ཉོ་བར་ཡོང་བ་མཐོང་སྐབས་སེམས་ནང་ཧ་ཅང་དགའ་པོ་འདུག”ཅེས་དབྱངས་ཅན་མཚོ་མོས་བཤད།

2017ལོ་ནས་2022ལོའི་བར་ཟངས་རི་རྫོང་གི་ས་བབ་ཧ་ཅང་མཐོ་བའི་རྒུན་འབྲུམ་འདེབས་འཛུགས་རྟེན་གཞིར་རིམ་རྩིས་བྱས་ན་ལས་མི་མི་ཐེངས་ཁྲི་9ལྷག་ཙམ་ཟིན་པ་དང་། ས་གནས་དེ་གའི་མང་ཚོགས་ལ་གླ་ཆ་སྒོར་ཁྲི་1080སྤྲད་པ། ལོ་རེར་མི་རེར་ཆ་སྙོམས་འབབ་འཕར་སྒོར་7000ཟིན་ནས་ཉེ་འཁོར་གྱི་གྲོང་ཚོ(སྡེ་ཁུལ)10ཡི་མང་ཚོགས་རང་ས་རང་ཡུལ་ནས་བྲལ་མི་དགོས་པར་ཐག་ཉེ་སར་ལས་ཞུགས་ཐུབ་པ་དང་འབབ་འཕར་བྱུང་ཡོད།

ཉ་གྲོང་ཆུང་ཆུང་ནས་འབྱོར་འབྲིང་གྲོང་ཚོར་གྱུར་པ།

དགས་པོ་གྲོང་ཚོའི་འཕོ་འགྱུར་གྱི་ལམ་བུ།

ཧྭ་གློག་བོད་ལྗོངས་ནུས་རྒྱུ་ཚད་ཡོད་ཀུང་སིའི་དགས་པོ་ཆུ་གློག་ཡན་ལག་ཀུང་སིས“གློག་ཁང་ཞིག་སྐྲུན་པ་དང་། ཡུལ་ཕྱོགས་གཅིག་གི་དཔལ་འབྱོར་ལ་སྐུལ་ཁྲིད་དང་། ཡུལ་ཕྱོགས་དེའི་མི་སེར་ལ་བདེ་སྐྱིད་སྐྲུན་པ”བཅས་ཀྱི་འདུ་ཤེས་མཐའ་འཁྱོངས་ཀྱིས་རྣམ་གྲངས་འཛུགས་སྐྲུན་གྱི་ཁྱབ་འགྱེད་སྐུལ་ཁྲིད་ནུས་པ་གང་ལེགས་བཏོན་ཏེ། ས་གནས་དེ་གའི་མང་ཚོགས་དང་ཨར་ལས་སྒྲིག་ཆས་རྣམ་གྲངས་འཛུགས་སྐྲུན་ལ་ཞུགས་སུ་བཅུག་ནས་རྣམ་གྲངས་འཛུགས་སྐྲུན་ཁྲོད་མང་ཚོགས་ལ་འབབ་འཕར་ཡོང་བར་བྱས་ཡོད། “དགས་པོ་ཆུ་ཤུགས་གློག་ཁང་སྐྲུན་འགོ་ཚུགས་ཚུན་རིམ་རྩིས་བྱས་ན་མང་ཚོགས་མི་ཐེངས་ཁྲི་1.2ལ་ལས་ཀ་སྤྲད་ནས་འབབ་འཕར་སྒོར་དུང་ཕྱུར་1.2བྱུང་ཡོད”ཅེས་ཀུང་སིའི་ཏང་ཨུད་ཀྱི་ཧྲུའུ་ཅི་གཞོན་པ་སྤྱི་ཁྱབ་ཅིང་ལི་ཐེན་ཏེ་ཀྲིས་ངོ་སྤྲོད་བྱས།

ཀུང་སིས་ལྷོ་ཁ་གྲོང་ཁྱེར་གྱི་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་དམིགས་ཏེ་དམའ་རིམ་དང་མཐོ་རིམ་སློབ་འབྲིང་གི་སློབ་ཐོན་སློབ་མ་14བསྡུས་ནས“གཏན་འཁེལ་གསུམ”གྱི་གསོ་སྐྱོང་བྱས་པ་དང་། སློབ་གྲྭ་ཐོན་རྗེས་དངོས་གཞིའི་ལས་བཟོའི་མིང་ཐོག་ནས་ཀུང་སིར་བཅུག་སྟེ“སློབ་གསོའི་དབུལ་སྐྱོར་དང་། ལས་ཞུགས་བཀོད་སྒྲིག ཁྱིམ་ཚང་དབུལ་སྒྲོལ”བཅས་གཞི་གཅིག་ཅན་གྱི་ཕུགས་ཕན་དབུལ་སྐྱོར་བྱེད་སྟངས་ཤིག་ཆགས་པ་རེད། གཞན་ཡང་ཀུང་སིས་མ་དངུལ་སྒོར་ཁྲི་4875བཏང་ནས་དགས་པོ་གྲོང་ཚོར་གནད་སྨིན་དབུལ་སྐྱོར་གྱི་ལས་ཞུགས་ཐོག་ཁང་ཞིག་བསྐྲུན་པ་དེའི་ཁང་མིག་30གནས་སྤོས་ཁྱིམ་ཚང་30ལ་གཉེར་སྐྱོང་བྱ་རྒྱུར་རྩིས་སྤྲད་པ་ནས་ལོ་ལྟར་འབབ་འཕར་སྒོར་ཁྲི་60ཙམ་ཡོང་གི་ཡོད་པས“གནས་སྤོ་དང་། ལས་ཞུགས། ཕྱུག་འགྱུར”བཅས་ཀྱི་དབུལ་སྒྲོལ་བརྟན་པོ་ཡོད་པའི་རྣམ་པ་ཞིག་ཆགས་ཡོད།

དགས་པོ་གྲོང་ཚོ་ནི་ཡར་ཀླུང་གཙང་པོའི་འགྲམ་གྱི་ཉ་གྲོང་ཆུང་ཆུང་ཞིག་རེད། 2017ལོར་དགས་པོ་གྲོང་ཚོའི་གྲོང་ཚོ་ཨུ་ལྷན་གྱིས་དུད་ཚང་72ཀྱི་གྲོང་མི་བསྡུས་ནས་དགས་པོ་སྐྱེལ་འདྲེན་རུ་ཁག་བཙུགས་ནས་དགས་པོ་ཆུ་ཤུགས་གློག་ཁང་གི་སྐྱེལ་འདྲེན་མངགས་ཐོ་གཙོ་བོར་བླངས་ཏེ་དགས་པོ་གྲོང་ཚོའི་དཔལ་འབྱོར་ལ་གསོན་ཤུགས་གསར་པ་བསྣན་ཡོད། 2022ལོར་སྐྱེལ་འདྲེན་རུ་ཁག་ལ་ཡོང་འབབ་སྒོར་ཁྲི་1200ལྷག་ཙམ་བྱུང་ཡོད།

ཆུ་ཚན། དམངས་སྲོལ་གནས་ཚང་། ཇ་ཁང་།

ཞོལ་པ་གྲོང་ཚོའི་གྲོང་མིའི་འཚོ་བ་ལེགས་སུ་ཕྱིན་པ།

ཟངས་རི་རྫོང་གྲོང་ནས་བྱང་ཤར་ཕྱོགས་སུ་སྤྱི་ལེ་45ཙམ་བསྐྱོད་ཚེ་འོ་དེ་གུང་རྒྱལ་འདབས་ཀྱི་ཞོལ་པ་གྲོང་ཚོར་སླེབས་ཤིང་། ཡུལ་དེར་ཆུ་མིག་བདུན་ལས་གྲུབ་པའི་ཆུ་ཚན་ཞིག་ཡོད་པ་དེའི་མིང་ལ་འོལ་ཁ་ཆུ་ཚན་ཞེས་བརྗོད་ཅིང་། ལྷོ་ཁ་གྲོང་ཁྱེར་གྱི་སྐད་གྲགས་ཆེ་བའི་ཆུ་ཚན་ཞིག་རེད། ཞོལ་པ་གྲོང་ཚོས་ཐོན་ལས་དར་རྒྱས་གཏོང་རྒྱུ་དམིགས་ཚད་དུ་བཟུང་ནས་ཁྱད་ལྡན་ཆུ་ཚན་ཡུལ་སྐོར་གྱི་གྲོང་རྡལ་ཆུང་ངུ་བཏོད་པས་ཆུ་ཚན་དེ་དག“ཕྱུག་འགྱུར་གྱི་ཆུ་མིག”ལྟ་བུར་གྱུར་ཡོད།

ཞོལ་པ་གྲོང་ཚོའི་གྲོང་ལྷན་གྱི་ཀྲུའུ་རེན་བཀྲ་ཤིས་དོན་གྲུབ་ཀྱིས། འདི་ལོའི་ཟླ་མཆོད་དུས་ཆེན་དང་རྒྱལ་སྟོན་དུས་ཆེན་རིང་ལྗོངས་ཕྱི་ནང་ནས་ཡོང་མཁན་ཡུལ་སྐོར་བ་མི་ཐེངས་ཁྲི་ཡན་ལ་སྣེ་ལེན་ཞུས་པ་མ་ཟད། ཐ་ན“ཉལ་ཁྲི་རག་དཀའ་བའི”སྣང་ཚུལ་ཐོན་ཡོད་ཅེས་བཤད།

ཏང་ཀྲི་པུའི་སྣེ་ཁྲིད་འོག་ཞོལ་པ་གྲོང་ཚོས་འཕགས་མོ་ཆུ་ཚན་མགྲོན་ཁང་དང་དམངས་སེམས་མགྲོན་ཁང་བསྐྲུན་པ་དང་། སྨན་ཆུ་ཁ་དང་བྲོ་ལ་ཁ་སོགས་ཆུ་ཚན་རྒྱས་སྐྲུན་བྱས་ཏེ་ཡུལ་སྐོར་བར་ཞབས་འདེགས་ཞུ་བའི་ནུས་པ་སྔར་བས་ཆེ་རུ་བཏང་ནས་མཉམ་སྡེབ་དཔལ་འབྱོར་འཕེལ་རྒྱས་དང་མང་ཚོགས་ཀྱི་འབབ་འཕར་ཕྱུག་འགྱུར་ལ“སྒུལ་ཤུགས་གསར་པ”བསྣན་ཡོད། དེ་དང་ཆབས་ཅིག་ཞོལ་པ་གྲོང་ཚོའི་ཁོར་ཡུག་རྒྱུན་ཆད་མེད་པར་རིམ་སྤོར་དང་ལེགས་སུ་བཏང་ནས་ཆུ་གློག་ལམ་འཕྲིན་དྲ་སོགས་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་བརྒྱབ་ཡོད། དེས་མ་ཚད་སྤུས་ལེགས་ཁྱིམ་ཚང་མགྲོན་ཁང་15བསྐྲུན་ཁར་ཆུ་ཚན་གྱི་ཡུལ་སྐོར་སྣེ་ལེན་ཞབས་ཞུའི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་ཡུལ་སྐོར་བའི་བློ་ཡིད་ཚིམ་ཚད་མཐོ་རུ་དང་གྲོང་ཚོ་ཡོངས་ཀྱི་ཆུ་ཚན་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད།

“ཞོལ་པ་གྲོང་ཚོའི་མཉམ་སྡེབ་ཡོང་འབབ་2020ལོའི་སྒོར་ཁྲི་123ནས་2022ལོའི་སྒོར་ཁྲི་389བར་འཕར་བ་དང་མང་ཚོགས་ཀྱི་བགོ་འགྲེམས་2020ལོར་དུད་ཚང་རེར་སྒོར་ཁྲི་1ནས་2022ལོའི་སྒོར་ཁྲི་3.5བར་འཕར་ཡོད”ཞོལ་པ་གྲོང་ཚོའི་ཧྲུའུ་ཅི་དང་པོ་ལི་ཞང་གིས། མིག་སྔར་ཕྱོགས་ཡོངས་ནས་གྲོང་གསེབ་དར་རྒྱས་གཏོང་བ་དང་བསྟུན་ནས་ཞོལ་པ་གྲོང་ཚོའི་རྨང་གཞིའི་སྒྲིག་བཀོད་སྔར་བས་འཐུས་སྒོ་ཚང་དུ་ཕྱིན་པ་མ་ཟད་གནས་འཕྲོད་ལས་འཚམ་བྱུང་ནས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་སྔར་བས་ཆེ་རུ་ཕྱིན་ཡོད། གྲོང་ཚོ་ཡོངས་ཀྱི་དུད་ཚང་98ཀྱི་མི་358ལ་ཡུལ་སྐོར་ལས་ཡོང་འབབ་བྱུང་ནས་འབྱོར་འབྲིང་འཚོ་བ་སྐྱེལ་རྒྱུ་བྱུང་ཡོད་ཅེས་བཤད་པ་རེད།

ཞིང་པའི་འབབ་འཕར་ལ་སྐུལ་འདེད་གཏོང་ཆེད། ཉེ་བའི་ལོ་ཤས་རིང་། ཟངས་རི་རྫོང་གི་འབྲེལ་ཡོད་སྡེ་ཚན་གྱིས་སྲིད་ཇུས་དང་བྱེད་ཐབས་རབ་དང་རིམ་པ་སྤྱད་དེ་ཞིང་ལས་དང་ཐོན་ལས་ཀྱི་གྲུབ་ཆ་ལེགས་སྒྲིག་བྱེད་ཤུགས་ཆེ་རུ་བཏང་ནས་ཞིང་ལས་ཕྱོགས་སྒྱུར་རིམ་སྤོར་ལ་སྐུལ་འདེད་བཏང་ཡོད། ཞིང་ལས་ཐོན་སྐྱེད་ཀྱི་ཕན་འབྲས་ཆེ་རུ་དང་སྤུས་ཚད་མཐོ་རུ་བཏང་བས་ཟངས་རི་རྫོང་གི་མི་སེར་གྱི་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་ཕྱིན་ཡོད།

གསར་འགོད་པའི་ཟིན་བྲིས།

ཁྱད་ལྡན་ཐོན་ལས་འཕེལ་རྒྱས་བཏང་བས། འབབ་འཕར་ཕྱུག་འགྱུར་གྱི“ཐབས་ལམ་རྙེད་པ”

ལྷོ་ཁ་གྲོང་ཁྱེར་ཟངས་རི་རྫོང་གི་ས་བབ་མཐོ་ཚད་སྨི་3600ཙམ་ཡོད་པའི་ཡར་ཀླུང་གཙང་པོའི་ངོགས་སུ་གྲམ་ཐང་དང་། ཐང་རྒོད། ས་རྒོད་བཅས་སྒྱུར་བཀོད་བྱས་ཏེ་བཟོས་པའི་རྒུན་འབྲུམ་འདེབས་འཛུགས་དང་། སྙོལ་བཟོ། འགྲེམས་ཚོང་། ལྟ་སྐོར་བཅས་གཞི་གཅིག་ཅན་གྱི་རྒྱ་ཁྱོན་མུའུ་8500ཟིན་པའི་རྒུན་འབྲུམ་རྟེན་གཞི་ཞིག་ཡོད། རྟེན་གཞིས་ས་གནས་དེ་གའི་ཐོན་ལས་འཁོར་འབྲེལ་རྒྱ་ཆེར་བཏང་བ་མ་ཟད། མང་ཚོགས་ཚོ་ཐག་ཉེ་སར་ལས་ཞུགས་ཐུབ་པར་སྐུལ་ཁྲིད་ཀྱང་བྱས་ཡོད།

ཉེ་བའི་ལོ་ཤས་རིང་། ཟངས་རི་རྫོང་གིས་རྩ་བ་བརྟན་གཏོང་དང་གནད་སྨིན་ཇུས་བསྟར་གྱིས་ལེགས་ལྡན་ཁྱད་ལྡན་ཐོན་ལས་ཁག་གཅིག་གྲོང་གསེབ་ཏུ་འཕེལ་རྒྱས་འགྲོ་རྒྱུར་སྐུལ་འདེད་བཏང་ནས་ཞིང་པར་འབབ་འཕར་ཡོང་བར་བྱས་པ་དང་། གྲོང་གསེབ་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ནས་གྲོང་གསེབ་དར་རྒྱས་ལ་ནང་སྐྱེས་སྒུལ་ཤུགས་བསྣན་ཡོད། རྒུན་འབྲུམ་སྨིན་པ་དང་། ཆུ་ཚན་སྐད་གྲགས་ཆོད་པ། འཚོ་བ་ཇེ་ལེགས་སུ་ཕྱིན་པ་སོགས་ཟངས་རི་རྫོང་གི་ཞིང་པ་རྣམས་འབབ་འཕར་ཕྱུག་འགྱུར་གྱི་མགྱོགས་ལམ་ལ་བསྐྱོད་ཡོད།

གྲོང་གསེབ་དར་རྒྱས་གཏོང་དགོས་ན་ངེས་པར་དུ་ཐོན་ལས་དར་རྒྱས་གཏོང་དགོས། གྲོང་གསེབ་ཀྱི་ཁྱད་ལྡན་ཐོན་ལས་འཕེལ་རྒྱས་གཏོང་བར་དོན་སྙིང་གལ་ཆེན་ལྡན་ལ། མདུན་ལམ་ཡངས་ཤིང་རྒྱ་ཆེ་བ་དང་བྱས་ན་བྱེད་གཞི་ཡོད་པ་ཞིག་རེད། རང་ལྗོངས་ཀྱི་ས་གནས་ཁག་གིས་ཁྱད་ཆོས་ལ་གཞི་ཚུགས་ནས་མུ་མཐུད་ཤུགས་རྒྱག་པ་དང་། བཟང་སྤེལ་ཞན་གསབ་བྱེད་པ། སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་བ་བཅས་བྱས་ཏེ་མི་སེར་གྱི་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་ཕྱིན་ནས་གྲོང་གསེབ་དར་རྒྱས་ཀྱི་མཛེས་སྡུག་ལྡན་པའི་རི་མོ་ཐུན་མོང་ཐོག་འབྲི་དགོས།

བོད་ལྗོངས་ཉིན་རེའི་ཚགས་པར་གྱི་ལྷོ་ཁའི་བཅར་འདྲི་ཚོགས་ཆུང་གིས་གསར་འགྱུར་འགོད་སྤེལ་བྱས།